الخميس، 15 أكتوبر 2009

بدون ذكر اسامي


مساء الخير جميعا :) .. جم وحده منكم انقصبت على شي اهي ماتبيه .. أقصد اذا احملت الوحده وفيها بنيه الأهل يدورولها على اسم حلو .. والأغلب يسمون على اسم ام الزوج او الزوجه .. بس اذا كان اسم أم الزوج وأم الزوجه موحلو كللش أقصد غريب وموحلو ومادري من وين امطلعين هالاسم .. ليش اتسمون هالبنيه الكيوت الي خدودها ورديه وشعرها لمكتكت هالاسم .. كفايه الأم متعقده من اسمها ليش اتزيدون عدد لمعقدين :) طبعا هذيل الأزواج المسيطرين على زوجاتهم الي ماكو تفاهم :) والله في وحده لمن يابت بنيه وهي بالمستشفى قاعد تبجي وترجاه عشان مايسميها على امه لأن اسمها مادري اشلون قايل .. بس مايهزك ريح وسماها .. وبعض الاسامي اوكي معانيها حلوه بس الاسم نفسه موحلو كللللش..بس طبعا لبنيه اذا رفضت الاسم مومعناته ان ماتحب خالتها ..لأ.. معناتها ان ماتحب اسمها فقط لاغير .

وفي سالفه طرت علي .. في أم قاعد تقول حق ولدها انشاءلله اذا الله رزقك ببنيه لاتسميها على اسمي مابي احد يسمي علي وانه حيه (والأم مسكينه كلش اسمها موحلو).. جان يقولها والله يايمه لانتي حيه والا انتي ميته بسمي بنتي عليج لووووووووول .

وكله كووم واسامي بعض اخواني البدو كووم طبعا اقصد الاسامي الي استحي اكتبها اصلا.. طبعا عارفين شنو اهي .. يعني الله منعم عليك احلا نعمه بالوجود ولي اهي نعمه لعيال وربك خلاك اتسير أبو .. ليش اتسمي هالاسم !! على بونه ياتك بنت اتسميها هالاسم !! مادري ليش بعضهم مايحبون البنات !! عيل ليش يتزوجون ..!! حرام عليك هذي انسانه وهذي احلا هديه من ربك ليش اتسميها هالاسم !! هالموضوع حارني حده .. اصلا هالموضوع يبيله بوست بروحه .

هناك 21 تعليقًا:

Dark angel يقول...

دايما يختارون للبي بي اسم كيوت لأنها بيبي .. بس ما راح يلبَأ عليها لما تكبر


اختيار الأسامي المركبة أو معقدة بعض الشيء تبدو أروع مثل :

بلقيس

نيفين

استبرق

سُندس



حتى الأسماء الأجنبية تبدو جميلة :

كاثرين

كاميليا

روزابيلا




الاسامي ببلاش

:)

Unknown يقول...

ana 6fartee ele y'3sboon 7reemhum 3la elesamee! i believe ena el ryal leh 7g ysmee esm awal sbai bs l'ana ra7 yseer abo flan 5law elbajee 3la elmara w3lia broo7ha t3bt !

رورو الشخبوطه يقول...

السلام..

وي كسرت خاطري الام اللي ولدها فشلها طيبه خاطر قول لج طولت العمر يارب..

لو ولدي جان ادبته خخخ..

امم انا افضل الاسمي المعاصره اللي تنفع لكل وقت وللبنت من اهي بيبي لما تصير يده..

اسامي الحين ماحبها رنا ورولا وشادن وبطيخ ماحسها اسامينا..

حلاته دلال ومريم وفاطمة وسارة واسمي والخ..


انا عن نفسي مسميني ع يدة ابوي بس امي مارضت باسمها الاصلي عدلته بحيث ينفع للحضر والبدو ..

لو مسميني الاسم الاولي جان لي الحين انا بطن امي ماطلعت خخخ..


ومرسي ..

lawyer يقول...

اتصدقين انا الاسامي عندي مو بيج ديل

يعني عادي اي اسم

بس اتقهر و تنبط جبدي لما احد يعيب على اسم خديجه ام المؤمنين

يعني لا تسمون بس لا تعيبون على اسمااء الصحابياااااات و اسماء اليدات

مثل مووزه
عبالهم الناس عن الفاكهه ما يدرون ان لؤلؤ


وايد وايد مشاكل تصير على الاسامي بس انا اشوووووووووف ان السالفه بسيطه يعني ماله داعي الزعل فيهااا

3BeeDo ;) يقول...

