الأحد، 28 فبراير، 2010

اليوم الوطني

كلنا كنا منشغلين بالاحتفال باليوم الاستقلال ويوم التحرير ..وكل واحد فينا عبر عن فرحته بهذا اليوم بطريقته الخاصه

الي سافر والي راحلو البر والشاليهات والي قضاها نوم ونت ومسلسلات ..والي بدعوا بالمسيرات والفومات وازعاج وتعطيل سير وزحمه مغاسل السيارات الي اربحوا محطات بانزين.

بس حبيت اليوم اتكلم عن الفومات ..مو عن اخطارها ولا اضرارها ولا عن مخاسيرها ..بس حبيت أتكلم عنها كـ(لعبه جماعيه)

اتخيلو هذي اللعبه الي يلعبها الكبير قبل الصغير ..وما تحتاج الا مشاركه وسلاح وفن للمراوغه وفن التسليح

الي مايعرف اللعبه اذا كنتوا ما لعبتوها او كنت من اشقائنا العرب أنا اقولكوم شنو لعبه الفوم

لازم اتكون مستعد بعده السلاح:

أولا سلاح ولازم يكون آمن غير مضر للشخص الآخر وله راح تتعرض للشرطه وهي حكم اللعبه يا تلحقك او تعتقلك او تسلبك سلاحك

السلاح الآمن رغوه فوم او خيوط ملونه(سلاح الفشله) او رشاشات ماي بأنواعها

ثانيا لبس الحمايه أما الاسكارفات والباروكات والكبابيس اقنعه والنظارات احسنها نظارات بحر =) واحسن شي اتكون داخل السياره للحفاظ على سلامتك وملابسك

اللعبه هي حرب جماعي المفروض من غير خساير ماديه او ارواح

الفايز (ما أعتقد في أحد فايز) الي يرد البيت من غير ما يتبلل او يتبهدل او يطلتخ بالفوم ورد سالم مع جميع اعضائه (عينه وله ريوله صاحين) سليم ميه ميه . وطبعا حتى لو ماشاركت بس اطمشت او دخلت بالغلط بمسيره لعبه الفوم لازم ثم لازم يوقعون لك بالفوم وكل راح يدري انك شاركت بالمسيره صراع او حرب الفومات .

هذي اللعبه في ناس تحرص عليها وفي ناس تذمها وترفضها ...بس في النهايه هذي عاده (محموده او مذمومه )بس هذي عاده تعودنا انشوفها في كل عيد وطني ... وفي ناس اربطوها بالعيد ...عيد وطني ..يعني صراع الفومات

عليكم بالعافيه على كل من شارك في هذي اللعبه ...وتمنى لكم السلامه .
عطله سعيده من غير خساير
ويله استعدوا للكورس الدراسي من غير عطل خلاص جابلو عدل.

الأربعاء، 24 فبراير، 2010

photo funia

مساء الخير :) .. هالموقع يقولون قديم بس انا توني اكتشفه .. حده حلو وونس .. الي يحب يفنتق بالصورنفسي يدش هالموقع حده سهل ماعليكم الا انكم تختارون الصوره الي تبونها وعلى طول تنحطلكم بلي اخترتوه بدون فوتوشوب والا بوتوشوب p; .. وطبعا مسموح لي بس اني احط صوره اخوي والباجي يستحون عشتو :) وطبعا في اشياء وايد احلى من جذي .. دشو وشوفو .. وعلى فكره ترى الصوره مالت اخوي مو واضحه اساسا ويلا لو واضحه جان الصور اطلعو احلا من جذي .. ولدخول الموقع الرجاء الضغط عليه photo funia

تحديث 4\6\2010 :
ترى هالبرنامج one line فيابنات ما انصحكم اتحطون صوركم .. لأن كذا وحده قاعده اتسولف معاي عنه على اساس ان بتحط صورها بس تلاحقت عليها قبل لاتحط .








