المشهد الخامس من رحلة مشهد :) والأخير

مجمع الماس شرق مثل سويت فاكتوري اسمه كاندي مكس .. ( عندهم موقع على الأنترنت اللي يحب يدش )
واحد من المحلات داخل السوق
هذا مطعم بوف مثل ماكدونالدز
طبعا الصورة غير الحقيقة :)

طلبنا ناجتس حق اليهال وإحنا تشكن فليه :)سلطة ما أنصح أحد يجربها ما أدري شنو طعمها والصلصة لا تعليق هذا كرت مدينه الالعاب ألعابها حلوه جنها طفل المستقبل
حليت عقب الغدى بفالوده لذيذه :)المطعم اللي تغدينا فيه في نيشابور ما عجبني :)

المحل اللي شرينه منه الكفرات
حمودوه أختار اللي على ميكي..ويسور أخذنا له على توم وجيري :)
وعدنا إلى الوطن الغالي :)

هذا البوست راح يكون المشهد الخامس والأخير من رحلتنا الحلوه حق مشهد المقدسة ..ونكمل حديثنا وعقب رحلة شانديز عطونا يوم free وقررنافي هذا اليوم نروح مجمع يديد عندهم ما أدري صار له شكثر هالمجمع فاتح المهم اسمه ( الماس شرق ) يعني حلو ومرتب بالنسبه حق مشهد وفيه مكان مثل طفل المستقبل حق اليهال يلعبون وطبعا أسعاره ما تفرق عن الكويت شي وداخل المجمع فيه مطاعم إحنا جربنا مطعم وجبات سريعة عندهم اسمه بوف يعني مثل ماكدونالدز بس ما في مقارنة طبعا بس يعجبني أنهم قاعدين يطورون نفسهم لأنه عندهم وايد سواح حلو إنهم يواكبون الموجود ..وبعد شقولكم كليت هناك فالوده حلو وايد أنا بصراحه احبه وايد بس حسافه طول الأسبوع ما كليته إلا مره وحده ..وبس اليوم اللي بعده كانت رحلتنا حق نيشابور زرنا ( محمد وإبراهيم المحروق عليهم السلام ) بالإضافه إلى المرور بالباص فقط على أبو الصلت الهروي ..ونزلنا عند بيبي شطيطة ...وكانت هذي الرحلة من الصبح لما العصر يعني تغدينا بس ما توفقنا بالمطعم ما كان حلو بس تغدينا وعقب ردينا وريحنا وكنا معزومين على مولد فاطمة الزهراء ( ع ) في حسينية قريبه على الفندق بس ما توفقت ورحت لأن الكتاكيت نايمين من التعب خليتهم يشبعون نوم وعقب رحنا زيارة حق الإمام وظلينا لما صلاة الفجر صلينا وردينا ( الحمد الله ) الجو واااااااااااااااااااااااااااااااااااااااااو بارد وحلو وينن ..وبس اليوم اللي عقب هم كان free وكان يوم يمعة وهناك عندهم الأسواق كلها تسكر عقب صلاة اليمعة فرحنا بروحنه مره ثانية وتغدينا في شانديز وما ادراك ما شانديز :) وبس واحنا رادين إذا تذكرون قلت لكم كنا ندور محل يبيع كفرات حق الورعان شفنا محل ونزلنا عنده كان تقريبا نفس اللي نبيه بس شوي كفراته أصغر من اللي نبي بس خذيت حق اليهال كل واحد كفر ( وطبعا يوم سألناه عن ذاك المحل قال أهوا اللي يوزع طبعا ما اعتقد صج لأنه الحجم غير بس زين حلو كان ) وبس ردينا ارتحنا شوي وعقب قعدت عدلت الجنة للإستعداد للعودة للوطن الغالي الكويت لأنه الحملة طلبوا منا تسليم الحقائب الساعة 11 بالليل عشان الوزن ..وماكو والله ضبطنا الشغل وسلمنا الجنط ونمنا وقعدنا الصبح طيارتنا كانت الساعة 12:30 الظهر وعدنا للوطن بالسلامة ..عسى زيارتنا مقبولة وما تكون الأخيرة ...احبج يا كويت :)

السموحة على الإطالة وإنشاء الله استمتعتوا معاي برحلتنا حق مشهد ..؟؟؟؟

عندي صور وايد بس ما قدرت أحطهم كلهم ..بس إنشاء الله الصور اللي حطيتهم يكونون كفوا ووفوا :)

اللي يحب أشوف المشاهد اللي فاتت :

المشهد الأول ..المشهد الثاني ..المشهد الثالث..المشهد الرابع..

وسلامتكم