لوول عاد انا من النوع اذا كان الاسم مو حلو مو شرط اسمي على ابو اني احب امي وله ابوي خو المحبه بالقلب مو انه نسمي على اسامي امهاتنه وله ابهاتنه :> واذا على البدو اليي يسمونه اسماء مادري شلون صايره الله يهديهم اهم عبالهم المره مو ادميه واهم الاوادم والله يهديهم نشالله :>

Om MoD يقول...

بصراحة أنا من النوع اللي يشغلني الإسم وأحب اختار اسم يديد وبنفس الوقت حلو ومو مكرر ..

أدري بتقولون شنو محمد ..ما يخلى منه بيت ..أنا سميت محمد على اسم النبي ( ص) ...والحمد الله اسمه اينن وأكثر ...


وبعدين أفضل شي الاتفاق ولازم واحد يتنازل عشان الثاني وما له داعي العناد ..يعني بالنهايه أهو ولدكم أو بنتكم اثنينكم ..


ومن أو ما الوحده تحمل حطوا اقتراحات الاسامي او سووا قرعه ...والله في وايد طرق ..


وعقب كل هذا أقول الأم ثم الأم ثم الأم اهي اللي لازم تسمي أو تكون عالاقل راضيه عن الاسم ..:ل هالتعب والشقى واخرتها اسم مو عاجبها ..


يعني مثلا ياسر أبوه ما كان عاجبه كلش ...بس شاور نفسه وقدّم لي تنازل :)



حلو الاتفاق والتشاور مو بالغصب والهواش والمناجر...



أدري إني كتبت بوست بس والله في أسامي تحتارين شلون اهلهم سمّوهم ..


وبالنهاية يفضل تسمية الجنين وهو في بطن أمه وهي بالشهر الرابع حتى يقترن الاسم مع الروح :)



وشكرا وسوري عالإطاله :) وعسى ربي يرزق الكل عيال ..

غير معرف يقول...

السلام عليكم

يعطيج العافيه طرحتي موضوع مهم وايد ومنتشر مثل ماقلتي في بعض الناس تسمي بناتها على اسم اليده ويكون اسمها اذا موحلو قديم ومنقرض
يعني ماحطو ابالهم موقف البنيه اذا كبرت او موقف امها الله يهديهم ويصلحهم
لا والحين طالعين بحركه يديده اذا ماسمى على امه يقولها تسمي البنيه عاد تعالي وسمعي الاسامي الي تنقيها بروحها ماماعوده شنو تبي تنقي بعد ؟؟؟؟ :)

cup cake

غير معرف يقول...

عندنا واحد بالدوام ياله ولد جان يسميه على اسم رفيجه ويوم سألته ليش ماسميت على ابوك قال ولدي ما راح يصير أغلى من ابوي حتى لو شال اسمه لكن رفيجي اخو دنيا والدنيا مثل ماتجمع تفرق وسميت ولدي عليه علشان يكون اسمه دايم على لساني لان اسم ابوي دايم على لساني كل ما ذكرت اسمي
اقنعني :)

غير معرف يقول...

ehya le3bat-ha bl BCHER.. ya3ne etha sammaw awwal baby 3ala esm el yad aw el yadda ..fa ma ra7 n5ale9 .. el kel byen8ar o yaby esm el a7faad 3alaih

bs etha el zojain mtaktekenha 9a7 o sammaw el becher 3ala hawahom ;p.. ma77ad bye3tere'6 3alaihom

o etha mani '3al6ana .. chenne sam3a enna tasmeyat el abna2 mn 7a8 ezzoja awalan !! konha ehya elli t3abat o 7malat

fatto يقول...

دارك انجل :
اهلين وسهلين .. شلخبار انشاءالله كلشي تمام :)
دايما يقولون خن نقي اسم يلوق عليها لمن تكبر .. بس انا اعتقد الاسامي قاعد تختلف من جيل لي جيل .. وشوي شوي قاعدين انتعلم عليها .. ومثل مااسم فاطمه راكب على اليده .. انخلي مثلا اسم استبرق مع التعود راح يركب :)




عنونه :
اهلا عنونتنه .. اشلونج شخبارج .. عاد مادري ليش حاسه ان اسمج حلو :)
انا معاج الصراحه بلي قلتي .. في بعض الرياييل عنيدين والله يعين حريمهم .. الاتفاق حلو .. وعلى قولتج المره اهي الي تعبانه وطلعت روحها مع البيبي .. خو خل اتسميها عقب هالتعب والشقى الي مرت فيه .. وعلى قولتج وهو خل اسمي اسم اول صبي .






