دعوه للمرح بعد الامتحانات (افراج)

بعد ماخلصنا الامتحانات وبدأت عطله الربيع ..حبيت أسوي حركه حق بنتي ..طبعا أنا كنت حابستها قبل الامتحانات واثناء الامتحانات ماكو طلعه دراسه بس ..بعد ما خلصت الامتحانات حبيت اطلعها ..فقلت خليني اختار لها طريقه يديده اتونسها لما اقول لها امشي خل نطلع

شريت كارت بناتي ناعم وكتبت فيه " دعوى الى المرح ليوم كامل

أنتي معزومه على الغداء + 10دك كوبون للالعاب الاكترونيه+رفقه محبه لك"

هذا الكارت
شريت لها باندا من إيكيا اهيا اتحب دب الباندا مع ان شكله يخرع بس قلت ماكو الا اهوى يكون مرافق للكارت
المهم استانست وايد كنت حاطته عند راسها ولما قامت من النوم شافته ...طبعا انقزت من الفرحه
طلعت من الدوام وخذيت بنت اخوي (الي اتحب اتكون معاها دايما) ورحنا نتغدى كلنا مع ابوها بعد .
وأخترنا مطعم عائلي إهيا ماراحتله كان يديد بالنسبه لها ..طبعا إهيا مطعمها الي اتحبه ماكدونالز ..بس قلت لها هذي الطلعه كل شي غير ..تقبلت الواقع وقالت مطعم اكبار مو حق يهال !! يعني أنا كبرت =)
حبت بنتي المشاوي وكلنا ناكل الاكل البناني ..بس زوجي قال أبي أجرب شي جديد ما كلاه من قبل ..طلب صحن عصافير وكان قيمته تقريبا 5دك وطبعا ننطر الاكل ووصل أخيرا وتوزعت الاطباق والطلبات بس لما حطو الصحن العصافير أجبال زوجي كلنا طلينا بالصحن شنو هذا؟؟؟؟؟؟؟؟؟ بس خمس عصافير اصغار حييييييل ماتوقعنا جذي اكونون اصلا شكلهم زرازير مساكين

حجمهم حجم جبده الدجاج واكبر اشوي بس ..مما اضطر زوجي يطلب طلب ثاني =)

وبعدين تمشينا اشوي بالواجهه البحريه من زمان مارحنا اهناك وبعدها وديتهم هذي الصاله كنت دايما امر عليها وأنا نازله من سوق شرق وكل مره أقول راح أوديهها حق هذي الصاله بس قلت يمكن اتكون صاله عاديه تبع العاب طفل المستقبل بس افيونكا ستلا قالتلي وديها اهناك تراهم غير عن طفل المستقبل من ناحيه الديكور .. وفعلا استانست بنتي مع بنت اخوي ولعبو لما اشبعوا

وفي نهايه مشوارهوم مريت حق هذا الركن علشان نشتري لهم شي بس ماعجبها شي ..تبي تشتري العاب من مكان ثاني مو من هني ..قلت لها عيل خليه يوم ثاني ..

وبس بدت العطله وبدت الحنه والرنه الحين كل يوم طلعونا ..الله يعين =)

وين رحتو بالعطله ؟

كبوس كبوس

شنو إسم الكبوس بالإنجليزي؟

ok ألحين شوفوا الدعاية

update: انا كله محد يفهم نكتي :(

بالدعاية لما راحت حق اخوها و بتاخد منه الـ mi fi قالت له (هات هات ) جنها تقولها بالإنجليزي (كبوس كبوس)

أكرهاااااا تبط جبدي ، إهيا و كلمة هات هات

سويتوها وانتوا صغار ؟؟؟؟

ذاك اليوم دشيت غرفتي وعند التسريحة تحديدا شفت شعر ومبن إنه أحد قاص شعره ...طالعته وقلت هذا لا شعري ولا شعر زوجي ...امممم ولا حطيت ابالي شي شلت الشعر وقطيته بالزبالة ( مكرمين ) ..المهم شوي رحت اطمن على الكتاكيت ( مودو ويسور ) شنو قاعدين يسوون ...انصدمت يوم شفت مودو ماسك مقصي خذيته منه وقلت له مرة ثانية يا ماما لا تحوّس بداري ...وهم ما حطيت ابالي شي ...بعد شويّ ولا مودو يايني يسولف معاي أشوف شعره ها.....شفيه شعرك جذيه :) مودو شمسوي ....يضحك ويقولي قصيت شعري ...الله يقطع بليسك شالجرأه ؟؟؟؟ شلون قصيته ..

