الاثنين، 9 فبراير 2009

ديروا بالكم وإنتوا تونسون عيالكم

ولد خالي اللي شد الهمة ونصب الخيام الله يعطيه العافية بونس العيال يوم ياخذهم بالوانيت يقحص فيهم ويوم يشب لهم جراقيات ( ألعاب نارية ) ويوم إييب لهم راعي التنكر ويرش لهم الأرض عشان يصير لهم طين ويلعبون لك طولت العمر وعسى ربي يخليه حق زوجته وعياله ..بس اليوم صار شي غير متوقع ومو حاسبين له حساب والله ستر والله الصراحة الله حفظ بنت خالتي المشكلة إنها واقفة من بعيد والعيال لو تشوفونهم يدورون دار مدار الجراقي اللي يشبه ولد خالي وإهي من بعيد ما حست إلا بحرارة يم عيونها راحت بسرعة غسلت عيونها وشيلتها حاشها شرار وانشقت ( خطاج السو حبيبتي ) وبعدين دشت داخل الخيمة تقولي أم مود شوفي شنو صار بشيلتي ..





استانسوا بس ديروا بالكم ..الله يعدي هالأيام على خير ..

ما قلت لكم بعد سالفة بنت إختي إحنا أول ما خيمنا طق مطر وبما أنا المنطقة مردومة فالماي يحتاج وقت على ما تشربه الأرض وبنت إختي سيارتها صالون صغيرونه وداشة بكل ثقة والسيارة محملة أوادم وأغراض لوووووووووووول عاد شفناها تسوق بثقة زوجي قال خلينا نلحقها شكلها داله المهم نمشي وراها ما شفناها إلا داشة بنقعة ماي جان إحنا نلف قلت حق ريلي أمبيه شكلها بتغرز وصج بعدنا شوي وما أشوفها إلا مغرزة لوووووووووووول شكل التاير يضحك يفتر وماكو فايدة مو قادره عاد ردينا لهم أول شي ريلي قال شكلها تحتاج ونش يسحبها المهم انزلوا من السيارة وبعد محاولات من زوجي العزيز طلع السيارة ..
لووووووووووول تعيشين وتاكلين غيرها يا دكتورة ...بس ديري بالج إي وما قلت لكم قاموا ما إيون إلا بجيب لووووووووووووول :)




سنوافيكم بآخر أخبارنا البرية إذا كان في أخبار :)

هناك 10 تعليقات:

غير معرف يقول...

ربي يونسكم أكثر واكثر

ويحفظكم أكثر وأكثر

تقبلي مروري السريع

haifa يقول...

ام مود

مره ثانية قبل لا تكتبين اي بوست رشي البلوق بملح مقري .. وعلقي بالبانر اكبر خرزة زرقة تحصلينها بالسوق

سالفة ام سطرين .. تنقلب دراما بسبب "الله يحفظة .. فديت عينه .. واعليا واعلى قلبه ..عسى الله يخليه ..الخ"

شدعوة يابابا .. ترى بلوق هذا حبيبتي مو يمعة جاي ضحى

DoDoq8 يقول...

هلا ام مود ماتسوه عليكم البر هذا

مو نفسه اهوا الي بنت خالج المصوره دشت بالطين :×


تك كيييير

joe يقول...

وووي ماسوت عليكم هالجراغيات والسياره لمجكنمه

يعطيكم العافيه

bhr.qadsaweya يقول...

عسى الله يحفظكم
وان شاء اللد دوم وناسه =)
يعطيج العافية

Om MoD يقول...

حجر كريم :

الله يسلمك وتشكر على هالدعاء ..

وحياك الله وإنشاء الله ما يكون المرور الأخير ..


haifa :

إنشاء الله المرة الياية راح اقوم بكل وصاياج ..

عزيزتي تقدرين اطوفين بوستاتي إذا ما تيي على ذوقج مو مغصوبه تقرين لي ..

وما شاء الله البلوق في تسع بنات أختاري اللي يعجبج ..

ويظل كلامج يعبر عن وجهة نظرج وانا احترمها ..

DoDoq8 :

شفتي شلون ..

إي نفس المكان ..

إنشاء الله ..

المباركية :

لووووووووول ..

الله يعافيك ..

bhr.qadsaweya :

الله يسلمج حبيبتي ..
والله يعافيج :)

غير معرف يقول...

يا حلو بوستاتكم والأحلى بعد إنكم عادي تحطون بوستات ورا بعض جنكم انا :)

وصح حطووووووووو بالكم .. والله يحفظكم من كل شر ترا متابعينكم لاتقاطعون حبيباتي :*

الله يحفظكم

stella يقول...

ما تشوفين شر يا بنت خالت أم مود ديروا بالكم من النار وألعاب النار وبعدوا اليهال عنها الله يحفظكم أن شاء الله

fatto يقول...

وييي خطاكم السو ديربالكم مره ثانيه .. وبعدو اليهال عن هالالعاب الناريه حتن لو يزعلون . المهم سلامتهم .

Om MoD يقول...

killie thiqqa :

:)

هذا الحلو ببلوقنا منع ومتجدد :)

ومإنشاء الله نكون متواصلين معاكم دايما ..

ومشكورة ..


stella :

:)

الشر ما ييج حبيبتي..

fatto :

خطاج اللاش حبيبتي ..

:) الله يسلمج ..