الأربعاء، 11 يونيو 2008

مصدومة من اللي صار لي اليوم !!



مثل أمي الغالية دايما تقوله " ما تمدح شخص إلا وتحتاج لذمه " أنا بحرف وبيغير بالمثل " ما تمدح بنك إلا وتحتاج لذمه "..
صار لي اليوم موقف لا أحسد عليه في البنك اللي كنت أتمنى أكون من عملاءه ما أدري ليش من يوم كنت صغيرة وأنا أسمع دعايته وأرددها " هلا هلا زينة بحساب التوفير إنشاء الله يصير عندج مال كثير كثير زينة تحقق حلمها وصار عندها حساب واللي حقق حلمها بنك الكويت الوطني " بس للأسف اليوم البنك الوطني عطاني طراق على ويهي وخيب أملي فيه تدرون شصار أنا أقولكم وبدأت الحكاية :

أنا صار لي فترة طالبه ePIN ( هذا رقم سري طلبته عشان أقدر أحول من حساب لي حساب ثاني عن طريق النت هذا توضيح حق اللي ما يعرف )..المهم دشيت البنك وما شاء الله بالاستقبال كان في شاب وبنت استقبلوني بصباح الخير وآمري ( يحليلهم يبيله ..) المهم قلت لهم إني طالبه ePIN و يايه استلمه قالي الشاب كاونتر 2 أنا استغربت لأنه جدام الكاونتر كان فيه لافته مكتوب عليها ( الكاونتر مغلق ) ما عليه بقولكم السالفة بالتفصيل الممل لأني حدي محتره ...المهم رحت قلت لها أنا طالبه ePIN ( أدري لاعت جبودكم بس ما عليه شوفوا اللي صار ..) ما قالت ولا كلمة ساكتة جان أقولها تبين البطاقة جان تقول إي البطاقة المدنية عطيتها بطاقتي وخبركم أنا ما أشيل الأصل مسويه لي نسخة طبق الأصل وأتجول فيها كل مكان يوم شافتها جان تقول مو أصلية وتهز راسها ما تتكلم لاحظوا فهمت إنه ما راح تمشيني قلت لها ما عندي غيرها جان تقولي ما يصير أبي أي إثبات أصلي عطيتها الاستمارة ( ليسن السيارة ) خذتهم وراحت إدور بملف بس ما أقولكم شلون شكلها لايعة جبدها حدها ما أدري مني من شي ثاني ما أدري والله إي وأقولكم وهي قاعده من بعيد تسأل من متى إنتي طالبته قلت لها ما أدري جان تقول يعني إنتي ما تدرين أنا شلون بعرف ( طبعا بنفس مع أنها مرة عوده مو صغيرة بس ما أدري شفيها شنو هالإسلوب؟؟!! ) رديت عليها قلت لها يمكن من أسبوع دورت دورت دورت جان تسكر الملف وتقولي ما فيه أنا وصلت شهر 4 وما فيه .....؟؟؟؟ خنقتني العبرة أنا ياية ومتعنية وحالتي حالة وهي جذي تسوي قلت لها شوفي يمكن نهاية شهر 5 ترد وتقول أقولج وصلت لما شهر 4 وما فيه وطبعا تطالعني بطرف عينها شمسويه لج أنا لا عرفج ولا تعرفيني ..احتريت حدي قلت لها شلون ألحين اطلب واحد ثاني جان تقولي إي قلت لها شلون جان تقول نفس الطريقة وتأشر بيدها اللي فهمته إنه بالنت ( بقلبي أقول حرام عليج أنا متأكده إني طالبه ليش بتخليني أروح وأرد ) خذيت أغراضي ورحت حق الاستقبال جان أقولهم أمبيه ما تبي تدورأنا متأكده إني طالبه بس إهي ما تبي تدور ..ما قصر واحد من الشباب قالي تعالي رحت معاه طبعا ما طلب مني لا بطاقة مدنية ولا بطيخ بس قالي عطيني بطاقة السحب الآلي عطيته إياها راح يبي يدور جان تقوله أقولك ما فيه ...المهم أهو حقرها ودور ولقى الـ ePIN وحطه يدامها جان تقوله أي تاريخ أممم تقولي سوري من بعيد طبعا قريت إسمج إبراهيم طبعا إسمي لا يمت بصله حق هالإسم ...المهم قالي ما تمرين على شي بعد ...............قلت له مشكور بس ترى إهي حرتني وايد .....بس الغلط اللي سويته إني ما اشتكيت عليها :( بس ما عليه أنا متأكده إنه الله بياخذ حقي منها لأني ما سويت لها شي ...
وبس هذي حكايتي مع الوطني :)
برايكم أحول حسابي بنك ثاني ...؟؟؟؟

هناك 10 تعليقات:

kAiKa-MGroMa يقول...

ويي صج جليلة حيا ..

وايد معطتها ويه والله لو أنا منج

أخ بس أخ .. فديتج أختاه لووووول عادي عادي تصير بس لا تغيرينه .. بس راجعي بفرع ثاني .

غير معرف يقول...

yemkin shes PMSing .. :P

غير معرف يقول...

laloya: ana 7awalt etamwel o erte7t o ba3den chan eshtekete 3alaha sheno hatha her work

غير معرف يقول...

لازم تتعاملين مع هالاشكال بدفاشة !

غير معرف يقول...

اختي
ما ضاعت الفرصة
دقي على البنك و سوي شكوه
تعرفين التاريخ و الموظفة و اذا ما عندج اسمها دقي على الفرع و سئليهم

ترى الوطني يهتمون بالشكاوي

لا تسكتين, ان سكتي بتم اللعينة بالاسلوب المعفن

bo_sale7 يقول...

تقدرين تسوين شكوى وتقييم للموظفة عن طريق موقع الوطني بالنت ...انا سويتها وتبهدل موظف من قبل ودق اعتذر مني

joy يقول...

لا لاتحولين ثاني
بس اشكي عليها
واهم مايقصرون فيها

واي قطيعة شلون تحملتيها
انا نوعي ازف ولقوله خلي غيرج اييبلي ياه خاتطس هالودرة


انا تلوع جبدي من ابتساماتهم المزيفة ومن فضاوة مخهم

Mr_CHoCoLaTe يقول...

نفس الحاله ذاك اليوم الموظفه تطالع جنه مو عاجبها

انا نوعي اطوف المره اليايه ماني مطوف

بس بنك الأهلي مو الوطني

Om MoD يقول...

أشكركم لتفاعلكم مع الموضوع ..[س لازم أشتكي عليها ألحين بدق على البنك .....حدي محترة منها ....

fatto يقول...

حدها اتحر .. وخليها اتولي لاتطلعين ولا شي .. اهي الغلطانه مو انتي .. اذا اشتكيتي عليها راح اتودينها ابداهيه .. وراح اتكون اهي الي تطله مو انتاي .