الثلاثاء، 21 أبريل 2009

برود خدامتي يقتلني

من وين ابدي مع هالخدامه .. انا اذا صار فيني شي اسمالله علي ترى من هالخدامه الي قاعد اتموتني بالبطئ ...
الكوشيات

افففف لاتشوفونها وهي اتعدل كوشيات الصاله .. الوحده تقعد عليها 16 ساعه على ماتعدلها .. خلاص ياماما خلاص يابابا خلاص يا أمي والله اتعدلت خلصيني روحي حق الكوشيه الثانيه اففف شنو هذي ... شيبتي راسي .

الاوتي
عاد كلشي كووم والضراب كووم .. والله قسما بالله ان 4 ساعات وهي تضرب 4 قمصان .. نمنه قعدنه تمشينه شفنه تلفزيون والاخت ليل حين قاعد تضرب 4 .. 4 بس .. خلاص يا ( ايمي ) الهدوم والا كسره فيهم .. خلاص برافو عليج بس خلصينه وراج شغل البيت .. والله ندري انج اتعرفين تظربين اوتي اخخخخ
الصحون
وااااي على الصحووون ... شوفوها وهي بتنشف صحن بالفوطه ... اااااااااه ياقلبي ااااه.. تقعد بالصحن ساعه .. ليييييييش والله العظيم قمت اطالع روحي فيه ..ادري عندج ظمير بس لاتطلعينه فيني تكفييييييين.
الارضيه
وما أدراك ماالارضيه.. مادري في احد قايلها مربع مربع من الرخام مسحي !! ويلا مادري اشقصتها .. تقعدلكم ابهالمربع مليون ساعه على ماتنظفه .. مادري تستهبل ويلا تستخف دمها !!!!! ياخي مسحي نفس الاوادم .. اشجايفه الارضيه امقطنه ؟؟
الخز
وياعيني عل الخز .. تعالو شوفوها وهي قاطه ويهه.. لحظه خن اشرب ماي لأن نشفت ريجي .. المهم امي وبوي قاعدين بالصاله ابروحهم ضحك وسوالف ( الله يخليهم لنا يارب ) .. عاد امي القطت عينها هاذي الي منخشه ورا الباب وتخزهم !!!
مادري اول مره اتشوف ناس اتسولف مع بعض ؟؟ اخاف ابديرتهم مايسولفون !!
المهم .. امي اتظايقت .. عاد عقب راحت الصاله الثانيه .. ولا هذي الي ماسكه المخمه وقاعده اتخم يمهم !! نعم !! اشتبيييين .. خليهم ابحالهم .. من متى حلالج التنظيف بليل ..؟؟؟ منو قالج صيري كونان علينه .. اخاف بس تفهمين عربي .. انا ماكنت ادري ابهالسالفه عقب دريت .. لو ادري جان دايسه ابطنها . و جم اااه تتحمل ياقلبي .. انا ماعرف اشعر بس صدقوني منها اشواي واشعر .. لووول
الميزه الوحيده ..الاكل
هالشي الوحيد الي ابثانيه يخلص صحنها .. حق بطنها بسرعه البرق اتلف.. حق الشغل ودي التها كف .. عليها بالعافيه بس لايسير فيها شي مني .. ارفعت ضغطي وانه ابعز شبابي ... حلاته الواحد مايجابلهم والله .. وماغير اسمع من زوجي الحبيب ( طولي بالج عليها ) وانه نازله يقولي طولي بالج .. وانه طالعه يقولي طولي بالج .. وانه اكل يقولي طولي بالج وانه اتكلم معاه بالتلفون يقولي طولي بالج .. والي حد الحين انا امطوله بالي .. بس اذا قريتو بالجريده امعزبه ذابحه خدامتها.. على طول ابيكم اتقولون هذي fatto بدون شك بالموضوع .

هناك 38 تعليقًا:

fatto يقول...

