الغبقه

أمس كان من الأيام الحلوه إلي في حياتي ، أمس كانت الغبقه على شرفي بمناسبة وظيفتي اليديده . اليمعه كانت في بيت fatto الساعه 8:30. بس الصراحه وايد مبجر ما قدرت أروح وصلت هناك أنا و إختي الساعه 9:30 ، الحلو إن كلهم كانوا موجودين ، وااااااااي صج و لهت عليهم و على سوالفهم ، طبعا كل وحده قعدت تسولف عن مغامرات الدوام و السفر و انا مع دوامي و فروحه مع دوامها (رفيجتنا - كانت معانا بالوزاره و طلعت) . انا قاعده أسولف مع pearl أحسها مو معاي مادري ليش بعدين إستوعبت لمه شفت stella ماسكه بيدها ورد فوقه هديه، إلا pearl قاعده تسمع fatto و stella وراها قاعدين يخططون . فتحت الهديه وله تراجي :)

أنا : شدراكم إني أبي تراجي ؟ :)

stella: ندري بعد كل يوم تعيدين علينا بالدوام من قبل لا تسافرين ، و إحنا نحفظ :)

واااي وناسه تراجي انام فيهم (أنا كنت ادور تراجي ألبسهم على طول عشان ما تنصك أذوني )

طبعا فروح معصبه : و ليش ما قلتولي أحط وياكم ؟ ما يصير انا ما أييب لها شي أنا وايد زعلانه منكم حتى الكرت ما كتبت عليه .

stella: خلاص فروح إنتي طلعتي من الدوام ، و هذي الهديه من بنات الدوام

فروح : طاع هذي !!! شنو بكيفج ؟؟

انا : بس فروح لا تصير هوشه

ما تسمعني الإخت

ما أشوف بعدبن إلا fatto و stella إيطلعون تفافيخ و يغنون happy birthday و بعدين و له أشوفهم يدزون صينيه عليها كيكه و شموع ، أنا إستغربت ، جان اقول لهم انا عيد ميلادي مو ألحين شهر 12 شفيكم ؟؟ عبالي بس قاعدين يغنون لأن هذي الأغنيه إلي يعرفون يغنونها إذا كان أكو شموع على كيكه ، طلع شنو ؟؟؟؟ بيحتفلون في فروح و فاطمه (رفيجاتنا بالدوام) و snow white و pearl ليش إن عيد ميلادهم كلهم في شهر 9 .و انا عبالي كل شي حقي ، وااااه فشلتاه . إهني طبعا فروح قامت تبجي من الوناسه و الصدمه ، لأن ما توقعت و كانت زعلانه منهم و طلع بعدين إن في مفاجاه حقها. الكيكه تونس عليها صورهم أهمه الأربعه :) . و ما شاء الله عليهم يايبين هديه حق كل وحده . وناسه بعدين صار فتح الهدايا .

خاتم فروح الأبيض و الأسود مال snow white

جنطة فاطمه و pearl يابولها شيله بيضه من foular

بعد هذا نزلنا السرداب للأكل واااااو وايد أشياء ، لا لا لا كلش ما توقعت .

و في الختام و بعد الأكل ردينا صعدنا فوق و شغلوا لي الـCD مسوينا لي في صوري معاهم في كل طلعه و يمعه و ينعرضون الصور على الحان مقدمه مسلسل (نور) يــــــأ سلالالالالام . و إحنا نطالع أسمع البنات يقولون : وييييي شفيج تبجين . إلا منو؟ جاردينيا قاعده تبجي على طلعتنا من الدواااام . طالع !!! مفروض أنا إلي أبجي :)

كان يووووم عجيب

صج و لهت عليكم و مشكورين كلكم