السبت، 31 أكتوبر 2009

طبيبك


هي مدونه كويتيه تهتم بالأمور الطبيه ( للدكتور ابو مشاري ) الصراحه واايد مفيده هالمدونه .. قلت خل اكتب عنها عشان الكل يستفيد منها .


يتكلم عن انواع الامراض وعن الصحه والريجيم .. وذا عندكم اي سؤال أو استفسار مايقصر معاكم كلش .. عنده مساحه للحوار بالفيس بوك عن المشاكل النفسيه وايميل للمراسله وعنده بعد مساحه للحوار بالمدونه نفسها راح اتشوفونها على يمينكم :) يعني حده مسهل لكم طريقه التواصل معاه .. الصراحه يعطيه ألف عافيه .


نبذه عن الدكتور :

حاصل على بكالريوس بالطب والجراحة منذ 18 سنة وعلى الدكتوراة في طب العائلة منذ 13 سنة .. ولديه خبرة في القطاع الحكومي والخاص بالكويت .. وخبرة سابقة ادارية في ادارة مكتب العلاج بالخارج ببريطانيا .. وحاليا يعمل بوظيفة طبية ادارية ولديه عيادة لعلاج كبار السن و اهتمام خاص بالتوعية الصحية و مشاكل الذاكرة والنسيان .
للدخول الى المدونه يرجى الضغط على رابط ( طبيبك )

الخميس، 29 أكتوبر 2009

Rapping

الأربعاء، 28 أكتوبر 2009

جمجمه فوق رأس أمي

صباح الخير جميعا :) لسبوع الي طاف أمي واليهال رادين من الشاليه .. وهي بالطريج الناس اتطل ابويه امي وتمشي .. ويوم وصلت البيت .. الا أبوي بره .. وقولها اشحاطين فوق السياره .. وأمي ماتدري عن شنو يتكلم .. ويوم اتشوف.. ويلا جمجمه !! أثاري ( حمني اخوي المجرم ) حاط جمجمه دلفين صجيه فوق السياره لاقيها بالشاليه لوووول .. زين محد بلغ عنها وشك انها من عبده الشيطان :)

الأحد، 18 أكتوبر 2009

لبستو شي جذي

قلب مصنوع من عظام الجمل ...إبصراحه اعجبتني الفكره ..بدلا ما يرمون العظام يصنعون منها اكسوارات او تحف (رجعنا للعصر الحجري ) بس حبيته وكان في اشكال وانواع وايد ومع انه كان سعره مايسوى اتقولون كله عظم ابعير مو أسد ولا شي نادر ..وشريته من غير تردد ومن باجر البسه واكشخ فيه ..وبعد ما ركبت السياره وله ؟؟؟
أشم ريحه ! ياربي شنو هذي ريحه من وين ريحه غريبه شنو هذي ..اشمم السياره لا مافي شي ؟؟؟ و ييت اشم اهدومي وله ؟؟؟؟ اوووووف ..... ريحت القلب ويييع ريحت القلب اشلون شاسوي اشلون افصخه ويع ويع ريحته صارت قويه ....بس ما أقدر
وأرجع البيت وافصخه وأروح أرشرش عليه عطر أغرقه وطلعت الطقم كله وسبحتهم بالعطر وبعدها نشرتهم بالهواء الطلق ..إتخيلو خليتهم يمكن اسبوعين الى 3 أسابيع ...شميتهم أشوه مافيهم ولا ريحه ولا حتى ريحت العطر مادري اتبخرت وله اتشربه ...المهم لما الحين موقادره البس القلب او التراجي اخاف اشم الريحه .............البس الاسوار بس
ونشوف مادري متى البس القلب مره ثانيه =) ها تبون اتجربون =)


سلسلة الشفق ( twiligh)




مساء الخيرات و البركات بعد طول الغياب ......

