الثلاثاء، 30 يونيو، 2009

مطعم إصفهان بسوق واقف


اكيد الكل واصله هذا الايميل عن مطعم اصفهان و بنقل لكم تجربتي مع هذا المطعم:)
بمناسبة انتهاء العام الدراسي قررنا نطلع طلعة عائلية مع الوالد و الوالده و الاشقاء الاعزاء و بعد المشاورات اقترحت عليهم انجرب مطعم اصفهان و ما اطول عليكم و صلنا سوق الديرة و سالنا رواعي المحلات عن المطعم و مشينا بهل السكيك و الغبره و اخر واحد سالناه قال اقبال فندق البحرين ...... مشينا لمن و صلنا الفندق البحرين و لا قبالنا مطعم شعبي و ابوي سالني هذا المطعم قلته لا لالالا فراح سال راعي المطعم و تتوقعون شنو قال:
.
.
.
.
.
.


انتوا العايله رقم 101 تسال عن المطعم
.
.
.
المطعم موجود في سوق واقف
.
,
,


في قطر !!!!


وووا فشلتاه..... فلا تصدقون الايميلات و المنتديات لازم اتشوفون او تسمعون قبل لا تعزمون او تقترحون خصوصا بعد اذا كان احد معاك ميت من اليوع ....و قمت ارقع حق روحي و قولهم انتوا شفتوا شي ما شفتوه من اول :)

الاثنين، 29 يونيو، 2009

شكر و اعتذار


مساء الخير جميعا :) الصراحه وااايد ولهانه عليكم يلبلوقرز .. ومشكورين على كل من سأل عني وقت غيبتي .. بس لاتحاتون انا مافيني شي الحمدالله .. بس تقدرون اتقولون ماخذه ( اجازه من التدوين ) .

اشكر fisha على سؤالها عني.. الصراحه ولهت على بوستاتج وسوالفج انتي ومديرج لوول .. واشكر (صبا) ..وقولها ولهت على رومانسيتج الحلوه .. واشكر ( كظماوي ) وقوله ولهت على تصيدك لبدلياتي :) واشكر ( غير معرف ) على سؤاله\سؤالها فيني :) .. وولهت على باجي المدونين .

واعتذر لأني راح اكمل انقطاعي لفتره انشاءالله ماتكون طويله :)



c . u

السبت، 27 يونيو، 2009

أخي العزيز ..مبروك التخرج

منتجع النخيل كانت عزيمتنا -مطعم الارجنتيني جاوش
حبيت آخذه حق مطعم شبابي وراقي ..ففكرت في هذا المطعم ..لانه يحب الستيكات ..كنت سامعه عنه من زمان ولا رحتله ..بس الحين يت حزته ..عزمته على الغداء مع ماما وزوجي ..صح المطعم حلو وراقي ..بس الاكل بارد ..إدويفي ...طبعا حبيت حركه تقديم الاستيكات حجمها تتبيلتها ..حلو ...شوفو معاي الصور

شوربه اليوم مع السلطه ..




طبق الدجاج الوحيد الموجود بالمنيو (أشوه )



الفطر طبق جانبي (شكله اخرع )


يعني نحتفل فيه حطيتله شمعه=)
الهديه كانت مبلغ من المال (من كل افراد العيله ) حصله مبلغ حلو والله ..وحطيتها في بوكس حسافه ماصورتها ..بس استانس وايد وحنا بعد ........ عقبال الوظيفه =) السنعه






الجمعة، 26 يونيو، 2009

Diet Care


صار لي ألحين أسبوع من بديت مع دايت كير..وعندهم أنواع حق الاشتراكات أنا عن نفسي اخترت إشتراك الأكشن و هو عبارة عن توصيل لحد البيت كل الوجبات ريوق وغدا وعشا بس بدون حليب وفواكه..بقولكم مشواري لهم أول يوم أول شي دقيت وخذيت موعد وماشاء الله زحمة مو على كيفي أنا دقيت اليوم وقلت لهم أبي باجر ما عطوني موعد إلا تقريبا عقب 10 ايام ..المهم عاد قبل الموعد بيوم دقوا عليّ وقالولي إحنا محتاجين تحليل دم ..ناخذ لج موعد ولا شلون ؟؟؟ قلت لها بصراحة أنا مسوية تحليل قبل فترة والحمد الله كل شي عندي أوكي ...قالت على راحتج ...

