الاثنين، 30 يونيو، 2008

تقصير




في حلقه من حلقات أوبرا كانت مقابله بطلات فلم Sex and the City و قاعدين يسإلونهم عن الفلم و جذي ، فآخر فقره تكلموا عن لبسهم ، و عن المره إلي تختار لهم اللبس ، فتكلمت عن هذا النفنوف إلي بالصوره إلي لابسته sarah jessica parker ، و قالت إن نفنوف سهرة قديم و كان طويل ، و قصروا عشان تقدر تطلع في بالشارع عادي جنه مال كل يوم ، أخاف بس مال كل يوم ، إنتوا بس شفوا الورده شكبورها !!!
المهم مو هذا موضوعنا ، قلت خل نلعب بأشياء عندنا من زمان :) أنا عندي نفنوف مفروض يكون سهره ، طالبته من أمريكا و ما عجبني لمه وصل ، لبسته مره وحده بس ، فقلت مدام ألحين كله مودت القصير خل أقصره و يمكن ألبسه أكثر . و ديناه الخياط و قصره و النتيجه مثل ما تشوفون .






نفنوفي لما كان طويل

طالللللللللللع ، و أنا قاعده أدور لكم صوره حق نفنوفي لما كان طويل ، إلا ألقه هذي

أكو منه قصير زاهب و خالص

بشييييييييييش

Fusion Japanese Restaurant

اليوم مرت خالي E عازمتنا على العشا في مطعم فيوجن في جاليريا 2000 ، كنا كلنا 9 أشخاص ، المطعم ياباني صارله فتره طويله فاتح ، إنتعييز نروح هناك ، مكانهم صعب ، مافي مواقف . بس هذي المره مدام صارت عزيمه خلاص اكيد بنروح . E كله تمدحه و تقول شكثر اكله لذيذ و أحلى من ماكي ، فوناسه اليوم رحنا إنجربه .
الصراحه الاكل حلو ، شي غير ، غريب ، أصلا ما أدري شنو قاعده آكل ، معظم الاكل طلبته E ،طبق وره طبق طبق و ره طبق إيينا ، إلي أختي تقول "شكلهم سوو كل إلي يعرفونه لنا ، ما خلو شي ما يابوا" ، أحلى شي الصوص إلي مع الاكل ، أوووووف عاد أنا اموت على الشكر ، كل شي تقريبا كان علي sweet souce ، حتى الخس حالي .
بالنسبه للمكان جدا صغير ، طاولتنا تشيل 10 و لي يمنا بعد أظن كانوا 6 أو 8 و أكو قنفتين كبار ، شكلهم حده عجيب حق التسدح ، و طاوله صغيره تكفي نفرين و بس ، خلص المطعم . الديكور وايد مودرن و ظلمه أزرق على وردي ، بعد اليوم كان اكو واحد قاعد يدق لنا على الجيتار.
sorry على الصور كلش مو واضحين ، محد له خلق ينطرني أصور كله ماشين عني ، ماكو وقت حق التفنن بالتصوير . ما قدرت أصور الأطباق عدل على ما أضبط كامرتي إلا الاكل طار ، فجدا متأسفه .


أول صورتين مبين فيها شلون المطعم ظلمه



إهني مع فلاش

آخر شي حلينه ببرد مسوينه المطعم ، وايد واااااايد لذيذ ، في أقل من 5 ثواني خلص نص الصحن ، بنت خالتي N كانت رايحه الحمام مسكينه ما لحقت على شي خلصناه عنها ، بقالها يمكن قفشه و له قفشتين . عبالكم شبعنا ؟؟؟ لالالالالالالا من كثر ما إهو لذيذ كل واحد طلب برد بروحه ، انا خذيت فانيلا ، بنات خالتي خذوا فستق و كاكاو .
إنشاء الله مره ثانيه نروحله و نقعد على القنفه :)
ملاحظه : fusion مو أحلى من Maki ، كل واحد له ستايله و موديله
و مشكوره يا مرت خالي ، الأكل كان لذيييييييذ

الأحد، 29 يونيو، 2008

المشهد الأول من رحلة مشهد :)