أثر الحبيب ماخذ المقص وقاص شويه من شعره ...عاد توه من يومين رايحين مع ابوهم الحلاق ..صار شعره نافوره :)

وشكيت فيه إنه قاص شعر اخوه بعد أطالع يسور جنه مو طبيعي قلت له ها شنو حتى يسور محلق له ...يرد عليّ يسور إي يماه ...مودو ليش تسوي جذيه ....يقولي مودو لا يماه ما قصيت شعره بس شعري ...ألتفت على يسور شنو ماما ألحين مودو قص شعرك ولا لأ ....يضحك ويقولي شنو ماما مودو حلاق ...انا الحلاق محلّق شعري :) ..

ضحكت والله ....وتذكرت إني مره يوم كنت صغيرة بس مو صغيرة وايد حشيت قذلتي خوش حشّه...كانت باطه جبدي وقمت قصيتها بس صار شكلي تحفه :)..

إنتوا صارت معاكم ...سويتوها وأنتوا صغار؟؟؟؟؟؟؟؟

BaBy ShoweR PaRty

حضرت baby shower وذهلني كل شي الترتيب والتنسيق والهدايا والأكل ..وكل صغيرة وكبيرة ...بصراحة جهود مشكورة وتستحق الثناء ...:) الله يعطي العافية كل من ساهم وشارك والشكر الأول والأخير حق صاحب الفكرة ...:)


بكتفي بعرض الصور والتعليق عليها ..

1- baby shower for girl :
الديكور والهدايا :)


طبعا خلال الحفلة كان في مسابقات وهذي وحده من المسابقات وهي عبارة عن حروف ونحط كلمات تتعلق بالبيبي ...وعاد تعالوا شوفوا الكلمات وقروها وضحكوا هذي كانت ورقتي ..:)

ومسابقة ثانية كانت منسقة الحفلة حاطة لنا أغراض من حليب وبامبرز ...الخ.. والمطلوب نسعّرهم.. واللّي أسعارها اقرب إهي الفايزة ...ومو تقولون أنا اللي فزت صج عندي عيال بس ما أعرف الأسعار ...
ألحين صار دور البوفيه..كل شي كان نمنم وصغير والديكور طبعا وردي ...شكل الصمونه تشوق مووووو....داخلها مني برجر وجبن وخس وصوص..:)
واو كل شي صغير.....
وهني عاد الحلو ..وكان عبارة عن كوكيز صغار وكب كيك هم بعد صغار..

شرايكم ...مو تعب ..مو كل شي حلو ...طبعا في أشياء ما ذكرتها وما صورتها بس حاولت انقي من كل شي وأحطه لكم ...


2-baby shower for boy :


في البداية المكان كان مطعم "ساكورا " في فندق كراون بلازا...

سبب اختيار مطعم " ساكورا " إنه مطعم هادي ..وعندهم برايفت روم..:)..عند المدخل كانت موجوده هاللوحة..وكل ما تدخل وحده ادور مكانها وتقعد لأنها بتلقى تب مكتوب فيه اسمها وكيس فيه كاكاو أم أند أمز بس أزرق :)

من المسابقات هذي المسابقة وهي كانت رسمة كاريكاتير...ونكتب تعليق وطبعا اللي الحفلة على شرفها إهي اللي تحددمنو الفايزة..وطبعا دايما اول وحده تفوز om mod :)عقب عاد تحط التعليق الفايز بالبرواز وتحتفظ فيه للذكرى :)...ولا تطوفكم هديتي ...ميدالية ولا أحلى كشّخت فيها مفتاح سيارتي ...:)مسابقة ثانية من المسابقات ويبيلها فنان ..توزع علينا طين ..وكل وحده تشكل أي شي يخص البيبي...وهات يا فناتق ...البنات مو هينين طلعوا فنانين ..بس انا ما عرفت أسوي شي سنع ...الهدايا اللّي حصلتها الحامل ...عليج بالعافية ...والمفاجأة كانت بالنهاية ووصول الكيكة ...تفاجأنا كلنا بروعتها..كانت من Breadtalk حدها لذيذه..