موضوعي اليوم عن رواية توايلات او الشفق من تاليف :ستيفاتي ميلر .... ما اقدر اوصفلكم شكثر الرواية حلوة و ممتعه
و الي خلتني اتجرا و اقرى الرواية بالانجليزي والصراحه طلعة مو صعبة و انجليزيتها سهلة و ممتع في الرواية ان اساسنا انا بنات خالتي book club صغيرونو لنا نتناقش بهل الرواية و الكتب القادمة انشاء الله ...
و انا اقيم الرواية 5\5

من منا لم يسمع يوماً عن مصاصين دمـاء آكلـي لحوم البشر
لكـن .. هــل سمعتـم من قبـل عن مصاصين دمـاء نبــاتيــن
يدرسون في الثانوية ، يلعبـون البيسبولـ ، وفوق ذلكـ يحبـون البشـر!

* * *
عندما يقـودكـ الحب للتعلق بمصاص دمـاء .. فما الذي يمكنكـ
أن تفعله .. !
حينما يكـون مقـدراً لكـ العيـش خالـداً .. فلأجـل ماذا تعيـش .. !



يدأت هذه السلسلة في عـام 2005 باسم “Twilight” وهي سلسلة خيالية رومانسية موجهة لفئة للمراهقين ، تدور أحداثها حول مجموعة من مصاصين الدماء اللذين يتعايشون مع مجموعة من البشر ، ويقع إحدى المصاصين (ادوارد كولن ) بعشق إحدى البشريات (بيلا سوان) إلا أنه في نفس الوقت لايستطيع أن يقترب منها لأنه إن فعل فسيمتص دمها حلو المذاق!

بعد النجاح المذهل الذي حققته هذه الرواية أتبعتها الكاتبة بإصدارات ثلاث أخرى، والسلسلة عبارة عن:
”Twilight” الشفق 2005


و تم تحويل توايلات الي فلم تم انتاجه في عام 2008 و لكن ظلم الرواية لان افقدها الكثير من التفاصيل المهمة و الممتعة من الرواية لذلك تم تغير مخرجة عند انتاج الجزء الثاني نيومون او القمر الجديد الذي سيعرض في صالات العرض في تاريخ 20\11\2009 و كذلك يستعدون لتصوير الجزء الثالث كلبس او الكسوف .


و لقد حازت المولفة ستيفاني ميلر على لقب كاتبة العام 2008 بعد ان باعة 42 مليون نسخة منذ عام 2005 و ترجمة رواياتها الي 37 لغة ومنها العربية التي اصدر منها الشفق (تحصلونا في جرير) و القمر الجديد لم ينزل في الاسواق الكويتية .
"واذ تبون النسخة الانجليزية تحصلونها في فيرجن بس لا تاخذونها من جرير لان دابلين السعر :)"


الخميس، 15 أكتوبر 2009

بدون ذكر اسامي


مساء الخير جميعا :) .. جم وحده منكم انقصبت على شي اهي ماتبيه .. أقصد اذا احملت الوحده وفيها بنيه الأهل يدورولها على اسم حلو .. والأغلب يسمون على اسم ام الزوج او الزوجه .. بس اذا كان اسم أم الزوج وأم الزوجه موحلو كللش أقصد غريب وموحلو ومادري من وين امطلعين هالاسم .. ليش اتسمون هالبنيه الكيوت الي خدودها ورديه وشعرها لمكتكت هالاسم .. كفايه الأم متعقده من اسمها ليش اتزيدون عدد لمعقدين :) طبعا هذيل الأزواج المسيطرين على زوجاتهم الي ماكو تفاهم :) والله في وحده لمن يابت بنيه وهي بالمستشفى قاعد تبجي وترجاه عشان مايسميها على امه لأن اسمها مادري اشلون قايل .. بس مايهزك ريح وسماها .. وبعض الاسامي اوكي معانيها حلوه بس الاسم نفسه موحلو كللللش..بس طبعا لبنيه اذا رفضت الاسم مومعناته ان ماتحب خالتها ..لأ.. معناتها ان ماتحب اسمها فقط لاغير .

وفي سالفه طرت علي .. في أم قاعد تقول حق ولدها انشاءلله اذا الله رزقك ببنيه لاتسميها على اسمي مابي احد يسمي علي وانه حيه (والأم مسكينه كلش اسمها موحلو).. جان يقولها والله يايمه لانتي حيه والا انتي ميته بسمي بنتي عليج لووووووووول .

