الاثنين، 13 يونيو، 2011

مشتاقة لكم



مشتاقة لكم ولكل شي قديم ...دشيت البلوق ولقيته يصفر ضاق خلقي حدي وين أيام العز واللي باليوم الواحد عندنا أكثر من بوست نكتبه وشلون أكون مشتطة والكاميرا بإيدي عشان أصور وأوثق لكم كل شي بالصور ॥

وشلون أستانس بتعليقاتكم وأرد عليها ..
خذاني منكم التويتر والفيس بوك بعيد صرت أكتب كل شي يطري لي هناك ॥


وأكتفي بأني أتابع البلوقات بالقراية بس ॥

خاطري أرجع مثل قبل وأخصص وقت حق بلوقنا الحلو ॥



لما قريت البوستات القديمة استانست إني موثقة كل شي باليوم والساعة والتاريخ والصورة ॥


لازم لازم بكون لك من وقتي نصيب وبرجع لك وبرجع للي كانوا يتابعونا بإذن واحد أحد :)

الثلاثاء، 19 أبريل، 2011

لذيييييذ
تبون ..=)



جربته وايد حلو وقطع البسكوت واضحه بين الايسكريم لذيذ ، أصلا أنا أحب برد كي دي دي ، من عمري و


أنا غداي برد ، خصوصا لما كنت أرد من الجامعه ... وحر ... بس آخذ دوش ...وافتح الفريزر ... هجووووم عليه


طبعا أنا الحين موجذي ...=) كنت مجرمه .


الأحد، 17 أبريل، 2011

الشاي دافي لساعااااات

اي بالدوام نحتاجه وايد وايد، جهاز صغير اتركبينه على الكمبيوتر ، امي يابته لي من سوق الصيني من دبي، جربته ...إخلي الشاي دافي مو حار ...أنا أحب أشربه ادويفي ।

شكرا ماما .

حمدالله على السلامه

كانت حفله تنكرية سويناها حق إختي بعد ما قامت لنا بالسلامة آخر شي عطيتهم تي شيرت يحمل قصة الحفلة ..ووداع شي لن يعود ...أصبح من الماضي


إختي مسكينه سوت عملية حق (خشمها ) للانف =)



وكانت العملية علاجية بس اتغير شكلها واااايد وكانت وايد زعلانه لانها ماكانت اتفكر إجمل (خشمها ) بس صار كأنه تجميل لانه كان وايد مظخم وملتهب فالحين صار صغيير ، فحبينه انونسها وسوينه لها كيكه ونقول لها تراج حلوه وحابين (خشمج ) اليديد =)

وقدمنا لها هديه وسوينه حفله تنكريه।


بس ماصورت صور وايد كنت مشغولة وكل الصور شخصيه للاسف =)


السبت، 26 مارس، 2011

الحمد والشكر بعد الغبار


الحمد لله الذي كشف عنا الضر,, الحمد لله الذي حفظنا وحمانا ,,الحمد لله الحمد لله الحمد لله ,,اللهم لك الحمد حتى ترضى ولك الشكر حتى ترضى,, الحمد لله كاشف الهم والغم مجيب الداعي اذا دعاه ,,ربنا اجعلنا شاكرين لنعمتك علينا دوما ياكريم
ألف الحمد لله على سلامتكم ياحبايبي ياكويتيين :)

الجمعة، 18 مارس، 2011

The November Bakery





مساء الخير والجوري والنوير :) من زمان ابخاطري أذوق هالكيكه لأن مثل ما انتو شايفين ( ماتوقااوم ) اتششوووق ,, صج لذييذه يوم طلبتها ... انصحكم فيها حق لزواره واليمعات ,, وكيكهم عموما وايد حلو انصحكم اتجربونه

رقمهم للتوصيل : 97313310
مكانهم : مجمع التلال - الشويخ - بجانب مجوهرات الفارس

السبت، 26 فبراير، 2011

روعه ابراج الكويت

مساء الخير والجوري والنوير :)
طبعا أمس كان يوم روعه ابروعه الأبراج والألعاب الناريه ... صج شغل متعوب عليه ... المنظر كان عجييب ... شكرا ياكويت :) صج استمتعنه :)

