الأربعاء، 7 أكتوبر، 2009

الهدايا اشلون صرنا انقدمها

واي .... أول كل شي بسيط ..والحين كل شي معقد ..ومنها تقديم الهدايا ..أول انغلف الهدايا في ورق اذا تذكرونه رول كبير ولونين نقط زرقاء او ورديه او للاماع يبرق بونجوم او اشكال هنديه ...وبس اهم شي الهديه ..
الحين انخسر على تغليف الهديه نفس سعر الهديه ..بكسات ورد وحشوات ودبب يالله تملي عينا وماننسى الكيس الي راح انحط فيه الهديه ..ونتكلف فيه وكأنه هوه المهم (مو كله راح ينقط باللزباله) ..
فالحين أنا وحده من الناس مثلهم اكشخ الهديه ...وي.... ادوخ وادور شي فنتق ومرتب علشان اقدم الهديه ..وله فاضيه صح =) كافي انحوس اول على الهديه وبعدها على تغليف الهديه ...وييييه تعب بس ترى احب هذا التعب ..وشكثر انزف عليه من امي وله زوجي من كثر ما افكر واحوس اشلون اغلفها اشلون ...المهم هذي المره كانت حطه (افلوس ) مجموعه من البنات هذي الهديه مريحه مانفكر شنو نشتري نتيمع مجموعه من البنات ونهدي فلوس ..انزين الحين المشكله اشلون انحط الفلوس ...الدارج انحطها في ظرف راقي وحلو ينباع في محل بوابه الهدايه (صارت قديمه الحين) او اشكال مثل بيضه مزركشه ينحط فيها الفلوس اوورده او دب او بوكس صغير ..أو أو وايد أشياء
بس كل هذولا سويناهم وملينا منهم ..ماكو الا اشتري شي غير مكلف (علشان ماتنقص سعر الحطه وتستفيد من المبلغ احسن) وهم ما ينقط في اللزباله تستفيد منه وهم شكله اونس أول ماتشوفه تبتسم ..فكانت المناسبه مولود جديد..
وكان ماعندي وقت افتر مشغوله وايد بس لازم اغلف الهديه ..فصارت جذيه ..وحطيت الفلوس بوكس وداخله الهديه وهي المبلغ المهداه . شريت تاج بناتي حده على شكل تباع الشمس ..وشريت ادلاقات بيبي وثبتها عليه وحطيت داخلها الفلوس ..مع اني مو عاجبتني وايد ..بس قلت واي بس المهم شكلها ذرب ..عيزت وأنا أغلف في هل هدايا ...الله ازيد المناسبات الحلوه بس كل مناسبه هديه حتى اصادف استقبالين في نفس اليوم ..الله يشافينا من هل فناتق ...المهم قولولي حلو صح



هناك 16 تعليقًا:

Me Blogging يقول...

أنا عجبتني
مبين إن حق وحده والده
cute

Q8EL5AIR يقول...

الصراحة اعجبتني .. شكلها حلو :)

بس سؤال شفيج مع ادلاقات البيبي !! :)

وهمن استفسار بسيط تقبليه مني :)

ما ادري فكرة الفلوس تنحط بالادلاق .. مو جنها شوي موحلوة !!

ماادري احس جذي !!




بس عموما الفكرة وااايد حلوة .. يالتوفيق ان شاءالله :)




وتحياتي ..
ويسلمواااااااااااااا :)

ARTFUL يقول...

عقدتوا الدنيا وحنا ندفع

ابتلشنا


P;

Sn3a يقول...