وكله كووم واسامي بعض اخواني البدو كووم طبعا اقصد الاسامي الي استحي اكتبها اصلا.. طبعا عارفين شنو اهي .. يعني الله منعم عليك احلا نعمه بالوجود ولي اهي نعمه لعيال وربك خلاك اتسير أبو .. ليش اتسمي هالاسم !! على بونه ياتك بنت اتسميها هالاسم !! مادري ليش بعضهم مايحبون البنات !! عيل ليش يتزوجون ..!! حرام عليك هذي انسانه وهذي احلا هديه من ربك ليش اتسميها هالاسم !! هالموضوع حارني حده .. اصلا هالموضوع يبيله بوست بروحه .

الاثنين، 12 أكتوبر 2009

بعض الاقتراحات لتقديم الهدية

كاني وفيت في وعدي وحطيت بعض الافكار لتغليف الهدايا ..وهذي آخر فكره وكانت فكرت PEARL-OM MOD -STELLA وطبعا أنا =) حبينا هذا البوكس الي يحتوي على ملابس للبيبي ملفوفين على شكل باقه ورد وطبعا في احجام والوان وخترنا الي يناسبنا وطلبناه من JELLY BEANZ . وحطينا معاها الحطه(مبلغ مالي) ولفينا الفلوس وزيناها وغرسناها مع الورود ..وكانت حلوه وايد =) وكانت الهديه لزميلتنا بالدوام . الوردة البارزه اهيا الحطه .
مع الكارت والحطه ...ومن الخلف بوكس الهديه يوضح ما تحتوي الهديه من قطع ملفوفه على شكل ورد
أما عن أقتراحات لتقديم الهدايا لعده مناسبات : زواج -تخرج -ولاده ...الخ فهناك مواقع حلوه ويمكن اتفيدكم منها :
WWW.JELLY BEANZONLINE.COM


WWW.BASSINETWORLD.COM
باسينت للهدايا 25715002-9796226


WWW.COOKIES-BOUQUET.COM
COOKIES BOUQUET 55997654

وفي تقديم بطاقات بدلا من المبالغ الماليه وهذي من زمان يسوونه بس لما الحين دارجه..مثل بطاقات الشايع او بطاقات لسباه او لي جلسات العنايه بالايادي والاظافر أو بطاقه عشاء في احد المطاعم الراقية .
هذا الي عندي الحين واذا في مرات قادمه واذا في شيء مميز اكيد ما راح ابخل عليكم ..وشكرا .


الجمعة، 9 أكتوبر 2009

شئ ستايل ...

السلام للجميع .. يمكن تقولون من وين طالعة .. :) بس شنسوى الدنيا و مشاغلها .. و اتمنى ان الكل يكون بخير ..


كلنا ندري ان الكويت ( صل على النبي :) ام الهبات و ما يمدى الواحد يسوى شغلة غريبه الا الكل سو مثله عاد تعال شوف

بالرخيص و الغالي .. المهم نفس الشكل .. مو شرط الجودة ..

عاد انا الهبة الي اضحكنى سالفة Blackberry بنوعين bold , curve .. و الكل عندة الكبير و الي توة ما طالع من البيضة ..

عاد تعال شوف الألوان .. على أساس الموضة فسفوري .. الكل كفراته فسفورية ..

انا بعطيكم سايت .. تغيروون في الكفر غير الألوان الفسفورية الي تعور العين :)
i hope u like it
انا الصراحة اعجبونى الأشكال .. معن مالي كلش اي اهتمام بالتلفونات و اكسسواراتها ...

و مثل حجي امهاتنا الكبار .. ( ما اعرف الا اضغط الحمرا و الخضرا :) .. بس انا احسن منهم شوية ادز مسجات و اصور اليهال :)


انشاءالله يعجب الي لهم اهتمامات فية ..