وعيد وطني وتحرير سعيد انشاءالله :)

الجمعة، 19 فبراير، 2010

موقع كويتي شامل 8UPDATE

وانا اتصفح المنتديات وله اطيح على هذا الموقع اونس تقريبا يشمل على كل شي بالكويت من محلات و ومهرجانات وكل شي يديد
يعني كل شي يخص الكويت ... حبيته ....

الرابط

الأربعاء، 17 فبراير، 2010

الككاو لاحقني وين ماروح

أمس وأنا كنت ماره مارينا لأمشي هناك وله أكتشف أن امسوين شبه معرض للككاو ..ولييييهه عاد أنا إدمان ..ما أقاوم ..رحت يعني أمشي وأخفف رديت وأنا ذقت الي لحقت عليه =) كنت رايحه على العشر بلليل ..مالحقت على الباجي كانو امسكرين =) هذولي بعض ابروشورات المشاركين ..أغلبهم أعرفهم بس هم ذقت =) هذا بسواق القرين

وهذا بالسالميه عند نادي السالميه




أنا هذا داخلته في جمعيه مشرف








وهذا ماسألناه وين محله بس هذا الموقع
www.lesgaufresdaugustin.be

علشان أنا كنت مشغوله بالطلب وهي اتسويه اشوف ككاو وفراوله تبوني افكر ابشي ثاني



أدري الصوره ماتشوق وعفسه بس تراها حلوه وثقيله هذا كان عشاي =)






مكانه بالمهلب لذيذ ككاوه وعنده بعد هوت جكلت ناويه أجربه =)تراه للرجيم

هذا الي لحقت عليه =)

الاثنين، 15 فبراير، 2010

Nonita collection للعيد الوطني


مساء الخير بلوقرز ومعلقين :) والله لكم وحشه وايد .. من زمان مازرت المدونات .. الصراحه ولهانه عليكم وعلى تعليقاتكم وسوالفكم ومواضيعكم .. انشاءالله لي عوده قريبا :)
الي يبي يجهز للعيد الوطني يايبتلكم تشكيله حلوه من ( نونيتا )











الاسكارفات اتيي 3 مقاسات ( s-m-l ) على 5 د.ك
الكبابيس 5 د.ك
البروشات 3 د.ك
التاج 1.5 د.ك
الخواتم + التراجي 1 د.ك
القلوب 2.5 د.ك
للاستفسار والطلب هذا ايميلها وتلفونها :
nonita-q8@live.com - 65888809

الأحد، 14 فبراير، 2010

أول يوم دراسي في يوم الحب


خوش وقت اختاروه لبدايه الكورس الجديد ..أقول للمدرسات خصوصا كل عام وللحب لطابور الصباح وللصراخ وقلم الصبوره وزحمه الصباح =)
بدايه الدراسه بحب

إيشوقوووووون

السبت، 13 فبراير، 2010

كرسبي وتشكيله قلوب الحب

شفت الاعلان وقلت شكلهم يشوق سألت عن النكهات قالت : بالفراوله أو البرتقال أو الدارك ...ياسلام شريت كل الانواع وذقت كل الانواع وحبيتهم طبعا هذي التشكيله حق الي إحب الفراوله بالككاو او البرتقال ...لذيذه =)

الجمعة، 12 فبراير، 2010

chocolat hotel

ككاو لندني تم افتتاحه في البحرين والفرع الثاني راح يفتح في مارس في دبي .
فرعه في ستي سنتر

طبعا ما قدرت أقاوم خذيت كميه لي وأحبابي علشان يشاركوني التذوق


وطبعا وككاو الدارك بالفراوله له نصيب الاكبر من المشتريات ..وطبعا علشان الذوقي المميز محد ياكل مثلي فأخذيت لهم بالبندق وككاو بالحليب وبالجوز وماخليت شي =) ابخاطري .
وطبعا في قوالب كبيره متنوعه
احسن شي شوفو الموقع

