الأربعاء، 29 أبريل 2009

بالمقبرة

بغيت أحط لكم صورة مقبرة بس خفت عليكم ...وهذا حرامي تالي الليل بس اللي باق زوجي العزيز حرامي نهار :)


تصدقون زوجي العزيز كان رايح المقبرة عشان يحضر مراسيم دفن شخص يصير لهم ( الله يرحمه ويغمد روحه الجنه ) ...وعقب الدفان راحوا المسيد اللي بالمقبرة عشان يستقبلون التعازي عن الوقفة بالحر ..وعقب ما طلعوا انصدم انه نعاله مو موجوده ...بالمقبرة ويبوق شلون ؟؟؟؟ شي يخرع ...إذا الموت ما كان رادع شنو يكون رادع ؟؟؟

ليش ما يصير نييب كلب؟

ذاك اليوم بنت خالتي يايبه كلب رفيجتها يوم واحد عندنا بالشاليه ، لعبنا معاه و ستانسنا .

بعدين و إحنا قاعدين إلا ولد خالي الصغير عبودي (9 سنوات) يسأل أبوه ...

عبودي :بابا ، ليش ما يصير نييب كلب؟

أبوه: بس يا بابا ما يصير الكلب نيس ، إنتا ما تحتاجه في شي ، لازم يكون عنك مزرعه ، فيها حيوانات يحرسها ، فيها دياي إحنا ما عندنا

عبودي : إمبله إحنا عندنا دياي

أبوه : من وين لنا ؟

عبودي: ماما كل يوم تشتري دياي من الجمعيه ، عندنا واااايد


واااااي اليهال يهبلون مع تفكيرهم ... الدياي إلي بالثلاجه بالله شسوي فيهم الكلب !!!

الثلاثاء، 28 أبريل 2009

كوكو

شنو احب هاالغنيه وايييد .. الصراحه (محمد زويد ) ابدع فيها اينن وهو يقول : ( كوكو كوكو ..وتالالايلام تاي لالالام ) وجيكو وهو يهز راسه اينن :)

هالغنيه امعرده ابمخي من جم يوم ..انا وبوي الغالي نستانس عليها :) اغنيها وانه رايحه معاه ومنطربه بس بعض الكلمات مادري شقول فيها .. ساعدوني اذا امثبتين الكلمات :)

كلمات الاغنيه :__________

ياماشي بين الورد ( @#$%^& ) يعني مادري اشقال :) ... جكتني الباليبو

والكحله جوه العين زادت فيني باليبو ( صح باليبو ؟؟ )

وكوكو كوكو كوكوكوكوكوكووو كوكو ما (@#$%^&) تالالايلامتايلالالام

عاشاااااااوووو ( ترى هذي مني مومن الغنيه :)

+++++

يالابس ثوب الاحمر والنازع شاريبو ... تاخذ وصالي منك أهل الوصل واصيبو

وكوكو كوكو كوكوكوكوكوكووو كوكو ما (@#$%^&) تالالايلامتايلالالام

+++++

وياربي تشفي العليل عن ( @#$%^) ... وبحكمك يا الاهي (!@#$%^) عن الف طبيبو

وكوكو كوكو كوكوكوكوكوكووو كوكو ما (@#$%^&) تالالايلامتايلالالام

اذا خرته بالكلام قولولي لوووول .. اشكركم على مساعدتكم

وصل ..


بعد عناء طويل وصل كمبيوتري ....طبعا صار لي اشتغل 5 سنين وتوه يحطون كمبيوتر على مكتبي ..ليش ؟؟؟ ما أدري هذي حالة إدارتنا :)

عالعموم أبارك حق نفسي وحق زميلاتي وزملائي على التطور اللي وصلت له إدارتنا ..

ومنه للأعلى...

