الخميس، 31 يوليو، 2008

اليوم وصل الكونتينر

اليوم وصل الكونتينر :) وصلوا أغراضنا ، بدأ الشغل اليوم

طبعا أنتوا تشوفون من بوستاتي إني ما انام مبجر ، كله سهرانه ، فأنا ما أقوم من النوم إلا الساعه 1:00 الظهر أو 2:00 . هذي حياتي . المهم اليوم الكونتينر و صل الساعه 10 . فما شفته لما راح البيت و نزلوا الأغراض ، بس إختي تقول الغبار إلي على الأغراض مو طبيعي ، إلي الفرنسيين لما نزلوا الأغراض إنبهروا ، أو بالأصح إخترعوا ، تقول ينفخون عليهم و يطير الغبار ، جنه كارتون، ما جنه صج من كثره . وااااي الغبار لاحقنه لي هني!!!


المهم بس قعدت من النوم ، تغديت و إستعديت للتنظيف و الشيل و الحط . من الساعه 2:00 الظهر لين الساعه 9:00 المغرب و انا بالبيت . أهلي عيزوا و ردوا على الـ 5:00 . عاد من بد الأيام كلها ، اليوم موووووووووت حر ، خسنا و إحنا نسنع ، و بعد ماكو مكيف ، فتخيلوا الوضع .
و هذي داري بالصوره إلي تحت ، طبعا انا اثاثي ما خذيته من الكويت ، فبنطر لين تاريخ 6.8.2008 (إذا ماني غلطانه) على ما يوصل .

Samuel L Jackson Movie

شكله حلو الفلم ، و يحر بعد

إنني أرى فيونكات

سلسله من Karen Walker Jewelry

السعر: 42 دينار تقريبا

للطلب : إضغط هنا


أنا أسميه طوق و بعض الناس يقولون تاج

من Marc by Marc Jacobs

السعر :21 دينار تقريبا

للطلب : إضعط هنا


تراجي

من Fred Flare

السعر : 2 دينار

للطلب : إضغط هنا

الأربعاء، 30 يوليو، 2008

ميانين !!!

تخيلو .. هذا بالهند .. يحذفون اليهال الرضع من 15 متر لأنهم يعتقدون ان اليهال راح اتصير صحتهم زينه وقويه ابهالحذفه !!

شبيه YSL


Aileenn شبيه YSL
الفرق هذا بـ 27 دينار تقريبا و الثاني بـ 200 دينار
YSL شفته بالتنزيلات إهني بسويسرا ، بس يظل غالي ، صار بـ 100
للطلب (طبعا الجوتي الأرخص ) : إضغط هنا


YSL

الثلاثاء، 29 يوليو، 2008

sakura noodles

رحنه تعشينه أنا وزوجي ابهالمطعم الي في أبو حليفه اهو ياباني وأكله عجبني .. حسافه ماكنت اموديه كامرتي عشان أوريكم اشلون يطبخون جدامكم ونتو قاعدين يمهم .. وفي منه في ليلى جاليري .. وفندق كراون بلازا اللي بالصوره.

فورير



أدري أدري بتقولون ميانين نلبس فرو حق الكويت ؟؟ أدري إن شتانا قصير و مو بارد ، بس الشطاره شنو ؟؟ إنكم تلبسون نص فرو ، أو ربع فرو . يعني مو شرط كووت فرو و تخيسون في ، لأ . تقدرون تلبسون كووت جم قصير او بدون جم ، هذا إلي أنا أسمي نص فرو . و الربع فرو إلي يا القلبه او الجم فيهم فرو . و بعدين إحنا وين بنلقه فرو صجي ؟؟؟ كل إلي بنلبسه شعر خروف وله شعر بلاستك . كلها شهر و بخلص البرد .

السياره الغواصه

ودي أسوق هالسياره :)

برد لولي


شنو هذا ؟؟؟ جنه برد Lolly مال KDD

(مصوره في محل LV بجنيف )

محل صعب



إيلي صعب فتح أول محل له في لندن داخل هارودز بطابق نفانيف السهره . أنا عبالي من زمان عنده محل في لندن!!!