الخميس، 11 فبراير، 2010

البطل


الثلاثاء، 9 فبراير، 2010

حين تريد الهرب ..من هموم الدنيا وضغوطها

نعم حين تحس بضغوط ..وألما وحزنا ..حين تريد التفكير بحالك وحال الدنيا ..أين تذهب ..حين يعتصر قلبك ..وتخنقك غصه حزن ..أين تذهب؟؟
أكيد الى الله عزه وجل اول وآخر ودائما
ولكن ..أليس لديك مكان تختبأ فيه ..مكان تكون لوحدك ..لا ترغب بمحادثه أحد ..الا نفسك ..تسألها وتجيب ..يلوم كل منكما الآخر ..وبعدها ترجع الى عالمك وهومك ..ولكن وأنتا مرتاح ..وقد أسترجعت قواك وتركيزك..
نعم لدي هذا المكان أو بالأصح عده أماكن ...يمكن بالنسبه لكم ستضحك حين تعلم أين ولكن فعلا حين أرجع إلى البيت أكون سعيده وقد أرتسمت على وجهي إبتسامه مريحه جدا .
( أماكن بيع الأثاث ) أول اللوحات أو أي شيء جميل ومنظم ووضعه في أماكن وسيعه ويكون هدوء
ميداس صفات الغانم أي تو زيد إيكيا إلخ
تجدني أتجول دون محادثه أحد واتنقل من قسم الى آخر وأتمتع ..بالقطع الثمينه منها وراقيه ..وأتمتع بجمالها وطريقه صنعها ..إلى أن أرتاح وأتمتع بالتبضع بشراء إما لوحه أو فازه أو حتى بكوب راقي ..
لا أعلم لماذا أماكن الأثاث بالذات ..ولكن فعلا فعلا أحب أن أهرب إليها
ها ..أنتم إلى أين الهروب ؟

رحله الى المتعه الى ياهوووه المائيه




وناسه للكبار وصغار



قلنا بما إن وقت عطله الحين والجوى في الكويت متقلب ماندري وين النروح قلنا خنروح ياهووه المدينه المائية في ستي سنتر البحرين
رحنا يومين منها تسوق ومنها وناسه
فعلا كانت المدينه المائيه حلوه ممتعه للكبار وصغار اهم شي انهيا قسمين داخلي وخارجي وانتو عارفين اليومين الي طافو كان الجوى هوى شايل حتى بالبحرين كان جذي.

المدينه المائيه صغيره اصغر من حديقه جنه دلمون المفقوده ..بس وايد اتونس
اهني اتبين مكان مسبح الامواج


وهني فوق مكان الدلو الكبير الي يكون في اعلى القمه ولما ينترس يسكب الماي ابقوه وفيها مسدسات ماي ومدافع وزحلاقيات للكبار ولصغار ومجرى النهر الدائري.



هناك الي على شكل بيت خشبي يكون المطعم والكافي شوب




هناك في شلال صغير ومن خلفه جاكوزي ورا هناك على اليسار لعبه وايد ممتعه يشوتك الموظف من فوق انتا وتيوبك وعاد انتا اطير الى الجهه الثانيه ابقوه ومتعه وعلى اليسار وقلبك البصوب طاير وجسمك ابصوب
هناك بوابه الى الجزء الخارجي في الهواء الطلق ماصورت فيه لانه كان هوى بارد ثلج بس فيه العاب وايد حلوه بعد


شجر ينثر الماي مثل الدوشات وكراسي مادري ليش حاطينهم نتشمس على ضوء المصابيح يمكن =)

وفي النهايه توجد آله لتنشيف تدخلين فيها لتجفيف جسمك بالكامل سعرها 1دينار بحريني اتونس

****************************************************

مقارنه بينها وبين جنه دلمون المفقوده

*************

الديكور : ياهوووو (عادي) دلمون المفقوده (حبيت ديكوراتها تذكرني في صنوي لاجون ماليزيا -مصممها هوه نفسه الى سوى صنويلاقون ففي شبه بينهوم )