الاثنين، 27 أبريل 2009

لاعت جبدي ...وإنتوا


صار لهم جم يوم كل شوي يرن تلفوني ....رقم غريب .... منو ؟؟؟؟؟ ... رشحي فلان ..عطيني أرقام اهلج ؟؟؟؟ ماكو شغل ..بعطيج رقم رقم ...مو حالة هذي أرقامنا موزعة ...وكل من يدق علينا ....شتسوون إذا أحد دق عليكم ؟؟؟؟؟ ... وشلون تتصرفون أنا لاعت جبدي وما أدري اخاف ما أرد ويطلع أحد داق علي ويبيني ضروري ...الله يعدي هالأيام على خير :)

ندعوكم للإفتتاح


نأسف لسوء فهم البوست ، هذا مسج يايني من كاريزما...ما عندنا محل هناك
ندعوكم للإفتتاح الرسمي و المميز لمحلات كريزما الجديده ( مقابل المستشفى الأميري )
يوم الثلاثاء 28/4/2009 الساعه 6:30 مساءا

الأحد، 26 أبريل 2009

الزيارة الأولى والأخيرة


رحنا أمس تعشينا بمطعم " الصنوبر " وهو مطعم لبناني مكان مطعم " الدانة " سابقا عالبحر ...أول ما وصلنا شدني شكل المطعم من بره وايد حلو على جنب نافورة وشكله شرح وكبير..صورت بس الصور كلش مو واضحة ليش إنه ليل وظلمة الصور ما طلعت حلوة ...عقب دشينا شكل الصور على الحمام ( الله يعزكم ) وايد حلوه ...وأكيد صورتها ..



ومن كنا تحت قبل ما نصعد سمعنا صوت أغاني حق " فيروز" أكيد كل مطعم لبناني لازم أغاني " فيروز " :) المهم انصدمت يوم صعدنا صيحة وازعاج ولوية ...والإخت اسألتنا تبون شيشة وقلنا لها لأ وتحطنا مكان فيه شيشة ...المهم غيرنا المكان ...وطلبنا ( حمص باللحمة ( زوجي يقول وايد ثقيل مقارنة بكبابجي ) -تبولة ( هم زوجي العزيز ما يازت له ) - فتوش ( وايد حلو أنا طالبته )- جبدة دياي بدبس الرمان ( ما كانت لي ذاك الزود ) - بطاطا حارة ( شكلها من زمان مسوينها وأنا كليتها عند مطعم " عبدالوهاب " وايد أحلى - فطاير سبانخ ( حدها بارده مع إنهم وايد تأخروا المفروض تكون حاره يعني ) )..



وطبعا تشوفون كل اللي طالبينه مقبلات وتأخروا على ما يابوا لنا الطلب ..عاد أنا حطيت لهم ملاحظات ..



بصراحة اللي يشتغلون بالمطعم وايد ومكانه حلو بس يحتاج يحسن من أكله وينسق بين الموظفين...ويشوف له حل على هالازعاج جنه رايحين سوق يمعة :)



هذي كانت تجربتي وما أفكر ارجع مرة ثانية :) صور الحمام الله يعزكم ...عالطريقة اللبنانية :)


هذا المنيو ..الصورة ظلمة ميخالف :)

السبت، 25 أبريل 2009

لذييييييذ ..جربوه المافن




شفتو مايبيله شي ..والنتيجه ...وااااو ..

ولا بعد ..داخله قطع شكلاته ..=)

الجمعة، 24 أبريل 2009

الصور تتكلم

بما أن مودو خبرتهم حاليا " خبرة المواصلات " فقرروا يونسونهم وكل واحد من الأطفال اييب معاه يا إما سكوتر أو قاري أو أي شي يتعلق بالخبرة ..ومودو وده قارية وحده استانس :)
__________________________________أما اليوم اللي بعده واللي اهو أمس كان عندهم يوم للتوعية الصحية :) تحت شعار " سعادتنا في صحتنا " ..
كانوا مسوين دعوه حق الأمهات وبحضور الدكتورة : بشاير البابطين ..قدمت لنا بعض الأفكار والطرق لتقديم الأكل حق اليهال وشلون نحاول نبعدهم عن الوجبات السريعة ...وعطتنا احصائيات حق معدل السمنة بالكويت ..مودو مع ربعه ...شباب المستقبل :)
وعقب المحاضرة كان فيه ماراثون حق الأمهات وعيالهم داخل الروضة..وهذي بداية الماراثون ..



عصير وماي ..حق اللي يعطش :)


محد من اليهال ملتزم والكل قام يركض وأنا ماسكه مودو بيدي واقوله ماما ما يصير تركض ..حبيبي روحت عليه الجائزة :)


ووصلوا ..وعقب التعب قعدوا ...

نهاية الماراثون وكانت أم مود الأولى هيّا .....عاشت أم مود ... وعوضت خسارة مودو ...

