الأربعاء، 7 أكتوبر 2009

لزقه


صباح الخير جميعا :) ولهانه عليكم وعلى تعليقاتكم .. من زمان ماكتبت .. انشغلت مع الدنيا حبتين :)

موضوعي اليوم اهو عن الرياييل .. انا مره كتبت موضوع اسمه ( سوالف حريم ) وطبيت فيهم اشوي :) ..الي بقراه يضغط على الرابط .. فلازم اطب في الرياييل اشوي عشان انتعادل .. عشان مايصير في زعل :)

طبعا معروف على بعض الحريم انهم لزقه ..بس سالفتي اهي العكس .. لزقه الريال .. اعرف واحد متزوج .. يمووت على مرته يحبها حب جنوني.. بس شنو لزقاااااه .. لزقته صكت على بعض الحريم .. الي من كثر ماهو لزقه صارت بينهم مشاكل ( وتطلقو ) معنه يحبون بعض بس تصرفاته خلت لبنيه تزهت منه .. موحاسه ان ريال من تصرفاته الي تقث .. ترى سالفتي مومألفتها ترى صج .. وابي رايكم فيها .

خن قولكم بعض تصرفاته :

وين ماتروح مرته اهو ريله على ريلها ..موسالفه مو واثق فيها .. لأ سالفه موقادر يفارقها .. ومايحب يطلع من البيت والا يروح دواوين والا يطلع مع ربعه موسالفه ماعنده ربع لأ ..من كثر مايحبها موقادر يفارقها ..حتن تخيلو اذا بتروح الدوام اهو يوصلها .. وذا بتطلع مع رفيجاتها يقولها تبين اوصلكم وعزمكم على مطعم ..وذابتروحون السوق اشترو الي تبونه انا الي راح ادفع .. عشان يسكتها وترضا ايي معاهم !!بس ترى موشاك فيها لأ..بس مايقدريفارقها بالمره .. ومره يابت رفيجتها البيت فأهو قاعد بالصاله الثانيه جان يدق عليها تلفون يقولها مليت وانه بروحي تعالو قعدو معاي .. شكووو !! ويلا يقولها تبون اسويلكم عشا !! تقول بنسولف ابناخذ راحتنه بنحش ابنضحك محنه قادرين !! ومره تهاوشو وراحت بيت اهلها .. بعد 5 دقايق طق جرس الباب ويلا اهو يقولها ولهت عليج حبيبتي .. يعني حتن بلهواش ماكو فجه ..ومره شافته يبجي على الخفيف .. تقوله شفيك يقولها احبج ( لاتعليق) .. تقول 3 أماكن بس الي اكون فيها بروحي ( تكرمون الحمام والنادي وذا نمت) تقول هالثلاث اشياء اطول فيهم عشان افج منه .. افف انا قثني .. يمكن بعضكم راح يوقف معاه وبعضكم راح يوقف معاها لأنها اطلبت الطلاق .. بس والله لو اتعيشون الوضع جان حسيتو فيها .. اهو حلو الواحد ان يحب .. بس موبهالطريقه .. اذا الوحده اسمعت عن هالطريقه راح اتقول ابي واحد نفسه .. بس اذا عاشت معاه راح تزهق والله. لأن اهم ماخذين بعض عن حب بس لمن عاشو مع بعض ماقدرت اتحمل .
يعني الانسان بطبيعته اذا تغلى ويلا فج اشوي .. الطرف الثاني يحن عليه ويفقده ..والواحد اذا كان عزيز نفس ينحب اكثر . صح كلامي ويلا انا غلطانه .

هناك 20 تعليقًا:

fatto يقول...

بحرينيه قدساويه :

كنتي طالبه هالموضوع .. وكتبه عشانج :)
جم بحرينيه قدساويه عندنه :)

master يقول...

بس بعلق
لأن شكله بس انا وياج إلي قاعدين لي هذي الحزه :)

DoDoq8 يقول...

ambeeeh htha ms7ooor

3mre ma shft ryal chthe

Eng_Q8 يقول...