وماكو رحت لهم وعطوني أوراق عبيتهم بمعلومات تخصني من إسم وعنوان وغيره ...وتوقيع على تعهد إنه ما لهم شغل إذا ما نزل وزني ..؟؟؟؟؟وقعت شسوي بعد ..

دخلت على الاخصائية وايد حليوة ..خذت وزني و طولي و عمري وقررت جم سعره حرارية أحتاج باليوم ...ووقفت على جهاز يقيس نسبة الدهون بالجسم ويحدد جم الوزن المثالي لي بصراحة نسيت شنو اسم الجهاز ..

اخترت معاها تقريبا حق يومين شنو الوجبات اللي أبيها وعقب قالت لي كملي عند الاستقبال وعطيهم الأوراق وحطت لي موعد عقب أسبوع تقريبا ..وحرصتني على الرياضة على أساس أبدي بـ 30 دقيقة وأزيد عقب ..

وماكو كملت أوراقي وبديت المشوار ..

عقب اقل من اسبوع راجعت ولا نازله كيلو ونص ...وااااااااااااو وناسة بس ما سويت رياضة إلا 3 ايام بالاسبوع ماكو وقت حق الرياضة شسوي بعمري ..

تجربتي معاهم :

1- الأكل وايد حلو ..

2- الحلو ولا أروع :)

3- مواعيدهم مضبوطة..

4- شكل العلبة وايد مرتب وحلو ومنظم..
5- السلطات لذيذة ..


هذا كله كلفني 225 د.ك ..الاشتراك قيمته بس 199 د.ك هذا غير فتح الملف والفحص على الجهاز ...ومدة الاشتراك شهر ..

الحين عندهم عرض قيمة الاشتراك بس 189 د.ك وتدشون مسابقة واللي يخسر وزن أكثر يربح 3 تذاكر سفر حق جزيرة بالي مع إقامة 5 أيام ..ناويه أشارك ادعوا لي أفوز :) بس قالولي على الشهر الياي عقب ما أجدد اشتراكي ..

أرقامهم : 1806050

الثلاثاء، 23 يونيو، 2009

لدراريع رمضان




يتشرف محمد على البغلي بدعوتكم لحضور معرضه في بيت ديفا

من يوم السبت (27-06-2009 ) و حتى يوم الاثنين (29-06-2009)

هلا أسامه

اسامه موظف معانا بس من إداره ثانية ، صارلي فتره أدق عليه عشان إنسق معاه يوم إيينا لأن مديرنا بكرمه و بنصوره . المهم أسامه يه ، جان يدقلي محمد من السكرتاريه و يبلغني بوصوله ، و يقولي تعالي جان تبين تشوفينه تره المدير عنده إجتماع ألحين.

قمت و طلعت رحتله بقاعة الإنتظار، و أشوفه قاعد على القنفه يقره مجله من هل المجلات إلي حاطينهم حق الناس يتسلون فيهم وقت الإنتظار ... و بإبتسامه عريضه ...

أنا : هلا أسامه ، معاك ماستر إلي كلمتك بالتلفون ، شلونك ؟ شخبارك ؟ عساك بخير...
بطرف عيني أقدر أشوف محمد واقف على يميني و يبي يكلمني ، بقلبي ( هذا وقته !!!! خل أخلص من الريال بعدين كلمني)
و اكمل مع اسامه : انا اعتذر منك ، المدير ألحين بإجتماع و يمكن يتأخر شوي ، إنشاء الله بس يخلص بشوفك

جان يقوم من القنفه نص قومه و يمسك شي بيده اليسار كان حاطه يمه و يقول : يعني أأوم أصور دلوأتي و له ....

