الأربعاء، 1 أبريل، 2009

في أحد نفسنه ؟

منو يقعد من النوم الفير يشتهي ياكل ويلا يشرب أشياء غريبه !!! أنا ورفيجتي من هالنوع :) مثلا أنا أقوم من النوم تقريبا عالأربع الفير أشتهي أشرب ( شاني ) :) وفعلا ماخليها ابخاطري أروح أشرب .. ومره اشتهيت معكرونيه , طبعا فظلت أمس مو قاعد أطبخ الفير :) ورفيجتي صكت علي .. قامت مره خمس الفير اشتهت ( ميد ) مال غداهم أمس مع عيش ودقوس لوووول والله سخنته وكلته .. استغفرالله ميد من الفير !! ولاه وراهه جامعه بعد :) قطوه مو رفيجه لووول .ويتلها فتره اهي مع اخوها يطلبون كل يوم عالريوق قبل لايداومون الجامعه من ( بيتزا هت ) لووول .. ومره اطلبت عالريوق من مطعم جوني ..بيرقر وبطاط وحلقات بصل وبيبسي . وااااي رفيجتي وحش :)) عليها بالعافيه .

في أحد نفسنه وحش ومو طبيعي ويلا بس احنه :) ؟؟؟؟؟

اخخخ هالبيتزا لو أي وقت اييبولي اياها حتن لو كنت حدي منقثه راح اكلها

هناك 17 تعليقًا:

جاردينيا 2000 يقول...

انا افتح عيني من النوم اشتهي جكلت بار ..بس يفتح الفير ؟؟ ماردي انطر لما يفتح
بس لما اشتهي الككاو او الكيك ..لازم اكله وله اصير وحش =)

Om MoD يقول...

لووووووووووول

يمه تخرعون .. وحوش..والشاني يهون عن الميد وغيره ..

الميد غدى ويالله هالمره الواحد قاعد من النوم استغفر الله..

بصراحة حمدت ربي على النعمة اللي أنا فيها أشتهي الأشياء بوقتها :)

والله يعينكم على نفسكم ..

أحمد الحيدر يقول...

عليكم بالعافية ..

انا قبل كنت جذي لما صغير ..

اقوم نص الليل اقول حق امي يوعان ..

تقول تعال اكلني يما :)))))))))))))


الحين بنتي لما ما تبي تنام تستعبط تقول يوعانة ..

صج كما تدين تدان :)

Sn3a يقول...

تصدقين انا اكره اكل شي الفير
يمكن اشرب قهوه هوت جوكليت ميخالف
اما اكل لا
وحتى لما اقوم من النوم لازم عقب جم ساعه اكل

بس ميد وعيش ودقوس
مع اني ما اكل سمج وعيش
بس هذي مو صج لووول

TruTh يقول...

ميد و عيش و دقوس الفير قوية شوي لوووول ماشاء الله عليها

على فكرة مدونتكم اللوك مالها صار يشوق،و حتى هذولة البنات اللي فوق يونسون و اهما يطامرون و يسولفون لووول :)

تحياتي لج

مركبنا يقول...

موضج تخرعون

سمج !!!

Pearl يقول...

:) امبيه من صج .. لكم خلق الفير تاكلون .. غريبة :)

تذكريني في عمي .. يقوم نص الليل و يطلب من بناته يسووله توست و جبن و لازم يشرب ميرندا ..

نفس الحاله بس واايد اهون :)

sinfuleye يقول...

انزين .. مطبق زبيدي الساعه 4 الفير يمشي حاله ؟
سويتها كذا مره بعد ..
و ما اكون توني قاعد من النوم
اكون بعد شوي ابي انام ...
صار لي سنتين .. الصبح ريوقي لازم يكون كاكاو .. او على الاقل شي فيه كاكاو !
و هم بعد .. هالكورس .. كل اثنين و اربعه غداي الساعه 10 الصبح من برقر كنق و لا هارديز !!

عادي جدا .. الاكل ماله وقت معين !
بس عاد ميد ..
ميييييد عاااد !

حياتي هدف مو عبث يقول...

ههههههههههههههه
عادي
مجبوس
تونا
معكرونه
هارديز
ومرتين صبووور
ووايد بعد
ما أذكر

أحلى وقت للأكل اهوا الفير

ولا وحوش ولا شي

عااادي

:)

snow يقول...

