الخميس، 12 فبراير 2009

ماليزيا ..

رجعت بحمدالله من ماليزيا ..والحمدالله رجعت مستانسه وغيرت جوى..أنا ابصراحه كنت مخططه حق تايلند واخترت الاماكن والفنادق وكل شي بس لما صار الاضطربات عندهم ..غيرت وجهتي الى ماليزيا ..بس هذي المره رحت اماكن غير وأشياء ما شفتها ..الا في بعض الاماكن أنا احبها رحتلها .. طبعا البرجين وحديقته أحبها وايد
حديقت البرجين تتكون من مسابح عامه والعاب المتاهات ومراجيح ....ماشفت مثل مساحتها ..يعني اعيالج ماراح يملون منهم ولا من المسابح ..+ ان هناك اكوايروم يطل على الحديقه ..وطبعا البرجين شامل كل شي من محلات عالميه وماليزيه ..ومطاعم بأنواعها

أنا سكنت في فندق المطل على الحديقه ..تطلعين منه ادشين على طول الحديقه ..كل يوم اتمشى بالحديقه ..أسمه تريدرس



من الاماكن الحلوه من ناحيه الجوى والراحه ..منتجع المدينه الفرنسيه ..فوق الجبل قريبه من جنتج

وكان يومها مطر بعد زادها جمال


أما بننج أنا ما احبها وايد بس رحتلها علشان أشتري منها أغراض ..منها الدارسين من حديقه البهارات وجاي الصيني من البيت الصيني في بننج ..بس اتمشينا في حديقه الفواكه والبهارات وتسبحنا وأخترت فندق عادي يكون في وسط سوق الليل علشان التسوق تالي الليل =) أسم فندقنا بارك رويال اللوبي ماله أينن كله قاعده فيه اطلب نسكفيه

زهرة القوه لونها ابيض من حديقه الفواكه

صوره من حديقه البهارات ..أحب أشرب فيها شاي على المقهى المطل على البحر

أفاموسا ..اهنيه حق بنتي حجزت في فله فيها مسبح ..بس بلليل فلم رعب خرمس وشير تتحرك وجنه ابروحج بالفلا + أضيوف الغابه ترحب بكم ..السيده العنكبوت ..واصحابها البراعصه ..وقبيله الباعوض ..بس بالنهار وناسه ..حق اليهال اتونس ..اكوابارك اصغيره ..ومدينه الكابوي فيها عروضات من بعد المغرب الى الساعه 10 بلليل ..ماراح اتسكرين لا عينج ولا حلجج من الوناسه ..بس محتاجه مهفه + دسكفري لحديقه الحيوانات ..لليهال اتونس ..أما المعاريس مادري


لوبي فندق افاموسا ..أنصح بالحجز بالفندق مو في الفلل ..علشان الفندق قريب من كل مرافق المنتجع أما الفلل ..فوحيده مع أصحاب الغابه =)


حجزت ليله بالفلل وليله في فندق المنتجع استراحه في الفندق أفاموسا

أما جنتج ..كان فاتحين شي يديد أسمه مصنع الككاو للاطفال ..فحجزت في فندق أسمه شي وورد نسيت اسمه المهم فندق الملون الي أطلعين ريولج من الفندق اطبين في مدينه الملاهي ..اضحك من كثر الناس الي فيها ما يفضى ابدا ..ابدا كله لويه وزحمه ..بس تضحكين وتتعجبين من كثرهم ..تبين اتسوين جيك أن اتحجزين رقم وتنطرين دورج ..وللوبي كله كراسي ..جنج بالمستوصف مو لوبي ..,كاوترات مالها آخر ..اتشوفين اي كونتر ..راح اناديج ..أما جيك آوت ..مالهم فاضيلج ..في ماكينه ادخلين كرتج فيها وبس روحي
ومكان الريوق .. ملعب كرة قدم من كبر الصاله ..اي صاله مو مطعم فندق ..وطبعا كل شي دور عليه ..تبين بيضه صفي دور 10 دقايق ..حطيتي بيض ..تبين اكواسون ..صفي دور 10 دقايق ..تتريقين اصلا قبل ما توصلين حق الطاوله =) شي اضحك وعجيب .
جنتج هاي لاند متكونه من سوق + مدينه الثلج ماله دبي احلا منها +متحف عالم الانسانيه للاشياء الغريبه (حبيته روعه )+طبعا صالات البولينق والالعاب الاتاري ..وتسلق ورمي الرماح ..+ مسارح +سيرك +ساحر ...وايد أشياء +الحديقه الخارجيه وفيها مدينه الديناصور يعلمون الاطفال أشلن اكتشاف الهياكل الديناصوريه + مصنع الككاو الي أنا متعنيه على شانه ..أصغير كلش بس يشرح أشلون يصنعون الككاو من ثمره الككاو ..شكله اونس لليهال ..وأنا حبيت الديكور جوها بارد بعد مع غيم بين فتره وثانيه اتغطي الحديقه ..أشوه ما حاشنا مطر .