لسعر : ياهووووه للكبار 9 دينار بحريني ديمون اعتقد 13 دب نسيت بس اغلى من ياهوووه

لحجم : ياهوووه اصغر من جنه دلمون

لبعد: ياهوووه في ستي سنتر في ضاحيه السيف قريبه من السوق والسكن دلمون : بعيده مع ان البحرين صغيره بس ابعد و قريبه من محميه العرين

المتعه : حبيتهم ..وكل وحده لها طابعها الخاص ...تتميز ياهووو عن دلمون بأنها شغاله على طول السنه بسبب وجود جزء داخلي ومعتدل الجوى قريب من الاستوائي ...أما دلمون بس في الصيف

على العموم لازم اجربون الاثنين

رابط الرحله الى جنه دلمون المفقوده

http://fyonkat.blogspot.com/2008/07/2.html

الأربعاء، 3 فبراير، 2010

دعوه للمرح بعد الامتحانات (افراج)

بعد ماخلصنا الامتحانات وبدأت عطله الربيع ..حبيت أسوي حركه حق بنتي ..طبعا أنا كنت حابستها قبل الامتحانات واثناء الامتحانات ماكو طلعه دراسه بس ..بعد ما خلصت الامتحانات حبيت اطلعها ..فقلت خليني اختار لها طريقه يديده اتونسها لما اقول لها امشي خل نطلع
شريت كارت بناتي ناعم وكتبت فيه " دعوى الى المرح ليوم كامل
أنتي معزومه على الغداء + 10دك كوبون للالعاب الاكترونيه+رفقه محبه لك"
هذا الكارت
شريت لها باندا من إيكيا اهيا اتحب دب الباندا مع ان شكله يخرع بس قلت ماكو الا اهوى يكون مرافق للكارت
المهم استانست وايد كنت حاطته عند راسها ولما قامت من النوم شافته ...طبعا انقزت من الفرحه
طلعت من الدوام وخذيت بنت اخوي (الي اتحب اتكون معاها دايما) ورحنا نتغدى كلنا مع ابوها بعد .
وأخترنا مطعم عائلي إهيا ماراحتله كان يديد بالنسبه لها ..طبعا إهيا مطعمها الي اتحبه ماكدونالز ..بس قلت لها هذي الطلعه كل شي غير ..تقبلت الواقع وقالت مطعم اكبار مو حق يهال !! يعني أنا كبرت =)
حبت بنتي المشاوي وكلنا ناكل الاكل البناني ..بس زوجي قال أبي أجرب شي جديد ما كلاه من قبل ..طلب صحن عصافير وكان قيمته تقريبا 5دك وطبعا ننطر الاكل ووصل أخيرا وتوزعت الاطباق والطلبات بس لما حطو الصحن العصافير أجبال زوجي كلنا طلينا بالصحن شنو هذا؟؟؟؟؟؟؟؟؟ بس خمس عصافير اصغار حييييييل ماتوقعنا جذي اكونون اصلا شكلهم زرازير مساكين

حجمهم حجم جبده الدجاج واكبر اشوي بس ..مما اضطر زوجي يطلب طلب ثاني =)



وبعدين تمشينا اشوي بالواجهه البحريه من زمان مارحنا اهناك وبعدها وديتهم هذي الصاله كنت دايما امر عليها وأنا نازله من سوق شرق وكل مره أقول راح أوديهها حق هذي الصاله بس قلت يمكن اتكون صاله عاديه تبع العاب طفل المستقبل بس افيونكا ستلا قالتلي وديها اهناك تراهم غير عن طفل المستقبل من ناحيه الديكور .. وفعلا استانست بنتي مع بنت اخوي ولعبو لما اشبعوا


وفي نهايه مشوارهوم مريت حق هذا الركن علشان نشتري لهم شي بس ماعجبها شي ..تبي تشتري العاب من مكان ثاني مو من هني ..قلت لها عيل خليه يوم ثاني ..
وبس بدت العطله وبدت الحنه والرنه الحين كل يوم طلعونا ..الله يعين =)

وين رحتو بالعطله ؟