مادري ليش موضوع الاكل طالعلي هالكبر .. اشدعوه .. عميان .. موراضي يتعدل .. عيزت وانه اعدل فيه .!!!!
السموحه على هالمشكله الصغيره ياجماعه.

صبا يقول...

fatto

بعد قلبي الله يكون بعونج على البلوه
اي والله بلوه ...

بعضهم عله على القلب هالنوب بااااارده ثلجه بالشغل

انا اموت لو شغالاتنا جذي
:(

صاجه حق الخز والتسمع عند ويهج اشطر منهم ما في

..................


مادري ليش موضوع الاكل طالعلي هالكبر .. اشدعوه .. عميان .. موراضي يتعدل .. عيزت وانه اعدل فيه .!!!!
السموحه على هالمشكله الصغيره ياجماعه.

إقتباااس


عيل شتقولين عني انا روحي شوفي البوست ينزل مو مرتب لي الحين
اعاني ...ما دري ليش

انتي ماشالله بوستج مرتب
واول مره تصير عندج مشكله
يمكن من عيوني
امشي واتلفت على بلوقاتكم المرتبه
:)

اشلون بوستج يصير مرتب شتسوين
علميني....؟؟

:**

صبا يقول...

انا الاولى

:)

غير معرف يقول...

هذي لازم تيبين وحدة غيرها.. إذا تمت عندج بييلج ضغط

من صجي!!!!!!!!!

Q8EL5AIR يقول...

أخاف انها أمن دولة !!

ترى كاثرين هالأيام !!!

مسكين هذا يزاهه مخلصة بعملها !!

:)


ومازلت عند وعدي بالبرتقالي !!

بس عاد ابي شيرة توت :)





وتحياتي ..
ويسلمواااااااااااااااااا :)

maha يقول...

ضحكت على تعليق كويت الخير

الله يعينج

هذي تعل القلب

زين منكم صابرين عليها

تخيلي عاد تطلع أمن دولة!!!!

ياخوفي باجر بالجريدة

(( أحد أفراد فيونكات تم القبض عليها ))

DoDoq8 يقول...

لووول

اكيد يديده الله يعينج عليها

مايمديهم يتسنعون الا يبون يسافرون مره ثانيه

fatto يقول...

صبا :
اهلا والله ابصبا هلافيج :) الخز اهو اكثر شي باط جبدي .. بس ليل حين ماصدتها وهي اتخز .. اولا أصيدها أحسن :)

لووووول ... جذي عينج حاره وحده ابوحده ؟؟؟

شوفي ياصبا .. الله يسلمج انا لمن اخلص كتابه من البوست أول شي اسويه اظلل كل البوست وعقب اختار حجم الخط .. الي اهو large الي قبل الاخير .. وعقب اظلل مره ثانيه واختار ( ضبط كامل ) الي اهو شكل الفقره الي ابيها .. وهذا سر ترتيبي :) انتي نفسي بس انتي تستخدمين ( توسيط )

fatto يقول...

صبا :
وصج ..تحيه حق صبا الاولى :)





مومنتوم :
اهلييين مومنتوم .. علام كيكج مقلوب جذي ؟؟؟ شكلج متعوكسه لووول

اهي يديده .. بس الظاهر مومثل باجي الخدم ابسرعه يفطنون ويفهمون .. الظاهر يبيلها طوله بال اشوي .. معنع صارلها شهر وشي . ماني قاطعه رزقها بصبر اشوي عليها .






كويت الخير :
مساء الخير والنوير ياكويت :) لوووووووووووول والله موتني ضحك ( اذا جذي اشكال امن دوله .. فالله يعينهم عليها )

لااا مدام انت ليل حين على وعدك بالبرتقالي عيل تستاهل الشيره كلها عليك بالعافيه .. عاد بين وقت والثاني اذا اشتهيت اسويلي منها
( ملك شيك ) لاتقصر معاي زورني وعطني سله توت .. عشان بس مايسير ابخاطري منها وسير فيك شي .. وعزوك طبعا على الملك شيك .. لأني طبعا صاحبه اصول وسنع :)




مها :
اهيب مها :)
لوووووووول اتهقين اخرتي صايديني ابسبتها لوووول





دودو:

هالا والله ابدودتنا :)
اي والله نفس كلام رفيجتي .. قبل مايسافرون يتسنعون لووول .. اشعقبه

fatto يقول...