طيارتنا كانت الساعة 8 صباحا يوم السبت 21-6-2008 ..وايد عجبني وقت الرحلة قلت عشان ناخذ اليوم بطوله وما يكون ضايع علينا بس للأسف الورعان خربوا كل شي ..خليتهم ينامون الساعة 9:30 عشان يشبعون نوم بس تجري الرياح بما لا تشتهي السفن جنهم حاسين إن وراهم سفر قعدوا الساعة 12 بالليل توني حاطة راسي بنام جان يفزون وبجي وحالتهم حاله يبناهم ينامون عندنا قلنا لو شوي بس إنام بس ماكو مو راضيين يبون يقومون ..قام أبوهم مسكين معاهم وقعد بالصالة ألحين يدوخون شوي ينامون لا صار الفير والحلوين قاعدين قمت لبستهم وريقتهم وإحنا بعد لبسنا ويلا على المطار أول ناس وصلنا الساعة 5:30 الفير حتى قبل راعي الحملة ..طبعا كان شي حلو إنه أحنا اول ناس لأنه صار لويه بعدين وناس وايد ، بس تعبانين وفينا النوم واليهال يتسببون على أي شي لأنه فيهم النوم وماكو رحنا تريقنا أنا كليت من ستاربكس وزوجي العزيزو اليهال من دجاج نايف ( يقول ريلي إنه صمونة البيض عندهم حلوة ) المهم أنا ريوقي كان ( فربتشينو كارميل + مازورولا بانيني بالعافية على قلبي ) .وماكو رحت بشتري حق اليهال دوا حق اللوعة قالي الدكتور مخلص إخذي لهم دوا حساسية عشان ينامون .أبوهم ما رضى وقالي أهما دايخين وراح ينامون وعاد صج من ركبنا الطيارة يدوب طارت أثنينهم حاطو راسهم وناموا ..وللحديث بقية :) شفوا الصور

ما أحلى العودة للوطن :)

في انتظار صعود الطيارة

في البداية ..ولهانة عليكم وايد يا فيونكات وحدي ولهانة على البلوق من أول ما طبيت الديرة وأنا أقول يا ربي شكثر البوستات اللي ما قريتها شمسوين الفيونكات بالبلوق وشلونه بدوني :) ؟؟؟؟..

أمس الظهر وصلنا بالسلامة من إيران وبالتحديد مشهد المقدسة الساعة 2:03 ظهرا على طيران الجزيرة وهذي الرحلة كانت الثانية عشان حبيب القلب محمد كان وده يروح يزور الإمام علي بن موسى الرضا عليه السلام وما خليناها بخاطره بس أهو دايما حاط في باله إنه بروح ويشوف شخص يدامه أحس يضيق خلقه لما يوصل لحد المكان وما يشوف غير القبر الشريف يعني مثلا لما رحنا المدينة المنورة كان متشوق ويشوف رسول الله صلى الله عليه وآله وسلم ولما وصلنا يسأل أبوه وينه أبوه قاله نايم طلع وقالي يماه أنا رحت بس أهوا كان نايم ولما رحنا عند الإمام نفس الشي تدرون شنو قال يماه اهوا كله نايم قلت حبيبي والله إي يمه بس إنت سلم عليه ويوصل سلامك حقه :)...الحمد الله هالسنة توفقنا برحلتين لأماكن مقدسة والفضل يرجع حق توفيق رب العالمين وحق محمد المشتاق حق هالزيارتين .. ( اللي يحب يشوف رحلتي الأولى )

إنشاء الله بوستاتي الياية راح تكون عن رحلتنا حق مشهد ..مدة الرحلة كانت أسبوع من 21-28 /6/2008 برفقة حملة الثقلين..

ما أبي أقولكم طبعا شتان بي الجو هني وهناك روعة جوهم بارد وحلو وشحلات التمشي بأي حزه ..بس مثل ما قلت لكم ما أحلى العوده للوطن ..ولو درت الدنيا ولفيت ما ألقى مثلج يا بلادي :) أحبج يا كويت :)

السبت، 28 يونيو، 2008

أمس رحت فيلا مودا أشوف الشتوي

ما كو شي واو و عجيب ، والمشكله إذا لقيت شي يعجبني ما يطلع حلو باللبس وله إيعور، و إليكم التقرير...

