السبت، 31 مايو 2008

لشعر كثيف

الي يبي يسير شعره في ( فوليوم ) وكثيف يجرب يحط ابشعره أول ما تخلصين من الشاور هالمنتج من ( بودي شوب ) وبعدين تسيشوريين شعرج .. والمنتج الثاني من ( لوريال ) الي ماله خلق يسشور شعره يحط فوم .


شفت الصور وتشوقت أكثر..




ناويه هالشهر إنشاء الله نروح العمرة عشان ماديشا حبيبي متشوق على بيت الله من أول ما رديت من الحج وهو يقولي يماه ليش ما وديتيني بيت الله ..وكل ما شاف صورة بيت الله يبوسها ..قلت عاد ما أبي أخلي شوفة بيت الله بخاطره وبوديه مع أخوه يشوفه بعيونه ..عاد وأنا اتصفح إيميلي شفت صور حق الحرم النبوي وتذكرت الحج وروعته والحرم وحلاة القعدة فيه شوفوا الصور أكثر من رائعة بصراحة عند الحرم النبوي الشريف الأجواء غير وغير أصلا الجو داخل أسوار الحرم غير بره..المدينة شرحه وتريح القلب والنفس ..إنشاء الله اللي ماراح يروح واللي راح ذكرته بالأيام الحلوة ..وإنشاء الله أوافيكم بالصور لما أرد من العمرة إدعوا لي الله يسهل علينا أول مرة باخذ الكتاكيت معاي بالسفر ..:)

Roberto Cavalli dress

لقيت نفنوف من Mango مقلدين في Roberto cavalli ، أدري مو نسخه منه ، بس مستوحينه منه ، ويعني حق عيد ميلاد و له أي حفله صغيره ، حلو ، و أدري الصوره خربوطه مالت mango بس شسوي ضيج بغرفة التبديل ، هذا إللي طلع معاي .

mango شي و أربعين دينار (ما أذكر بالضبط)

Roberto cavalli يمكن بألف دينار

ليش التعذيب يا أم مود

شفت الصورالي دازتهم حق ايميلي.. وحدي اتشوقت ..تدرين اني ما أقدر اكل هالأشياء ابسبه الريجيم .. ليش ؟ ليش يا أم مود العذاب هذا :) شوفو الصور وقوليلي اتشوق ويلا لأ ؟؟

Missoni Hotel in Kuwait


ذاك اليوم قاعده أفكر ، ليش لكويت ما عندها أوتيلات نفس الاوادم ، بدبي كل يوم يطلع أوتيل أحلى من الثاني ، و إحنه ما عندنه واحد حلو وله غريب ، واااااي نكسر الخاطر ، بعدين جان أذكر أنا مره قاريه إن بسوون أوتيل Missoni في الكويت ، صج إصار علي ؟
قعدت أدور بالنت لمه وصلت حق جم معلومه ... يقولون ... إن راح يكون في مجمع إسمه (سيمفوني - symphony) بالسالميه ، مقابل الجامعه الأمريكيه ، و أن الأوتيل مكون من 20 طابق في تقريبا 200 غرفه ، و راح يكون في بعد مطعم ، نادي و spa . و في نفس المكان بكون في مجمع تجاري و بعد مكاتب . و يمكن يمكن يفتح في الربع الثالث من سنه 2008 .

و هذوله بعض الصور عن شلون راح يكون شكل الاوتيل من داخل





و الصوره الأخيره حق مجموعة missoni للمنزل ، وايد أحب ألوانهم و تركيبه الأشكال الهندسيه مع بعض

و إنتهى season 4 من Lost


شي مو طبيعي ... الحلقه فتاكه ، عجيبه ، إتينن ، كانت مدتها ساعه و20 دقيقه ، جاوبت بعض التساؤلات ، و أضافت بعض التعقيدات. انا ما أقدر أتكلم عن آخر حلقه ، يمكن في بعضكم ما شفها بعد ، بس الصراحه هذا الـseason أحلى season لـ lost . لازم لازم يفوزون بالـemmy السنه اليايه ، ويعطونها حق الكتاب مو الممثلين ، القصه تعقد ، لو شنو محد يقدر يفكر فيها ، ناطره على نار للجزء الخامس. شكلي برد أطالع الحلقات مره ثانيه ، عشان أفهم عدل.
ذاك اليوم أسأل رفيجتي : وين بتسافرون هالصيفيه ؟
رفيجتي : مادري والله يمكن نروح أستراليا
أنا : شطاري عليكم أستراليا ؟؟
رفيجتي : يعني تغيير ، مليت من اوروبا
أنا : جنه أستراليا مليقه ... (بعد التفكير)
وله أقولج ، روحوا أستراليا ، يمكن إطيح فيكم الطياره و أشوفج في season 5 في lost :)
ملاحظه : متابعين lost راح يفهمون النكته

الجمعة، 30 مايو 2008

طائرات ورقيه بالمسيله

اليوم العصر و إحنه رادين من الشاليهات و له نشوف أشياء إطيربالسما ، مو مبين شنو ... أول شي عبالنه دعايه حق محل وله مطعم ، قربنه أكثر وله ناس قاعدين إيطيرون طائرات ورقيه ، طبعا أنا كنت قاعده أسوق ما أشوف وله شي ، قلت لهم (بوقف أبي أطالع عدل شنو هذا ؟) كانوا في براحه يم المسيله ، وقفنا و قعدت أصور ، وله الطائرات مو ورقيه كانوا من قماش على أشكال حيوانات ، شكلهم إيشوق ، ألوانهم وايد حلوه ، مادري منو هذوله الناس القاعدين إيطيرونهم ، بس ونسونه و الله . و شكلهم عجيب من الشارع .





