الأربعاء، 30 ديسمبر 2009

امي الحجيه


بالامس كانوا معي و اليوم قد رحلوا و خلفوا في سويد القلب نيرانا


امس توفت يدتي الغاليه ... و الواحد ما يحس بغلاتهم الا بعد فقداهم

و لي ذكريات معاها واايد ......منها


كانت دايما تقولنا هل شعر على الناس الي ما تعجبهم خلفت البنيه :


بنيه على بنيه ولا قعودات بطاله .. بنيه تطحن القفه وبنيه تعاون الجار ..وبنيه تقول يايمه لفونا اليوم خطار


و كانت الله يرحمها تضحكنا اذا قالت : امك ثم امك ثم امك ثم اباك في سورة يس و تصمم على كلامها

و دايما كانت تقولنا اذاقبلنا عليها : جدتي يا جدتي احن علي من ابي يلي كل حاجه تيبينها الي


بالنهاية شحجي و شقول عنج يا يما من غلاتج ما توصف يا حبيبه بس الحمدلله رحتي لارحم الراحمين و انشالله قبرج يكون روض من رياض الجنه

يارب تغمدها في فسيح جناتك

الثلاثاء، 29 ديسمبر 2009

جربتو هذا الكب كيك

شفته في الجمعيه ..وشريته طلع يحليله صج كب كيك اصغار حيل بس حلو النوع الي احبه ثقيله وتكفي وحده تاكلينها المهم ..حبيت اقدمهم لاهلي بطريقه سنعه فحطيتهم في صحن مثل الصوره تقريباانواع الكب كيك بالطعم وله الشكل واحد

بطلت 3 انواع من الكب كيك وصفيته على هذا الشكل
رشيت عليه ككاو بودر


وهرشليز السائل وككاو صغار
وصار شكله لذيذ اكثر =)




فكرتي فكرت ادلع نفسك على يوم ؟؟؟

أنا من الناس أحب أدلع نفسي ...كل مره أفكر في شي ...طبعا درت على أسباهات الكويت كلها ..ومتعه والله جربو ..مره رحت مع الي احبهم صج صج كان يوم لا يونسا ...ومره رحت ابروحي ...وكان بعد وناسه طلعت من السبا وحلجي منشق من الوناسه مايتسكر ..
وهذي المره ..دلعت نفسي في ريوق فاخر ودلعت وتمتعت ..إخترت مجمع هادي جدا 360 وكان كفيه فرنسي معروف فانشو مادري صح جذي اسمه ..
ريوقه حلو وطريقه تقديمه اروع ..هدوء ..مثل مايقال جلست مع نفسي ..لا بل مع افكاري
ها تبون اتجربون ..إخذو إبريك يالله وتمتعوا
أخليكم مع الصور
متعه =)


الاثنين، 21 ديسمبر 2009

التاج من shaymooona

مشكورة شيومه ... بما اني اصغر وحده فيهم و كلوني المهمة :)
اسمك واسم مدونتك؟
اسم المدونة :fyonkat
اسمي : sun shain
احب الالوان؟ الايام؟ الارقام؟
حاليا اللون البرتقالي \يوم الثلاثاء \4
برجك وتاريخ ميلادك؟
القوس\ 16-12-1984
اهم مميزاتك؟ واهم عيوبك؟ وماهى الصفه التى تتمنى ان تتوفر فيك؟
اممم مميزاتي : صاحبة ابتسامه مشرقه :)
عيوبي : سريعه -متردده - حنانه ... و الله يستر على الباجي
الصفه الي اتمناها : الصبر و الحكمه و الصمت
ماهو مكانك المفضل؟
مكتبة جرير - فيرجن
ايه هى هوايتك المفضله؟
القراءة و الالعاب الالكترونية
ما المقوله اللى تؤمن بها؟
مقولة الامام علي (ع):
((الناس صنفان اما اخ لك في الدين او نظير لك في الخلق))
اجمل هديه قدمت لك من مين؟
كل هدية تقدم من شخص عزيز اعتبرها جميلة و قيمة
اسعد يوم فى حياتك؟ واتعس يوم فى حياتك؟
يوم زواجي
يوم ولادة بنتي زهره
يوم رحت فلم new moon
اما تعيسه فهي ماضي وراح و ما احب اذكره
موقف طريف لا ينسى من ذاكرتك؟
موقف اختي : لمن كانت صغيرة كانت وايد متاثره في ماروكو الصغيره اهيا و بنات خالتي الثنتين في حلقة تنحاش او تزعل ماني ذاكره فقرروا يقلدونها
فقعدوا يدورون فلوس مالقو الا توامين فطلعوا دارو في الفريج لمن قرصهم اليوع ردوا البيت
معاك ثلاث وردات لمين تهديهم ؟
عائلتي
فيونكات
الكون
معاك ثلاث رصاصات على من تطلقهم؟
اعداء الحرية
الجهل
الفقر
ايه رايك فى الحب؟ ولمن تقول اجمل كلمه حب؟
من اسمى معاني الحياة التي وهبها الله عزوجل لنا نحن المخلوقات
طبعا زوجي و كل حبايب قلبي
المراه فى نظر الرجل ......... أكمل ؟
نصف الحياة
الرجل فى نظر المراه...الآمان ..........أكمل؟
و استقرار
ماهو اسعد خبر سمعته هذا العام؟ وماهو اتعس خبر؟
امممم راح احتفظ في لنفسي
اتعس خبر : ما احب اتذكر الاشياء السلبية
لمن تهدى التاج؟
bhr.qadsaweya
اقصوصه
Sn3a

