الأربعاء، 15 أكتوبر 2008

طير جارح في حديقتنا

لقينه طير ابحديقتنا مادري اهو ( صقر أو شرياصه أو شاهين ) اللي يعرف شنو نوعه يقولي خن تثقف :) وهالنوع مادري اشيايبه ابمنطقتنا .. وزوجي طايح فيه تصوير من قريب ولايتحرك والاشي .. واليوم الثاني وانه طالعه جان اشوفه ابحوض حديقتنا .. انا قلت اكيد ببرد على روحه ..وخليته.. وعقب ساعتين رديت وشفته ابنفس المكان.. جان اقول ( اشلون هالنوعيه من الطيور قاعد بالماي يتبرد !!! مخي الله بالخير هالأيام ) أثاريه طاب بالغلط .جان أقول حق الزراع طلعه .. وأول ماطلعه مسكين ماقام ..طاح مسكين وعقب صرت قويه وقلت الا بشيله وبوريه زوجي .. وتخيلو شلته ودشيت فيه البيت وانه مستانسه اني صايره قويه وخايفه ابنفس الوقت .. ووريه وبقق عيونه ان اشلون انا شايلته .. وعقب جان ينفض علي جان اهده بالصاله ( مت من الخرعه وزوجي مات من الضحك علي ) ورفس فيه بريولي لي بره بس اشوي اشوي ماعورته . وعقب بليل مسكين مات :( وعلى فكره منطقتنا فيها حيوانات غريبه مره حماي لاقي ثعلبين عند دوارنه ( والله مو قاعده اجذب ) وغير أنواع الجلاب الزينه الي بالممشى ومره عمي قايم الصبح طالع الحديقه ويلا أرانب بالحديقه ودياي .. حديقه حيوان مو منطقه :)
.

هذا أول يوم شفناه فيه

هذا ثاني يوم .. عبالي قاعد يتسبح :)

عقب الإنقاذ

عقب ما رفسته بره البيت :)

هناك 19 تعليقًا:

joe يقول...

جنه ترمه او شرياس
انا اخاف اشيل زرزور هالمره اشيل هالطير يماااا
همن لسمجه اخاف اشيلها
منطقتكم تخررع صايرة محميه حق الحيوانات
احنه حديقتنه كان ايون فيها كواسكو و بيبي متوه و طيور حلوه
بس مثل منطقتكم تخوف

يعطيج العافيه

sun shine يقول...

انا اموت خوف من الحيوانات خصوصا الطيور و ما احبهم :(
واااي لايكون فيه انفلونزا الطيور ؟؟؟

Matrix يقول...

فاتو شلونج :)

صراحه انج شجاعه ، والا هذا طير تمسكينه !!

زين اللى ما عضج ،والله حفظج

Noor يقول...

:(

وي حرام كسر خاطري

لو مودينه طبيب بيطري
ومعالجينه انا اكثر حيوان يكسر خاطري الطيور

واتوقع من الصوره انه هذا صقر او صقر صغيرون

بس عاد حيوانات بمنطقتهم هذا شي غريب
الله يستر بس عليكم وعلي عيالكم

اناإذا شفت جلب او قطوه اخاف ماعرف امشي ؛)

يعطيج العافيه

master يقول...

fatto ... نقدر نقول إن مات من الترفس ؟؟؟ :)

SNoW White يقول...

فاتوو شلوون شلتيييه جنة يخرع

زوجي يقوول هذا عقاب وان الحيين موسم عبور الطيور هذا وايد صغير الكبير وايد اكبر من هذا

و الظاهر كان يوعان عشان جذي مات مسكين

الله يرحمة

غير معرف يقول...

هذا عقاب
ليش مرفسته حرام عليج بروحه دايخ
هذا احد صايده وهاده بالمنطقه
مستحيل من نفسه يطب
جان حنطتيه وحطيتيه بالصاله ذكرى
تحياتي

غير معرف يقول...

اشلون تلمسين واتشيلين طير واتدخلينة بيتج! يمكن فيه انفلونزا الطيور أو يمكن مريض أو يمكن فيه عدوى
أو يمكن فييييييييييييييه يني !

ShaymoOona يقول...

الله يرحمه ..عظم الله اجرج :(
لو موديته الطبيب جان احسن على الاقل تكسبين فيه اجر

Salah يقول...

كان المفروض تاخذونه حديقة الحيوانات في العميرية!

Gee™ يقول...

حرااام كسر خاطري :(

غير معرف يقول...

واي يخرع زين سويتي فيه فاتوو حبيبتي والله بطله صديقتنا واحنا ماندري

Manal يقول...

حرام
شكلة يكسر الخاطر
بس لا تسمعين كلام صلاح وتودونة العميرية
ترا بالنسبة للحيوانات العميرية مثل الصليبيخات

:)

master يقول...

وااااي fatto من أذكر ويه الطير مسكين و إهو بالماي اموت من الضحك و غنتي تقولين عبالي يتبرد :) هاهاهااها

kazmawy يقول...

هلا بفاتو غلا هذا الله يسلمج عقاب الله اعلم انه مريض والا مستحيل يطب ويركد على البيت لانه متوحش وموذى ولو كان صاحى ماتقدرين تجربين يمه..مستانسه رافسته لووول
والله لو صاحى جان قرم صبعج العود كااااك
:)

fatto يقول...

كويت ماستر :

والله هاليوم صرت قويه مادري اشلون :) ومنطقتكم يحليلحا رومانسيه :)


سن شاين :

لاتخرعينه انا موناقصه فلونزا :)


ماتركس :

الحمد الله تمام الله يسلمج ..وافا عليج شفتي اشلون :)


نور :
والله مافكرت اوديه طبيب بيطري .. المفروض والله اعالجه :)


ماستر :
لوووول .. لاتقولين الحين يأنبني ضميري .








نور :

fatto يقول...

سنو وايت :
واااي لو أدري ان عقاب جان ماشلته :)


غير معرف :
لووول اي والله لوامحنطته للذكرى :)


غير معرف :
يني مره وحده .. حدها قويه :)


ميمونه :
الله ذكرتيني ابباي قديم وحنا يهال انشوفه .. عرفتيه :) اهي ديناصور بحر او شي جذي :)
عالعموم مشكوره انج وجبتيني ( اجرنه وجرج )



صلاح :
لوووول .. اشفيك مات :)


غدور :
هذا يومه :)


أفراح :
اعجبج :)



منال :
ماقدر اوديه لأن ( عطاج عمره ) :)

ماستر :
لوووول :)



كظماوي :
والله لو أدري ان عقاب جان من صجك أقرب يمه .. وعلى قولتك يمكن مريض .. والحمد الله ام موصاحي جان اتحرولت الحين ابسبه عقاب واللي يسمعني يقول قناصه موفاتو :)

المنصوري يقول...

هذا اسمه عقاب

غير معرف يقول...

بلا كلام الناس بلا خرابيش هذه نوع من صقر الباز ويسمى بل أبو حقب