وهذي الجائزة مودو مستانس ماسكها :)

Lacoste

وصلني اليوم بالإيميل :

إنضمي إلينا في حفل إلقاء بالونات عطر لاكوست "
Love of Pink " في مول الافنيوز يوم السبت القادم الموافق 25 نيسان / أبريل بدءاً من الساعة 6:00 مساءاً. إذا حالفكِ الحظ و التقطتي البالون الذي يحتوي على الجائزة الكبرى فستفوزين برحلة إلي باريس لشخصين، أما الجوائز الأخرى في البالونات التي سيتم إلقائها فستكون مجموعة بلورات كريستال وردية اللون قيمتها أكثر من 500 دينار كويتي، بالإضافة إلى المئات من الجوائز المثيرة الأخرى من لاكوست "Love of Pink".حظاً طيباً نتمناه لكِ من فريق عطر لاكوست "Love of Pink"!سيكون حفل إلقاء بالونات لاكوست "Love of Pink" هذا السبت في الافنيوز مول .


و هذي صوره صورتها أمس بالأفنيوز ، هذول البالونات إلي يتكلم عنهم الإيميل
أكو احد بروح ؟

الخميس، 23 أبريل 2009

DREW BARRYMORE

الممثله Drew لبسها وشعرها و شكلها تغير 180 درجه ، هذي الإنسانه شنو غيرها ؟؟؟ طول عمرها تطلع مهلقه و تلبس خرابيط ، يوم دورت شنو عندها هذا الموسم ، طلع عندها فلم يديد إسمه Grey Gardens . عشان جذذذذذي متغيره.

الثلاثاء، 21 أبريل 2009

برود خدامتي يقتلني

من وين ابدي مع هالخدامه .. انا اذا صار فيني شي اسمالله علي ترى من هالخدامه الي قاعد اتموتني بالبطئ ...
الكوشيات

افففف لاتشوفونها وهي اتعدل كوشيات الصاله .. الوحده تقعد عليها 16 ساعه على ماتعدلها .. خلاص ياماما خلاص يابابا خلاص يا أمي والله اتعدلت خلصيني روحي حق الكوشيه الثانيه اففف شنو هذي ... شيبتي راسي .

الاوتي
عاد كلشي كووم والضراب كووم .. والله قسما بالله ان 4 ساعات وهي تضرب 4 قمصان .. نمنه قعدنه تمشينه شفنه تلفزيون والاخت ليل حين قاعد تضرب 4 .. 4 بس .. خلاص يا ( ايمي ) الهدوم والا كسره فيهم .. خلاص برافو عليج بس خلصينه وراج شغل البيت .. والله ندري انج اتعرفين تظربين اوتي اخخخخ
الصحون
وااااي على الصحووون ... شوفوها وهي بتنشف صحن بالفوطه ... اااااااااه ياقلبي ااااه.. تقعد بالصحن ساعه .. ليييييييش والله العظيم قمت اطالع روحي فيه ..ادري عندج ظمير بس لاتطلعينه فيني تكفييييييين.
الارضيه
وما أدراك ماالارضيه.. مادري في احد قايلها مربع مربع من الرخام مسحي !! ويلا مادري اشقصتها .. تقعدلكم ابهالمربع مليون ساعه على ماتنظفه .. مادري تستهبل ويلا تستخف دمها !!!!! ياخي مسحي نفس الاوادم .. اشجايفه الارضيه امقطنه ؟؟
الخز
وياعيني عل الخز .. تعالو شوفوها وهي قاطه ويهه.. لحظه خن اشرب ماي لأن نشفت ريجي .. المهم امي وبوي قاعدين بالصاله ابروحهم ضحك وسوالف ( الله يخليهم لنا يارب ) .. عاد امي القطت عينها هاذي الي منخشه ورا الباب وتخزهم !!!
مادري اول مره اتشوف ناس اتسولف مع بعض ؟؟ اخاف ابديرتهم مايسولفون !!
المهم .. امي اتظايقت .. عاد عقب راحت الصاله الثانيه .. ولا هذي الي ماسكه المخمه وقاعده اتخم يمهم !! نعم !! اشتبيييين .. خليهم ابحالهم .. من متى حلالج التنظيف بليل ..؟؟؟ منو قالج صيري كونان علينه .. اخاف بس تفهمين عربي .. انا ماكنت ادري ابهالسالفه عقب دريت .. لو ادري جان دايسه ابطنها . و جم اااه تتحمل ياقلبي .. انا ماعرف اشعر بس صدقوني منها اشواي واشعر .. لووول
الميزه الوحيده ..الاكل
هالشي الوحيد الي ابثانيه يخلص صحنها .. حق بطنها بسرعه البرق اتلف.. حق الشغل ودي التها كف .. عليها بالعافيه بس لايسير فيها شي مني .. ارفعت ضغطي وانه ابعز شبابي ... حلاته الواحد مايجابلهم والله .. وماغير اسمع من زوجي الحبيب ( طولي بالج عليها ) وانه نازله يقولي طولي بالج .. وانه طالعه يقولي طولي بالج .. وانه اكل يقولي طولي بالج وانه اتكلم معاه بالتلفون يقولي طولي بالج .. والي حد الحين انا امطوله بالي .. بس اذا قريتو بالجريده امعزبه ذابحه خدامتها.. على طول ابيكم اتقولون هذي fatto بدون شك بالموضوع .