السبت، 19 فبراير، 2011

مطعم لحم جلاب


مساء الخير والجوري والنوير :)

ولد عمتي وربعه بالدوام كل يوم يطرشون الفراش عشان اييبلهم ريوق او غدا من مطعم يمهم وايد يمدحونه. في حمسه لحم خطيره عندهم .فطايحيله كل يوم فيه .عاد ذاك اليوم ياهم الفراش ايده خاليه قالوله وين الاكل ؟؟ قالهم : هذا مطعم سكر ,, لان هذا يبيع (((( لحم مال كلللللب) ))) قالها مثل الهندي الي مع حسينوه هههههه !!!!!!!!!!!! وااي تخيلو ويييييييييييييع قلبت جبدي ... شنو هذا المطعم الي لاذمه والا ضمير مالت عليه وعلى أشكاله ... مسكين كل من أكل من هالمطعم ... قلبي معاكم الصراحه ,, لو انا منكم اسوي غسيل معده ... وتشحيم حق أسناني وتفرك حق الساني ولثتي ... انا بس بعرف وين البلديه عنهم ؟؟؟؟ الظاهر شيشهم (حسينووه) ههههههه ॥ اترككم مع الفيديو : هدا مو ماكووول هههههههه


الثلاثاء، 15 فبراير، 2011

i phony تحطم



مساء الخير والجوري والنوير :) ولهت على الجميع :) كل يوم اقول بكتب .. وتعييز :) برررد مايساعد الواحد يطقطق اصابيعه بالكيبورد :)
نصيحه : لحد يستخدم تلفونه وخاصه الايفون4 بدون كفر لان كله زجاج من وره وجدام مومثل القديم .. شفتو اشصار في تلفوني :( انا اساسا املبسته كفر .. بس شلته عشان تلعب فبه بنتي .. وقلت بروح مشوار صغير وبرد .. توني نازله من السياره ويلا طرباااخخخخخ زلق من ايدي :((
منو يعرف محل يصلحلي تلفوني ؟؟ يقولي بليز :) وشكرا
الي موحاط كفر ومايدري من وين يشتري او عيزان يتحرك مثلي ( اتقول سودانيه ) يدش على هالموقع ... اضغط هنا----->( كفراتي ) الكفرات عجييه .. والصوره الي فوق هذا الكفر الي شريته عقب مانكسر تلفوني ( اشعقبه ) :) اهو بنفسجي بس مادري ليش قلب ازرق مع التصوير .

الأربعاء، 22 ديسمبر، 2010

نهايه السنه 2010

مابقى شي من هذي السنه مرت بسرعه ...واشياء وايد صارت فيها ...كانت خفيفه ماحسيتها ثقيله او حزينه ..بس صارت وايد تطورات واشياء ما كنت اتوقع راح اتصير .
اشلون راح تنهون هذي السنه عندكم ترتيبات ..وله لاهين وماعندكم وقت ؟
أنا وحده اهتم في آخر اسبوعين في كل سنه ..أحاول اشوف كل أقربائي وأتيمع معاهم واشوف اخبارهم
بيتي اغير فيه ..أراجع اهدافي هل حققتها وله في مجال احققها في الايام الباقيه..
مكياجي و كريماتي اشوف مدة الانتهاء ..واسوي تصفيه ...جناطي ..شنو اخلي وله شنو ابي اشتري من الوان..
وايد اشياء اسويها ..وايد مشغوله هذي الايام ..وناسه
وانتوا شنو مخططاتكم ..؟
يوم 1/1 شنو اول شي راح اتسوونه في اول يوم في السنه اليديده