انا هني عيني قامت إتلاقط ، أطالع الريال و اطالع إيده ، ارد اطالعه و احاول أستوعب شنو قاعد يقول ، وااااي لالالالالالا
طلع هذا المصور ، وااااااااه فشلتاااااااااه ، إلي بيده كانت جنطة الكاميرا ،تره على فكره أنا شايفه المصور من قبل بس ناسيه شكله ، جان ألتفت على يساري و أقول حق محمد ، وين اسامه عيل؟

محمد : و انا صارلي ساعه بقولج هذا مو أسامه و إنتي حاقرتني ، أسامه بمكتب خالد

أنا : يااااااااي و أعدل نفسي و إبتسامتي مره ثانيه و أدخل مكتب خالد و أقول: هلا أسامه ، معاك ماستر ...
و أرد اعيد كل إلي قلته للمصور

الاثنين، 22 يونيو، 2009

وينك يانحن والاطفال

تذكرتوه ..مركز نحن والاطفال ويه شعاره البانده الاصفر ..وييييه كان شي على أيامنا ..ماأروحله الا في فتره الاعياد والما انخلص من المدرسه وناجحيين =)
اليوم استلمنا الشهايد وفرحه الامهات قبل اطفالهم في النتايج ..والشوارع زحمه ..واليهال انطلاق وافراج من بعد الامتحانات ..يله انعشيهم ونونسهم من بعد الحكره ...ها ماذكرتو ايام زمان مع نفس الشعور ...وناسه وخصوصا لما نشتري من نحن الاطفال ..وباربي لازم باربي نازله يديده في زي جديد ...
الحين بنتي ذكرتني لما استلمت الشهاده وقالت يله يا يمه وديني قلعه الالعاب "فانتزي وورد " الي في شويخ ماتحب تشتري العابها الا من هناك مع ان في له افرع في اماكن ثانيه وداخل المجمعات ...لا ما تبي الا اهوى (اذكرت لما ابوي اقولنا خلنا اروح محلات الوليد اقرب ..إحنا لا مانبي الا نحن والاطفال ...حسافحه عليك يانحن والاطفال رحت مع الايام الحلوه . المدخل
كان في تنزيلات بس مو على كل الالعاب عالعاده على ربع الالعاب

ديكور عجبني داخل المحل



الأحد، 21 يونيو، 2009

حدتني الظروف

أدري مصخت سالفتي وصارت قديمة بس أنا مواعدتكم ولازم أوفي بوعدي :)

ما كنت ناوية ولا مخططة كلش إني أروح ماليزيا وكل ما زوجي ياب سيرتها قلت له ما أبي ..ما أبي اروح حر وخيسة شويدينا ابي أروح مكان بارد وفيه ثلج ..بس صج بني آدم يخطط ويرسم واللي مكتوب له يصير ..كان ودي أروح أول شي جنوب أفريقيا وحست ودورت وبحثت عنها وايد وحسب اللي قريته جوها بارد وحلو والشعب ودود بس ما أدري جنه الرحلات ماكانت على مزاجي حسيت اغلب الرحلات اللي فيها من طقت سفاري فهونت عنها وحولت على أستراليا ولو تشوفون الـ favorites عندي تلقون ملفات وايد عن استراليا وجنوب أفريقيا ...وبيوم من الأيام دش علي زوجي وقالي خلاص ما لنا إلا شرق آسيا ..طبعا عقب إنفلونزا الخنازير قالي ما نبي نروح ونجازف بحايتنا ...تعوذت من إبليس وقلت له أوكي ..والحمد الله رحنا السفريات وحصلنا حجز يتوافق مع إجازة زوجي العزيز ورحلتنا كنت مدتها 10 أيام ما تنقلنا وايد أنا ما أحب التنقل وايد بالسفر بس رحنا كوالالمبور قعدنا فيها 5 أيام وعقبها رحنا سلانغور قعدنا فيها 3 أيام ومنها لما دبي قعدنا يومين.. ..وانا عجبتني وايد سلانغور حلوة حق اللي ياخذ عياله معاه إحنا قعدنا بفندق سن واي لاجون سيتي ..الفندق عجيب والمدينة المائية أعجب ..مكان روعة :)

بحط لكم بعض الصور مع تعليقاتي الخاصة :)

وصلنا ماليزيا صورة بالمطار عجبتني وصورتها ..




لازم نروح السوق الصيني ونحوس فيه ...
طرارة من نوع ثاني ...و في نفسه ذهبي بس ما شفته ..

ما شاء الله اللون الأخضر مغطى كل مكان ووايد مريح للعين ..




مدينة الملاهي في جينتك ...وايد زحمة مع انه ما كان يوم إجازتهم ..بس الجو هناك عجيب ...






