الخميس، 17 يوليو 2008

صبغ أظافر برتقالي



قلت لكم من قبل إني قاعده أدور على صبغ أظافر فسفوري ، حست الكويت كلها ما لقيت إلي أبي ، لما صدفه شفت وحد بالسينما حاطه صبغ برتقالي فسفوري ، واااااي كان عجيب ، من بعد ألف متر تقدرون تشوفونه، ولا إهيه بعد كان لونها برونزي و لابسه نفنوف أبيض فتخيلوا شلون الصبغ طالع عليها ، إينن، رحت لها و سألتها من وين ماخذه الصبغ ، الله إيعافيها قالت لي مسويته عند N-Bar إلي في غاليريا 2000 ، انا ما صدقت خبر و من ثاني يوم رحت لهم ، و سيده طرت صوب الستاند مال الأصباغ ، و عيدت يوم شفت جميع الألوان الفسفوريه موجوده ، البرتقالي و الأصفر و البنفسجي و الوردي ، يمعتهم كلهم و رحت عند الكاونتر ، و قلت لها أبيهم كلهم ...

جان تقولي المره :sorryyy, we don't sell these

انا : Noooooo

المره : we are going to bring from them next week

أنا : Ohh realy , ok then , I'll give you my phone number and call me when you get them

و خذوا رقم تلفوني ، و مر الأسبوع و له أحد دق ، قلت ما يصييير ، أنا خاطري في ، بس ماني ناطره ، باخذ موعد , يسوولي .

للأسف كل ما أدق ، fully booked وله أنا ما يكون عندي وقت .

اليوم على الغدا ، أشوف إختي حاطه صبغ برتقالي ، نوعا ما فاقع ، إستغربت !!!! من وين يايبته ؟

شان تقولي عندنا من 3 سنين تقريبا و محد إستخدمه

وله قطيناه ؟؟؟

أكيد ألحين بلقاه ثقيل و ما ينحط .

بعدين تذكرت ، مره قاريه بمجله إن إذا عندج صبغ قديم و صار لزج و ثقيل زيدي شويه أسيتون و رجي و يرد مثل ما كان :)

و سويتها و الصبغ طلع عجييييب ، إيدي ألحين تشب :)

صج إن حلو بس ذاك أحلى ، عشان جذي لن أفقد الأمل و البحث جاري عن الصبغ الفسفوري

هناك 6 تعليقات:

Pink GirL يقول...

عاد اتصدقين امي الله يرحمها قبل جم سنة لما هبوا بالفسفوري شارية لي من امريكا شكثر ولا حطيت منهم شي وبعضهم اختربوا وقطيتهم والباقي بالكبتات الفوقية مادري عنهم اذا تبينهم اشوفهم لج ومري اخذيهم :)

DanDash يقول...

تدرين وين بتلاقينهم
بس بشرط لا تضحكين

لقيت بسرداب الشايع شكثر و خذيت منهم وردي فسفوري عجيب

joy يقول...

انا مادري انج تبين عبالي شريتي
انا توني شارية من ببلز سبا ببرج جاسم الوان خيالية زووووووووووووووغغغغغةةةة
بتترس راسج وادري هذول اللي تبينهم
تراهم ليميتد بس حق هالصيف

Blue_ribbon يقول...

اذا تبين نفس صبغ أظافر N-bar تطلبينه من النت :)
هذا السايت مالهم

http://www.essie.com/

و تقدرين تطلبينه من امازون بعد

master يقول...

signorina:

أنا لو أقدر أطلب جان طلبت من زمان
بس مو يقولون ما يصير تطلبين شي سائل من المكياج و هل أشياء ؟؟

Blue_ribbon يقول...

عادي تقدرين تطلبينا من مركز سلطان jusk Ask و اهما ايبونا لج