السبت، 18 أبريل 2009

التوت و المطرق والبرتقالي

بما أن الحين الساعه فوق ال12 بلليل فصباح الخير جميعا انشاءالله مستانسين بالويك اند :)

(التوت)
احنه بالويك اند انروح بيت بانينه خصيصا لعطلاتنه ..تقدرون اتقولون ( استراحه ) فزارعين ( شيَره توت ) فهذا الحين موسمها .. ومن جم يوم قاعدين ناكل منها بس انا احب اخلطه بالخلاط مع حليب وشكر وثلج ..( يعني توت ملك شيك ) أخخخخ يسير لذييييذ .. لو عندي صوره جان وريتكم اياه بس ماعليه متى ما اسوي احطلكم اياها :) .




التوت البنفسجي اهو الي ناظي ( yammmy )


هذا ولد بنت عمتي ( مرس التوت تمرس لووول )

v

v


v



(المطرق)
يمكن في بعضكم يسأل شنو المطرق ؟هذا نوع من أنواع الطيور وأعتقد ان هم هذا موسمهم .. مادري ترى ألفت :) المهم حاطين شبك اسمه ( الساليه ) على قوله أبوي االحبيب عشان انصيدهم .. لأنهم يحوسون عندنه فصدنه والله .. بس مساكين يكسرون الخاطر وهم حد الدعسه واخر شي بالشبك ..حسيت اني حمني اخوي على هالجمله ( حد الدعسه ) لووول المهم لأن مايبين الشبك والله مالومهم لو انا قاعد أمشي وانه مادري جان انصدت :) لووول اخليكم مع الصور .

هذا اخوي حمني .. طبعا غني عن التعريف :) .. وهذا الشبك ( الساليه ) شوفو الطير مسكين اشلون متدندل



وهنيه مع عمي قاعدين يعابلون فيه


وهذا الطير المسكين عقب الصيد .. مسكين مادري ليش زانطينه جذي .. اهو في روح يطير عقب هالقصه الي صارتله :) لووول

v

v

v

البرتقالي

انتو املاحظين ان اخوي وولد بنت عمتي ( اوله الاسم اشطوله :) ) وواحد مادري منو وراهم كلهم لابسين برتقالي .. الظاهر الموظه برتقالي .. وحتن لو مو الموضه برتقالي خن أخليها أنا موضه خن شوف شصير :) ودي انا الي أكون مسؤوله عن لون موضه هالصيف :) ساعدوني بس هالصيف والله .. ومن باجر بطلع بشوف لبستو ويلا لأ اذا مالبستو يويلكم :) لوول

هذي فصله اخر الليل ..قمت أخوره .. لأ ..حده يبيلي أنام .. تصبحون على خير

تحديث

حتن الكرسي الي بالصوره البعييييييد لونه برتقالي ..توني الاحظه لووول ... فلاااااا لازم لازم اتساعدوني ياناس عل البرتقالي

ودمتم سالمين :)

الخميس، 16 أبريل 2009

وين راحت براءة عيالنا ؟؟

(مودو واستبرق " بنت خالته " )


تدرون كتبت الموضوع جان ينمسح كله ..... ضاق خلقي ..:)أملق حركة ..