الاثنين، 28 يوليو، 2008

ناطحات السحاب



آآآآه جوتيين ميته أبي أجربهم ، الأول من Giambattista Valli و الثاني من Versace ، مو شرط أهم نفسهم ، أبي شي يشبهم و رفعهم ، و خاطري يكون اللون فوشيا أو أزرق جويتي . وايد أتحلم ها ؟

الجزء2 في منتجع ريتز في البحرين+ جنه دلمون المفقوده

وهذا النادي تبع الفندق اول ما تدخلون راح اتشوفون صاله كبيره فيها جاكوزي
واماكن تقعدون فيها وتطلبون مشروبات بارده
ومسبح كبيره
بعدين في باب تدخلينه اوديج على صاله التمارين الرياضيه واخر الممر السبا وهذا اول ماتشوفونه لما ادشون السبا وبعد ما اتحجزون نوع المساج
بعدين تدخلون الى قاعه تنطرون فيها الي راح تاخذكم الى غرفكم
ممر اخر في الاسبا ..هدوء غير النافوره شغاله بهدوء ولحن هادي

بعدين بعد ما اتخلصين من المساج مساءا يرسلولج الى غرفتج بطاقه شكر ..وطبعا لما اتردين غرفتج راح اتشوفين انهم جهزوها لج السرير ..وحطولج شكلاته الي احبها قلبي =) الدارك شوكلت

لما رحنا البحرين وطبعا احنا بالصيف قلنا خلنا اروح اكوا بارك ( جنه دلمون المفقوده ) جذي سموها ..اهيا حلوه بس الي في دبي احلى( الود وادي) واكبر... كيفو اليهال اقصد الكبار :) عليها رحنا العصر على الساعه 5 وفي ايام الاسبوع فكانت هاديا مع ان اسعارها اغلى من يوم الخميس ..في ايام الاسبوع اتسكر الساعه8 ويوم الخميس الساعه6 . وهذي اصورها


استراحات

لعبه الامواج

كانت رحله ممتعه ..اتمنى ان نالت اعجابكم ..شكرا

نسخه من marni


BCBGirls
نسخه من جوتي marni مال العام الماضي موسم الشتاء - (مارني بالصوره تحت)
السعر : 30 دينار تقريبا
للطلب : إضغط هنا


شفي google ؟؟؟



وييييه إطلعت روحي و انا أدور على هذي الماركه !!!

شفي google خابرته إيصلح حق الواحد إذا كتب غلط ... الظاهر هذي ماركة الجناط طايح حظها ، مو قادر يلقاها . أنا اليوم عجبتني جنطه منهم بس وايد صغيره بقيت اكبر ، قلت يمكن ألقاها بالنت ، قعدت توه فوق النص ساعه و انا أدور ، ماني ذاكره السبيلنغ ، و يوم لقيت صفحتهم بطلعت الروح ، و ضغطت على collection جان الملق يقولون لي لا ممنوع أحد يدخل على هذي الصفحه ، بس وكيل هذي الماركه يقدر يشوف . مالت عليكم و على ماركتكم
لقيت سايت ثاني يبيع جناطهم ، بس جنطتي مو موجوده :(
إلي يبي يشوف هذا السايت إضغط هنا

الأحد، 27 يوليو، 2008

Bubbles Nail Spa


قريت ابمجله bazar عن هالصالون شكلي بروحله اهو طبعا من اسمه متخصص بالأظافر .. شكله راقي ولي يبي يروحله .. ( مجمع جاسم ) بالديره وره صاله سكيتينق ورقمهم 2960929 - 2960930 ولي بشوف موقعهم يضغط على هنا .

تحذير هام !!!!!!!!!!

مساء الخير انا حاطتلكم هذي الصوره علشان تتحذرون من الصبغ لاني الحين صايرلي نفس صاحب الصورة صار شكلي نفس كازيمودو في احد نوتردام خليكم على الحنه لانها طبيعية و انشالله اذا طبت اقولكم شنو قصتي و انشالله تستفيدون منها و تتعضون ...شكرا




منو كله بردان مثلي ؟


أنا أكره البرد ، أثلج بسرعه ، أنا حتى بالصيف أشغل الدفايه ، مو الدفايه الغاز لأ ، الهوا ، اكو بعضكم عمره ما شافها ، بس هذي إلي أستخدمها ، عندي و حده بالدار و بالصاله و بالدوام . فبما أنا ما أحب البرد أدور أي شي يدفيني ، و واحد من الأشياء إلي تحميني من برد الشتاء ، وقت ما أركب السياره و أسوق ...الدسوس . و إلي يتابعون المودا و يبون يعرفون شنو دسوس الموسم ، أقولكم ( الدسوس الطوال ) . أيا كان نوع الخام ، جلد ، صوف ... المهم طوال . شلون بنلبسهم مع جم طويل ؟ مادري ، بس راح نسوي المستحيل في سبيل المودا .