رورو الشخبوطه :
اهلا اهلا ابرورتنا.. شخبارج .. مس يو والله :)
لوووول قاعد يتغشمر معاها اكيد :) لووووووووول موتيني ضحك انج راح اتكونين ابطن امج واراح تطلعين .. شوقتيني ودي اعرف الاسم الي كانو بسمونه لج :P






لويار :

اهلا اهلا ابمحاميتنا .. شالغطه .. فقدتج :)
وانه بعد امقصره من زمان موزايرتج :P
صح كلامج اسماء الصحابيات عيب اصلا اعيبون عليهم .. اما اليدات ترى اساميهم مافيهم شي بس جيلنه بغير موحاب اسامي اول .. انا اسمي واسم خواتي من اسامي اول .. بس الناس ملت من كثر ماتسمع ابهالاسامي المكرره تبي تجديد :)

غير معرف يقول...

مو بس البدو الي مايسمون اسامي حلوة حتى الحضر وايد حضر اسامي عياهم غلجه وصعب نطقهاوالبنات اساميهم قديمه ومو حلوة ومابي اذكر امثله
اصلا اختيار الاسم الحسن حق من حقوق الولد على ابوه في الاسلام وفي قصه الرجل الي جا يشكي عقوق ولده لما جا الولد لعمر بن خطاب ساله عن اسباب العقوق قال هو الي عقني قبل اعقه اختار لي اسم مو حلو وماتخير نسب امي زين

fatto يقول...

عبييييدووو :
اهلا شلونك شخبارك :) .. بس في بعض لهل يبون احفادهم على اساميهم .. طبعا اهنيه مانقدر انقول شي :) اي والله الله يهديهم .. اصلا المفروض المكان الي يروحله الي اهو مادري وين وماعرف اسمه لوول يرفضون ان يسمي هالاسم والله .. يعني الانسان له احترامه حتن بسمه .





ام موود :
هلا والله ام موود شخبارج .. اشتهيت جباتي كله انسى من اي جمعيه الفردوس ويلا الاندلس ؟ عشان اطرش سايقنه وذا تبون قوليلي عشان اييبه لكم الدوام :)

وانه بعد اهتم بالاسم .. وعلى قولتج اهم شي الاتفاق يكون بينهم .. اعجبتني ( اقتران الاسم بالروح ) :)





كب كيك :
وعليكم السلام واللع يعافيج و هلا والله فيج :)
لووووووول بعد هذي ول مره اسمعها .. يعني ماكو فايده الاسم راح يكون قديم بكلا الحالتين :)




غير معرف :

هلا والله :)
حلو تفكيره عجبني .. الله يدوم الصداقه والمحبه بينهم يارب :)




غير معرف :
هلا والله :) بالضضضبط نفس تفكيري :) الاسامي الي بره العايله احسن عشان مايكون زعل عند اليدات واليدان :)

lilly يقول...

مادري أحس عادي كله أسم مو فارقه معاي وايد والأسم ماراح يجدم ولا يأخر


بس أكيــــــد ضد أن الوحده تسمي بالغصب .. هذي فرحتها ومن حقها أختيار الاسم اللي بخاطرها

joe يقول...

هالايام ملاحظ الشباب مركزين على الاسامي اليديده مثل ابرار ْ, ساره , نوره
هذي الاسامي حلوه
اعرف وحده بدون لا اذكر اسمها
كلش اسمها مو حلو انزين يدتها اسمها مو حلو اهيه شكو تسمونها جذي
جنه اسم صبي بس اخر شي هاء

reemas يقول...

سوالي بناتي و انتي سألتي البنات
يعني مو شغلي اجاوب ههههه
بس حبيت اسلم و اقرا التعليقات :)

Sweet Revenge يقول...