مرة ثانية أشكر كل من تعب وفكر وصمم وحط وشال وراح ورد ...بصراحة جهود تستحق الشكر والثناء....

ويسعدلي أيامكم ...

تحديث : هذا التعب كله يرجع حق فيونكتنا ( pearl ) محروسة من العين وعساج عالقوة :)

قصه " الكويتي فنان "

من زمان ..زمام أول ..الي راح وقعدنا بس نتحسر عليه ودنا يعود ولو انعيشه أيام ..أسمع يدي وله يدتي ..أتقول اقول:إيييه راحت أيامنا الحلوه ..راحت وراحت مع أهلها ..؟؟
أهلها ..منو ..موكانو اكويتييين مثلنا وله كانو نازلين من السما
لا والله كانو مثلنا بس كانوا احرار وفنانين!!!

اي فنانين لكويت اول كانت اضم كل الفنانين وكانو عجيبين ..علشان جذي لكويت اول كانت غير ...شنو صار وجرى الحين وله سنين الي قبل ..شنو تغير وشنو الي تركناه وتحجر شنو ؟شنو
اتعرفونه شنو ؟؟ فن لكويتي الي نساناه بالاصح الي سلمناه لغيرنا وماعرف اشلون اسيره ..وهني صار التغيير وطار طعم الفن وطار معاه كل شي اكويتي اصيل ..وصار تغيير في لكويتي نفسه ..صار يحب الرباده والسنع السكبه بس وهذا الي اهمه..صار لازم وغصب على كل كويتي عنده شهاده جامعيه وماجستير وله دكتوراه وشهايد ولو من بره احسن ..وصار لازم يتهندم من احسن الماركات ويشتري ويكدس في ديونه ولا يندم ..على فلوسه الطايره وله على وقته الي قضاه بلا فايده ولا عايده ..
صار لكويتي لازم اكون مهندس وله طبيب وله طيار مرتز بطيارته ..وله إداري لازم اكون مدير اقل شي وله وكيل وله عضو في مجلس الامه وعلى الاقل صاحب شركه خاصه فيه ..
وينكم يا فنانين .. ترى سبحان الخالق لكل واحد بصمه غيرخاص فيه ما خلقها عبث
وياكويتي ترى لكل واحد فينا فن غير
فنك بإيدك موجود وله في داخلك نايم مسجون
زماننا حكم علينا وفرض مثل ماقلت لازم انكون في مراكز ومهن مصفوفه ومحفوضه لنا مو لغيرنا ولازم نوصل لها ..غصب طيب وهل وسايط جدامنه كلنا صرنا دكاتره (حتى لو شرينا شهادتنا يبنها فخر من بره) خوش فخر ..الي نفتخر فيه ياي دكتور ولا ماجستير ..بس للاسف هذا الي اهالي البنات لازم تنطره والي كل ابنيه لازم تاخذه .. تراه موبدينه تراه موفنه ..بس لازم علشان اتكون اكويتي محترم ..موجذي ..غربلوه وغربوه وصرفو دم قلبهم ..علشان يرفع راسهم ؟؟...انزين وبعدين اي شنواتقولين وتخربطين راح اتقولولي اي المعاش رزه وعيشه تراه معاش وسياره آخر مديل ونلبس الغالي ابجيسه وله ...بس كافي فهمت ..هذا الي اتعلمتوه إلي لازم كل كويتي من اهوى صغير وعا وفتح عينه عليه ..جذي عشنا وتربينا ..
وديرتنا خليناها لمنو ؟؟ مو للغرب ؟؟؟ اكوتنا بس تبي مهندسين وله اطبه وله محامين ...إيييه اهني المشكله إلي سويناها بإدينا وله الي سواها أبهاتنا ..دخلنا ناس أغراب ..مسكناهم بنيتنا التحتيه ..أساس الي راح اتقوم عليه كويتنا ..وحنا ضلينا فوق طايرين ورافعين عينا لفوق ونطمع لفوق ونسينا احنا شنو اساس كراسينا نسينا أساس اراضينا ..وبانزينا وكهربتنا وشوارعناحتى مجارينا الي اطفحت ..نسينا أساس خبزتنا ..حتى ماينا من وين انييبه ..!! شنو صار وله شنو بعد راح اصير ..ترى الناس الي ادخلو ديرتنا تراهم مو من ثوبنا ولا دينا ..إدخلو ويابو معاهم اشياء دخيله ..ماقول قبل ما كان في غلط وله غش بس كان فيه بس بنسب قليله ..تدرون شنو صار ..صار رشوه والغش جذب شي دارج وشي اجارينا في كل يوم انشوفه ونسمعه وتقبلناه ولا صار البعض خذاه عاده وإطبع فيه وصار حياته تمشي عليه ..
