مبارك عليكم الشهر مقدما ..شنو شريتو هدايا حق احبائكم

حبيت اعطي امي شي من اديني ..فقلت خلني اسوي لها الفكره الدارجه او الي هبو فيها الناس ..وهي طريقه تقديم الشاي او لوازم التقديم الشاي ..اولا رحت شريت من محلات 100 فلس ..اقراش اصغار وستكرات الي يستخدمونها حق الموبايل ..وحطيتهم على القراش عبيتهم بالزعفران واللقاحوجهزت علبه من عندي وحطيت فيها ورق ملون مقطعوحطيت القراض بشكل عشوائي

وصار شكلها حلو بس ..قلت مادري ابي اضيف بعد شي معاه فشريت من الانامل الكويتيه ..من بنات الكويت ..الله يعطيهم العافيه ..تقريبا نفس الفكره شكر مغلف وزعفران وماي لقاح ..واحد بحطه عند امي وثاني حق دوانيه ابوي ..وطلبت بعد حلويات كويتيه ..من محل الكواكب في سفره من سعف ملون ..بس لما الحين ماستلمناه ..وبعد طلبت بعد علاقات حق مطارات الشاي والقهوى والاعشاب ..صناعيه محليه الله يخلي بنات الكويت والله

بعد باجر ..راح اعطيهم امي واباركلها في الشهر الفضيل ..اختي بعد شاريه شيله حق امي ومسباح حق ابوي ..وناسه يله متى نعطيهم الهدايا

Repetto

ألحين أنا فريت العالم كله أدور هذي الماركه repetto آخر شي ألقاها في فيلا مودا و يقولون بعد إن صار لهم 3 مواسم إييبونها ، و ليييييش محد قالي ؟؟؟ يقولون موجوده في المباركيه ، ما احب المباركيه ، انا كنت وقتها في المنطقه الحره بالشويخ . المهم من كثر ما انا مستانسه إني لقيتهم و لقيت اللون العجيب (الأزرق الجويتي) إلي أبي ، لبسته و لمه طلع كبري ، سيده رحت دفعت و طلعت ، ما فصخته :)

المزهريات المكسورين

تقدرون تطلبونهم من الإنترنت

عشان يوصلون الكويت مكسرين صج :)

سايتهم Dror Shop

Dramatic Lemur

شفت هذا الفيديو في blog وحده إسمها creature comforts

يخرع و يضحك بنفس الوقت

cole haan

ما اعرفها هذي الماركه و ما شكلهم عندهم شي حلو بس البنيه الصغيره إلي بالصوه على اليمين إتشوووووق وااااي حدها كيووووت .

هذي سايتهم Cole Haan

دلافين ابشاليهنا

واي شوفو الدلافين الي عند اليال .. ونااااسه .. اشوه ان بنت خالتي شافتهم وعندها كامرا عشان اتصورهم :)

something nice

ذكرني هذا النفنوف إبنفنوف see by chloe مال الصيف ، عيزت و انا أدور صورته ماني لاقيتها عشان أراويكم الشبه . إلي عرفه خل يقولي إي والله صصصصصصح :)

من :Orla Kiely

السعر : 64 دينار تقريبا

للطلب : e dress me

يوم الخميس

أبيخ شي في دوامي إن الحمام بالسرداب و انا بالطابق الثاني ، فتخيلوا كل ما أبي أروح لازم أنزل بالأسنسير ، اليوم بالدوام دقت علي رفيجتي الظهر بس ما أقدر أسولف معاها فقلت لمه آخذ breack أنزل تحت و اكلمها . نزلت و كلمتها بعد 10 دقايق رديت مكتبي ، أنا معاي بنتين بالمكتب لمه رديت ما لقيت أحد ، هدوء ، وين راحوا ؟ قلت أكيد عندهم إجتماع ، كل ما إختفه أحد أسألهم وينه قالوا إجتماع . كانت الساعه 2:35 ، يعني بقى نص ساعه و نطلع أنا عادة أقعد زياده لمه أخلص إلي بيدي . فأطلع 3:30 . و أنا قاعد أشتغل علق على الكمبيوتر مادري شنو رعصت خربته ، ناديت الريال إلي يشتغل بالـ IT سوالي إياه ، بعدين جان يقولي إنتي شمقعدج ليمه ألحين ؟ أنا بس سألني جان أرد علي : لأ بليييز لا تقولي اليوم يطلعون مبجر !!!! الريال : إي يوم الخميس الدوام يخلص الساعه 2:30 . الله ... و أنا حظرتي مسويه روحي الموظفه المثاليه . و أشوف المكتب خالي و ليش محد قالي ؟؟؟