طاووس شايف نفسه بحديقة البغبغاوات بكوالالمبور ...وايد حلوه الحديقة..

شفت هالإعلان بالسوق ( تايمز سكوير )..وهو نفسه الفندق اللي قاعدين فيه ...عجبوني المعاريس اللي من تفافيخ فصورتهم لكم :)

لازم نمر عليها قبل لا نروح الفندق ...بقاله مشهورة عندهم ومرتبة وكل شي فيها :)


مدينة الثلج بجينتك ...درجة الحرارة -5 تحت الصفر...موت برد ..بس صغيرة ..حذفنا على بعض ثلج وطلعنا :)


الله يعزكم ...ما أدي شقصتها ...رحت أصلي ما اشوف إلا نعال مقصوصه قمت طلعت كاميرتي وصورتها ..ليش يعني ريولهم صغيرة ؟؟؟؟؟؟


بريد كتكات ...عشان نطفي فيه حرارة الجو...كليناه بالمدينة المائية في سن واي لاجون :)


عجبتني طريقة زقايرهم ..عشان الواحد كل ما يفكر يدخن له زقاه يشوف هاللوعة الجبد عليها ...وفي صور ثانية تعيسة بعد ..


هذي صورة ثانية في مدينة جينتك ..



مطعم الطربوش مطعم لبناني موجود في المجمع اللي متصل بفندق سن واي لاجون ...وايد الأكل حده حلو..


في عندي صور وايد بس اكتفي بعرض هذيه لكم ..ليش إنه أغلب الصور إحنا فيها :)

وبصراحة عقب التعب ما صورت وايد بدبي ...جم صورة بس بمدينة الثلج وكله إحنا مرتزين بالصور ..بعد مو عدلة أحط لكم صوريّ :)
om moD

الجمعة، 19 يونيو، 2009

مطراش


توا واصلني بالـ BBM هذا المسج حبيت أشاركم إياه ...
( عندك أغراض بتوصلها و محتاج مطراش ؟ شركة Mr. Delivery تقوم بذلك 22494944 )
أول شي شكيت ، قلت يمكن مو صج ، جان أدخل قوقل و أدور ... جان ألقه وحده إسمها عاصمة الموضه في منتديات كويتيات ترد على بنيه إدورعلى أحد يوزع لها بطايق عرس ، ردت عليها و كتبت هذا...
(هلا حبيبتي صح كلامج الشركة هذي اسمها Mr Delivery اصحابها شباب كويتيين يوصلولج اي شي داخل الكويت اب اي منطقة كانت ووايد بنات بالمنتدى يتعاملون معاهم وخصوصا التاجرات وعندهم هالخدمة انهم يوصلولج بطايق العروس دقي ليهم هذا رقمهم 22494944 صراحة شغلهم عدل وامرتب وسواقهم شاطرين وعارفين )

الأربعاء، 17 يونيو، 2009

يا صباح الإسترخاء


صورة من موقعهم
في صباح فات رحنا أنا و pearl و stella لتجربة Aquatonic Spa يم فندق كراون بلازا بمنطقة الفروانية ...البنات مرة كانوا يتسوقون بالصالحية ومن هناك حصلوا على دعوة مجانية حقنا وكان المفروض يكون معانا snow white و fatto بس لظروف خاصة بكل وحدة فيهم ما قدروا يكونون معانا ..

المهم أول ما دشينا يعني من المدخل مبين المكان وايد حلو وكل وحده فينا تقول حق الثانية واي شحلات المكان ...عاد ما قلت لكم الدعوة المجانية كانت عبارة عن استخدام المسبح والسونا والبخار بالإضافة حق الصالون قص واستشوار ..واحنا حجزنا زيادة على الدعوة جلسة مساج استرخاءلمدة ساعة ..


عند الاستقبال عطيناها الدعوة وقلنا لها إحنا حاجزين هالوقت قالت لنا أوكي ودشينا ..ورحنا داخل مع وحدة منهم قالت أختاروا لكم لوكر وحطوا اغراضكم فيه وممنوع التصوير ..عطتنا الروب واحنا نتلوفت ونشوف المكان وجماله جان تقول لنا عندكم hair cup احنا شنو محد قال لنا جان تقول مو مشكلة تقدرون تشترون بـ 15 د.ك ...شنو 15 أي شي أنا سألتها شنو الواحد بـ 15 ولا ثلاثتهم ترد وتقول لا الواحد ...ماكو شغل نشتري قبعة عشان نغطي فيها شعرنا واحنا نسبح بـ 15 د.ك ..