عرفتو ليش زمانه اول غير
عرفتو ليش حياتهم في ابيوت الطين له لذه وطعم حلو ماينسى لو مر زمان وراح الزمان ..لو طال وله قصر ...زمان بيوت طين غير والله غير ..يشتاقلها الي عاشها وله ماشافها ولي بس سمع فيها ..ليش ..ليش لما الحين ماعرفتو ليش
اقولكم تعالو معاي نتفكر ..أنا ماعشت هذا الزمن..بس عشت تحسر اهالينا وحزهم ومستعدين بيعهم لها الوقت مقابل بيت الطين في ذاك الوقت
تعالو شوفو معاي هذي الوحات
اقولكم ..منو كان الفنان الي يبني بيوتهم ؟ مو بيت فلان البناي
منو كان يطاوع حديدهم ..مو هم بيت فلان الحاداد وله تناك .. وله في مهن ثانيه ياكثرها ومحلا اصالتها وفخر لنا من هذي بعد المهمن العطار وله منو ايبلهم ماي وياحلاته من صفاه ونقاوه الماي من الكندري وله منو اسويلهم سفنهم مو قلاف ..وله وله ماراح اخلص من كثرهم ..منا وفيا ..أمان وراحه ياسلام ..اتخيلو اتودي سيارتك حق ولد جيرانكوم وله ولد اختك وله خاكوم ..اتخيلو بس الحوار الي راح اكون
بينكوم : ها شخبارك شخبار الاهل
الكهربجي الي اصيرلك : ابخير ياهلا ياهلا ابريحت الحبايب اشلون خالتي ونسايب ها اشفيها سيارتك
القارئ: لا سفايف بس ..وقلت ما اوديها الا عندك ..ادري فيك فنان ولد فنان ..كل الكويت تتكلم على نظافه شغلك ..ما اوصيك عليها
الكهربجي : ماتوصي حريص ..سيارتك اهيا سيارتي ..وها اخليها على حساب مثل كل مره ..
انت : اي تدري بعد التزامات والسياره ما اصير فيها شي الا بنص الشهر ..على العموم سلم على الاهل ...ماتنسون يوم الخميس اتمرنا بالدوانيه .
ينتهي الحوار
الفه وموده اتحس لكويت كلها لنا ابروحنا ..ونشيل بعضنا البعض . ياسلام
وين هذا اليوم ..الحين ولد عمك اشوفك يصد عنك يخاف تامره شي وله تطلبه !!
يافنانين تراكم كلكم فنانين وبإيدينكوم اتردون ديرتنا لنا ومهنا الضايعه والاساسيه لنا
تسمعون يوم صار تسمم من أكل المطاعم ..وله تسرب امتحانات في احد المدارس وله بيت افلان خر عليه وأساسه غلط وله عوي ..وله الصبه مغشوشه راح اطيح عليه ..اقول عن الي ماسك مهنا وميعرفلها شنو نبي بالضبط لاتحاول لاتفنن من يد اكويتي احلى فن ونغم .
اصلا كل شي راح طعمه وذبل ..كل شي ندري واحنا نشتري كله غش وله ناصبين علينا بالسعر وله ندري ان أكله وصخ وناكل ..وحنا راضين ومستانسين ..والربحان الي دخل علينا مو احنا ..دخل علينا وحنا امهللين دخل علينا وسحب من تحتنا بساط السنع والاصل ..وتعتقدون انه اخذ منا ابساط الفقر ..وقلتو خلوه لهم تراه هذا بساط كله شقى وريحه وتعب ومهن وضيعه متناسب ولا تنفع ولا تضر ..اييييه بعتو أساس فنكم بعتو حق الي دخل علينا ابطمع ..ما أعمم بس الغالبه دخل زاير حتى لو بقى فيها 40 سنه ياكل ويشرب ورتز وبنا بديرته احلا العماير ..وحنا ندري وراضين ..يبوق وينهب عليه حلال يبيع الخمر وفتح المراقص وقهاوى ونور السراديب بليتات حمر ..وحلال عليه ..مو المهم المهم يقوم ابشغله ..الفساد انتشر ..لكويت تتدمر ..علينا ندفع بس دفعو افلوس بس هذا المهم ..