كويت الخير :
_____________

تصحيح بدليه :)


عزوك = أعزمك :) لوول طوف


وانه قاعد اكتب قاعد اقول معقوله مافي بدليه !!! جان تطلعلي هذي لووووول .. تدري قام يسموي ( ام البدليات ) :)

Mr_CHoCoLaTe يقول...

هذيل حريمنا من اتييب اول ياهل او لو ما اتييب بعد تبي شغاله

يبا اشتغلي تحركي فيها صحه و عافيه و مو عيب زوجج يساعدج بس ماكو فايده

هذيل الخدم و هذي طبايعهم و تحملوهم !

fatto يقول...

بدليه 2 :

مها _______________

اهيب مها شنو ؟؟؟؟ انا وين عيني وانه قاعده اكتب .. امبييه .. خن بطل كل الليتات الي عندي احسن .


اهيب = اهلين :)

fatto يقول...

مستر جوكلت :
هلا ابككاونه :)

اول سنه زواج انا مايبت خدامه .. قلت ماله داعي اتحوس عندنه وانه عروس :) .. بس ابهالسنه الاولى اشصار فيني .. كرهت عيشتي .. مليييت وانه انظف وقسل واطبخ .. وطبعا زوجي مايقصر يساعدني .. بس ليمتى ؟؟؟ الصراحه احسن قاعد اجابل بالبيت اكثر من ماقاعد اجابل ابعمري لاعت جبدي .. الخدامه انا عندي من ضروريات الحياة :)

joe يقول...

خليها على مينونها لا ايي الي اين منه

خل تشتغل بضمير ولا باجر تشتغل لج اي شي

رورو الشخبوطه يقول...

السلام..

الخدم شر لابد منه..

احنا خدامتنا قامت ترادد وتزعل بعد خخخ..

قمت احس اني خدامتها..

الله يعينج..

Manal يقول...

الله يساعدج
واسم الله عليج وعلى نفسيتج

والله يخلي البابا والماما لج يارب

:)

Sn3a يقول...

شوفي خدامتنا الييديده الله يطول بعمرج
كوت شيلتي تقريبا ب عشرين دقيقه
يابتها داري بس ها
يابتها مسفطه مربع 10*10 سانتي متر
انا عبالي تتغشمر والله
القميص كوته باكثر من وقت الشيله ويابته مسفط



والكوشايات قصه بحالها

الله يكون بعونج
عيل خدامه عمتي تقولها انا ما اكل صمون المطاحن ابي فرنسي وان شافت ياهل بايده شي تاخذه تاكله وتقول بيبي عطاني

مع ان عمتي حاطتلها شكثر اكل انواع الاجبان واللحم والسمج لان عمتي اصلا ماتاكل يعني الايدام ببطن الخدامه بس
وعلى فكره عمتي تغسل هدومها وتنظف البيت بيدها الخدامه بس ماسكه الدياي والزرع

حياتي هدف مو عبث يقول...

حتى خدامة أختي
اندونسية باردة باردة
أختي كله معصبة منها
تقول بتيلي جلطة منها
بس فاتو ترى بعدين تتعود
طووفي لا اتحرين عمرج
اذا تبين شي قوليلها قبله بيوم كامل
هههههههههههههه
عشان اتخلصة بالوقت اللي تبينه
وربي يعيينج :**

إمـرأة لا تُنسـى يقول...