الجمعة، 17 ديسمبر، 2010


اهلا بالجميع .. طبعا كلكم اتعرفونه ..والاغلبيه كانو شارينه او اقربائهم شروه .... هذي الللعبه من الاشياء الي كنت احبها وكل مره اشتريها بنواعها ...ومن الاشياء الي احب أورثها اعيالي ..وطبعا بنتي حبته وكل ماتشوفه تشتريه .
وبعد من الاشياء الجميله في طفولتي البريئه لعبه "الباربي " اموت عليها ..وطبعا اول مايتني بنت كوت لها باربيات ...بس للأسف ماتحب تلعب فيهم ...حسافه بنات هل وقت ملاقه .
وهوايه القرائه ..كنت ومازلت اعشق الكتاب وريحت الورق ...وشريت وشريت اشكثر قصص بأنواعها كنت انا وبنتي نقراها قبل مانام ..بس في النهايه اتقولي انا ما أحب القراءه ...بس ساعات اشوفه قبل ماتنام اتفج لها قصه تقراها ..
فعرفت ان الهوايات ..والاشياء الي كنتي اتحبنها في صغرج صعب اتغرسينها في نفس اطفالج ..إلا اذا كانو اصلا جينيا يحبونها مهما حاولتي
طبعا هذا كلامي بعد 10 سنوات مصارعه احاول اعلمها اشياء وايد احس انها مفيده او لازم تتعلمها او شي انا احبه يكون فيها ...

المهم انتوا شنو الاشياء الي تتمنونه يكون متواجد او متوارث في اطفالكم ؟

الثلاثاء، 14 ديسمبر، 2010

يوم في روضتي

بصراحة اليوم كنت معزومة بروضة الحلو يسور بروضة العصافير ...روضة ولا كل الروضات سنع وعدال الله يعطيهم العافية من اصغرهم ليما أكبرهم ..
بهذا البوست حبيت اعبر عن شكري وامتناني لهم ...وبالذات أبلات يسور ( أبله ل و أبله ع )..
وعشان ما أظلم ابلات مودو اللي قبل هم أشكرهم ( أبله ر وأبله ق ) مودو لحد ألحين يتذكر أيام الروضة وما ينساها ..
نرجع حق صف يسور ..الحلو والمتميز أنه صف يسور عبارة عن خلية نحل وكان أهداء اليهال حق أمهاتهم قرشة عسل صغيرونه ..و الأبله ما قصرت خلت كل طفل يقول اللي يبيه حق أمه وكتبت كلامه في بطاقة وعطاها أمه وطبعا ورتنا قبلها تصوير فيديو حق اليهال واهم يقولون الكلمة..
درسهم حلو وخبرتهم عن الماء والهواء ..
شكرارشكرا من كل قلبي والله يوفقكم يا رب ...
كان ودي أحط لكم الصور بس حجمهم كبير وماني عارفه أصغرهم إذا أحد يقدر يفيدني أكون شاكره له ..

جنطه السفر


صباح الخير والجوري والنوير :) عندي لكم طريقه سهله لتحضير جنطه السفر وهالطريقه خذيتها أمانة من صديقتي الصدوقه ( أم مود ) .. أنا كنت لي بغيت أسافر أسويلي جدول أكتب فيه مثلا يوم السبت البس جينز مع قميص والاحد كذا مع كذا وهكذا .. بس طبقت طريقه أم مود حق جنطه بنتي .. الصراحه واايد اسهل للسفره ما أقعد ألوي ودور شباصتها ويلا دلاقها مع هالبدله .. أحط بدلتها ودلاقها وشباصتها ابجيس واحد وكتب عليه اليوم الي راح تلبسه :) حلوه الطريقه مو :) وااايد ريحنني .. شكرا أم موود :)