جنطه بجنطه

طالعوا عدل ، تره اكو رسمة جنطه على الجنطه

marc by marc jacobs

السعر : 26 دينار

للطلب : إضغط هنا

shoe umbrella

طبعا شنو إلي شدني له أول شي؟ اللون العجيب ... أنا عبالي هذا بووت عادي ،يوم دخلت سايتهم إلا يطلع هذا مثل كووت المطر rain coat بس حق الجوتي ، تلبسينه عشان المطر ما يخرب جوتيج.

هذا السايت : Shuella

Jaguar Motorcycle

واحد معجب بسيايير الـ Jacuar وايد لدرجة إن مسوي سيكل على شكل الـlogo

المصدر : T3

جريش

سوينا ( قريش ) بالدوام .. وكل فيونكه يايبه معاها شي .. واحلى شي بالموضوع ( جباتي أحمر ) اخخخخخخخخ اينن اينن اينن الي يايبته ( ام مود ) .. وياريت اتكررها قبل رموضان .. تكفين ييبيه قبل رموضان .. ماشبعت منه :) الي مومجربه لازم يجربه بس ينباع الصبح حده لي الساعه 7 او 7ونص الصبح .. طعمه شي موطبيعي اهو في شكر منه وفيه .. وحسافه مو كل مكان ينباع الي اعرفه في ( الاندلس والصليبيخات وجنه جنه غرناطه ) اذا ماني غلطانه .. لحقو عليه قبل رموضان :) طافج يا ماستر يريت كنتي معانه .

تغيرت حياتي

هلوووو أدري صارلي جم يوم ما كتبت بس من يوم الأحد تغيرت حياتي مع الدوام اليديد ، ما قمت أسهر مثل أول ، عشان أكتب بالمدونه ، انام الساعه 12 ، يعني بقه لي ألحين ساعه و أنام . أرد متأخر الساعه 3:30 أو 4:00 ، بس أشوف إيميلاتي و أصكه و انام . بعدين لمه أقعد ، أقره من الإنترنت عن شغلي و بالدوام بعد أقره، ما خليت شي ما قريته مليت ، أشوه اليوم بده الشغل و إستفدت من إلي قريته . أودعكم ... يمكن أسوي بوست عن جم موضوع خفيف و ضريف بس مو مثل الأول .

أنا أكره السنافر

أوووووه انا أكره السنافر ، سأقضي عليكم ... سأقضي عليكم

و لو كان هذا آخر عمل في حياتي

مقولة شرشبيل الشهيره

هذي T-shirt رجالي

من My Pink Moon

السعر : 16 دينار

طوق من ريش

إدورون على شي أوريجينال ؟ شي غير و مو شايفينه بالسوق ؟ السايت Etsy يبيع أغراض كلها handmade مسوينها ناس عاديين عندهم هوايه الخياطة أو الرسم أو الخزف أو ... أو ... إلخ . لقيت عندهم طوق من ريش وايد حلو و غريب و سعره بس 5 دنانير . إلي تسويهم إسمها Gaia Trove من امريكا . إلي يحب يطلب ... إضغط هنا

سكر ملون ..من منتدى كويتيات

كنت داخلا منتدى كويتيات اعتقد شغلات فنيه وحده من المشاركات كانت حاطه اشلون اتسوون شكر املون قلت يله خنا انجرب ..وسويت مثل ما قريت تقريبا ..بس من غير مقادير انا ما اعرف اسوي شي بالمقادير يبت اشويه شكر وحطيت الوان الطعام ..نقط ..وبعدين اخلطه وكونت مجموعه من الوان..وطبعا لازم (شريجتي اقصد بنتي) مريوم معاي
بعدين حطيتهم في اقريشات بعد ما اشتغلت اشوي على الاقراش ..بحركات بسيطه