بالعافيه عليكم :)
اتمنى شهيتي تكون مفتوحه على طول، انا ان يعت اجابل الكل بس اول لقمتين واحس مكثره وماني قادره اكمل والشي الوحيداللي مااقاومها هي البوظه.

{~المباركية~} يقول...

لوول كل هذا الفير

انا اذا كنت سهران ومواصل اكل لي 5 توستات مرتدلا مع عصير كوكتيل مال abc هذا مزاجي اذا كنت مواصل
او اذا قعدت الفير من النوم يوعان اشرب لي عصير واكل بسكوووت

fatto يقول...

جاردينيا :

الي ياكل الككاو والكيك مو وحش ياقاردينيا .. الي يشوف الناس شنو تاكل من الفير يهون عليه الاكل الي ياكله :) لوووول


ام مود :

لووووول ... لعياب عند الباب ديربالج اتعيبين :) ولحد اييب طاري الشاني ترى ماارضه :)


احمد الحيدر

هالا اباعلامينه هالا :)
الله يعافيك .. واااي امك اتينن حبيتهه الله يخليها لك يارب :) اطلعت عليك بنتك بعد اشتبي :) الله يخليها لك

fatto يقول...

سنعه :
هالا ابسنعه لبلقات :) شوقتيني بالهت جوكليت .. :) جنه يبيله الحين :)
انا بعد نفسج ما اشتهي شي اسمه سمج والا اتحمل ريحته اصلا والا اقدر اقعد ابطاوله فيها احد ياكل سمج اتلوع جبدي اروح اقعد عنهم ابمكان ثاني او انطرهم ياكلون وخلصون وبعدين اجابل اكلي :)


truth
شفتي اشلون .. كل واحد ومشتهاته .. اشوه ان قله منهم الي يشتهون هالسوالف .. معني ماسنعت احد سواها غير رفيجتي الفاصله لووول
ومشكوره عالامدحج باللوك اليديد ووحده من هاليطامرون انا منهم .. انا ام الوردي الحلوه الي اشزيني :) لووول اشرايج فيني وانه امدح روحي :) لووول


مركبنه :
لووول مو انا هذي رفيجتي بس :)

fatto يقول...

بيرل :
هالا ابأم حموده هالا :)
والله الواحد اذا طقه اليوع .. مايعرف الفير من العصر :)
عمج ذرب مو نفسنه :)

fatto يقول...

sinfuleye

لووول زيين في احد نفس رفيجتي والله عبالي بس اهي الي تفصل بليل خن اقولها ن في واحد نفسج :) اشفرق بلمطبق لزبيدي ابميد ؟؟؟ كله زفر ابزفر نفس الشي .. عيل طلعت انت وحش نفسنه :) انا مادري ان الفاست فود مثل بيرقر كنق يسوون لحم الصبح عبالي بس في ريوقهم .
وبعدين ابي اسإلك شنو معنات اسمك ؟ الصراحه اطلعت عيني على ما اكتبه :) والسؤال الثاني : موقعك شنو ؟؟ اهو موبلوق مادري شنو ؟؟ عرفني عليه .. حتن شعاركم غير مادري شنو معناته :)



حياتي هدف موعبث :
بعد جبدي والله .. احب الي يأيدنه ابهالأكلات الفير :)



سنو :
هالاوالله شخبارج وشخبار اعيالج ولهنه عليج والله خاصه كلمتين ( شنو ومنو ) لووول
وهذا ويهي اذا صار عندج شهيه اصلا .. جان زين انا نفسج مومهم عندي الاكل :)


المباركيه :
هالا والله شخبارك :) عليك بالعافيه :) انت بالنسبه لنا ذرب .. ماصرت وحش :)

غير معرف يقول...

يا جماعة الخير ذكروا الله وصلوا عالنبي ما شاء الله آفه ..
أخاف فيكم شي لا قدر الله روحوا حللوا !!

fatto يقول...

ماقلنا قاعد ناكل واايد ويلا مليون وجبه باليون قاعدين انتكلم عن ان نشتهي ناكل شغلات مو ابوقتها :)