الأربعاء، 31 ديسمبر 2008

سوق الحمام

حبيبي حمودو قبل أسابيع خذاه أبوه يوم اليمعة وراحوا سوق الحمام وشرى كتكوتين ملونين تعرفونهم اللي ما يسكتون من التوصوص ويمكن 4 ما أدري 5 سمجات المهم ظلوا أهو مع يسور مجابلين الكتاكيت وأنا اتحلطم عليهم يعني لو إحنا ساكنين ابيت ميخالف بس إحنا قاعدين بشقة يعني مساكين هالكتاكيت محبوسين داخل الكرتون والمشكلة أثنينهم حاكرين نفسهم بزاوية ما أدري ليش وحمودو لزم ناخذهم معانا بيت الماما وخذناهم وهناك عيال أخوي ( سلمان وفواز ) ما قصروا فيهم ما يخافون اسم الله عليهم ويشيلون ويحطون فيهم وهذيل من عمر ما لهم روح بسرعة يموتون ومن الشيل والحط والغباء اللي فيهم طبوا داخل الماي يعني يبون يشربون واستبردوا المهم ما أطول عليكم ماتوا وكسروا خاطري ما أحب أنا جذي وأصلا ما احب احبس الحيوانات يكسرون خاطري وأصلا حمودو ويسور يخافون منهم يعني من نطلعهم من الكرتون ما أدري ليش يلحقون اللي يركض وعيالي متصروعين إي وعاد مثل ما قلت لكم ماتوا مساكين ظلوا السمج كل يوم تقريبا تموت وحده وما بقت إلا وحده وكانت مقاومة وصحتها زينه وحمودو يخاف عليها وكل يوم يجيك على مايها إذا نظيف ولا لأ ولازم يتأكد إذا عطيناها أكل ولا لأ وذاك اليوم قعد من النوم ومايها كان وصخ قالي ماما لا تموت غيروا مايها وصج عاد غيرناالماي وزوجي العزيز قال لا تحطون لها ماي بارد حطوا لها ماي شوي دافي وفقيره الظاهر تغير عليها الماي مع انه مو أول مره نغيره لها بس يومها وماتت وحمودو حده ضاق خلقه وياي يعاتبني يماه شفتي أنا قلت لج غيري لها الماي لا تموت وما غيرتي وماتت ..فديته حبيبي قلت له غيرنا ماما بس الظاهر لأنه حطينا لها ماي دافي ماتت حبيبي وايد تأثر بموتتها بعد عمري خاف وما سلم ويسوروه اييب علبتها ويقول : سمج مات سمج مافي ..فديت خشمك يا الحلو ..

عادألحين أبوهم شاري لهم كناريه والعجيب إنهم ما يغردون إذا شافوا بعض سبحانه الله وإذا بعدناهم عن بعض يغردون ويستانسون إذا حطيناهم بالدريشة بس أنا اللي مضايقني إنهم محبوسين داخل القفص ودي أدربهم إنهم يطيرون داخل الشقة عادي وبس بالليل نحطهم داخل القفص في طريقة معينة عشان أعلمهم..
هذا واحد من الكنارية :) يونسون مع إني ما كنت حابه صوت تغريدهم أحس جني قاعده بحديقه بس ألحين قمت أحبهم

حمود ( نانو اسم الشهرة ولد إختي ) أعز أصدقاء يسور لاحظوا العقنقز على ويه يسور

صار دور حمودو وتلعوزت معاه وألحين الحمد الله عدى هالمرحلة والدكتور قالي لا تحطين له هالدوا الأبيض ما منه فود ولا عود وصج ما كملت له شوفوا شلون مصبغته لأنه صراع معاه عشان أحط له الدوا و ما صدقت يوم قالي الدكتور مو لازم ولا ضروري ..

هناك 4 تعليقات:

kAiKa-MGroMa يقول...

لووووول نكته

بس امبيه غيري صورهم حرام مو حلوه هالصور .. شفيهم جذي شكلهم دايخين

وعيونهم رايبه

-_- ..

غير معرف يقول...

وااااااي مساكين :) مصبغين

و أم مود الكناري مو مال إطلعينه الشقه يوسخها

Om MoD يقول...

kaika-magroma :

لا حلوه ما فيها شي بعدين نانا بالصورة مريض كان عادي ..كلهم مرضى يعني أكيد أشكالهم بتكون جذي :)

master :

لوووووول شفتيهم خنت حيلي يعورون القلب ..

على قولتج أنا بالقفص ومو سالمه من وصخهم ما أدري ليش أهما جذي وصخين ..بس والله يكسرون الخاطر محبوسين بهالقفص ..

bhr.qadsaweya يقول...

بالنسبة للكتاكيت و السمج ان شاء الله عيالج يكبرون و ينسون
ويتربون بعزج الكناري حبيبتي
و زين صورتي عيالج عشان يكونون ذكرى
و ان شاء الله يروح منهم بسرعة
يعطيج العافية