الخميس، 16 أبريل 2009

وين راحت براءة عيالنا ؟؟

(مودو واستبرق " بنت خالته " )


تدرون كتبت الموضوع جان ينمسح كله ..... ضاق خلقي ..:)أملق حركة ..


اليوم كنا طالعين أنا وزوجي العزيز وكتاكيتي مودو ويسور ..ولفت انتباهي بنوتة كبر مودو اسم الله على عمرها وعمره...لابسة جينز سكني وتي شيرت أحمر قصير ..ومسوية شعرها ذيل حصان وطبعا الشعر ستريت وتاج ..وحاطة جنطة على جتفها ( قلت يحليلها يوم كنت بعمرها ما البس جنطة إلا من عيد لي عيد ..ولي وصلنا مكان في لعب عطيت الجنطة حق أمي ) لا وبعد الجوتي عزكم الله فلات ..حبيبتي يعني عالموضة ..ومعاها بنت اصغر منها بشوي ماسكه ايدها ويلعبون من لعبة لي لعبة اسم الله على عمرهم ( ذكرت ربي وتمنيت يرزقني بنوتة اتحلى عليها ) ..كل هذا عادي بس اللي خلاني انصدم واستغرب يوم رحنا نتعشى كانوا يمنا ما أشوف إلا تلفونها يرن وطلعته من جنطتها وترد ...!!!! أنا علامة تعجب ؟؟؟


شنو شصاير بالدنيا عمرها خمس سنين ...خمس سنين بس ..تلفووووووووووووووووووووون ؟؟؟؟؟؟


ليش شنو تحتاجه فيه ..إذا ألحين عندها تلفون مو بعيدة بعد جم سنه يشترون لها سيارة ..


ليش ما نخلي عيالنا يعيشون طفولتهم ..؟؟احس هالأشياء تخليهم يكبرون قبل أوانهم أوكي زمنهم غير زمنا بس في اشياء لازم نفهمهم أنكم مومحتاجينها الحين ..


بدل ما تشيل بيدها عروسة ( باربي مثلا ) شايلة جنطة وفيها موبايل ..أنا مو ناقده عالجنطة بس التلفون حق شنو ..؟؟ لا زين عالصحة ولا مهم لها ...!!!


ما ادري عيال هالوقت أحس ما فيهم براءة ...؟؟والسبب يرجع حق الأهل ..


يارب عينا على تربية عيالنا تربية سليمة ..


والله يحفظ لكم عيالكم ...ويستر عليهم

هناك 23 تعليقًا:

darkness يقول...

الله يخليهم لج و يرزقج بنوووته تهبل مثل ما تمنين و احسن

و بعدين هذي الكويت صل على النبي

!

um_alzain يقول...

صدقتي والله
الموبايل يضر بصحتهم وماله داعي بهل عمر
وين اهلها؟؟
اكيد رايحه مع الخدامه!؟
والله كل يوم نشوف ونسمع العجب للأسف !!

fatto يقول...

ماكو طفوله ابهالزمن .. الياهل من يولد صار مراهق لووول
اشوه اني عشت طفولتي :)

وانه الي تنبط جبدي ازياده .. الياهل الي على قولتج ابهالعمر ومكيجونها .. ااااااااه ودي اخذها وغسل ويها ابماي وصابون .. ليش المكياج اشماله ليش بتوخرون الويه البريئ .. هذا انا احاجيكم بالعيد وابحفلاتهم بالروضه ..

اما بلعرووووس .. حدث والا حرج .. هالماسكرا والايلاينار والحمره الحمممممره والبودر والبف .

بس ماني امكمله قلبي قام يعورني عليهم .
تصبحين على خير .. انا مادري شمسهرني لي هالحزه .

غير معرف يقول...

لووول هذي حدها ستايل البنت

الله يرزقج بنوته حلوه

طز بالرجالة يقول...

حلت البراعة محل البراءة

هذا هو الجواب

خلي الموبايل
انتي شفتي يراعة اليهال الحين؟ كل شي يعرفونه
و الام تشجع
ماكو كلمة وصخة ما يعرفونها و الام تضحك

مرة ياهل في مكان عام
مادري شنو قالت له مره...جان يشتغل عليها
يالق***
و الام لا حيا و لا مستحي ...ولا كلمة

و الياهل مستن يردد هالكلمة

فالموبايل وايد ارحم من الكلام الوصخ و الاخلاق المو نبيلة

Hashemy يقول...

