السبت، 22 نوفمبر 2008

البر

هالأيام الجو وايد حلو وما قصر زوجي العزيز وعمه نصبوا لنا خيام ونروح بين فترة وفتره يوم شوي يوم غدا هناك وناسة حده وأنا أموت على البر من يوم كنت صغيرة وعلى الطاري تذكرت هالسالفة إقروها :

يوم كنا صغار كل عطلة 15 نروح نخيم كلنا عمامي وعماتي وخوالي وخالاتي يعني كل الأهل والأحباب ومو بس جذي كنا نبات هناك بس ننزل نتسبح ونرجع البر وماكو نرد جلحان ملحان لووووووووووول بس كانت أيام ولا أحلى ولا يمكن تغيب عن البال .. وبيوم من الأيام أنا وبنت خالي العزيزة و هي أكبر منى بسنتين بس ( للعلم: العادة إحنا نخيم في بر الدوحة ) كل يوم نشوف المدينة الترفيهية من بعيد عاد قالت لي : شرايج نروح الترفيهية ..عاد أنا رديت عليها وقلت : إي يلا ... قالت لي: خلاص باجر عقب الغدا ..
المهم يوم ثاني كلينا الغدا وعلى طول مشي لما الترفيهية نمشي ونمشي ونمشي ونمشي وكل ما نقول وصلنا بعدت المدينة وايد شنسوي ألحين المهم وصلنا على خير ودشينا المدينة ووصتني بنت الخال إذا أحد سألنا وين الفلوس نقولهم طاح البوك وما ندري ضاعوا ...وأنا ما علي إلا أقول إي :)

وصلنا الترفيهية ودشينا القبة وقعدنا نلعب وما نطلع إلا والدنيا خرمس وااااااي صار الليل شلون بنوصل المخيم وشلون بنعرفه المهم ما ظلت آية ما قريناها لما وصلنا الحمد الله ..والله الله حفظنا زين ما صار فينا شي والسالفة كلش ما كانت تسوى ...اخترعنا خرعة ما صارت ولا استوت ....واللي ذكرني بهالسالفة إنه هالسنة خيمنا بنفس المكان القديم اللي كنا نخيم فيه قبل .

على العموم ديروا بالكم على عيالكم وديروا بالكم من البقيات حافظوا على نظافة البر وودوا عيالكم يستانسون لا تحرمونهم من هاللحظات السعيدة ..

تصدقون البر هالأيام تطور سيارة راعي البريد تدور بين المخيمات واللي يبي يأشر له ويي لما عنده وطبوا وتخيروا من هالبريد شرينا حق اليهال وحقنا وعقب استبردنا وما قدرنا نقعد برة دشينا داخل الخيمة :)

راعي البريد أخترع وقالي : بتصوريني ليه :)؟؟؟

وهذا البريد

يا فرحتهم وهم ياكلون البرد من اليسار : حمود - عيسى - يسور - مودو

هناك 12 تعليقًا:

حياتي هدف مو عبث يقول...

شيشتيني على الترفهية :p

New Bride يقول...

وناسة عليكم بالعافية :)
انا مو راعية بر كلش :)

snow يقول...

شوقتيني عاد احب البر بس علشان اليمعه واللعب طبعا ما نحس بالوقت من الوناسه ، والحين ناطره على نار متى يبلشون ينصبون الخيم :)

DoDoq8 يقول...

ياحلات البر وياحلات اليهال


امس اليهال يحنوون يبوون برد بس الجو بااارد

:)

Om MoD يقول...

حياتي هدف مو عبث :

لووووول عاد ألحين الجو حده عجيب حق الترفيهية :)

New Bride :

الله يعافيج ..وحشتيني صار لي جم يوم ما أشوفج :)

وجربي البر وبتحبينه والله حده وناسة ..

snow :

إي والله صاجه ما نحس بالوقت واليهال يبجون حزة اللي نقول يلا بنرد البيت :)

DoDoq8 :

صاجه كلش مو وقت برد بس قلنا نونسهم وبعدين ما كان الجو وايد بارد بس يوم كلينا البرد استبردنا واليهال قاموا يكحكحون :)

om hussan يقول...

عجيب البر واحلى شي بالشتا البر وناسه وكسر روتين بالعافيه الشوي لاني اموت عليه بالبر

Manal يقول...

ضحكتيني على راعي البريد
:)

fatto يقول...

خابرتج يا ام مود خوافه .. ماهقيتج اتروحين المدينه الترفيهيه انتي معاها ابروحكم وتردون بليل :) لووول

والله بر الكويت صار كشخه .. حتن راعي البرد يتفرفر :) ماخلو شي .

Om MoD يقول...

om hussan :

إي والله حدة عجيب ...والشوي هناك مثل ما قلتي شي مو طبيعي :)

Manal :

شفتي مسكين اخترع :)

fatto :

إيرخوافه بس هذي الترفيهية مو لعب يهال ..أجازف عشانها ...
شفتي كشخة برنا :)

master يقول...

om mod:
جم كان عمرج وقتها ، إتخرعوون :)

Om MoD يقول...

master :

لووووووووووول قبل الغزو عاد تخيلي جم عمري يمكن 9 او 1و سنين مو أكبر من جذي :)
ومن كثر ما أنا مصدومة شلون سويت جذي مو قادره انسى السالفة :)

kAiKa-MGroMa يقول...

looooooooool ebda3

aham shy elhadeya ely 5thaitoha

le al7een mawjoda

bs lazem ayee barkom

D=.