واااي الله يعينج عليها..
دامها تنظف بـ ضمير احسن لج من اللي من فوق الى فوق وعالماشي، مو؟

خدامتي، قصتي قصة معاها، ميزتها انها دارسة! وحضرة جنابها تبي كتب! انزين اييب لج جرايد ملوت ديرتج بس مو كتب مرة وحدة جذي، لا بعد تبيهم قصص! صج والله!! انا روايات ما اشتري لي هالمرة اشتري لخدامتي قصص انجليزية.

مثل ما قلتي شغل الساعة عندها سنة
والأزود من جذي.. دمعتها كله على خدها
على اقل كلمة تنقال
هذا وانا مو من النوع اللي اهاوش واخانق..

مرة وحدة بحياتي عصبت عليها لأنها طلعتني من طوري إترادد وتعفس ويهها (مادري منو يشتغل عند الثاني) زفيتها زف خليتها تلصق بالطوفة من الخرعة) عقبها حرمت إترادد وتتطاول

بس باقي هالبرود اللي فيها.. ما أتوقع له علاج غير انج تحنين فوق راسها (يالله.. ماصارت..) P:

غير معرف يقول...

حمدي ربج آنا اللي عندي وهقتني مع رفيجاتي وقصت ويهي ومادري شرقع الموقف , تخيلي صارلي ساعتين وآنا أسوي بهالسلطات العجيبة وقيالتلهم بفاجئكم بسلطات يديدة وقلتلها حطيهم بالثلاجة وكان عددهم 4 سلطات وقومي حطيهم بالفريزر ويوم يو رفيجاتي قلتلها طلعيهم وحطيهم على الطاولة ويوم بناكلها وله صخر آآآآآآآآآآآخ على قلبي وتعبي وشماتت رفيجاتي علي اللي لين اليوم واهمه يضحكون علي , فالله يعينا ):

الزين يقول...

فاتوووو


اول شي شلونج

ثاني شي خدامتكم مو مريحه كلش

احس وراها شي وخصوصا بسالفة الخز

ديري مالج منها

fatto يقول...

المباركيه :
اهلا فيك :)
هذا الي راح اسويه :) شكرا على النصيحه :)






رورو الشخبوطه :
هلا ابرورتنا :)
هذا الي ناقص خدامه اترادد عندي .. اتخسي اصلا .. لوول





منال :
اهلين ابطباختنا :)
:) اميين





سنعه :
هلا والله بالسنع كله :)
لووووووول اعجبتني 10 * 10 زين ماكفختيها بالشيله :)

وعششتاو اتشرط بعد حاصلها صمون عادي ابديرتها عشان تبي فرنسي

وسالفه الاكل طبعا هالجمله معروفه عند الخدم ( البيبي عطاني )

جنه خدامه عمتج مالها سالفه يايبتها .. اذا كلشي عمتج اتسوي وهذي يايبينها عشان تبلع .. جيكو على الدياي لاتاكله بعد لوووول




حياتي هدف موعبث :
مساء الخير اهلين :)

حده راح اتبع نظام الطااااف ..
راح اجرب طريقه قبلها ابيوم :) لووووووول اعجبتني :)




امرأه لاتنسى :
هلا والله :)

مو :) هذي كلمتي ( مو ) وايد استخدمها :) لووول

واي ذابحتها الثقافه خدامتج لووول يحليلها ..

ياكره الخدامه الي على ولا شي تبجي اففف تنبط جبدي منها ..
واثاريج مو هينه .. اثاريج ( اتلزقين الواحد بالطوفه ) لووووول .. عسى راضيه عني بس :) لووول





غير معرف :
هلا بالغير معرف :)
لوووووووووووول اضحك لأن هذي امسويتلنه نفس السالفه .. ابوي كان عازم ناس عندنه بالبيت وشاري كراتين بيبسي وقالها روحي حطيهم بالثلاجه وقومي ابكل ثقه حطيهم بلفريزر ..
وهم مره امي عندا عزيمه رفيجاتها .. وقومي حطي هالسلطه بالفريزر ( نفس سالفتج بالضبط )

اخاف انتي أمي ؟؟؟ انتي امي ؟؟؟
لأن امي اتعلق عندنه :)




الزين :
هالا بالزين كله :)
على قوله خالتي .. اهم منبهرين منه لأن ديرتهم فقيره وماعندهم الي عندنه فكلشي يخزونه .. عقب يتعودون عالوضع والعز :) .. اعطيها كذا فرصه لمن اتسنع انشاءالله :)

lawyer يقول...