وبس هذي تدرجات اللوان

Marc Jacobs

محل (أنوتا - Anota) في شرق مقلدين marc jacobs

شدعوه جذي الجنطه الثانيه شكبرها ؟

marc jacobs

Necklace

وااااااي و قعت في غرامهم من اول نظره ، أتخيل ألبسهم مع بلوزه صفره فسفوريه تشب ، و له مع برتقالي يااااااي راح يطلع حلوووو، بس الله يهاداهم مادري سايتهم شنو في إلي مو مطلع الأسعار . أظن إذا تبون تطلبون لازم إدزون إيميل أو شي ... ما فهمت ، أنا ما عندي credit cards ألحين ( عشان سالفة الدوام اليديد ) فما أقدر أطلب ، متى ما صار عندي أشوف شنوا سالفت هذا السايت . لازم تدخلون صفحتهم عندهم أشياء غريبه و حلوه

Vice and Vanity

Jimmy Choo boutique online

إكتشفت اليوم إن Jimmy Choo ( السايت الأصلية للشركة ) يبيعون online ، وناسه معناته أي موديل تبونه من جناط أو جواتي مو لاقينه في الكويت ( محلهم بالصالحية ) راح تلقونه بسايتهم . و يوصلون لي الكويت عن طريق DHL . أمي خاطرها بجنطه ، إذا ما لقتها بالكويت بنطلب من سايتهم و نجربها .

صفحة Jimmy Choo

شنو يعني ؟؟؟

يوم كنت بالسعوديه شفت بستراحه من الاستراحات هالمطعم .. الصراحه شدني الكلام الي تحت .. بس ماني عارفه والا كلمه فيهم ؟؟؟ الا مندي .. والباجي مادري شنو .. شنو يعني ( مظبي - مضغوط - مدفون ) ؟؟ الي يعرف خل افيدني .. انا احب هالسوالف :)

Wedding Story Manga

مو مثبتين إن كل شي قام يتحول إلى رسوم ؟؟؟ قصدي الأغاني قامت كله تصير رسم ، المغني يرسمونه و يصير شخصية كارتونية .. والدعايات بالتلفزيون و المجلات ... باليابان عندهم شركه ترسم حق إلي بتزوجون قصت تعرفهم على بعض مثل قصص الـ comic و الرسوم المتحركة اليابانية الـ Manga المشهوره . يودون صورهم عشان الرسام يرسم شخصيات تشبهم و لمه يخلصون تتوزع هذي القصه على المعازيم بالعرس . نطروا جم شهر و بتصير هبه بالكويت .

المصدر : Trend in Japan

الشركة : Sakura Comics

وداعا للريوق

وداعا للريوق وأهلا بالصيام ويا هلا بشهر رمضان شهر الخير شهر المودة والرحمة شهر رب العالمين ...يارب قدرنا على صيامه وقيامه يارب تقبل أعمالنا فيه يارب عوده علينا كل سنة ...شهر فيه نتواصل مع كل من نحب شهر يختلف عن كل الشهور يمر علينا مرة بالسنة ويقربنا أكثر من ربنا يذكرنا بالمحرومين من اللقمة ..شهر نصوم فيه عن كل المعاصي بكل أنواعها ..شهر نكثف فيه عبادتنا عشان نضاعف فيه حسناتنا ..شهر حتى نومنا فيه عبادة ..أذكر نفسي وأذكركم أحبتي لا تكون متابعتنا حق المسلسلات تلهينا عن العبادة خلونا ندحر الشيطان اللي راح يكون مكبل طول شهر رمضان كل شي ينعاد وكل شي يتكرر إلا لحظات شهر الخير والرحمة والمغفرة ..بإسمي وإسم جميع الفيونكات أهنيكم بقدوم شهر الحب والخير والرحمة والمغفرة شهر رب العالمين شهر رمضان وعساكم من عوادة كل سنة ..ومبارك عليكم الشهر ..وكل عام وأنتوا بألف خير ..:)

عساكم بس جهزتوا السمبوسة ...والكبب السنعة ..الفيمتو أهم شي ...تانج .. سانكويك ...:)

Miu Miu

بعض الأشياء اليديده إلي نزلت من Miu Miu في فيلا مودا ( المنطقه الحره ) ... و يابوا بعد البروشات الأحرف .