اليوم كنا طالعين أنا وزوجي العزيز وكتاكيتي مودو ويسور ..ولفت انتباهي بنوتة كبر مودو اسم الله على عمرها وعمره...لابسة جينز سكني وتي شيرت أحمر قصير ..ومسوية شعرها ذيل حصان وطبعا الشعر ستريت وتاج ..وحاطة جنطة على جتفها ( قلت يحليلها يوم كنت بعمرها ما البس جنطة إلا من عيد لي عيد ..ولي وصلنا مكان في لعب عطيت الجنطة حق أمي ) لا وبعد الجوتي عزكم الله فلات ..حبيبتي يعني عالموضة ..ومعاها بنت اصغر منها بشوي ماسكه ايدها ويلعبون من لعبة لي لعبة اسم الله على عمرهم ( ذكرت ربي وتمنيت يرزقني بنوتة اتحلى عليها ) ..كل هذا عادي بس اللي خلاني انصدم واستغرب يوم رحنا نتعشى كانوا يمنا ما أشوف إلا تلفونها يرن وطلعته من جنطتها وترد ...!!!! أنا علامة تعجب ؟؟؟


شنو شصاير بالدنيا عمرها خمس سنين ...خمس سنين بس ..تلفووووووووووووووووووووون ؟؟؟؟؟؟


ليش شنو تحتاجه فيه ..إذا ألحين عندها تلفون مو بعيدة بعد جم سنه يشترون لها سيارة ..


ليش ما نخلي عيالنا يعيشون طفولتهم ..؟؟احس هالأشياء تخليهم يكبرون قبل أوانهم أوكي زمنهم غير زمنا بس في اشياء لازم نفهمهم أنكم مومحتاجينها الحين ..


بدل ما تشيل بيدها عروسة ( باربي مثلا ) شايلة جنطة وفيها موبايل ..أنا مو ناقده عالجنطة بس التلفون حق شنو ..؟؟ لا زين عالصحة ولا مهم لها ...!!!


ما ادري عيال هالوقت أحس ما فيهم براءة ...؟؟والسبب يرجع حق الأهل ..


يارب عينا على تربية عيالنا تربية سليمة ..


والله يحفظ لكم عيالكم ...ويستر عليهم

الثلاثاء، 14 أبريل 2009

نتيجة الشيلات

من قبل جم يوم كنت كاتبه عن شلون ترتبون شيلاتكم ؟ و طلعت النتيجه إن اغلب البنات يحطونهم في علاق الدوائر مال الكرفتات من IKEA (الصوره تحت)



هذي صوره من fatto شلون حاطه الشيلات

و صوره ثانيه حق البنات إللي سألو شلون يرتبون جناطهم

Zeezoo أحد القارئات
تقول تعلقهم بهذي الطريقه


فتقول شافت أحد البنات شارين هذا العلاق من دايسو و مركبينه على الكبت
حلو أنا عجبني هذا أكثر
مثل ما قالت ما يعفس اللفه
و سلامتكم
update
دايسو كان موجود بالشويخ ، صكو او بالأصح هدموا ألحين موجود بسوق السالميه أنا ما شفته بس قالولي صار هناك

الأحد، 12 أبريل 2009

مجلة مميزة


في وسط زحمة المجلات الفنية و التخصصية تفردة و تميزة مجلة الابعاد الخفية من حيث طرحها لمواضيع التنمية البشرية و العلوم الطبيعية و العقلية ....و لانكم مميزون فأنا أنصحكم بقتنائها خاصة للاشخاص الذين لا يتوافر لهم الوقت للقراءة فهي مجلة شهرية قيمتها 1 دينار كويتي و هي قيمه رمزية للمعلومات القيمة التي ستحصلون عليها :)