حلووو

انا ماتعب نفسي
حق المواليد شريت جياس من لندن ايهبلوووون على نص دينار فيهم اشياء مركبه عليهم ولونين وردي وازرق
وعندي جياس قش
وانتهينا

حق الفلوس امي عندها قواطي صغار حلوييين
وعمتي لما بتهدي فلوس تترس القوطي كاكاو وتحت فلوس
بالنسبه لي الكاكاو اثمن لول


وبين فتره وفتره ايكيا يبيعون قواطي او كراتين اتينن واسعارهم حلوة تقدرون تشترون جم وحده وتخشون حق وقت الحاجه


بس صج اختي مره غلفت هديه مادري وين ب 8 دنانير
زين ليش
انا عندي لو شاريه شي زياده بهال 8 دنانير احسن

بس بالنسبه لي اهم شي الكرت
احب اخش الكروت

شاي الضحى يقول...

اشوف انه الفكره وايد حلوه وغريبه احلى من العلب والأظرف ... وموضوعج حده بوقته رفيجتي عيد ميلادها قبل جم يوم وفكرت شنو باخذ لها بس قاعده افكر بالتغليف وتوابعه هههههههه


يعطيج العافيه :)

غير معرف يقول...

ماشاء الله حده كيوت

such creative person

bhr.qadsaweya يقول...

واااااايد حلوة
اانا وايد عجبتني

والله عليج فناتق منتي هينه

يعطيج العافية و يسلم ايدينج حبيبتي

جاردينيا 2000 يقول...

Me Blogging
اشكرج

Q8EL5AIR
تدري ليش ادلاقات البيبي ..علشان اذكرني بريوله واي اتهبل ناعمه ومتفخه
وسالفه الفلوس بالدلاقات ..أبدا مافكرت فيها باني اهين الفلوس ..اصلا أنا حاطتها في دلاق اكيوت ودك اتبوسه من حلاته ..اشكرك على التعليق


ARTFUL
=) الله يعينك والله




Sn3a
انا بعد احب البكسات وكل شي يتعلق بالزينه والتزييين واي شي احسه انه يصلح انحط فيه الهديه اخشه


ونفسج احب الككاو




شاي الضحى
وأنا أحب التغيير والفناتق ..اشوه انج استفتي من الموضوع




غير معرف
اشكرك




bhr.qadsaweya
اشكرك
أنا احب الزينه والتزيين تخصصي=)

Angel Orchid يقول...

شكلها حلو ومرتب تنفع حق هالسوالف وقطات الدوام حق الزميلات الوالدات:)
اذا صار عندي مناسبة ابي وحده نفسها :)

غير معرف يقول...

ما شاالله وايد حلو اعجبتني فكرتج بسيطه وذربه والدلاغااااااااات يونسوون


خلاص ان شاالله كل ماغلفتي هديه حطي صورتها عشان نستفيد من افكارج الحلوه(:


بغيت اسال عن التاج وين حصلتيه؟

cup cake

-mate يقول...

أنا مرة دزولي هدية كيس دلاقات .. بس ماكو داخلها فلوس .. لا ومو مغلفة بعد!
:(

reemas يقول...

يا حلو البساطه اول في كل شي
الحين احس وايد مبالغات و صار كل شي ماله طعم

جاردينيا 2000 يقول...

cup cake
اذا اسمحتلي الظروف راح احط تغليفات الهدايا
التاج شريته من كليرز


-mate
ضحكتي ليش عاد ادلاقات يمكن اشكالهم غريبه او جوده او مافي منهم =)


reemas
كلامك صح

غير معرف يقول...

سلام...
على طاري الهدايا, انا حدي متوهقة و ابي مساعدة, صديقتي توه والدة و يابت صبي "الله يخلي لها" و أنا مو عارفة شنو أيبلها هدية, ابي شي unique & cute, إذا تقدرين اتدليني على أسامي محلات أكون شاكرتلج وايد :)
وسوري على الطوالة :)

وحـدهـ من البـشر يقول...

انااسهـ خوش فكره

حلوه التغيير :)

وانا احب جي شي غريب ويونس بنفس الوقت


تسلم الديــااات

جاردينيا 2000 يقول...

غير معروف
شوفي البوس الي بعده يمكن يفيدج

وحـدهـ من البـشر
الله يسلمج