الأحد، 12 ديسمبر، 2010

عرس حنه في الفجيره


صباح الخير والجوري والنوير :) بعد رحله خصب الممتعه .. ثاني يوم معزومين على عرس في الإمارات في إماره الفجيره .. طبعا انتو تدرون ان الاماراتيين عرسهم يكون طول الإسبوع بس إحنه رحنه ( يوم الحنه ) ويوم العرس العادي الي وراه على طول .. بالنسبه لي هذي أول مره أحضر عرس بره ديرتي فكان شي ممتع الصراحه وبنفس الوقت عشان اعرف عاداتهم وتقاليدهم بلعرس .. بس الغريب بالموضوع انا توقعت إن العروس اهي الي إحنونها بس طلع المعرس ! والعروس بالأساس ماحضرت الحفله .. لان قالولي قبلها بيوم كانو امسويلها حفله .. فقلت يمكن تعبانه .. والله مالومها سبوووع بحاله طق ورقص .. إحنه يوم واحد وراسنه يصدع من الطقطقه .. المهم حاطين كوشه أرضيه للمعرس .. وعقب مارقصو البنات .. يا المعرس وزافينه أهله بالرقص والأغاني والتصفق ولفلوس والحلاو الي قاعد يفلعونه فيه من بعيد ههههه مسكين كسر خاطري يوم انفلع بالحلاو .. الله يهداها الي قاعد تقط الحلاو جنها قاعده ترجم .. قطي من فوق على الأقل يطيح ابراسه مو بعينه ويلا ابخشمه .. المهم نرد حق موضوعنه .. فأول مايدش المعرس يكون شايل صينيه الحنه فوق راسه وعقب يشيلها اي احد ثاني .. وييكون لابس مثل حزام اخضر مربوط عالخصر والجتف .. ويقعد بالكوشه ومد ريله فوق الكوشيه عشان يحنون ريله .. بس الصراحه ماشفت هالمقطع من الزحمه .. بس شفت يوم يحط صبعه لصغير يم صبع عمه لأن أبوه متوفي الله يرحمه وعقب تيي المره الي اتحط حنه وتحنيهم مع بعض .. وعقب يمش الحنه ويفصخ لحزام الي قتلكم عنه ولبسه واحد خاطب ... وأترككم مه الصور :)


طبعا لازم أي وحده تروح العرس لازم اتحط حنه .. فحماتي تحنت .. وانا انسووووو اكره الحنه وريحتها



وهذا المعرس بوحزام لازم يمسكونه من الصوبين وزفونه لي الكوشه ( بعد أخاف يهون .. فمافي مجال للنحشه :) )


وهذي صينيه الحنه .. الي فيها شمع ترى مو جوكلت كيك .. هذي الحنه ههههه


وهذا واحد من أهلهم شايل الحنه ( طبعا الرياييل لهم حفله .. فلازم يفرون الفريج فيها مع غناوي ورقص لي الكوشه )

وجذي طريقه تحني الريل



وهذا صبع المعرس مع عمه :)

طبعا مافي نفسنه ( ممنوع اصطحاب الاطفال والاطفال مملكتهم بيتهم ومن هالحجي ) جنهم يقولون الي ماييب عياله يويله ويلااه :) عاد يوم سألت وحده ليش اليهال !!؟؟.. كلش ماله داعي .. قالتلي اذا قلنالهم لاتييبونهم محد راح إيي . . . عاد لاتشوفونهم شنو سوو بالعرس الي باليوم الي وراه .. كان بفندق 5 نجوم والصاله وايد حلوه .. والورد اموزع ابكل مكان وصوب الكوشه .. وقبل لاتيي العروس الورد كللللللله تنتف من اليهال .. الي يقطع الورد ووزعه ولي ياخذه وياكله ولي ينتفه ولي يحذفه .. حرااام والله ليييييش !!! المشكله مححححد يكلمهم الوضع حده عادييييييي والي يايبه عربانة ولدها وطبعا كل وحده ماسكه جنطه البيبي ولي ترضع بنتها ولي اتسكت الي تبجي ويلي ويلي ويلي .. مادري بالنسبه لي كلللش ما حبيت اليهال بالعرس.. بس الصراحه استانست واايد لأن تجربه يديده بالنسبه لي :) شكرا يا أم مروان وأبو مروان والعايله الكريمه كلها الي ضيفتها وحطتنه فوق راسها .. الصراحه ماقصرو معانه .. الي سوو معانه شي كبير الصراحه :) انردها لكم انشاءالله اذا شرفتونه الكويت :)

السبت، 11 ديسمبر، 2010

دعوة حسينية

شخباركم حبايب .....؟؟؟؟
إنشاء الله مرتاحين ....؟؟؟؟
ولو إنها متأخر بس ميخالف باقي جم يوم واللي يحب يحضر ويستفيد ..
دعوة زهرائية لأخواتي وأطفالهم للمجلس الحسيني بحوزة السيدة الزكية سلام الله عليها بمنطقة الأندلس ق 12 ش 15 م 22 ..
ت: 24880999 ...
لمدة 10 أيام ... من الأحد 5/12/2010 - 14/12/2010 ...
وسيكون من 6_8 مساءا ......وهناك مشاهد تمثيلية بالإضافة إلى المحاضرة ..