المهم احنا طاقين الكرت واحنا تحت لحفنا ...حسبيا الله عليهم علمونا اشياء واشياء تشيب لها روس وما مرت على بشر ..مايخالف ..احنا فوق ومحد داس على طرف اثوبنا و دشاديشنا ..
لا يخالف .. ويخالف ونص بعد ..اصحو يافنانين ..اصحو ..مامليتو من الفراغ والنوم والسهر ..مامليتو من النت ..وقز ..وسفر ..اكيد راح اتملون
تدرون ليش لانكم أساسكم فنانين ..كلكم فن كلكم فن . بس هم اقوم الحمدالله مازال الخير الموجود مانتحر ..أخيرا في ناس اتحركو ..زحفرو لهم تاريخ ينحفر لهم فوق الصخر
بس اقول شي الحق يانقال كلمه حق وفخر شفت شباب مثل ما انتو شفتو اليوم وراح اتشوفونهم باجر أكثر..تدرون منو ..جيل الحين ..شفتو اشلون اتشطرو..
تدرون شنو يحاول يقول :

انا كويتي انا فنان زمان اول
انا كويتي أنا فنان اعرف اطبخ واخيط واتفنن
انا اكويتي أنا مثل مانقال فيني قول وفعل
ياحلاتكم من جيل جيل قوي – رافض – كله عزم - وجيل متكبر تكبره مو على الناس لا حشى جيل متكبر على الرباده متكبر على نفسه متكبر على الحدود الي ارسمتله
تدرون شنو يقول بعد :
ليش لازم محامي وله دكتور
ليش ما أكون أنا الي احدد ومن غير اقول
ليش ما أكون كهربجي وبمعرفتي بكهربهت شغللي اشغل اختراعاتي واديرمشروعي من فلوسي لا من شهاتي ولامن مركزي الزفر
تراكم كلكم مو اغلبكم ذقتو بسكوت (الكوكيز) الي كان ابيته وابإيده اخبزه اهوى وربعه ..والحين الله يحفضه محله في أكبر المجمعات انرز وانفتح ياحلاته من كوكيز
وله شقت والي رسم ولون على البلايز تيشيرتات وعرضها بساحه سوق شرق ابفخر
وله تعالو وخلونا من تصاميم الغرب ..شوفو الي صمم دشاديشنا ابفناتك وله نفانيف بناتنا حتى تراجي وله جناط ..كله حلو يافنان كله حلو يا فنان ..