عن أبي الدرداء قال : قال رسول الله (صلى الله عليه وسلم) : (( إنكم تدعون يوم القيامه بأسمائكم وبأسماءآبائكم فأحسنوا أسمائكم ))


الله راح يحاسبة الي يسمي عياله باسماء سيئة في بعض الثقافات لهم اسماء متداولة عندهم ولها معني حلو ممكن اطوفها بس اسماء تفشل او تعقد الياهل فهذي كلش مو مقبولة ولازم يسون شي يجرم هالموضوع المفروض حتي شهادت الميلاد ماتطلع بالاسم

Sn3a يقول...

وحده من البنات مسكينه سألتها شسم بنتج
قالج فلانه
ولا الابو مسجلها اسم ثااني;p
فقيره
لا ويريت اسم امه


لا والشي اللي يقهر
لما كل العايله تتفق على اسم البيبي من ورا الام والابو
وانتو شكو!!

fatto يقول...

lilly
هلا والله فيج :) .. انا مو اقصد اي اسم .. اقصد الاسماء الغريبه الي مادري من وين يايبينها .. ودي اذكرلج والله جم اسم بس اخاف وحده اسمها من الاسامي الي بذكرها وتزعل .. فمابي ازعل احد .. معن ماعتقد الاسامي الي ابالي في منها وايد .. يمكن بس وحده ويلا ثنتين :)



المباركيه :
اهلا اهلا :) ... مادري ليش يعقدون اليهال مساكين .. انا ولد خالي غير اسمه لأن تعقد منه .. كل ربعه قاعدين يعيبون عليه .. مسكين نفسيته اتعبت .. وعقب جان يقول حق اهله كيفكم ترى بغير اسمي وفعلا مسكين راح غير اسمه .

fatto يقول...

reemas
امبيييييه انت ريال !! وانه طول لوقت قاعد اعلق عندك على بونك بنيه .. انزين ليش ماقتلي انك واحد .. بعد انا ماجيكت بروفايلك .. سوري :(
استغربت قاعد اشوف ليش كاتبه انتي سألتي البنات !! قلت خن جيك على البروفايل جان انصدم الصراحه :)

بس شكرا على المرور .. وسوري على الغلط .. تحصل ابأكبر العايلات :)

سؤال : شنو معنات اسمك reemas ؟؟







سويت ريفنج :
اهلا اهلا :) بالضبط .. اشلون الي يشتغلون ابشهادات الميلاد يرضون ان هالاسم يطلعونه !! المفروض يمنعون هالشي والله .. لأن الاسامي قويه وتفشل ماتنقال اصلا .





سنعه :
اهلا اهلا :) مسكيينه اكسرت خاطري .. انزين ليش يسوي فيها جذي !! يعني كللش مالها راي !!

وهالعايله الي اتفقت على الاسم .. خلاص يعني قصب الاسم راح يمشي على الام والابو حتن لو موراضيين !!! شنو هالسالفه بعد .

bhr.qadsaweya يقول...

هلاااا فاتووو
شخبارج شلونج عساج طيبة
ادري مافيني خير ماسأل وحدي قاطعه
سامحيني..

بقول لج سالفة خالتي
مسكينة تأخرت بالحمل 6 سنوات

واخرها يابت توم ولد و بنت و ريلها من زود الفرحه راح و قال حق امه بسمي البنت عليج و الولد على ابوي
وبعدين قال حق خالتي طبعا خالتي شتقول بعد سكتت خصوصا ان خالتها وايد زينه وياها و تحبها ومن اليوم الثاني الخاله طاقتها تشري هدوم و اسره و قماطات و كل شي حق البنت الي اسمها.... (ف خ ر ي ة)
آآآآه الياهله عنونة و تينن و الأسم ما شاء الله كبير عليه

والله يستر ما اعيب و الله يبليني

يعطيج العافية
وسامحوني عالقطيعة

fatto يقول...

هلا والله قدساويتنه .. انا الحمدالله بخير دام انج بخير .. انتي اشلونج وشلون اهل البحرين :)

على الاقل لو اهي امسميه لبنيه وهو لصبي .. جان ما طلع هالاسم .. بس اخاف خالتها تزعل ليش ان سمو على ريلها وماسمو عليها .. بس على قولتهم ( حكم الاوي على الضعيق ) :)


وسامحج على شنو يابعد جبدي .. عادي شسالفه كلنه اتييلنه فترات نقطع فيها .. يا من ظروف الحياه او من ظروفنه المزاجيه :) الله يعينه :)