فعلا بفضل التكنولوجيا الي تركض واليهال بعد يلقطون بسرعه اختفت معاهم براءة الاطفال وصار لازم تربي وتراقب الياهل اضعاف اول

بعدين احنا مشكلتنا ندلع اليهال

الناس مو لاقيه تاكل وتعيش

ياهل عمره 4 سنين عنده موبايل

ولي دش الابتدائي صار عنده لابتوب خاص فيه ومحد يدري عنه شسوي هذا غلط لازم حتى لو بندلع نراقب ونوجه هالاطفال ماندلع واحنا ماندري عنهم

احنا لي الثانويه نطالع جرندايزر
وهذيله بالروضه بدل لايشوف بارني يطالع نور ومهند ;p

غير معرف يقول...

فيونكات كتبت تعليق ذهب مع الريح
ومالي مزاج ارد اكتب اسمحولي.

العسل"طز بالرجاله"مع احترامي للرجال الحقيقين منهم فقط لاغير ..شكرا على الدعوه وانشاءالله يظل بلوغج مغمور واذا فتحت اميل وبلوغ راح ايي واعلق عندج براحتي بس انا متكيسله حاليا بامتياز مع مرتبه ومخده .... موتيني ضحك بنشيده الرجل الحديدي ههههههاي عجيييبه :)

تدرين تبردين الجبد وقاعده استمد قوه من خلالج
اخلي قلبي حديد.....مايذوب نفس الجليد امام كل من قال انا رجل غير اناوانا وانا واغلبكم كوبي بيست بسوالفكم وخشومكم اطول من بينوكيو P:

تحياتي بنت كوكب فينوس

Pearl يقول...

عيال هالوقت يا وخيتي يخرعون ...
احس اذا موكلهم اغلبهم قاعد يعيشون عمر اكبر منهم ..
لانهم يشوفون الكبار وايد .. صارهمهم ان يقلدون الكبار مو يلعبون و يستانسون في طفولتهم ..
من صج الله انشاءالله يعينه على تربيتهم و يحفظهم من كل شر ..
الوقت يخرع ..

Om MoD يقول...

darkness :

الله يسلمج حبيبتي مشكورة وايد ..

مثل ما قلتي ..بس لازم يكون حق كل شي حدود ..

um_alzain :

شفتي شلون..البراءة قاعده تنعدم من عيالنا ..

أي صحة محد هامة شي ..عبالهم بجذي قاعدين يدلعونهم ..
لا مو مع الخدامة ..مع أهلها ..
آآآآآآآآآ يا قلبي ..

fatto :


لووووووووووول ..

ويع هاليهال حتى ما تشتهين تبوسينها ..ما تحسين في اي براءة ..

بعد العروس سكتي ..صج صج تشوفين العجب ..

اسم الله على قلبج ..
وأقوولج الحين ..مساء الخير ..:)


Momenutum :

يسمع منج الباري ..

طز بالرجالة :


صاجة حلتها محلها بقوة..

ويع ...ويع ...شنو هذا ..؟

كل والسبة الأهل ..ما في تربية..

واكيد هذا أسلوبهم لأن الياهل يتعلم من أهله ..

انا حطيت شي من الاشياء اللي قاعده تعدم البراءة ..وإلا اهي وايده وشكثرها لا تعد ولا تحصى ..



hashemy :

يمه الزمن قام يخوف ..ولازم نراقب عيالنا أكثر واكثر ..


والمسلسلات خلها على صوب ..

غير معرف :

متى ما صار لج مزاج ردي وكتبي ..ودنا نعرف رايج :)

pearl :

هذا أهو الواحد لازم يركز عالتربية ..ويوجه صح ..

عشان العيال يعيشون كل مرحلة من عمرهم ..

والله المستعان على هالوقت ..

Mr_CHoCoLaTe يقول...