الجوثن



الي وده يسوي ( بف ) بالبيت يروح الجوثن ويشتري مشط البف الي لازم يكون الشعر الي طالع منه طويل وقصيرويابس .. فأنا شريت نوعين نوع الي جنه مشط والنوع الثاني المعتاد بالصالونات بس هذا مايستخدمونه وايد بس بالنسبه لي زين .. جربو اشوراكم .

شوفي جنطتي الي أحبها يا ماستر

انا شريت ياماستر جنطه حلوه بالنسبه لي ..يمكن ماراح تعجبج لأن لونها وردي (: وطبعا مو ماركه فما أقدر استخدمها حق السفر أخاف اتشقق علي .. فأستخدمها حق اذا بروح الشاليه ويلا البر ويلا اي مكان ..بس في الكويت . وشريتها من الإمارات تقريبا ماطلعت علي اب 10 د.ك وفي الوان حدها عجيبه وأشكال وايد حلوه .

أمس كان تعذيب في فيلا مودا - الجزء الثاني


تكمله رحلتي في فيلا مودا ... لقراءه الجزء الاول إضغط هنا

الله يسلمكوم أنا صارلي يمكن 4 سنين و انا أدور جنطة سفر حلوه (ترولي) و ما عجبني و له شي أشوفه بالسوق ، و لمه ألقه شي حلو ، يطلع إبـ 500 دينار و له 700 و أتحسف أشتريها . و ذاك اليوم في فيلا مودا لقيت ترولي حلوه ، بس محتاره أخذها و له لأ ، سعرها 370 تقريبا ، من Anya Hindmarch ماركه إنجليزيه ، بالصج أحلى من الصوره .

الشي الثاني إلي لبسته و عجبني لونه جوتي prada و مستانسه إن مقاسي موجود على الرف ، ماله داعي أنادي الريال إييب لي، بس بعد ما لبست و شفت روحي بالمنظره جان أكتشف إن يشبه جوتيي الـ prada مال العام ، وااااي أشوه مو إختي معاي و له أمي جان هاوشوني و عيبوا علي ، يقولون إنتي كله تشترين نفس إللي عندج و ما تحسين ، و لا للعلم شاريه بعد واحد يشبها من zara :)

فسخته ، و بكل إحترام طلعت من المحل

prada الجديد - صيف 2008

Parada القديم - شتاء 2007

هذوله الجواتي بعد كانوا يايبينهم ، أموت و أعرف منوا بيشتريهم إيلوعون الجبد

( آسفه إذا جرحت مشاعر إللي شاريه منهم )

هذا جوتي النجوم بعد موجود في YSL بس واحد يشبها لأن هذا بالصوره لاف على الكعب و الريل مفصوله إذا تقدرون تشوفون

بعد شفت جنطه من dries van noten مت عليها بس أدري لو شريتها ما راح ألبسها لأنها كلش مو عمليه (clutch) مو مالت كل يوم ، آآآآآآه يا قلبي ، إللي بيشتريها علي بالعافيه سعرها 209 دينار . ماكو صوره ، هذا إختبار إنتوا لازم تعرفون انا عن شنو قاعده اتكلم ... (أو يمكن ما أبيكم تعرفونها عشان محد يشتريها ، أنا ليمه ألحين قاعده أفكر:) )

الخميس، 29 مايو 2008

تعاون Top shop مع Alice McCall





أول نفنوفين إيننون .... ما أدري إذا و صلوا الكويت و له لأ ، بس إللي يلقاهم ، سيده خل يشتري بدون تفكير ، أسعارهم تقريبا 28 دينار أو 30 . للطلب بالإنترنت : Top shop

Anna Sui فتحوا بالأفنيوز الجزء اليديد



ستريت & كيرلي


بما اني أحب ألعب ابشعري وحب أسوي فيه كلساع حركه .. فكلا اتلاقوني عند محلات الجوثن والأماكن فيها السيشوارات .. فمن كثر ماعندي وأجرب أنواع وايد من السيشوارات والاستريت والكيرلي .. لقيت أحسن شي عند ( كليرز ) .. عندي الحين 4 أجهزه ستريت خذيتهم من كذا محل بس أحسن مكان اهو كليرز .. بس مو أي واحد .. سألو الي تستخدمونه حق الشعر الرطب والجاف .. نادر ماتحصلونه لأن يطيير ابسرعه ويتله فتره انقطع والحين ردوه .. حددده عجيييب .. والشي الثاني أجهزه الكيرلي خذيت 3 ضعيف و وسط ومتين .. يسوي الشعر شي عجييب .. لازم اتجربونهم .واسم ماركه الستريت remington wet 2 straight وتمنى اني تعطوني النتيجه .

macdonalds

وصلي ايميل وستغربت ان طلع في توصيل .. بس لمن سألتهم قالو بس في الديره ( مدينه الكويت ) حق الشركات فقط . جان زين يوصل همن حق المناطق .