والله الحريم ما يعجبهم العجب لي جابلها قالوا لزقه واذا رطلع مع ربعه قالت هادني بروحي واذا نسق وقته هم ما يعجبها

ويقولون تزوج .. يازين راحة البال

Sweet Revenge يقول...

صاجة والله اي قلنا حبها بس مو جذي
اتوقع انا ما اكمل اسبوع مع واحد جذي
بس شلون رضي يطلقها واهو يحبها كل هالحب ماصار فيه شي
صك علي مجنون ليلي هذا

Diesel يقول...

أعوذ بالله هذا مريض لازم يتعالج ، السالفة مو رجولة أو غيرها هذا فيه مرض التعلق لازم يعالج نفسه .
وفعلاً لزقة الرياييل أغث من لزقة الحريم ، لزقة الحريم حلوة ، يعني تزفها وتلزق هههه صج تغث لكن في قلبك لو تفتش تحبها.

SHOOSH يقول...

يا ماما

mtfa2el يقول...

الحمد لله و الشكر الله لا يبلانا

زين سوت تطلقت منه .. هذا صح مريض مو صاحي فيه شي
و لا انا عن نفسي أمل من روحي هالمرة أحب مرتي و الزق فيها جذي
لا بل !!

رورو الشخبوطه يقول...

السلام,,

شلونج عاش من شافج ..

فقدتج من غير شر..

وي حرام كسر خاطري..

بس اهي خسرته انا ابي جذي واحاول الهيه بشغلات 2 ..

مرسي خيتو..

Aurous يقول...

lol
hatha mn 9jah!! @@

bokeh of magic * يقول...

أمبي لا فضيع هذا شدعوه جذي
انزين اهوا لما يسوي هالحركات يطيح من عين مرته !!
و شدعوه ما يطيح من عين نفسه اصلا !!
معاها حق اتطلق
و ثانكس

نمووول يقول...

والله ما عرفنالكم
مره تقولون تبون ريال يجابلكم ويهتم فيكم
والحين ماتوبنه يجالكم ويلزق ؟

اكيد الاعتدال مطلوب بكل شيء
الله يعينها والله انا انغثيت منه هههه

شكراً ..

joe يقول...

لوول استغفر الله قمت اضحك
لوول زين بعد ماينطرها عند باب النادي ولا عند باب الدوام يقولها يلا متى تخلصين

bhr.qadsaweya يقول...

ياااااااابعد قلبي فاتووووووو
حبيبتي تسلمين و الله
.
.
اي و الله الحب حلو بس موب بهالطريقة عاد و الريال لازم يوخر شوي عشان زوجته تشتاق له و يوحشون بعض


يعطيج العافية

Sn3a يقول...

وااي توني اقرى الموضوع
لاجد تو متش

انا ماحب احد جذييه!!!
هذا مرض مو حب

بس الحل مو الطلاق
الوحده وين تحصل واحد يحبها!!
كان المفروض تعامله بطريقه ثانيه
حتى لو تروح طبيب نفسي من وراه وتشرح مشكلته
مو اتزوج واحد عن حب
واطلقه لان زاد الجيله

ظلمته جذيه

بس تصرفاته اوفر
خنت حيلي مامداها تكح ماكملت كحتها الا قالها حلو
;p

3BeeDo ;) يقول...

اوله شدعوه لي هالدرجه عااااد !!
والله مالومها

غير معرف يقول...

والله هذي السالفه غريبة في زمن اللاحب الكل يتمني الحب وساعات يتمني انه يتأكد أن الحب موجود ومحافظ على مستواه ماانفقد او مو حب واجب زوج لوزجه .... يعني يتشفق عليها ويوله على الطلعه معاها او او او اهو اللي يطلب الطلعه مو بعد حنه وبوز منها .....بسمو لزقة مثل المسكينه حب القاتل واعتقد هذي عقده او مرض نفسي خفيف .......مادري شنبي بصراحه

fatto يقول...