GUCCI

هدوم ما شفت ، محد له خلق يركب ، بس شفت جناط و جواتي ، الجناط كلش ما فيهم شي يديد ، كل إلي يايبينه carry over على قولتهم ، و هو موديل الصيف رادين مسوينه حق الشتاء . أصلا ما ثبت و له شي ، كله أسود و بيج ، الشي الوحيد إلي ثبته إهو البواكه ، لونهم بنفسجي ، و هذا إلي أنا اعرفه ، إن لون هذا الموسم إهو البنفسجي .





جواتي بعد ماكو شي ، كله صنادل ، و جنه بوت واحد ، إظاهر عشان منزلين الشتوى وايد مبجر فلازم ينزلون صنادل عشان الناس تلبسهم ألحين ، علامه gucci اليديده الطمقه المدوره او الدرع .


هذا موجود بس يايبين لون بنفسجي غامج و ما في GG و لميع ، كعب واطي و رفيع

YSL

نفانيف جيرسي الألوان (بنفسجي و أخضر و أسود) ، الجناط بعد carry over ، الشي الوحيد إلي عجبني الجوتي إلي تحت ، بس ما كان هذا اللون كان أخضر غامج ، حسافه وايد وايد رفيع ما قدرت أمشي في ، أنا توقعته زين بالمشي طلع لأ ، شوفوا قاعته ، شوي رفيعه عن الأرض جنها مدوره ، و الكعب 13 سانتي ، حسيت ريلي راح تنعفت بأي لحظه . عاد انا شنو مشتهيه جوتي رفيع من جدام ... راح أستمر بالبحث و إنشاء الله ألقه .

ETRO

وايد عجبوني ، طبعا etro كله ألوان ، بس السنه هدومهم أشباه marni يمكن عشان جذي عجبوني أنا من المعجبين بـ marni . هذا النفنوف إلي بالصوره يايبينه ، ستان مشير و حافته بيج مخمل ، بعد الموسم رادين على المخمل ، ثبتوا .

DAKS

النفنوف إلي تحت من DAKS بس هذا مو من الكولكشن الجديد ، كان بالتنزيلات ،قماشه جنه جيس قرقيعان ( لا تعيبون تره بالصج وايد حلو ) ومن تحت مقصصين القماش صاير جنه كشاكش ، بس مثل ما قلت لكم من القه شي حلو ما ألقه مقاسي ، هذا أكو منه مقاسين 14 إنجليزي و 10 . و الـ 10 ملبسينه المنيكان ، مساكين البياعين خليتهم إيفصخون المنيكان ويعطوني إياه ، و لمه لبسته طلع و سيع ، ومو مال تصليح ، خفت يصلحونه. حسافه عاد سعره كان زين ، كان بـ 800 و شي يصير بعد الخصم بـ 400 . يالله منو مقاسها 10 و له 14 و تبي نفنوف حفله قصير ؟؟؟؟

مصدر الصور : saks - Daks - neiman marcus - gucci

وناسه


شوفو اخوي لصغير اشلون مستمتع بالجاكوزي .. واترككم مع تعليقاتكم :)

خوووش مايه

أمس رحت شاليهنا والمايه حدها اتشوق للسباحه من كثر ماهي حلوه اتسبحت من الساعه 6:30 م الى الساعه 9:30 م .. وكل الشاليهات طابه اتسبح .. حتن الحصان شوقته المايه وطب معانه :)

الجمعة، 27 يونيو، 2008

طالع johnson and johnson شمسوين




حركاااااااات ... حتى johnson and johnson قاموا يتعاونون مع مصممين ؟؟؟ مسوين لزاق جروح على ألوان و تشييرات بالتعاون مع المصمم البرازيلي alexandere herchcovitch . عاد هذا وين بنشوفه ؟؟؟ ما راح إيبونه لكويت ، ولا بعد limited edition . و الله لو ألقاه أجرح روحي بس عشان ألزقه . بعدين قريت المصمم شنو قال "أنا لازق واحد من أول ما نزل ، مع إني مو مجروح" ، بعدين فكرت ... صج شكو أجرح نفسي عشان ألزقه ؟ ألزقه و بس ... آآآآآآه على الغباء .

