تنزيلات فيلا مودا

من أمس و أنا أفكر أروح تنزيلات فيلا مودا و له ما أروح ؟ أروح وله ما أروح ؟ يسوى الواحد يقعد من الصبح عشان يتهاوش على جوتي وله جنطه ؟ جنه ما يسوى . بس يا ربي فرصه ، الأشياء بتصير نص السعر ، عاد انا بقوم من النوم يوم السبت ؟؟ و لا و الساعه 9 الصبح ؟؟؟ مستحييييييل ... خلاص بسمع من الناس ، ماله داعي أروح . شدعوه بلقه إلي أبي ؟؟

و صار يوم السبت ، طبعا كالعاده ، قمت من النوم الساعه 1:00 الظهر . بدلنا و طلعنا تغدينا في ماكي . بعد الغدا تسوقنا شوي و ختمناها بقهوه عند لورينزو. مع السوالف إلا بنات خالتي يقولون لي إن إختهم الكبيره اليوم العصر راحت فيلا مودا . أخخخخ نسيت !!!! يوم دقينا عليها جان تقول ما شرت شي لأن ما لقت مقاسها ، بس ما كان زحمه مثل أول ، مقبول ، طبعا gucci تقول ما يندخل ، وأصلا ما شافت شنو عندهم من الزحمه .

طالعت أمي جان أقول لها : ها ؟؟؟ تروحين بعد صلاة المغرب ؟

أمي : إنزين أروح ، مع إني ما أبي شي .

أذن ... صلينا و طلعنا مع السايق ، على بونه زحمه ما راح نلقا موقف . أول ما وصلنا ، شكله الوضع زين ، دخلنا ، لا و الله الحمد الله هدوء ، أشوه بعد صاكين الأغاني عشان الواحد يقدر إيفكر و يقرر ، أول نقطه miu miu الجوتي الأسود ، دخلت متوقعه ما راح ألقاه ،بس لأ ، كان موجود ، حتى مقاسي في . إستغربت!!!! خذيته و إنتقالنا إلى gucci طبعا الجناط مصفوفين كلهم يم بعض ، إلي من نفس الموديل ألف ، بعدها prada وإلي بعده marni و dolce و هكذا . حتى إنتهت الرحله على خير ، و الحمد الله وقت الدفع كان زين . طبعا خلصنا على الساعه 10:20 باقي دقايق و صكون ، عشان جذي ما كان زحمه . بس إلي عجبني هذي السنه ، إن كل محل حاط طاوله طويله عليها كل الجواتي ، و أي مقاس تبينه إييبه من وره (حاطين الكراتين وراهم) . و شايلين كل المانكانات و العرض من الفترينات عشان يحطون فيهم جياس الناس بعد ما إختاروا إلي يبونه ( بالصوره تحت) فكل محل تمرون علي تشووفون جياس جياس .

جوتيي العزيز