إستقلت

ما تكلمت بالموضوع في الـBlog لأن ماني مصدقه إن بصير ، انا من أول ما إشتغلت بالوزارة و انا ودي أطلع و أشتغل في قطاع خاص . و الحمد الله قابلوني قبل لا أسافر و إنقبلت . فردتي الكويت مبجر كله عشان لويت الإستقاله . أول يوم (الأحد) ، خلصت الفحص الطبي و اليوم الثاني ( الأثنين ) رحت البنك و عقبها إدارتي و كتبنا الكتب إلي أحتاجها عشان أوديها إنتهاء الخدمه بالوزاره ، الثلاثاء و الأربعاء كملت شغلي بإداره إنتهاء الخدمه ، وهذا إلي مكتوب تحت نموذج عن الأيام إلي طافت عشان أطلع ورقة الإستقاله :

اليوم الرابع و الأخير ( الأربعاء)
1- الرواتب (السرداب)

2- الحسابات عند البنات فوق الطابق الأول

3- التدقيق

4- بو علي المراقب

5- الخزينه

6- الرواتب ( مره ثانيه)

8- الغرفه إلي يمهم عشان الختم

9- الدور الاول توقيع المدير

10- إنتهاء الخدمة (الدور الأرضي)

11- طباعه (السرداب)

12- إنتهاء الخدمة

13- توقيع رئيس قسم العلاوات

14- إنتهاء الخدمه

15- العلاوات

16- السجل العام

17- إدارة التنمية البشرية

18- السجل العام

19- الرواتب

و أخييييرا بعد عناء طويل إطلعت الإستقاله ، واااااي تعبت وايد من الفراره ، أشوه الأيام إلي كنت فيها بالوزاره كانت معاي رفيجتي فضيعت الوقت معاها بالسوالف . من التعب قضيت يوم الخميس كله نايمه ، ما سويت وله شي مفيد ، الصبح و العصر كله نوم ، حتى ألحين عيزانه بس أحاول أقاوم . إنشاء الله راح أبدي دوامي اليديد يوم الأحد

Can't wait :)

عجبي وشوقني وشريته ..بس

وانا اتمشى في مركز السلطان رحت صوب الككاوات ادور ككاو ..شفت ككاو بيضه كادبري اشوفه من زمان بس ما كنت امفكره اشتريه ..بس هذي المره كنت محتاره شنو اخذ ..فقلت خلني اجرب هذا ..شكله لذيذ
وخصوصا اكريمي ..ثقيل يعني ..احب جذي ..بس ..لما كليته كانت مفاجأه ؟؟؟ شوفو

اشلون فكرو جذي ..اي نفس تشتهي تاكل شي جذي ..صعب ..مع اني حاولت آكله بس هم طعمه صعب ثقيل وايد ..وطعمه مادري اشلون حالي واااااااااااااااااايد ..جربو ابنفسكم وشوفو
اشلون امسوينه جنه بيضه صج

حبيبي حده مستانس

حبيبي مودو من زمان مواعده أبوه يشتري له PsP وأخيرا راح وشرى له عقب حنه مني ..مسكين مودو كل ما نروح نزورأمي يقعد يم عيال أخوي يشوفهم وأهم يلعبون ويطر منهم اللعبة طرارة اللي يعطيه واللي ما يعطيه وبس لما نروح هذي حالتنا مودو يبجي ومحد يبي يعطيه وإن عطووه مايمديه يلعب إلا ردوا وخذووووووووووها منه فديته حبيبي ..وعاد ألحين صار يملك وحده وشايخ فيها عندهم أول ما طلعنا من الرحاب ( مجمع كله في هالسوالف من الألعاب وغيرها ) قال بروووووووح عند سلمان لوووووووووووووووول بحره يعني ( سلمان ولد أخوي ) ..يحليلهم اليهال ويحليل سوالفهم ...ألحين مو جذي السالفة يسوروووووووه يبي وحده بعد هذي حالة بالله :)