ابييييييييه لا يصير فييييييج شي منها



في اختراع اسسسسسسمه المكتب


ردوها او تفهمو وياها





سولها ديييييييل او تذلف

ReLaaaX يقول...

ياقليبي الله يعييينج

اهيا يديدة والا مشتغله من قبل ؟واذا مشتغله شكثر؟

لأن خوفج رادينها عشان هالبرود

بعدين قوليلها اشتغلي بسرعه عادي مافيها شي ؟


أو مثلا عطيها شي وقدري انتي بشكثر لازم تخلصهم مثل الكواي مثلا وقوليلها ابيهم الساعه هالكثر خالصين !

وعلى طول عطيها شي ثاني جود تتعود على الحركة وبعدين تشتغل بسرعه!


يارج الله

بلا قيوود يقول...

غيريها وبلاش عوار راااس تلاقينها هذي اطباعها جذي ما رااح تتغير

Yin مدام يقول...

لووول
إسم الله عليج

لا تحرقين قلبج !!
تتغير وذيج الساع ودج ترد لبرودها أبرك
كلميها وفهميها ما فيها شي خل تتلحلح :))

بس ديري بالج منها على سالفة الخز!!

جنها خدامة يدتي الله يرحمها تقعد تتصوخ عند الباب أييها أقولها شتسوين تقول ماما شنو أنا يبي يسمع !!
وبعدين تلاقين السوالف عند باجي الخدم
!!


الله يحفظ لج كل غالي من كل شر
:))

fatto يقول...

لوير :

هالا والله ابمحاميتنه :)

والله قلت بعطيها فرصه .. شسوي لازم اتحمل اشوي .. بعطيها جم اسبوع اذا حسيت اني بموت اسفرها على طول :) لووول





ريلاكس :

اهلين هالا والله :)
لاا يديده .. لازم احددلها مثل ماقلتي كلشي لاوقت معين . شكرا حبيبتي :) انجرب ونشوف .. على قوله امي اتييب اليهده :) لووول




بلاقيود :
هلا فيك :)
الا بغيرها .. يا انا يا اهي . :)
داشين حرب حشى لووول





مدام ين :
اهلا وسهلا نورتي مدونتنه :)
هذي خدامتكم حدها قويه وترادد بعد .. واااي ما اتحمل هالاشكال الي يقطون اذونهم اتنرررررررفز .

Om MoD يقول...

ما أقدر أقول غير لووووووووووووووول ..


والله يكون بالعون ..

وتراج حدج واحشتني ..ومعطتني سكب من قلب ليش عاد ؟؟؟؟

cup cake يقول...

الله يكون بعونج بصراحه لاتخلينها عندج اكثر من جذي لانها راح ترفعلج الظغط
وعلى قولتج اذا ملقوفه وتحب اتسمع اخاف تسويلج مشاكل

نصيحه مني استخيري ويبيلج وحده ثانيه :)

إمـرأة لا تُنسـى يقول...

لول
راضية عليج والقلب داعي لج :))))

fatto يقول...