لوزان مره ثانيه

اليوم رحنا لوزان- Lausanne بس هذي المره مو حق أثاث حق تسوق هدوم ، الجو كان عجيب لاهو برد و لا هو حر ، وصلنا الظهر و تغدينا في Bongenie ( مطعم داخل department store ) . أهلي كلو سمك و انا كليت ربيان مشوي . زوين ، إلي إينن و رايحيين عشانه... الحلو . (شوكولاه فوندو) مالتهم إحنا نعتبرها أحلى فوندو بالعالم ، بعد أهم ما يسمونها فوندو ، يسمونها (موالو شوكولاه ) ما أعرف أكتبها بالفرنسي . بس شي مو طبيعي ، إلي بيي جنيف أو سويسرا لازم يجربها.



بعدها طبعا تسوقنا و ما ردينا البيت إلا على الساعه 7:00 تقريبا . بالطريج شفنا خيام وايد ، في منطقه يم Nyon لما دورت بالإنترنت و له أكو فرق موسيقيه تيي إهناك إيغنون صار لهم 6 أيام ، باجر آخر يوم لهم. إسمه Paleo Festival.

شفت جدول الإحتفال و منو بغني ما عرفت و له أحد . ما عرفت إلا Vanessa Paradise إلي مره حطيت لكم إغنيتها :) محد حبها :) ردوا شوفوها مره ثانيه يمكن تحبونها ألحين :) إضغط هنا للأغنيه



شارع من شوارع لوزان



الخيام

السيايير


يكون يعني متفننه حاطه الصور جنهم شريط ... إيلوعون الجبد بحط لكم جم صوره كبيره عشان يبينون



فيتامين C

برتقالي برتقالي برتقالي ، صج إن هدوم الشتاء غالب عليها الأسود و الرمادي السنه ، بس إلي يبي لون ، هذا لون الموسم . شكلهم شوي شوي بزهبونا حق الأحمر بالصيف ، لأن الاحمر صار له فتره منقطع ، يمكن 3 او 4 مواسم




السبت، 26 يوليو، 2008

بريعصي ابيتنا :(

وانه قاعده بالصاله وقاعده أشوف فيلم وحدي مندمجه .. وماوعه الا شي لفت نظري فوق بالطوفه يتحرك .. الا ( بريعصي ) طلعت عيوني وانه اشوفه .. اشلون قاعد يتمشى وحدددي خفت ان يطيح علاي وكمل طريجه ونخش بالفتحه مالت الي تشفط المكيف ( ماعرف اسمها ) :).. فقلت اهدي نفسي وييب كامرتي.. وصوره :)

الجمعة، 25 يوليو، 2008

فندق ريتز في البحرين

خذيت اجازه من الدوام ..وحبيت اروح مكان ارتاح في واغير جو ..فشفت بالنت مواقع حجز للفنادق انا ومرت اخوي ..وشفت هذا الفندق وعجبني ان فيه سبا ..وراقي ..قلت يله البحرين =)
طبعا اول ما وصلنا استقبلونا بعصاير ..وككاو ..وقهوة عربيه وتمر ..على ما ناخذ المفتاح
اللوبي كبير وااايد وفخم ..وكله رجال اعمال ..وناس راقيه وكشخه وهادي وايد ..وبين فتره وفتره اصير عزف على البيانو ..عزف هادي ..المهم رحنا طابقنا كان الثالث مطل على المسبح
الاثاث اسود بذهبي ..احسسج بالفخامه ..والمني بار عادي مثل كل الفنادق الا شي واحد مافي غلايه شاي ولا شاي ..في قهوه وماكينه اتسويلج جميع انواع القهوة


دوره مياه ..بلونين الاسود وذهبي



شكل فندق من ناحيه المسبح والبحر


وهني قسم الشاليهات التابعه للفندق ..واسمونهم فلل (3 غرف نوم)


وهذا المسبح الخارجي( وفي مسبح داخلي تبع السبا ) وحديقه وفي مقهى بعد والعاب للاطفال


وفي جزيرة صغيره تابعه للفندق ..وهذا الجسر الي يوديج للجزيره او في سياره صغيره تاخذج اهناك


وهذي الجزيره ..تقدرون اتروحون لها سباحه ..طبعا الي يعرف يسبح ..وفيها كشك للمشروبات البارده ..


طبعا انا وقروبي (زوجي وبنتي واخوي ) انحب السباحه والبحر فكان وقتنا كله بالفندق

وحتى كان اكلنا بالفندق ..مانبي نطلع منه


لا بعد العشا طلبناه بالغرفه ..من كثر التعب

اما السبا فخلوها للمره اليايه ..انزل الصور ..اشوفكم