الأربعاء، 7 أكتوبر 2009

الهدايا اشلون صرنا انقدمها

واي .... أول كل شي بسيط ..والحين كل شي معقد ..ومنها تقديم الهدايا ..أول انغلف الهدايا في ورق اذا تذكرونه رول كبير ولونين نقط زرقاء او ورديه او للاماع يبرق بونجوم او اشكال هنديه ...وبس اهم شي الهديه ..
الحين انخسر على تغليف الهديه نفس سعر الهديه ..بكسات ورد وحشوات ودبب يالله تملي عينا وماننسى الكيس الي راح انحط فيه الهديه ..ونتكلف فيه وكأنه هوه المهم (مو كله راح ينقط باللزباله) ..
فالحين أنا وحده من الناس مثلهم اكشخ الهديه ...وي.... ادوخ وادور شي فنتق ومرتب علشان اقدم الهديه ..وله فاضيه صح =) كافي انحوس اول على الهديه وبعدها على تغليف الهديه ...وييييه تعب بس ترى احب هذا التعب ..وشكثر انزف عليه من امي وله زوجي من كثر ما افكر واحوس اشلون اغلفها اشلون ...المهم هذي المره كانت حطه (افلوس ) مجموعه من البنات هذي الهديه مريحه مانفكر شنو نشتري نتيمع مجموعه من البنات ونهدي فلوس ..انزين الحين المشكله اشلون انحط الفلوس ...الدارج انحطها في ظرف راقي وحلو ينباع في محل بوابه الهدايه (صارت قديمه الحين) او اشكال مثل بيضه مزركشه ينحط فيها الفلوس اوورده او دب او بوكس صغير ..أو أو وايد أشياء
بس كل هذولا سويناهم وملينا منهم ..ماكو الا اشتري شي غير مكلف (علشان ماتنقص سعر الحطه وتستفيد من المبلغ احسن) وهم ما ينقط في اللزباله تستفيد منه وهم شكله اونس أول ماتشوفه تبتسم ..فكانت المناسبه مولود جديد..
وكان ماعندي وقت افتر مشغوله وايد بس لازم اغلف الهديه ..فصارت جذيه ..وحطيت الفلوس بوكس وداخله الهديه وهي المبلغ المهداه . شريت تاج بناتي حده على شكل تباع الشمس ..وشريت ادلاقات بيبي وثبتها عليه وحطيت داخلها الفلوس ..مع اني مو عاجبتني وايد ..بس قلت واي بس المهم شكلها ذرب ..عيزت وأنا أغلف في هل هدايا ...الله ازيد المناسبات الحلوه بس كل مناسبه هديه حتى اصادف استقبالين في نفس اليوم ..الله يشافينا من هل فناتق ...المهم قولولي حلو صح



لزقه


صباح الخير جميعا :) ولهانه عليكم وعلى تعليقاتكم .. من زمان ماكتبت .. انشغلت مع الدنيا حبتين :)

موضوعي اليوم اهو عن الرياييل .. انا مره كتبت موضوع اسمه ( سوالف حريم ) وطبيت فيهم اشوي :) ..الي بقراه يضغط على الرابط .. فلازم اطب في الرياييل اشوي عشان انتعادل .. عشان مايصير في زعل :)

طبعا معروف على بعض الحريم انهم لزقه ..بس سالفتي اهي العكس .. لزقه الريال .. اعرف واحد متزوج .. يمووت على مرته يحبها حب جنوني.. بس شنو لزقاااااه .. لزقته صكت على بعض الحريم .. الي من كثر ماهو لزقه صارت بينهم مشاكل ( وتطلقو ) معنه يحبون بعض بس تصرفاته خلت لبنيه تزهت منه .. موحاسه ان ريال من تصرفاته الي تقث .. ترى سالفتي مومألفتها ترى صج .. وابي رايكم فيها .