ام مود :
هلا والله في ام الجمال كله :)
السموحه يالغاليه .. موبس انتي معطيتج ( سكب ) العالم كله امسكبته لوووول .. افا عليج يا ان مومد لاتزعلين مني تدرين انتي غاليه ابقلبي :)

انا جوزائيه والجوزائيين ( مزاجيين ) فهاليومين مزاجي اني اسكب بالدنيا .. بس اليوم لمنم قمت من النوم رديت لحالتي الطبيعيه والحمد الله :)

على فكره انا شفت رقمج ابتلفوني ابنص الليل قبل لانام .. ففشله ادق ابص الليالي وصروعج عالفاظي :) لو شايفته ابجر جان رديت عليج افا عليج :)





كب كيك :
اهلين وسهلين :)
والله مادري .. اهي تكسر الخاطر مسكيينه وبين جمله والثانيه سوري مدام وثانكس مدام ويس مدام .. وكله مبتسمه .. راح اعطيها وقت وذا مافاد بعد امري لله اييب غيرها :)




امرأه لاتنسى :
لوووووووووووول .. اتغشمر لاتصدقين :)

om hussan يقول...

الله يعينج كان عندي وحدة تعل القلب بس راحت شقتي خفيفة بدونها

Om MoD يقول...

مسموحة حبيبتي ..


بس لا طول الحالة الله يعافيج ...


بانتظار اتصالج :)

fatto يقول...

ام حسين :
اشوه انج افتكيتي منها .. هذي البلاعه ماغيرها :) لوووول هذي قصتها قصه :)


ام مود :
دقيت وينج ماتردين علي ها ؟؟؟؟ :)

kazmawy يقول...

لوووووووووووولخنت حيلى فاتو
والله شكلج صغيرة على لوية الخدم ومغثتهم
الله يصبرج ويعينج
عندنا وعندكم خييييييير

fatto يقول...

انت وينك غاط غطه علينه .. اشدعوه كبر راسك عقب مابطلت ديوانيتك ويلا شنو ؟؟
:)

ومحد صغير .. كبرنا ياكظماوي كبرنه :)

اذا اتشوفني صغيره وناسه .. بس هااا يويلك ان دشيت ( بروفايلي ) وشفت عمري :) وذا شفته .. جنك ماشفته اوكي لووول

غير معرف يقول...

واي نفس أول خدامه فلبينيه يبتها والله بالضبط بالضبط نفس الطبع و تحملت ظيمها لان كنت حامل و بالأخير قالت لي انا مابي اقعد عندج بروح بيت ثاني!! فوق شينه قوات عينه طبعا خذيت منها كل الاغراض و الملابس اللي كنت شاريتهم لها و بالأخير و لا اشوف عندهابالغرفه شاريه خط تلفون و شامبو و كريمات و كاكاو و حلاو (مع ان انا كل شي اييبلها من كثر ما اييبلها حتى كلمن يقولي ليش مدلعتها) المهم طلعت تكلم الخدم و السواق اللي يمنا مع انها فلبينيه و اهما اغلبهم هنود و اهيا ماتعرف عربي و انجليزي كلش ضعيف بس النذله حق الخرابيط تعرف تتكلم عاد ريلي ماقصر فيها زفها زف و المكتب شخلوها و صاحب المكتب ضربها كف برد جبدي فيها و منها لله انشالله

نصيحتي: لا تتحاملين على نفسج و ترفعين ضغطج لانها غالبا قاعده تتعمد و لو تدشين غرفتها و تشوفين اغراضها راح تنصدمين انها مو بهالغباء اللي انتي متخيلته , اذا منتي بعازتها و تقدرين تتحملين جم اسبوع على ماتدبرين غيرها اقول توكلي على الله و ذلفيها و كان الله بالعون حبيبتي :)

fatto يقول...

غير معرف :


ويويويوي .. كل هذا يطلع من هالنوعيه .. من تحت هالله هالله ومن فوق يعلم الله .. اتصدقين انا ماحب اشك بالخدم مادر ليش .. واخاف افتشهم والا مره سويتها اخاف مادري ليش .. بس الحين انا ساكته عنها ومومجابلتها .. يعني ما ابي اعور قلبي معاها .. والحمد الله قامت تضبط الشغل .. وابشرج قامت اتسير اسرع من اول :)


يبلهم صبر اشوي :) وانشاءالله ماتطلع نفس خدامتج اتخرع جذي :)