كرسي مضحك


إسم الكرسي : Cosy chair
تصميم : Sabine Müller and Andreas Quednau of SMAQ, New York
يقولون وصلوا بالـwater heater و الماي الحار يمشي في البايبات و يدفي المنسدح علي !!! شلون ما أحترق ؟

الأربعاء، 28 مايو 2008

امس كان تعذيب في فيلا مودا - الجزء الأول

واااااي مادري شنو أسوي في روحي :( أمس رحت فيلا مودا (بالمنطقه الحره) و كل شي كان حلو ، انا ممنوعه عن الشراء ، و السبب إني ما خليت شي هذي الصيفيه ما شريته ،، أمس بس كنت أطالع ما أقدرأشتري و له شي ... بس تدرون شنو الخطه ؟ التنزيلات . حرام الواحد ما يشتري في هذي الفتره ... مو صح ؟ إي هذا هو الوقت المسموح في الشراء ، وقت التنزيلات ، ممتاز ، كل إلي علي أسوي ألحين إني أحفظ الأشياء إلي أبيها و أقايس ، عشان وقت المخامط بس أأشر على إللي أبي و أقولهم شنومقاسي.
عبالكم حفظت شي ؟ إفتر راسي ... مادري أنا أصلا شنو أبي من كثر الأشياء . فيلا مودا تقريبا نزلوا كل التشكيله الصيفيه ، خلاص ما أظن أكو شي بعدها . كل إلي شفته بالإنترنت نزل ، فأمس جني رايحه متحف ، أتعرف على الأشياء إللي قريت عنها و شفتها بالمجلات .



جوتي رقم (1)

أنا امووووت على جواتي gucci وايد مريحين بالنسبه لي ، بس هذا مثلا بالصوره يبين وردي عادي ، بالصج لونه جنه حلاوه ، يشب ( ما أقول فسفوري) بس مو مطفي مثل ما مبين ، أظن كان سعره 180 دينار ، ما اذكر الصراحه.

جوتي رقم (2)

وقعت في غرامه ... آآآآه شوفوا خياط الجوتي من وره مع الكرستال الملون على الكعب ... حسافه كان إيعور باللبس ، ما ينمشي في كلش.

للأسف كنت براويكم شنو شفت بعد ، بس ماني لاقيه صور للأغراض ، فراح أكمل لكم القصه بعدين إذا لقيتهم . باي باي .

ملاحظه : فيلا مودا راح يفتحون محل بروحه بس حق Dries Van Noten و بعد محل لـ Tom Ford بس أظن هذا رجالي ، كله بدل ، قريت عنه مره إن توه فاتح في نيويورك .

شنو هذوله الجناط يذكرونكم في ؟

أنا ذكروني في نفانيف Prada ملوت الـresort collection 2008 ، وايد حلوين ، جان زين أقدر أشيلهم ثلاثتهم مع بعض :)
السعر : تقريبا 13 دينار كويتي

للطلب : silk clutches


الثلاثاء، 27 مايو 2008

منو يقص شعره بالبيت ؟


الصراحه انا اقص شعري بالبيت (بس أواسيه ) والكل مستغرب مني .. وايد سهل مايبيله شي ومتساوي يسير .. مالي خلق اطق درب لي الصالون عشان اواسيه بس .. فقلت اتعلم وفعلا تعلمت والحين صارلي 4 اسنين وانا اقص شعري ابروحي ..
الطريقه : اخذلي شاور وافرقه نصين ومشط كل جهه واقص نص اليمين وبعدين نص اليسار وبس :)

شاليهات خيران كبيره واسعه

هذي شاليهات الخيران اليديده فلا وايد حلو ويكفي 6 اشخاص غير الماستر والاطفال وفي غرفه خدم حق 2 ومافي مفتاح كرت ومدخنه وحديقه اصغيره خاصه شوفو الصور ..فوق 3 غرف وحمامين ومطبخ تحضيري وتحت غرفه لشخصيين وحمامين ومطبخ مفتوح على الصاله كبيره .
بس عيبه انه مفصول بشبك حديد عن باقي الشاليهات يعني مافي الا مدخل ومخرج واحد حق كل الشاليهات ..كبر ابعيد عنه اشوي ومافي العاب حق اليهال ..والبحر الخور العمي كله جتسكيات طايره والماي اشويه وفي المقابل اطالعون شاليهات ثانيه ..بس حق اليمعه وناسه