الجمعة، 11 ديسمبر 2009

الحمدالله على نعمة الكهرباء


في يوم من الأيام طفت الكهرباء عندنا بالبيت ، و كان ليل ، فشبينا الشموع انا و أختي و قعدنا بالصاله ننطر الكهرباء ترد ، وهذا الحوار إلي دار بيني و بينها وقتها ...

أنا: ها ها ها عندي laptop أتسلى فيه على ما ترد الكهرباء
أختي : شنو قاعده تسوين ؟
أنا: قاعده اكتب بوست ، بعد شوي بنزله
أختي: شلون ؟ ماكو كهرباء يعني ماكو إنترنت!!
أنا : أووووه نسييييت ، عيل بروح أسوي شي مفيد ، بروح أتسبح
أختي: أكيد الماي ضعيف ، ماكو مضخه ، و فوق هذا شلون بتنشفين شعرج ماكو سشوار
أنا : ياربي ، شنو أسوي ؟؟؟ إييي أنا عرفت ، خل أشبك على الـ Blackberry و أقرأ لك تعليقات البنات إلي كتبوها في البلوق، أووووووه شفي بطئ ؟ مو راضي يدخل!!
أختي : تبين أييب الـ ipod مالي أسرع؟ أحسن من الـ Blackberry شاشته صغيره
انا: شلون ؟؟؟ مو ماكو إنترنت
إختي: أوووه نسيت ، إنزين بدال لا إحنا قاعدين على ضوء الشموع خل نفتح الشتر إيينا ضوء من بره ، أسفر
أنا (وعلى وجهي إبتسامه عريضه) : الشتر على الكهرباء شلون بتفتحينه :)
مو جنه إنام احسن ؟

الثلاثاء، 8 ديسمبر 2009

جو ولا أحلى ..






مساء الجو الشتوى العجيب .. و الصباح الي ما يخليك ودك اداوم .. و تروح تقعد بكافية و تتريق و تتمتع بالبراد .. :)

بس ما ادري شفي الجو هاليومين مرطب و حدة شكلة خون فينا .. و الأهدوم الشتوية اليديدة تنطر من يبلسها ..


بس من جم يوم قبل هالرطوبة .. العجيبة .. زرت cafe living room .. الي بالمارينا ويفز . . رايحة مع بنات حلوين ..


و وقت العصر .. و الهوا العليل الي في نسمة برد عجيبة .. وحدة من صديقاتى حست برد فا قمت تتغشمر مع الويتر ..


قالتلها طلبها .. و بعدها قالتلها ما عندكم blankt !! أنا مع الي معاي اطلعت اعيونا ؟؟ من صجها blankt ?? شلون ؟


الصدمة .. تقولها ( yes we have :) ) جان تقوم و تيبلنا .. :)


فكانت القعدة صج و لا اروع hot coco و برد و لحاف .. و منظر اينن مع غروب الشمس على البحر


خلت الفكر يسرح بعيد بعيد ...


الي ما راحلة انصحة يروحلة بس يختار الوقت قبل الغروب .. :) ( طلعوا لا تقعدون بالبيت .. استغلو الجو الحلو)














الاثنين، 7 ديسمبر 2009

fatto صغيرة .. :)


بفضل من رب العالمين .. رزقت فيونكتنا الحبيبة fatto بفيونكة صغيرة .


الف الحمدالله على السلامة و يجعلها من الذرية الصالحة

السبت، 5 ديسمبر 2009

تصدقوني ؟؟!!!!!!!


رايحة عالراحة بشتري حق مودو يوم الخميس (قبل أمس) ملابس حق الروضة ( توني متفرغه ) ...وكانت الصدمة الكبرى كل ما أروح مكان يقولون لي ماكو ملابس وخلصوا ..أول مره ادري إنه ملابس الروضة تخلص ؟؟؟؟؟!!!!!

ولا ولو يكون فيه ما أحصل قياسه او موديلات معينة ...؟؟؟؟؟؟

الحمد الله شريت له ..بس ناقصه جم شغله :)...بروح بعد شوي أشوف له ...بس ما حصلت له البدله كامله من مكان واحد من كل مكان خذيت شي:)

توبه وآخر مره.. مره ثانية من مبجر بجهز أغراضهم :)

اللي لحد الحين ناطر اقوله ما راح تحصل شي :)


وأخيرا بداومين الكتاكيت باجر:)....عسى الله يحرسهم من كل شر آمين :)