خن قولكم بعض تصرفاته :

وين ماتروح مرته اهو ريله على ريلها ..موسالفه مو واثق فيها .. لأ سالفه موقادر يفارقها .. ومايحب يطلع من البيت والا يروح دواوين والا يطلع مع ربعه موسالفه ماعنده ربع لأ ..من كثر مايحبها موقادر يفارقها ..حتن تخيلو اذا بتروح الدوام اهو يوصلها .. وذا بتطلع مع رفيجاتها يقولها تبين اوصلكم وعزمكم على مطعم ..وذابتروحون السوق اشترو الي تبونه انا الي راح ادفع .. عشان يسكتها وترضا ايي معاهم !!بس ترى موشاك فيها لأ..بس مايقدريفارقها بالمره .. ومره يابت رفيجتها البيت فأهو قاعد بالصاله الثانيه جان يدق عليها تلفون يقولها مليت وانه بروحي تعالو قعدو معاي .. شكووو !! ويلا يقولها تبون اسويلكم عشا !! تقول بنسولف ابناخذ راحتنه بنحش ابنضحك محنه قادرين !! ومره تهاوشو وراحت بيت اهلها .. بعد 5 دقايق طق جرس الباب ويلا اهو يقولها ولهت عليج حبيبتي .. يعني حتن بلهواش ماكو فجه ..ومره شافته يبجي على الخفيف .. تقوله شفيك يقولها احبج ( لاتعليق) .. تقول 3 أماكن بس الي اكون فيها بروحي ( تكرمون الحمام والنادي وذا نمت) تقول هالثلاث اشياء اطول فيهم عشان افج منه .. افف انا قثني .. يمكن بعضكم راح يوقف معاه وبعضكم راح يوقف معاها لأنها اطلبت الطلاق .. بس والله لو اتعيشون الوضع جان حسيتو فيها .. اهو حلو الواحد ان يحب .. بس موبهالطريقه .. اذا الوحده اسمعت عن هالطريقه راح اتقول ابي واحد نفسه .. بس اذا عاشت معاه راح تزهق والله. لأن اهم ماخذين بعض عن حب بس لمن عاشو مع بعض ماقدرت اتحمل .
يعني الانسان بطبيعته اذا تغلى ويلا فج اشوي .. الطرف الثاني يحن عليه ويفقده ..والواحد اذا كان عزيز نفس ينحب اكثر . صح كلامي ويلا انا غلطانه .

السبت، 3 أكتوبر 2009

شخباري .....

قبل جم يوم طلعنا الكتاكيت وين تتوقعون وديناهم ؟؟؟........ رحنا الجزيرة الخضرا أدري بتقولون شخباري أنا نفسي كانت ردت فعلي حق زوجي العزيز قلت له .... شالطاري الجزيرة الخضرا والله ذكرتني بأيام قبل :) لوووووووووووووووووول ..



قبل يمكن كنا كل أسبوع أو أسبوع وترك نروح هناك ..نعلب ونتمشى وناسه ..يا حلو أيام زمان :)



الحمد الله توفقنا باختيار المكان ...وايد هادي عكس قبل زحمة ولويه وازعاج..وطبعا مسموح لكم تدخلون كل شي من أكل وألعاب وقواري وكور وغيره حق وناسة اليهال ..عكس باجي الحدايق العامه كل شي ممنوع شوي ممنوع..كره ممنوع ..وأنا كنت كاتبه هالموضوع من قبل ..




وايد المكان نظيف ومرتب حق اللي عندهم عيال ويخافون يباعدون عنهم ..المكان مسكر ولو وين يروح اليهال ما يضيع ...في هناك بعد ألعاب كهربائية ..وبقاله بس حدها غالية ...أسعارهم خياليه :) ( نهيبه )




في كراسي وطاولات ..هذا كله أنا مو متذكره إنه في قبل ليش إنها أشياء ما كانت من أهتماماتي ...ناويه أجمع العايله الكريمة ونروح نشوّي هناك :)





وعقبها رحنا تعشى في ماكدونالدز يديد توه فاتح عند مطعم ناز الإيراني بشرق وهناك بعد في مطعم نايف ..



ماكدونالدز اللي هناك كبير وحلو ونظيف .. اخليكم مع الصور ..في تأجير قواري بالجزيرة الخضرا :)

ربع تعاونوا ما ذلوا ....متيمعين على شنو يا حلوين ...مودو ويسور وعيال عمهم :)...ربي يحفظكم من كل شر

ماكدونالدز يرحب بكم في شرق

في مكان بلاي ستيشن حق الكتاكيت يلعبون

انتهى المشوار ....مع السلامة