شنو إحنا إنفشل بالبولنغ

اليوم أنا و أختي و بنات خالتي رحنه معهد Champions Boys (الجابريه ) ، بس حق اليهال و يه أمهاتهم ، ما يدخلون صبيان اكبر من 13 سنه ، و كله في ألعاب ، مثل merry go round و الألعاب بالفيش و skating و bowling إلي إحنا ياينه مخصوص ، قبل أسبوع كنا في نفس المكان لعيد ميلاد ولد خالي ، و عجبنه ، ما تخيلناه جذي كلش ، أحلى شي إنه ماكو ريايل ، يعني الوحده تقدر تلبس إلي تبي و تيي . الدخله للشخص الواحد 1 دينار ، و كل لعبه بمبلغ مختلف ، مثلا إحنا البولنغ بـ 2 للشخص ، فكنا 4 أشخاص يعني 8 دنانير ، أدري ما يسوه ، بس يله مره وحد بالعمر . يوم دخلنه وله أكو بعد عيد ميلاد و عفسه ويهال ، بس أشوه الصوب إلي نبي ما في زحمه . عطونه الجواتي الخاصه للعبه ، و دخلت المره أسامينا بالكمبيوتر و بدينه اللعب ، واااااااي يا إحنا فاشلين .... كسرنه الخشب و إحنا نقط الكره ، ولاه أختي و بنات خالتي حاطين حواجز بعد، يعني إذا الكره راحت يمين و له يسار يردها الحاجز و يفوزون ، أنا يعني بسوي روحي بطله ، ولعبت بدون حواجز ، بنهاية اللعبه طلعت المركز الأخير ... حدي أفشل .

يالله مو مهم أنا أصلا يايه مو عشان اللعبه انا يايه عشان الأكل ، يوم العيد ميلاد كليت عندهم همبورغر عجيبه ، حدها لذيذه إلي أذكر طلبت مرتين من كثر ما إهيه حلوه، فهذي المره طلبت نفس الهمبورغر العجيبه ، بس كلش مو حلوه ؟؟؟ ليش جذي ؟؟؟!!! ضاق خلقي ، جان أبلش بالبنات و اطر منهم ، بس أبي أذوق ، واااااوو صمونتهم وايد احلى مني ، الخبز وايد ترف ، و الدياي حار و علي صوص جنه صيني ، كانت لذيذه. تحسفت ليش ما طلبت مثلهم (بالصوره) . المهم صمونتي انا المليقه كليتها غصب ، و بعدين عقب ما شبعت جان تتفضل بنت خالتي و تعطيني نص صمونتها ، كليتها و انا طافحه ، بس كانت ما تتطوف . بس بعدها طلعنا و ردينه البيت . انا ألحين بنفجر ،أكيد باجر ما راح اتريق بعد هذا الأكل إلي كليته .

عجبني الممر المؤدي للحمام صابغينه كله برتقالي يصرع

و هذي مغسله الحمام إعجبتني بعد شلون نازله (أدري بتقولون ما عندج سالفه مصوره المغسله ) بس كيفكم أنا عجبتني