اسعارهم غاليه من حقهم سوو الي انتو ماسويتوه اشكركم يا فنانين ابفخر ويا فنان ويافنانة الكويت والعرب
امبييييه وله نسيتو مخترعين الي خذو براعت اختراع ..مانشوفهم وينهم وينكم يا تلفزيون الكويت اخذوهم واحد واحد واعرضوهم لنا ابفخر وله ابطال الإلمبيات وله عظماء العلماء وله الكتاب وشعراء تراهم كلهم فخر مو بس اصحاب المهمن

ماخذيتو من عشابين وعطارين الي هابين الحين والله من عمريوعمرك تييج وتعالج بطب العرب وله اتخلطلج ذيك الخلطه لشدالبشره وله لتساقط الشعر وله ياكشخه وحلات مصممين الكوشات وديكورات حتى صلات استقبالنا ماسلمو ابيوتنا اصممونهم ذيك الذرابه وبعقل..ماراح اخلص وايد مهن وفناتك ... احبكم واحب اصابع اينكم وعقلقم يوم اشتغل
اتقولون هبات اهل لكويت بالهل معارض وكل كويتي وكويتيه صارت اتبيع وتشتغل ..خليهم ان كانت هباتهم فن واصل وله تبونهم في شوارع هايتين من العصر ؟
ترى جيلهم لازم ينذكروينكتب ويتحبر وينحط عليه الف خط وسطر ويدون بتاريخ الكويت يوم فكرواكتشف فنه وتفنن وانكشف .
ماراح اخلص بس تراكم اتعرفون اتكمله بس التفتو ودورو وين فنك اختفه وله تعتقد انه اندثر .

اخذت الصور من:

http://www.arabpark.net/vb/t47721.html

http://jaber-edu-kw.com/history/Kuwin3.htm

http://www.mazadq8.com/vb/showthread.php?t=187036

الإمتحــانــات رابعه ابتدائي

واي ..بنتي اليوم أول امتحان لها ..وهي أول مره تمتحن فاينال ..والله اشوفها صغيره وموفاهمه ..أنا أصلا تعبت نفسيتي اتعبت من كثر ما أحاتي ..جني انا الي راح امتحن ..ما اقدر اطلع ولاأنام ولا اداوم وقاعده انطرها على نار تطلع من الامتحان ...عسى الله يوفق أعيالنا

ونجحهم..آمين

ويييييع ذكرتني بالي مضى

FRULLATO --- just try

أمس كان أفتتاح محل FRULLATO للعصاير.. و كنا معزومين على الأفتتاح .. كان حلو ..

مشروع صغير حق شباب كويتيين

و المكان استراتيجي .. بالسالمية ( خلف مجمع الثريا ).. فتوقعاتي راح يكون فاتحة خير حق مشاريع أكبر بالمستقبل ..

حبيت شباب و بنات هالوقت .. الي يشتغلون و يستغلون طاقاتهم بأشياء مفيدة .. و صراحة لازم الكل يدعمهم

ان كان الشركات الكبيرة او الناس بالتشجيع .

go head و الى الإمام .. يا بنات و شباب الكويت ..

و صراحة نصيحة جربوا .. عصايرهم متنوعة ..

frullato@live.com

T: 25755453

دم الضب

صباح الخير :) .. سمعنه ان دم الضب يوخر او يشفي الي فيهم ( اكزيما ) اذا حطو الدم من اول ماينذبح الضب مباشره الى مكان ( الاكزيما ) .. عاد مره كنه صايدين ضب .. عاد جان امي اتقول ابيكم تذبحون الضب صوب ايدي الي فيها حساسيه الاكزيما .. وفعلا سووها والصوره تشهد :) طبعا لاتشوفون امي وهي لايعه جبدها .. بس للضروره احكام .. تبي تفتك من الحكه الي امأذيتها مسكينه .. بس طل ماراحت الاكزيما ظلت فتره طوييله وعقب راحت .. بس ماعتقد من الدم لأنها كانت اتعالج بالكريمات :) بس يمكن اذا سوينه هالعمليه كذا مره يصير في نتيجه ..بس حده وييع .. مسكين هالضب كسر خاطري وهم ينحرونه .. الله يرحمه :)

لويدري الضب شسالفه جان مارتز حق التصوير :)

قصتي مع قبعات 2010 الجميله ؟

القبعاتاي مثل ماشفناه على العارضات من انواع القبعات ..مثل حالها من الاكسوارات اي هابين فيها هذي السنه مثل القفازات والشالات .

