الأربعاء، 18 فبراير 2009

شريت وشريت من ماليزيا

بعد ما عرضت لكم تقرير سفرتي ..الحين يه وقت أعرض لكم بعض الاشياء الي شريتها من ماليزيا.
طبعا انا مثلا أغلب الناس الي اتسوقو في ماليزيا أشتريت الشحاطات والشنط بس ما شريت التقليد ما احبه واصلا امطيح بالكويت أشكال والوان ..شريت كل شي صناعه ماليزيه ..زينه مجربتها ويطول ..بس ..بوتاتها من المره الي طافت ..ما كانت مريحه فماشريت بوتات..وبعد عندهم ملابس للاطفال حلوين وايد وعندهم ماركات ماليزيه أو شركات ماليزيه حلوين ويكدون ..فبنتي كان لها نصيب الاسد شنطه كامله لها لسنتين لجدام ..اتقولون أشدعوه ..والله ابصراحه أنا وحده إيدي اتحكني أذا دخلت السوق وشفت أشياء تعجبني وأسعار مناسبه ..أغلى نفنوف شريته حق بنتي صناعه ماليزيه ويصلح للتسيورات على 20د.ك ..والله خذيت وخمطت لما قلت بس حتى بجايم ملابس داخليه خذيت لها ..أما ولدي ما شريتله وايد بس من ماركه (بوني) كان في أشياء أتونس حقه ..
إنزين الحين المشتريات إلي مو كل واحد يتعنى ماليزيا علشانها ..والله أنا وحده أبحث عن منتج مميز وغريب ويتم إذكرني بالبلد إلي زرته
الدارسين دارسينهم شي عجيب من ريحته وطعمه شي افرش ..لونه بس عجيب بعد ما تتطحنينه ..غير (من أمه) خذيته من حديقه البهارات من بننق . شفتو كوده الدارسين الي تحت بالصوره كله طلع علي 1.450 د.ك كنت باخذ كل الموجود عندها بس وين احطه هذا بس خذا مكان بالجنه ووزن بعد وعن الفشله بعد خليت لها أشويه =) . تراه عصي طويله تقريبا طوله متر او اقل بشوي بس وثقيل بعد ..بس يستاهل الشيله والعنوه ..ويتم معاك 3 سنوات من غير مبالغه.
وبعد طبعا الشاي الماليزي .....بس هذا الشاي الي يبته والي أقصده شاي بورده من زمان انعرفه ..وموجود بالكويت بالمثنى كان محلهم ومادري اذا الا الحين موجود المحل بس هذا الشاي بورده شاي صيني الاصل صناعه صينيه مو ماليزيه بس موجود في ماليزيا ..فرعين منه البيت الصيني وعندهم موقع بالنت اذا تبون تطلبون منه ..بس أغلى من محل ثاني أبصراحه نسيت أسمه ..بس كان حاط كشك في مجمع اليديد جنه اسمه كوسبي المجمع الي فاتح ..وفي محل عنده في جنتج فوق في الدور الثاني ....المهم انا يبت منه هذي المره مو علشان جاي الورده لا علشان اشلون لافين الورده على اشكال ..صج صينيين ..أشلون لافين جاي الورده على أشكال ..أنا ابروحي متعجبه اشلون امكورين الورد واشلون بعد لما تتفتح الورده هنوب شكل اللف ..حبيت أشكالهم ..بس ترى طعمها موذاك الزود ..مع اني احب الشاي بأنواعه حتى شاي الفواكه أشربه ..وفيونكات عارفين ذوقي الصعب بالشاي والككاو =)..بس اذا ابخاطركم خذوه هدايا اونس ..واخذو الشاي الاسود والشاي الاخضر عجييييييييييييييييييب

حبيت القوري صبي عليه ماي حار يتحول الى وزه بيضاء اقصد ورده ;)

متفننين في اللف دقه ورتابه


علبتهم تراها الي لونها أسود بس الي يمه شاي أخضر وثاني شاي ورد جنيي أشرب ياسمين جذي يعني =)
شرينا قواري فخار صغار وبعد زجاج موجودين بالكويت بس حبينه نشتريهم من هناك ..وقلاصاتهم بعد تراهم مثل فناجيل القهوى
لما اتزورون البيت الصيني راح تقعدون حوالين طاوله وواحد صيني يصبلكم الشاي الصيني واشلون عاداتهم في شرب الشاي الصيني واشلون اسووونه ..طقوس ..شفتو اشلون القهوى العربيه ..نفسها ..وطول ما انتي قاعده على الطاوله اصبلج بالجاي في فنيالج ..ويشرب معاج بعد ..يشرب ويقول شربي ..طفحت ثلث ساعه اشرب شاي ماصارت صج بالي طويل بس اشلون اقوله بس اهز الفنيال مادري ..اصدقون واحد ناداه الي اصبلنا الشاي ..اهني انا انحشت ..بس كنت ابي اعرف اشلون اقولهم كفايه طفحت .
بس كانت تجربه حلوه بس ناقصنا اللبس الصيني ونعيش الجوى .



هناك 4 تعليقات:

malak يقول...

اول شي الحمدلله على السلامه



و خوووش شغلات و الله


اهم شي الدارسين كبير اول مره اشوف جذي


^_^

Om MoD يقول...

لوووووووول جاردينيا ..

أول شي بالعافية على مريومة اللي كان لها نصيب الأسد بالمشترى ..

وإنتي ما تيوزين من سوالف هالشاي ..ترى أي نوع تبون تسألون عنهاسألوا جاردينيا خبرة بجميع الأنواع ما شاء الله عليها ..

بس صج شكل الشاي يشوق أنا أول مره أشوفه ..

وعليكم بالعافية :)

RoOra يقول...

mshalah aldarsen sh6olha!
3bale mswyh zoom ;P
5osh sfra mshalah:D
mdam t7ben altea fe chna m7l belmohlb sa7bta q8iya kel anwa3 altea w al5l6at 3ndha ;P

sun shine يقول...

انا جربت الشاي الي على شكل وردة عجيب لمن تصبين فوقه الماي و تشوفين الوردة تتفتح ...ماخلو شي الصينيين:)