الله ستر

حاليا إحنا مخيمين عند محمية زايد اللي ما يعرف مكانها إهي بالدوحة وايد قريبة من المدينة الترفيهية وموقعنا عجيب جنه طالعين بر بحر يعني البحر قريب علينا وقريب المغرب يتيمعون طيور النورس والفلامنغو ويصفون يم بعض بترتيب يا سبحان الخالق لونهم يشوق من بعيد وعندي بنت عمي الله يحفظ عمرها هواتها التصوير وعندها موقع بفلكر خذت أثنين من عيال خواتي مع ولد إختها ومشي لي البحر ومحد درى عنهم تدرون إهي غرامها التقاط الصور العجيبة بس انصدمنا يوم ردوا أشكالهم تخرع كلهم طين والطين لونه أسود ...وإحنا من أول ما خيمنا توصيات من عمي ديروا بالكم على العيال لحد يباعد لا يروحون ذاك الصوب ترى الرمال هناك متحركة وهي ما كانت موجودة يوم عمي وجه لنا التعليمات بس ....

الكل يسألهم إنتوا وين كنتوا وشنو هذا ؟؟؟ والله كنا رايحين عند البحر وما بقى لنا شي ونطب بالبحر تقريبا 3 خطوات ونطب ( اللي يتكلم بنت عمي وهي شاخطه أول وحده والعيال وراها ) المهم عاد تقول أنا حطيت ريولي ولا إدش ومو قادره اسحبها وأشوه إنها ماخذه معاها الصبيان ساعدوها اللي يسحبها من إيدها واللي يعابل بطلع ريلها ووصلوا لنا بالسلامة ..

بس والله خذت خوش لقطات شوفوها على فلكر واستمتعوا بصورها القديمة ..

الحمد الله على سلامتكم حبيبتي إنتي والعيال :) والله الله حفظكم :)ولا تعيدونها ..

أحلى ما في البر اليمعة ووناسة اليهال والأكل اللي ما يوقف ... كل شي حلو الحمد الله إنشاء الله نعودها كل سنه ..