BACK 2 SCHOOL

حمودو وأول يوم دراسي :)

يسارش فديته عند الحضانة

بالنسبة لي هالجملة هذي السنة غير عشان كتاكيتي واحد دش الروضة والثاني حضانة ..حمودو أول سنة له بالروضة فديت خشمه لو تدرون شكثر كان متشوق ودش الروضة ما أدري شنو كان يفكر وكنت خايفه شوي من ردة فعله قلت يمكن لما نوصل الروضة يهون ويقعد يبجي وما يبي يقعد بس الحمد الله ما صار إلا كل خير دش أول شي جيكنا على إسمه وأي صف بكون وعقب رحنا عند صفه حده مستانس وكاشخ بلبسه شريته لبس روضة على سبايدر مان :) المهم يوم دش الصف قلت بقومون الأبلات ويستقبلونه والله ولا جنه أحد داش عليهم بس سألوا شنو إسمه قلت لهم محمد قعدوا يدورون جان أقولها رقمه 14 جان تقول وحافظه الكود بعد قلت لها إي وشلون ما أحفظه هذا الغالي المهم قلت حق حمود سلم على أبلاتك سلم عليهم فديته وبقلبي أقول شنو هذا هذول أولى روضة المفروض يحببونهم بالمكان يستقبلونهم بحفلة بأي شي تقوم الأبله لهم ....ما أدري دايخين من رمضان ولا شسالفتهم على العموم الحمد الله محمد وايد مستانس وحاب المكان وحتى الأبلات حبوه ( أكيد إذا مودو ما ينحب عيل منو ينحب ) :)

ألحين صار دور ياسر عيزنا وأحنا نقول منو بروح حضانه ؟؟؟؟ يسورو ما يرد وإن رد يقول ما أبي أخاف ..أقوله إنت شعرفك الخوف ..حبيبي حضانه حلوة وفيها ألعاب وأصدقاء أوديك ماما وأروح الدوام وبعدين آخذك ...يرد ويقول لأ ما أبي ..المهم موبكيفك حبيبي بتروح بتروح ..الحمد الله توفقت بهذي الحضانه عندهم 4 فروع ( بالشهداء..مبارك الكبير..مشرف.. الأندلس ) إسمها STEPS GROUB

وكل حضانه لها إسم غير يسورو حضانته إسمها خطوة بخطوة ..ما أطول عليكم دشيت معاه الحضانة وشاف الألعاب بس ما قرب يم ولا شي وعقب شالته الأبلة وقامت تكلمه وعادي يسورو ما استغرب ولا شي جان أقول يلا فرصتي للقبة وقلت له يلا يساري حبيبي أنا بروح شويه وأيي آخذك ورحت ما سمعت صوته ولا شي قلت الحمد الله حدث ما لم أكن أتوقع ودقيت سألت عنه قالولي ساكت المهم ما طولت عليه تقريبا ساعة ونص خليته ومريت خذيته واااااااااي حبيبي يبجي بجية تشره تعرفونها يتشره علي شلون خليته ورحت عاد سألت الأبلة قل لها بجى جان تقول يبجي ويسكت بعد عمري وقالي ما أبي أروح ..وبس هذي أول يوم دراسي :)

وما قلت لكم شسووا فيني منومتهم مبجر عشان يقومون مرتاحين وحضراتهم ناموا 8:30 بالليل طبعا وقامو تتوقعون متى .....؟؟؟؟؟؟ يسوروه 10:30 وحمودو 1:00 واااااااااااااي ويقولون ما فينا نوم شسوي وحنه ورنه يلا يمكن ناموا عالساعة 3:00 يعني والله قعدوا تعبانين شوي بس مودو كان متشوق حده فعادي :)

وسلامتكم :)