ويا فرحة ما تمت طلعنا نكلم اللي بالاستقبال ...قلنا لها شلون يعني احنا من متى داقين وحاجزين ما أكدتوا علينا على القبعة وبعدين احنا عندنا وشنو نشتري القبعة بـ 15 بصراحة ما نبي نشتري ..وتخيلوا الوقت يمشي ويمشي ...طبعا ردت وقالت واهي حتى ما تطالعنا القبعة مو بـ15 ..بـ 16 د.ك ..بعد طلعت بـ 16 د.ك لا حول ولا قوة إلا بالله...المهم جان تقول لنا انزين منو معطيكم الدعوة قلنا لها اسمها جان تقول ما قالت لكم المفروض كانت تقول ...قلنا لها ما قالت شنسوي الحين ..ترد وتقول سوري ما نقدر لازم hair cup ..قلنا لها دقي عليها وشوفي دقت عليها وما ردت ...شنو تتوقعون سوت ...عطتنا الرقم وقالت لنا دقوا عليها وين قاعدين شكو احنا ندق ..هذا شغلج ..عاد stella ما تقدر خذت منها الرقم ودقت عليها وردت علينا وقلنا لها جذي وجذي السالفة ...يعني إحنا بروحنا يا قدرنا نتيمع ونضبط أمورنا عشان نجتنع ونيي ..تقول هذي قوانين عالمية ....ويع ...منو مصبحين بويهه اليوم ..احنا يايين نسترخي ولا نعكر مزاجنا .....


عقب عطينا موظفة الاستقبال تكلمها وتخيلوا تقولها كلميهم بالعربي وفهميهم ...بطت جبدنا وقلنا لها ترى احنا عارفين شنو تقولين ...؟؟؟شكو تقولين لها تكلمي عربي .........!!!!!!


ماكو قالت لنا قولوا لها في عندنا قبعات free خلوها تعطيكم ...يوم نقولها تقول أوكي أنا أقدر أعطيكم بس إحنا ما عندنا إلا 5 وحاليا بس في 2 مو مستخدمين يعني وحده منكم لازم تشتري ...stella عصبت من استقبالهم الأي شي واللي يبط الجبد وقالت أنا بشتري بس بشوف قبعتكم اللي بـ 16 د.ك شنو صابغينها بذهب وصج ...دشينا وقلنا يالله إنشاء الله تتيسر أمورنا وما كو سوالف ماصخة ..


دشينا وبدلنا وعالمسبح يلا ...وليه شنو بعد ...يقولون لازم مايوه وما يصير غيره..و pearl ما كانت لابسه مايوه بس لبسها كان نايلون ويصلح حق السباحة يعني بس مو مايوه ..راحوا نادوا لنا وحده مسئولة وعاد pearl ما قصرت فيها عطتها بالانجليزي تقولها شنو تقصدين من كلامج إني أطلع انا الحين ما عندي إلا هاللبس ..تقول لها ليش مو لابسة نفس رفيجاتج ...شكو ..قالت لها أنا هذا لبسي مال السباحة شسوي ...ترد وتقولها لا ما يصير يعني كل واحد يقول هذا لبسي مال السباحة وأخليه وتأشر على لبسها وتقول عيل انا أقولج هذا لبسي مال السباحة ..

قلت لها أنتوا كاتبين القطن ممنوع وهذا مو قطن ...لا مو راضية ما تعرف إلا تقول I`m sorry...وليه شنسوي شكله هاليوم ما راح يعدي على خير ..

قلنا لها ترى هذي تجربتنا الأولى وكلش اسلوبكم بالتعامل مو حلو ...عطيتونا فكرة كلش سيئة عنكم ...ويوم قالت لها إنه أنا حاجزة مساج عقب المسبح ...جان تقول آآآآآآآآآآآآآآآآآه ...أوكي بس هذي آخر مرة مرة ثانية لازم مايوه ...



قمنا نطالع بعض شنو يعني ليش إنه بلاش يعاملونا جذيه ويوم دروا بندفع فلوس تغير الحجي ...ما يندرى ...؟؟؟؟؟؟؟؟؟؟؟؟!!!!!!!

