الأحد، 18 يناير 2009

مو معقولة ؟؟


مودو معطل صار له أكثر من إسبوع هل يعقل إنه العطلة تبتدي في 1/2 /2009 والناس تغيب من قبل إسبوعين تقريبا ..؟؟

حبيبي فديت خشمه قعدته من النوم ولبسته ودفيته ويلا على الروضة وإذا بالحارس ..لاحظوا حارس الروضة قبل ما يدش مودو قالي : ما فيش ولا طالب يا أستازة ..

أنا : ؟؟؟؟؟؟؟؟؟؟ أي شي شكو تو الناس على العطلة ..

رد وقال : بآ كل سنة وإنتي طيبة وما فيش دوام إلا بعد أجازة نص السنة ..

أنا : أوكي ..بس تو الناس ؟؟

الحارس : إزا كنتي عاوزه تنزلي تكلمي الإدارة تفضلي ..

أنا : لا ..مودو إصعد السيارة ..

حبيب القلب لما صعد السيارة يقول : ماما وديني روضة ثانية ..لوووووووووووول

شكو أنزل اكلم الإدارة شقولهم تخيلوا يعني من عقب عطلة العيد ما دوام مودو أول شي صار في عقنقز عقب راح له يومين وكله ضم لما ما بقى أحد غيره بالروضة ..شنو هذا ولما سألت بنت عمي تقول عندهم بمنطقة حولي التعليمية ( الرميثية وربعها ) دوام عادي وما في أحد غايب يمكن توهم غايبين مو من قبل ألف سنه ..

منو المسئول؟؟؟؟؟؟؟؟؟

هناك 18 تعليقًا:

Sn3a يقول...

فديييته اللي يبي روضه ثانيه

الكويتيين مالهم خلق لا يداومون ولا يخلون عيالهم يداومون

انا كنت بروضه خاصه حضوري اجباري لول
لا وامتحانات

غير معرف يقول...

التجاري معطلين من بعد اجازة العيد والعلمي يداومون بس عشان الرياضيات
بس علمي ان الروضة يداومون بس ماادري وفي بعض الروضات اذا كملو يخلون اليهالو يغيبون ع ما اظن

TruTh يقول...

كاااااك سلم قلبه يبي يروح روضة ثانية

شطور اسم الله عليه

:)

وماعندي فكرة عن الموضوع لكن واضح ان هذي الكويت صل على النبي

P:

DoDoq8 يقول...

المنطقه العاشره


ابتدائي وروضه صارلهم اسبوعين معطلين :)

جاردينيا 2000 يقول...

مدرسه بنتي ..صارلها من الاسبوع الي فات ..معطلين ..وقبل عيد الاضحى وديت بنتي ..وكان في طلبه الصبح وبعد الساعه تسع خذوهم ..مادري ليش هل حركه يا اتودوهم او اتغيبونهم اتفزعونهم من الصبح وبعدين تاخذونهم بعد ساعتين ؟؟والمشكله بنتي كانت اتقولها الابله دقي تسعه قبل رقم امج بنتي مافهمت قالت رقم امي يبدي بسته مو تسعه وصارت ادق مايطلع ولا كلفت نفسها ابله المناوبه ان تتصل اهيا وتخيلو ضلت بنتي مع بنت في صف ثاني وابله المناوبه للوحده ونص ؟؟؟عند الباب ينطرون ..ومنها قلت بصير نفس حريم لكويت وبغيب بنتي قبلها بسبوعين بعد ..ولا اخليها وعليه ابروحه تنطر للوحده ونص

joy يقول...

هذا يسمونه بربسة

master يقول...

هاهاها روضه ثانيه ... حلوه

و جاردينيا شهل مأساه
الأبله تحر ، الكبار ينسون يضيفون 9 تبي الياهل تفهم ؟؟؟

master يقول...

و الله أنا المآساه
قريت تعليقي ما فهمته ، كلمة (شهل)
مفروض شنو هذي المأساه وااااايد أعرف عربي

بنات عبدالغني شربت يقول...

اهم شي ان بروح روضه ثانيه
الله يخليه ان شاءالله

الكويت احس انهم ما يصدقون احد يقولهم غيبوا

Tekana يقول...

هذا حال مدارس الكويت ...عطله قبل العطله بأسبوع

غير معرف يقول...

يحليله و الله يخلية

إن ييتي للحق
اطمن حق قلبج يكون بالبيت ولا بهالروضة المريضة اللي ما عندهم مسؤولية ولا التزام بقوانين الوزارة
الله يستر على عيالنا

علي يقول...

ههههههه والله ما ينعرف لكم يا الأمهات
لما كنا صغار ما يخلونا نتغيب الا العصا على ظهورنا تلعب رايحة ياية
ونتمنى تيي الاجازة من الله
يعني احمدو ربكم حصل الياهل عطلة

بس انا ادري شنو السر على هالمعارضة الشديدة كلها علشان الياهل لا يبقى بالبيت ايننكم :D


اللهخ يخليه لكم ويكبره ونشوفه معرس

kAiKa-MGroMa يقول...

lool

احسن خل الأبلات يرتاحون منهم

P:

حمود حياتي كل شي عنده سهالات صج

لي قالوا ياهل

D=.

Manal يقول...

يا حياتي والله
حبيبي

صج سلم خشمة

يالله
بعد شيسوي

دوامات بطيخ

bhr.qadsaweya يقول...

فديته الي يبي يروح روضة ثانية

ترا احسن يقعد بالبيت و لا قومت الصبح وي البرد
يعطيج العافية

Om MoD يقول...

جاردينيا 2000 :

شالأبلة اللي تحر شنو هالحركات المفروض تتعامل مع الطالبات جنهم بناتها ...وزين تسوين عرفتي لهم مغيبة بنتج مبجر ..

master :

لا تحاتين عرفنا الكلمة ..
ولج وحشة وينج غاطة ما تبينين من زمان ؟؟؟

وكلكم تشكرون على التعليق ..

واللي يبط الجبد إنه الناظرة في بداية السنة وبالاجتماع الأول أكدت على الحضور واللي يغيب راح يفصل ..أي شي وطلعوا خواره وبس حجي ..

malak يقول...

اللي اعرفه ان الروضه يغيبون مبجر

والاهل يغيبون عيالهم مبجر بعد


يحليله حلوه وديني روضه ثانيه ^_^

Pearl يقول...

يا حبيب قلبي .. مايبي يقعد بالبيت
يبي يروح روضة ثانية :) يحلاتة

الغريب في مدارس الكويت ..عدم الألتزام ..
ليش بلا في المدارس الخاصة يداومون لي اخر يوم و في نشاطات و واجبات ؟!!
و يقولون مدارسنا صارت قوية بعد ؟؟
ما اتوقع !