استخدمي الفاير فوكس احسن حتى لو علق ما يمسح الموضوع هي هي

بالنسبه للبنت الله يستر عليها و على اليهال الباجي و يحفظهم

هالشغلات اهي اللي تخلي مثل وحش حولي و ربعه يتطاولون على عيالنا

منها يبوقها و منها يخلص شغله استغفرالله

و الله يحفظ عيال الديره من كل مكروه

Om MoD يقول...

Mr_chocolate :

شنو هذا الفاير فوكس ما أعرفه ؟؟؟؟

والله يسمع منك ..ويحفظ عيال الجميع ..

صج والله انا اتفق معاك بهالشي ..أنا فز قلبي عليها شلون هالاشكال الخايسة ...الله يستر ..

ربي يسمع منك ..:)

ضد بني يعرب يقول...

بالعكس , ما ني شايفة شيء غلط ..

اذا كانت تربيتها صالحة و الأساس و الجذور و القيم و المباديء صحيحة التي قام والداها بغرسها فيها , فلاقوة بالدنيا ستجعلها تنحرف , المعنى : التربية ليست بالماديات و أقصد هنا ( الحجاب .. التنانير القصيرة .. الهاتف .. كومبيوتر محمول .. أو اغتراب الفتاة للدراسة بالخارج ..) كل هذه أمور مادية لا علاقة لها بسلامة القلب ..

أنا ارى أن المشكلة ليست بالفتاة الصغيرة بل بطريقة تفكيرك أنت .

تستطيعين أن تربي أطفالك كما تشائين , لكن لا تستطيعين تربية أبناء غيرك بالطريقة التي ترينها أنت وفق مفهومك الخاص ...

غير معرف يقول...

Mr_CHoCoLaTe يقول...
استخدمي الفاير فوكس احسن حتى لو علق ما يمسح الموضوع هي هي

بالنسبه للبنت الله يستر عليها و على اليهال الباجي و يحفظهم

هالشغلات اهي اللي تخلي مثل وحش حولي و ربعه يتطاولون على عيالنا

منها يبوقها و منها يخلص شغله استغفرالله

و الله يحفظ عيال الديره من كل مكروه

17 أبريل, 2009 01:13 م

_______________________________


يعني هل تقصدين أن وحش حولي يفترس الفتاة التي تستحق الافتراس ؟؟! و التي لا تستحق لا يفترسها ؟؟!

حمدا للعقل

Mr_CHoCoLaTe يقول...

انا ما قلت جذي

ادري التربيه شي مهم

لكن ضعاف القلوب بسهوله تستوهيهم البنت او الولد اللي يكون انيق و عنده اشياء مغريه يقدر يبوقها

و بنفس الوقت يكمل جريمته و يرتكب جريمه ثانيه

Om MoD يقول...

ضد بني يعرب :

احترم وجهة نظرك بالموضوع ..بس ما اتفق معاك ..

غير معرف :

اقرى مرة ثانية شنو كاتب ..

يمكن تفهم القصد ..

Mr_chocolate :

ما قلتي لي شلون ..؟؟

bhr.qadsaweya يقول...

ههههه
ضكتيني و الله
اشوة انهايات على جذي
تلاقين اختها الي اكبر منها عندها و اهيه هم تبي جان الأم تسكتها و تعطيها موبايل

هذا عصر السرعه و التكنلوجيا

يعطيج العافية

bhr.qadsaweya يقول...

والله يرزقج ببنية حلوة
واهيه اكيد بتكون حلوة
دامج انتي امها حبيبتي

يعطيج العافية

Om MoD يقول...

bhr.qadsaweya :

:)

ما أدري بس ما شفت أختها معاها ..

Om MoD يقول...

يسلمو بحرينية ..الله يسمع منج حبيبتي :)

fatto يقول...

اشوفج غيرتي الصوره ؟؟

Om MoD يقول...

شرايج مو أحلى ؟؟؟

MoOd يقول...

اللى يجابل و يربى ويعطى مكارم اخلاق لعياله
لما يكبرون يجنى ثمار تربيته


اما عيال المجمعات و الخدم

الله يعينهم على نفسهموالله يحاسب اهلهم

Om MoD يقول...

إي والله هالايام ..الخدم اهي اللي تربي ..الله يكون بالعون ..

بس للأمانه البنت ما كانت مع الخدامة مه امها ..