طبعا ما بقولكم شكثر المكان حلو ويقولون إنه الواحد يحرق فيه تقريبا 500 سعره حرارية ...في معانا مدربة بالحوض وتعطينا توجيهات.. إحنا دشينا تقريبا الساعة 10:30 الصبح ..فيه مكان تمشون فيه الماي يكون عكس التيار يوّنس ...في قواري بالماي ...فيه دشات ترش على الجسم من صوب الظهر ..وفي كراسي تتسدحون عليها وتمسج كل مكان بالجسم ..وشي حق الريل وشي حق الراس ..المكان وايد كبير ..و في اشياء ما ذكرتها ..


طلعنا يمكن 11:45 ..رحنا السونا والبخار ..البنات حبوا البخار أكثر ..أنا عادي المكانين عجبوني :)

عقب خذينا دش وتوضينا وصلينا ..لأنه موعدنا حق المساج كان الساعة 1 الظهر ..



واي طبعا متنا من اليوع قلنا لهم ماكو شي ناكله نشربه على ما ايي مو عدنا عطونا شاي أخضر وايد مر ما قدرنا نشربه...وتفاح أخضر :) ..طبعا المكان اللي قعدونا فيه ..واو واو واو ...وايد حلو ..

عقب كل وحده يات لها اللي بتمسجها وتناديها باسمها وناسه ..الممر اللي مشينا فيه حلو وايد ...واستانست pearl لأنه الغرفة على إسمها ...


طبعا المساج روعة ويسوى قيمته ( 26 د.ك ) ومدته ساعة ..طلعنا عقب وحده تسأل الثانية عن شعورها ..الغرفة روعة وهدوء وموسيقى هادية ...شقول شخلّي :)


طلعنا لبسنا ورحنا على أساس نسوي شعورنا ...ما تصدقون اللي صار الموظفة نفسها اللي الصبح ما أدري شفيها علينا تقول لنا متى تبون أحط لكم موعد ..امبيه هذي شفيها احنا من الصبح قلنا لها ترى دعوتنا معاها صالون ...تقول لنا إي بس ما خذيتوا موعد ...شنو هذي تستعبط ....قلت لهم بلا عوار راس خلوها تنادي لنا المدير ...وتخلصنا ..ويوم قلنا لها وين المدير أشرت على واحد يمها ..كان فيه واحد لبناني ما ادري اثنين ..المهم كلمناه وقلنا له كل اللي صار من طأطأ لما سلامو عليكم ...المهم قال قعدوا وما يصير خاطركم إلا طيب ..

وتخيلوا دخلنا الصالون ولا البنات قاعدين ما عندهم أحد ..ليش تسوي جذيه..؟؟ ليش تبينا نروح ونرد ؟؟؟


عطونا ورقة عشان نقدم شكوتنا وصج كتبتها stella وحطت أسمائنا وأرقامنا ..وحمد الله انتهى اليوم على خير ..تدرون متى خلصنا يمكن الساعة 3 العصر ..يعني يوم حافل ما بين الاسترخاء وتعكير المزاج ما أدري شنو كنا المفروض نسمي هاليوم :)


وعقب ساعة تقريبا من ردتنا دقت وحده من العلاقات العامة وتكلمت مع stella وقالت لها كل اللي صار ..و ما قصرت عطت stella رقمها وقالت لها لكم منا زيارة مجانية ثانية :)

يعني بطيبون خاطرنا :)

وبس على كل اللي صار انصحكم تروحون مكان يستحق الزيارة وايد وايد حلو ...

بس لا تنسون المايوه والقبعة :)


وفيه أوقات حق الرياييل وأوقات حق الحريم ..فتأكدوا قبل ما تروحون :) وبس
Om MoD

الاثنين، 15 يونيو، 2009

"KAHIN NA KAHIN MILENGE"

هذا فلم هندي مسوينه في الكويت عن عايلة هندية مقيمة بالكويت و اهو اول فلم من انتاج كويتي هندي

