Strike Tv

اللغز :

ست وعشرون رجلا دخلوا مطعم ولا يوجد إلا واحد وعشرون كرسي كيف جلسوا ؟

تخيلوا إختي يوم العيد عطتني ورقة وفيها هالسؤال وقالت لي شنو الحل بكل سهولة جاوبت عليه لأنه حده قديم ومار علي ..جان تقولي تصدقين هالسؤال شفته بقناة Strike Tv والجائزة 25 ألف دولار والناس اللي يدقون مو عارفين الإجابة والمذيعة تقول دقوا ألحين وعلى طول راح تكونون على الهوا ورحت ودقيت المهم ولا كمبيوتر يستقبل المكالمة وتسجيلين بياناتج ويرد يقولج راح نرجع نتصل عليكم ..

تقول وانطر وانطر واللي يدقون شي عجيب غريب إجاباتهم سخيفة والأملق إنه المذيعة تساعدهم بعد ..

قلت لها وي يا يوخيتي صادوج هالقناة بس يتربحون من الناس ويبوقون فلوسهم ويحطون أسئلة سهلة وحلها أسهل والمبلغ عالي فيجذبون الناس إنهم يدقون والإتصالات اللي يستقبلونها وهمية كله ربوعهم وتخيلوا السؤال ظل لغاية اليوم الثاني واللي بعده بعد شالعبط معقولة محد يعرف الإجابة ولا دقوا على إختي ولا شي طلعت السالفة بوق ابوق ..

وأنا صارت معاي بشهر رمضان مع برنامج نهى نبيل اللي إسمه ( الكنز ) تخيلوا طلرشت لهم مسج على أساس أشارك بالسحب جان يدزون لي مسج بالسؤال وجاوبت وكنت ما أعرف الطريقة طرشت وطلع غلط طرشوا لي الطريقة رديت عليهم بالإجابة وطرشولي إني دشيت السحب وطبعا كل هذا على حسابي وعقب كل يوم يدزون لي مسج ( بعد قليل راح ندز لج السؤال اليومي ) و يدزونه لي والطامة الكبرى يوم اكتشفت انه كل مسج يدزونه لي يخصمون مني يا سلام عليكم أنا شكوا تخصمون مني أمس شاركت كل يود إدزون لي مسج وتخصمون مني بعد صج بوق ..

ونفس الشي مع صديقتي بالنسبة حق برنامج حليمة بولند ومحمد لويس ..والمشكلة بعد إنها دقت على شركة زين عشان يلغون لها الاشتراك وماكو فايدة ظلوا يدزون لها مسجات ودقت مرة ثانية والحمد الله لغوا الاشتراك ..

شنو هالنصب منو المسئول وشركات الاتصالات ليش تفتح خطوط للإتصال بهالنوع من البرامج وبالنسبة حق البرامج اللي بالكويت المفروض يكون في توضيح إنه تكلفة المسج مثلا نص دينار لكل مسج سواء مرسل أو مستقبل على التلفون ..

والله منبطة جبدي ليش يغشون هالبشر ويستغلونهم ..الشكوى لله