حليب ككاو


يعني ككاو



فراوله بالككاو

وناسه كانت سفرتنا غير ..وحلوه ..كان طيرانا الامارات ما اسافر الا عليه ..سفرتنا 10 تيام ..أنا جذي احب أسافر ما احب أكثر

هناك 16 تعليقًا:

nikon 8 يقول...

الحمد الله على السلامة
تغطية جميلة لبلد جميل :)
عليج بالعافية :)

fatto يقول...

الحمد الله على السلامه ياجاردينيها :)والله ولهانين عليج وايد .. والحمدالله انج غيرتي جو واستانستي بالسفره :) التغيير حلو وماليزيا عجيبه طبعا بدون كلام :)

Me Blogging يقول...

وناااااااااااااااااااسه

أكيد جاردينيا طلعتي كل هذي الاماكن من المنتديات ؟ :)

مت مت من الضحك على سالفة أصحاب الغابه :) و السيده العنكبوت

الحمد الله على السلامه

إي صج ... سؤال ، البيبي الصغير خليتو بالكويت ؟

Pearl يقول...

الحمدالله على السلامة .. و زين ما سويتو ..الواحد يحتاج يغير جو ..

و خوش شرح وافي عن السفرة .. عشت الجو و انا اقرا البوست :)

عليكم بالف عافية ..

sun shine يقول...

الحمدالله على السلامه الصراحه الصور تشوق وزينسويتي غيرتي جو قبل .... انشوفج عن قريب:)

joe يقول...

عااد ونااسه شرق اسيا الواحد ينفتح قلبه لما يروح هالدير و يشوف طبيعة حياتهم و طريقتهم عيشهم
ووزين سويتي غيرتي جو
بس انا بحررج بشي وااحد جونا بالكويت اونس يمكن انتوا طق عندكم مطر احنا طق عندنا غبار

الحمدلله على السلامه

جاردينيا 2000 يقول...

الله يسلمكم..وانا بعد اشتقت لكم افيونكات ..
nikon 8
شكرا
fatto
بس الحين انا اكتفيت منها ..وصح عجيبه ..مادري راح ارد اروحلها ولا
ME
اي اكيد طلعتها من تصفحي بالمنتديات ما اعرف اروح مكان الا وانا عارفته عدل
لا ولدي وياي ..ما أعرف اسافر من غير اعيالي
PEARL
مشكوره ..الله اعافيج
SUN SHINE
اي ما بقى شي وارجع لكم
المباركيه
اي وايد حريتيني ..واصلا استقبلني الغبار ..وطيحني مريضه على طول

Manal يقول...

عليكم بالعافية

:)

والفكرة موجودة
بس لما تقل المسافة لاني في بريطانيا الحين
والطريق دبل

:)

Om MoD يقول...

عليج بألف عافية والله خوش سفرة وخوش تغييرر جو ..

أكيد مريومه كيفت بس الصغير حبيبي ما يدري وين الله قاطه ..


قبلاتي محملة بشوق لكم ..

kuwaitawy يقول...

الحمدلله عالسلامة


وبصراحة



هالبوست راح يعني لي الكثير الكثير بالمستقبل القريب :)


مشكورة لأن فعلا مناظر ومعلومات قيمة ومفيده


ومشكورة مرة ثانية

غير معرف يقول...

الحمدلله ع السلامه

غير معرف يقول...

جنة سافرنا معاج :) وناسة

الحمدلله على السلامة يا الغالية والله تغيير الجو أحلى شي مافي أحلى منه بس عسى يبتيلي صوغة وياج (;

حمدلله على سلامتكم ويسلمو على البوست إلي يهبل :*

bhr.qadsaweya يقول...

حمدالله على سلامتج و سلامة اليهال
وان شاء الله دووم متانسين =)
يعطيج العافية

غير معرف يقول...

عليج بالعافية يا أم عيسى صراحة شوقتيني واااااايد

stella يقول...

وناسة حدها عجيبه السفرة صج شوقتيني على الروحه حق ماليزيا ... الحمد الله على السلامة وتعودونها كل سنة ان شاء الله

stella يقول...

وناسة حدها عجيبه السفرة صج شوقتيني على الروحه حق ماليزيا ... الحمد الله على السلامة وتعودونها كل سنة ان شاء الله