السبت، 11 أبريل 2009

Dry Foods

قبل فترة كنا نسولف أنا وحماتي شنو ناكل عالريوق شنو ما ناكل ..وعن الريجيم وهالسوالف ..جان تقولي عن وحده تسوي خلطات جبن وزيتون وأنا غرامي هالسوالف على طول خذيت الرقم منها ودقيت عليهم ..
أنا : ألو ..السلام عليكم ..أنا سمعت انكم تسوون زيتون وجبن ..
ردت علي وقالت : وعليكم السلام .إي والله وعندنا بعد فواكة وخضار مجففة ...
وسألتها عن نوع الجبن اللي يستعملونه ..قالت لي : جبن خالي الدسم ..
عاد ماكو جم يوم وخذيت خالتي أم زوجي ورحت ..امبيه شنو أشتري شنو أخلي ..ما شاء الله عليهم عندهم أنواع واشكال كل شي يسوون.. والحلو إنه كله شغل بيت ..
جبن بالخلطة ويكون معاه طماط مجفف وزيتون وآوريغانو..وطماط مجفف بالزيت وبدون زيت..وزيتون هم له خلطة ..وبهارات أشكال والوان حق الدياي واللحم والسمج...واناناس مجفف ..ويسوون قمردين ( توت -فراوله-كيوي-مشمش...وغيره ما اتذكر)
وهم بعد عندهم شغلات حق تتبيل الدياي واللحم و مثل صلصة الاناناس وغيرها يعني ما شاء الله شغل مرتب ونظيف والأسعار مناسبة تتراوح من 1.750 د.ك لغاية 3.750 د.ك..
اللي يحب يجرب شي من عنهم يقدر يدق على هالرقم : 99612274
وعنوانهم : الجابرية ق 12 ش 1 م 363
موفقين وإلى الأمام...


هذا اللي شريته منهم ..وبصراحة اللي ترد على التلفون نفسها وايد حلوة وحبوبه ..انصحكم تجربون منتجاتهم :)

للمره الثالثه :)


بجريدة الجريدة
شكرا يـــــا ... (والله إسمج صعب) يــــــا طز بالرجالة على المعلومه

الجمعة، 10 أبريل 2009

شلون ترتبون شيلاتكم ؟


شيلاتي كله معفسين فوق بعض ما أقدر أشوف شنو عندي عشان اركبه على اللبس إلي لابسته ... أنتوا شلون مرتبين شيلاتكم ، إلي تحس إن طريقتها مرتبه و تقدر تفيدنا خل تدز لنا الصوره على الإيميل
memeblogging@yahoo.com
و نحن في الإنتظار ، بعد يومين راح ننشر الصور

الخميس، 9 أبريل 2009

أقسم


ابي سبب مقنع


انا اليوم طالعه مع فيونكه من الفيونكات .. فلاحظت وهي اتسوق السياره فاصخه تكرمون انعالهه .. وهذي مو أول وحده أركب معاها اشوفها تفصخ تكرمون الجوتي أو لنعال عشان اتسوق !! هل انا السبب ؟؟ ويلا شيسالفه هل لسواقه اتكون اسهل ؟ ويلا أنفه حق الريل ؟ ومنو يسوي هالحركه .. هل قله ويلا وايد .. الي يسمعني بسوي احصائيه :) بس صج والله ليش ؟

الأربعاء، 8 أبريل 2009

حاطينا في جريدة الجريده مره ثانيه


مره ثانيه fyonkat بجريده الجريده و الله شي غريب عجيب ، أكو بلوقات ثانيه مساكين ليش ما يحطونهم؟
و لاه ، كله مواضيع fatto
جني حتريت ؟
على العموم شكرا للنشر
الخبر القديم link

الاثنين، 6 أبريل 2009

خوش فريج

فريج بيت أم زوجي عجيب ..أتشوفون مالا تتوقعون ..المهم ..اتشوفون كلاب تتخطرف قلنا عادي صاره موضه ..حمام بأنواعها.. قلنا قديمه ....ديايه وفريخاتها ..قلنا يمكن منحاشه ..واليوم بط مجموعه بط يتقلبون بالشارع كاك كاك كاك ..ونتو نطرو لما يطوفون علشان تسفطون ...يا سلام ؟؟؟شنو مزرعه ...وين صاحبهم ..مو يمكن واحد مشخوط يدش الفريج وطشرهم ..وله عتوي ملعون يذبحهم..مو حرام هذولي في ذمتكم ياصاحب الحضيره المتنقله ..إضاهر عمال الإزاله اكرفت قفصهم وسبلتهم ؟؟؟ وله عاجبك الفريج وجنا شركه دواجن ؟؟بط وحمام ودياي ...وحنا من خوفنا ندخل الفريج اشوي اشوي يمكن افريخ انط وله بطه وله كلب ينطرنا علشان يلحقنا ...احسد خالتي على فريجها اخرشه =)



الأحد، 5 أبريل 2009

عيشات

مطعم إسمه rice يعني عيش
في الأفنيوز فوق الجهة اليديه صوب المطاعم
ديكوره حده عجيب
و أحلى شي الثريا إلي جنها حبات عيش معلقين (عيشات)
أنا ما كليت في ، بس أخوي جربه ، يقول زين
إللي مجربه خل يقول لنا شنو حلو