الغباء و شلون يصير

تذكرون قصة البحث عن أثاث ؟؟

مختصر القصه إني طلبت أغراض حق داري و قالوا بوصلونهم في تاريخ 6.8.2008 أو 7 ، اليوم و إحنا قاعدين بالقهوه بجنيف و له يدق التلفون ، ألو ... ألو . و له وحده تتكلم فرنسي ، ما فهمت منها إلا إسم المحل إلي طلبت منه . طبعا أنا من أسمع أحد يتكلم فرنسي أحذف التلفون على أمي على بونه إهيه إلي تعرف . يوم عطيتها إياه جان تقول لها "speak english please"

طالع !!!! انا كنت أقدر أقول جذي .

المهم بعد ما سدته منها ، طلع إن الأغراض ما راح إييبونهم في 7 ، تقول بييبونهم في 19 ؟؟؟؟؟ 19 ؟؟؟؟ 19 إحنا بالكويت ماكو أحد يستلمهم .... واااي لأ شنو هذا ؟؟؟؟؟

قالت المره انا أشتغل بشركة التوصيل ، دقوا على المحل تفاهموا معاهم . جان نطلع رقمهم و ندق ، في وحده مغربيه تشتغل عندهم ، قلنا إذا توهقنا بنكلمها ، على بونه تتكلم عربي ، بس أصلا مع المغربيه يبيلنا ترجمه . المهم و يرن التلفون و تشيله وحده و تكلمني فرنسي ، قلت بسألها عن حياة (المغربيه) بس و بتعطيني إياها .

أنا : can i speack to hayat

جان ترد و تقولي أنا تكلمي، جان أقلب عربي و كل ما قلت شي ترد علي بالفرنسي ، شفيها ؟؟؟

أقول لها الأغراض ما راح يوصلون بالموعد

تقول : Oui - ( وي بالفرنسي يعني نعم)

أنا : شنو وي؟؟؟ تقدرون تخلون الأغراض عندكم و إحنا نمر ناخذهم

إهيه بالفرنسي طبعا : يوم الثلاثاء الساعه 12

أنا : الثلاثاء ؟؟؟ قالوا ما راح إيوصلونهم !!! أي ثلاثاء

إهيه : هذا الثلاثاء

أنا : بس قالوا الثلاثاء يوم 19 مو هذا

إهيه : وي

لأ مو معقوله ...جان أعطي التلفون حق أمي

طلع شنو ؟؟؟ آآآآآآآآآآآآه على مخي ، يوم سألتها عن حياة جان تقولي إهيه موهني ، و أنا عبالي تقولي أنا حياة . يا ربييييييييي . و طول المده قاعده تقولي متى حياة إداوم ، يوم الثلاثاء الساعه 12 .

و البايخه جان قالت ما أفهم ، انا قاعده اكلمها عربي !!!