والماركات العالميه لها نصيب من هذي الموضه .

وتنوعت هذي القبعات من القبعات الفرنسيه الى الصووفيه والامريكية (تمثلت بقبعات رعاة البقر) .

اغلبها من الشمواه والمخمل والصوف .

.
وتلبس في النهار غالبا ..انزين كل هذا تمام وماشي صح ...الكلام ....وين الغلط ...موضه هابين فيها والناس اذواق في اختيار الالوان والاحجام ....بس ...نيي حق كلمه " بس " هذي !!!!

تدرون وين الغلط ..بإلي شفته ابصراحه وسمعته

كنت رايحه مجمع الفنار وانا اتمشه دخلت محل اكسسوارات ..اتفرج ..وله تيي موظفه المحل شاكره لها خدمتها وتأشرلي على قبعات الي عارضيهم فوق وتقول : هذي القبعات تصلح للمتحجبات !! واقولها وينهوم ؟ اتقول : هذولي !!!!!!!!!!!!!! اشلون اشلون احط الشيله فوق كبوس الكابوي ؟؟ وله اتقول هابين فيهم والمتحجبات ياخذون منهم وايد ؟؟ الحمد وشكر على العافيه . طلعت من المحل وانا افكر اشلون كبوس عريض وحجاب فوقه مايصير .. ويي باجر ....... وله اشوف والله سوووها بنات الكويت ..فتحت احدى المجلات وله سيدات موصغار لابسين بدل رسميه وفوق شيلاتهم القبعات ! لا بعد حاطين عليهم اضافات الي ابروش اشكبره والي ريش ..شنو هذا ..انزين ابخاطركم لبسوه في الاستقبالات في عزايمكن من غير شيله مو في الشارع وفوق الشيله ليشششش..وحده من زميلاتي شافت وحده اتسوق ولابسه كبوس فوق شيلاتها ...لالا عفيه بنات ماتسووونها موضه مثل سالفه شيله او نفخه ...يعني منخلص من شي اييينا شي اكبر منه ذعراااا ...

مادري انتو لبستو الكبوس مثلهم ؟؟ وله منو شافهوم ؟؟

برج خليفه

امس كان افتتاحه ..كان عجيب مع الالعاب الناريه ..كانت مبهره جدا .

خلني اقولكم عنه بعض المعلومات الي شدتني :

في يناير 2004 كانت عمليات الحفر بدأت في انشاء الحلم الاماراتي ..وفي أبريل 2008 شيده أطول طابق سيسكن فيه انسان رقم الطابق 160 ...شيء مهول اشلون يسكنون ابجذي طابق !!! اسكن بالقمر احسن =)....وبه أيضا أطول ارتفاع لبرج المراقبه في الهواء الطلق في الطابق 124 وراح يستقبلون الزوار في تاريخ 5 يناير الجاري .

لمعرفه المزيد ..

http://www.alarabiya.net/articles/2010/01/04/96253.html#005

لمعرفه المزيد عن المشاريع وأبراج دبي في هذا الرابط ..

http://www.thedubaitower.com/videos

حين انطلقت منه الالعاب الناريه

ها في اي فندق راح تسكنون فيه ؟ اقصد في اي طابق راح توصلون له ؟

خفيف

في مركز السلطان مع ركن البسكوت ..

كلش مافي طعم المارس واصلا اخف من المارس

تاكلينه مثل البنك ..شيره شوي .