الأحد، 14 يونيو، 2009

حليمه غيييييييييير



أنا متأكده ألف بالمية إن الكويت كلها واصها هل الإيميل ، وانا أصلا ما احب اكتب عن إيميل واصلني ، لان ما في شي يديد. بسهل المره لأ .... ماني قادره ،لازم أعبر عن إلي في داخلي أبي اتكلم ، أبي أعلق....
حليمه صارت إنسانه ثاااااااااااااانيه ، وااااااااايد احلى من اول ، مو إن اول مو حلوه ، بس كلش مو ستايلي ،إهي إنسانه لها ذوقها الخاص و لها مطلق الحريه إنها تلبس و تسوي إلي تبي .
بس بهل اللوك اليديد ، الصراحه عجبتني

السبت، 13 يونيو، 2009

نسخه من prada

نسخه من prada
By Ben Amun
price: 298$
و لا بعد مو رخيص
المهم هذا السايت click here



الخميس، 11 يونيو، 2009

Goji Boutique مسوين خصم


بدوا الخصم اليوم ، يوصل لين 50% ... نفنوف بــ 334 كان سعره 668 دينار كويتي ، إضغط هنا للدخول لسايت المحل

الأربعاء، 10 يونيو، 2009

فسفوري بفسفوري

وحده من القراء سألت عني و عن فاتو ، صج صارلي فتره مو كاتبه ، و هذا البوست لها ، هاااااااااااي
أنا لوعت جبد القراء في بلوقي الثاني me blogging بالفسفوري ، أي شي لونه فسفوري صورته و حطيته لهم ، يا دوركم ألوع جبدكم :)


محل N ew Look بالأفنيوز
السعر : 21 دينار كويتي




جناط و حزم
لا تسإلوني جم أسعارهم
إللي يبي يروح و يشوف ، أنا بس دليتكم
و شكرا

السبت، 6 يونيو، 2009

حفله البنات

كانت حفله ممتعه للكبير والصغير .. بس لازم اولا قبل ما اتكلم عن الحفله لازم اشكر المجموعه التي اعانتني على تنظيم الحفله
اولا زوجي العزيز..
ثانيا افيونكات ..أحبكم
ثالثا منتدى كويتيات ..ما أستغنى عنه =)
كلهم ساعدوني بأفكارهم ..وخدماتهم ..ومنهم من زيين لي الحفله
شكرا ..شكرا ..=)
الحين الحفله كانت عن الفراوله ..وسوينه مشهد عن فايدة الفراوله ووزعنه ورقات عن فايده الفراوله ..وعلشان يحبونها أكثر خليت شخصيه الحفله ستوبري جيس كيك بنت يحبونها الاطفال ..
الزينه كانت بلونات ..وكانت ناعمه علشان السرداب صغير ..بس كانت حلوه وايد خذيتها من عضوه في منتدى كويتيات (معشوقه السفر-ام بدر)
وكانت هناك تنظيم للحفلات لولو كتي خذيت منهم رسم الوجوه

أما العشاء ....كانت السانويشه العملاقه اتكفي فريج ...امقسمه من داخل 4 اقسام كل قسم نوع ...حلوه وايد من هلثي آند تاستي =)

الكيكه كانت من سابليه ..ابصراحه ادور وادور ماردي ارجعله صج اشكال كيكه مو زاك الزود بس الكيك مالته ترفه واحنا انحبه فخذيتها على شخصيه الحفله


الطاوله زيتها وطلعت عجيبه


وجبات الاطفال حطيتها في علب ولصق عليها استيكر المحبوب



هدايا الامهات ..كانت اسكارف+كريم على الفراوله +شمعه+قناع



طاوله الحلو .....فراوله مغموس بالشكلاته =)



كب الكيك المشهوره فيه +كوكيز لذيذ

بفيه للاطفال الي جابلوه اتربعو عنده ماقامو منه ...خليته على طاوله نازله وحطيت فيه علوج وككاو وححلاو +مكينه العلج يمها الخرده علشان اهيا ماتشتغل الا في 50فلس+علب صغيره داخلها فراوله




كراسي الاطفال سويت لكل بنت كرسيها الخاص وعليه اسمها والهدايه +بلونه قصدير على صوره البنت ستوبيري




لعبناهم ونقزناهم ونسناهم ..اكبار وصغار ..ونسيت اقولكم اتعاملت مع مصوره تاخذ لكل ام مع اطفالها لقطه تذكاريه+صوره جماعيه من poto me studia
ها شرايكوم =)