ماستر :
اهلا ماستر :) .. اي لاحظت .. كنت بدق عليج حزتها بس خفت تخترعين :)




دودو :
اهلا اهلا :) هم انا والله اول مره اسمع هالحاله .. الله يعينه على نفسه .




eng.q8
هلا والله فيك :)
طبعا احنه نبي لمجابل بس موجذي الي مانقدر انتنفس .. خير الامور الوسط .
راحه البال راح تلقاها بالزواج موبالعزوبيه صدقني :) خن دورلك مره سنعه وقول فاتو ماقالت :)




سويت ريفنج :
هلا والله اشلونج :)
بالغصب رضا يطلقها .. لمن حس ان لبنيه خلااص مافي امل وياه .. معنه حاول كذا مره ان يتعدل بس موكو فايده ( بوطبيع مايوز عن طبعه ) :)





ديزل :
هالا فيك :) بالضضضبط .. في مرض التعلق لأن مافي انسان طبيعي يسوي جذي .. وطبعا احنه لزقتنه غير على سنع وتغلي بس بدون مغثه رجاءا :)




شوشو :
اهليين شوشوتنه شخبارج :)
لووووووووول ياماما ويابابا بعد :)




متفائل :
اهليييييين متفائل عندنه ماصدق .. نورت البلوق :) لووووووووول حلوه هذي اتمل من روحك :)





رورو الشخبوطه :
اهلييين رورتنه .. وعليكم السلام وعاشت ايامج ..ماتفقدين غالي انشاءالله .. لايامعوده صدقيني ماراح اتكملين معاه .. ماكو فايده التلهي بشغلات ثانيه .. اول الايام يمكن تستانسين .. بس اذا بتم جذي طوول العمر وياج راح تزهقين والله .

fatto يقول...

Aurous
اهلين :) .. من صجه ونص مسكين .. غريبه ان في ناس جذي انشاءالله مامنه وايد :) .. الحب حلو بس مو جذي .




being 1 :
اهلييين وسهلييين :) .. الظاهر طايح من عين نفسه بس موقادر يغير من روحه من كثر مايحبها ومتعلق فيها .




نمووول :
اهلييين ابنمولنه .. شلونك :)
مثل ماقلت الاعتدال حلو .. اللزقه الصراحه اتقث الواحد .. وحدنه موناقصين مقثه :) .




المباركيه :
اهليين وسهليين :)
اخاف بس ماينطرها عن باب تكرم الحمام .. يقولها ( حبيبتي تبين شي ) يعني وحده بالحمام اشتبي مثلا منك .






بحرينيه قدساويه :
اهليين ابقدساويتنه .. اشلونج وشلون اهل البحرين :)
اتمنه يعطيها مجال عشان توله عليه .. ابد ماكو فايده .




سنعه :
اهلين ابسنعه البلوقات شخبارج .. مس يو والله :)
الجيله اهي من زمان زايده .. بس لمن اتزوجو وعاشو مع بعض وتجابلو 24 ساعه .. اهنيه حست .. لووووووووول سالفه الكحه عجيييبه .. سوالفج اتينن :)





عبيييدووو :
اهلا اهلا .. اشلونج :)
اي مسكينه .. الله يعوضها ابواحد مولزقه :)







غير معرف :
هلا والله :)
الكل اكيد يتمنى ان في شخص يحبه حب كبيير . بس احنه البنات يمكن من طبيعتنه انحب الشخص اقصد الرجل يكون اشويه غامض مو كل مشاعره يطلعها سواء بالكلام او الفعل .. وهذي حالته مو حب .. مرض اللزقه الي مالها داعي .

Ļa ƒéммé يقول...

كان المفروض توقف معاه واتساعده عن طريق طبيب نفسي تبتكر أشياء يديده الطلاق مو حل اذا كانت اهي اتحبه؟؟

والصراحه ماتسوا السالفه تتطلق عشانها لو خيانه وشي جايد ممكن بس هالسبب مو حل وشي له علاج الله يكتبلهم الخير لهم آمين