BBQ

صباح الخير :) بما أن الجو حلو هالأيام ومايانه البرد الي ودنه فيه بس لازم نستغله .. وحنه استغليناه ابقعده حلوه في حديقه يدتي ..وماتكتمل الفرحه الا مع الأكل طبعا :) ..بس هالقعده الحلوه مو توه ..من شهر تقريبا .. بس الظروف ماسعفتني ان انزل الموضوع ابحزته.. المهم في واحد انتعامل معاه حق مشويات (باربكيو) ينقاله ( بوعبدالله ) أصله لبناني بس على قولته مهجن كويتي :).. اييكم مع عدته لي عندكم .. انشاءالله لو تبونه اييكم الوفره ماعنده مشكله وقولي لوتبوني بالجو اييكم :) حبوب وطيب ومحترم .. طبعا كلشي عليه من فحم وشوايه والحمص والمتبل والريش والكباب والتكا والخبز..وماشاءالله عليه شغله سريع واكله لذيذ وخاصه العرايس لاتطوفكم حدها لذيييييذه .. يحط معاها مثل ماقالي (زبده الجبن) والخبز الي يستخدمه مصري .. راح اتلذذون فيها صدقوني .. ويحسبلكم الاكل بالكيلو والكيلو عنده ابـ 7 د.ك يعني تقريبا الشخص ابـ 4د.ك ورقمه 99675644 .

وعاد الى الحياة

من جم اسبوع او يمكن صارله شهر ..هذا الحدث ...وأنا قبل النوم ماسكه حليبي واطقطق على لابتوب وله مادري شلون طاح كوبي على الكيبورد ونكات كل حليبي عليه وغرق المسكين وطفى بهدوء ..يبت الفوطه مسحته ..واشغله مايشتغل ..واقولب فيه اشوف يمكن في مكان مامسحته ..واشغله ؟؟ ماكو ...ياعم اشتغل ماكو فايده يبت اكلينكس وحطيته عليه يمكن يشتغل هم ماكو فايده اتصلت على اختي (اتخيلو نص الليل ) اخترعت قالت اشفيج قتلها القصه قالت قلبيه على ويه او نشفيه بالاستشوار على درجه بارده ..بس هم ماكو فايده ..المهم خليته مقلوب ورحت نمت على ان باجر وانا واثقه راح يفتح معاي ..بس للأسف ماشتغل ..ركنتا على جمب قلت خلاص انتهى وهذا عمره ..وتخليت عنه المسكين وخذيت من اخوى لابتوب ثاني احتياطي على ما أشتري لي لابتوب ...ولما شافني زوجي جذي متهيونه قال خلاص بتقلينه ..قلتله: بعد احترق اكيد ..وصارله سنتين او كثر خلاص اشوف غيره ..وحتر زوجي وايد ..وشافني من صجي بروح اشتري واحد ثاني على السنه اليديد =) حركات يعني .. المهم خذاه من غير ما أدري وراح يعرضه على المتخصصين ربعه يشورهم بالموضوع ..وطبعا الحين صارو كل الشباب مهندسين كمبيوتر من غير شهايد عادي ..اجتمعو ربعه على ان الجهاز راح يشتغل ومافي شي بس الشاشه فيها بلا ...وخذاه حق محلات الي في حولي

للكمبيوترات وفعلا قاله يومين ويخلص ..وهني قالي زوجي .. إنه راح يشتغل وبلاها واحد ثاني ..اصدقون ماستانست ..مادري ليش الحين أنا قاعده اشوف الايدد وحركات يديده ..قتله اكيد قال إي ..وفعلا أمس ياب الابتوب جنه ورده .

ويقولي ومعاتب ...تخليتي عني بسرعه وأنا راجعلج ولهان ..من كثر شوقي لج ..نسيت عتابي..ماشوف الا عيونج وأنا فيها هيمان ...

وسلامتكم

2010

كل عام ونتو بألف خير جميعا .. ياربي تجعلها سنه خير و محبه وافراح علينه.. واتمنى ان ربنا يحقق لنا جميع أمنياتنه.. وبهالمناسبه الحلوه أشكر كل من باركلي وتحمدلي بالسلامه على ولادتي :) واتمنى ان الله يرزق كل وحده ماعندها عيال ابهالسنه اليديده .