يا سلام على الماية

رحنا البحر قبل يومين تقريبا أنا وزوجي العزيز والكتاكيت ( مودو ويساري ) على أساس إنه بنقعد نتعشى ونقوم ومودين حقهم ألعاب بحر وكرة لعبوا شوي بالرمل عقب ما تعشوا شوي جان يروحون صوب البحر ليش إنه احنا قاعدين بعيد شوي عن البحر يعني على الحشيش وبس يوم راحوا هناك شافوا اليهال يتسبحون ياني مودو جان يقولي : ماما يايبه لي مايوه عشان أتسبح ...قلت : لا ماما وبعدين شوف بابا يقول الجو بارد ( كان هوا شوي ) نخاف عليك تمرض ..جان يقول : وهذول اليهال يمرضون ..قلت له : إي ماما مو زين ...المهم ما قدرت عليه يروح ويرد ويبي يسبح عاد خليته يسبح بـالـ(under wear) حتى يساري بعد يبي يسبح هم خليته يسبح بالتبان كيفوا حدهم والمايه كانت تشوق أنا كان ودي أطب وأتسبح بس شكلهم بالملابس الداخلية نكتة :)...وحمد الله الله ستر وعدت سلامات وما صار فيهم شي ..بس جان زين على البحر يكون في دشات عشان الواحد يسبح بالبحر وعقب يرش على نفسه شوية ماي حلوو..بس للأسف لا يوجد و الحمامات ( تكرمون ) آخر الدنيا صعبة مع اليهال ..

نتمنى الأفضل للكويت دائما ..

Trader Vic's

اليوم تعشينا في مطعم Trader Vic's اليديد يم الأبراج ( جدام مطعم ميس الغانم - من الجهة الثانية) . أكو بعد مطعمين ثانين يمه واحد فرنسي Letter Damour والثاني إيطالي Don Mario's .

أنا توقعت المطعم وايد ظلمه و الليتات زرق و الأغاني عاليه إلي الواحد ما يقدر يسولف من الصوت ، بس طلع المكان كلش غير ، الديكور جنه أفريقي و الأغاني هادية ، ما عجبني الديكور كلش ، ما احب هذا الستايل . قعدنا انا و أختي وإحنا متصروعين نخاف اكلهم يطلع نفس ديكورهم ... عطونه المنيو و بدينا نقره ، ماكو وله شي نعرفه ، أكلهم أكثره أسيوي ، من طقت الصيني و الياباني و التايلندي . المطعم على ما أظن جمايكي .

خالي دايما ياكل فيه كل ما راح دبي ، و يمدح أكلهم و يقول أحلى شي عندهم اللحم إلي تشوونه بنفسكم . إسمه Beef cho cho و صاج هذا كان ألذ شي ... وااااي اللحم ترف و فوقه صوص مو طبيعي . إلي حالي و ثقيل ( تعرفون طعم الصوص إلي على الستيك في المطعم الصيني الطاووس ؟ هذا نفسه و أحلى ) . طبعا كل ساعه يايبين لنا صوص عشان نقط في الربيان و البط إلي طلبناه واحد منهم شكله غريب ، لونه أزرق شفاف ... شوقني ، توني بحط الخبز في بذوقه جان يقول الريال .

This is the fire gel

أنا أطالعه ماني فاهمه شنو قال ، توني بسإله شنو قلت ؟ إلا أشوف ولاعه بإيده و يشب الصوص الأزرق ، طلع هذا مو صوص ، هذا إلي بنشوي في اللحم (جل أزرق يخلي النار شابه لمدة 5 دقايق تقريبا ) ... واااااي أشوه إني ما كليته ، جان مت .

البط بعد كان وايد حلو ، طعمه جنه حمام ، لذيذ ، الربيان حلو بس كان عادي ، ربيان إبقصمات مو شي يديد. بعد طلبنا ربيان ثاني نشوي هذا أحس ماله سالفه ، طبعا إحنا من كثر ما عجبنه الصوص إلي على اللحم طلبنا منه عشان نحطه على كل شي ناكله . كل الأكل إلي كليناه ما كان الـmain dish كان من المقبلات . فمادري شنو عندهم غير ، لازم الواحد يردلهم مره ثانيه . أخر الكلام المطعم أكله لذيذ و انا متاكده راح أرجع له مره ثانيه .

Beef cho cho

الجل العجيب إلي نشوي علي

للحجز إتصل على : 2475987

قولوا لهم أي مطعم تبون عشان يحولونكم ، لأن هذا رقم واحد لكل المطاعم الثلاث .