TAG


mr . choclate امسويلي tag ..يعني اهو سئلني سؤال ولازم أجاوب عليه .. وأقدر أنا أطلب من مدونين ثانين ان اسئلهم نفس السؤال وجاوبون عليه أوحتن اي سؤال ..وهكذا .. وككاو طلب مني ان أوريه مداليتي والشي الثاني طلب 6 أشياء تخصني أو اسويها :) .. ومو بس أنا طلب مني ..كلكم يا fyonkat :)

وهذي مداليتي يا ككاو :) اهي ماركه GIVENCHY بس فيها مفتاح سيارتي ما أحب اتكون مداليه السياره فيها أكثر من مفتاح .. والمداليه هذي يابتها لي ( pearl ) ابعيد ميلادي 2006 .

والست أشياء الي تخصني أو اسويها اهيه :
1. اذا بروح السوق لازم ابروحي ويلا مع اختي او امي ويلا ما اعرف اتسوق وأفضل ابروحي عشان اخذ راحتي ويلي معاي مايتملل :) .
2.اذا باكل بطاط لازم اخلط الكتشب والمايونيز مع البطاط ويلا ما اعرف اكله ..شكلي لوعت جبودكم :)
3. اذا احد قط علي كلمه ويلا جرحني ( انطرم ) ماأعرف أرد مادري ليش :( وتحسف عقب اني مارديت على الشخص :)
4. ما أعرف اتغدى ويلا اتعشى بدون لا أطالع شي بالتلفزيون وما اكل الا لمن يطلع شي يعجبني .
5. والا مره ركبت الطياره ومالاعت جبدي من ريحه الاكل وريحه زوليه الطياره وريحه المخاد وحتن اتلوع جبدي اذا سمعت الكابتن اذا تحجى بالمايك . الي يقعد يمي مسكييين :)
6. اتنرفز من التكاسي والباصات والسواق ..يسوقون جنه مافي احد بالشارع جنه شارع ابوهم .

Just In



Justin Timberlake عارض لعطر Givenchy - Play

Ferre راح يدخلون بالعقار


Gianfranco Ferre راح يدخلون عالم العقار ، بيبنون برج من 60 طابق ، راح يكلف 1.2 بليون دولار ، وهو مجمع سكني و تجاري بنفس الوقت ، طبعا أهمه راح يكونون مسئولين عن التصميم الداخلي ، و متوقع إن يخلص في آخر 2011.

وين ؟؟؟؟ وين بعد ...في دبي دار الحي

دلاقاتي

أموووت و اعرف ... محد يلبس دلاقات بالبيت إلا إختي ؟ ليش الخدام كل ما غسلوا الدلاقات حطوهم بدارها ؟؟؟؟؟ شنو أنا ما ألبس يعني ؟؟؟

المهم عشان أحل هذي المشكله شريت لي ألف دلاق من مارك سبنسر و بحط عليهم X من تحت ( بصبغ للملابس ) . و إن شفت دلاقي بدار أحد بذبحهم .




هذا الصبغ إلي إستخدمته ، ألحين بس أنطرهم ينشفون و أكويهم عشان يثبت اللون

الخميس، 26 يونيو، 2008

فيلا مودا نزلوا الشتوى


نزلوا الشتوي ...
Gucci
YSL
Etro
Ferragamo
Bottega

Designers Dolls



Karim Rashid



Zaha Hadid

Jaime Hayon


عجيبيييييين الألعاب ،هذا كان مشروع التخرج لـ Olivia Lee طالبه سنغفوريه في جامعة Central Saint Martins بلندن للفن و التصميم . تقول Olivia إن هذا المشروع يمثل شلون إن المصمم شخصيته تشبه الأشياء إلي يصممها بشكل مو طبيعي .

The Palms

من يومين تغدينا أنا وزوجي ابمطعم ( منتجع النخيل ) كانت يايتلي دعوه مجانيه لي ولزوجي بمناسبه عيد ميلادي من صديقتي ( ام علاوي ) .. أدري عيد ميلادي كان في 3\6 بس تونه انروح :) البوفيه كان متنوع من أكلات بحريه ولحوم . وحدي استانست لمن شفت مكينه البرد , فقلت حق الريال الي يخدم حق البرد أنا بسوي خن جرب ,, وشوفو البرد الي سويته صج مومضبوط بس صار :) وعقب ماحلينه شفنه الغرف وفي غرف على نظام شقق صغيره .وأسعارهم تقريبا ابتداء من 45 الى 80 د.ك . وال80 د.ك الي يطلون على الحمامات السباحه ( الستوديو ) .