الثلاثاء، 19 يناير، 2010

قصه " الكويتي فنان "



من زمان ..زمام أول ..الي راح وقعدنا بس نتحسر عليه ودنا يعود ولو انعيشه أيام ..أسمع يدي وله يدتي ..أتقول اقول:إيييه راحت أيامنا الحلوه ..راحت وراحت مع أهلها ..؟؟
أهلها ..منو ..موكانو اكويتييين مثلنا وله كانو نازلين من السما
لا والله كانو مثلنا بس كانوا احرار وفنانين!!!

اي فنانين لكويت اول كانت اضم كل الفنانين وكانو عجيبين ..علشان جذي لكويت اول كانت غير ...شنو صار وجرى الحين وله سنين الي قبل ..شنو تغير وشنو الي تركناه وتحجر شنو ؟شنو
اتعرفونه شنو ؟؟ فن لكويتي الي نساناه بالاصح الي سلمناه لغيرنا وماعرف اشلون اسيره ..وهني صار التغيير وطار طعم الفن وطار معاه كل شي اكويتي اصيل ..وصار تغيير في لكويتي نفسه ..صار يحب الرباده والسنع السكبه بس وهذا الي اهمه..صار لازم وغصب على كل كويتي عنده شهاده جامعيه وماجستير وله دكتوراه وشهايد ولو من بره احسن ..وصار لازم يتهندم من احسن الماركات ويشتري ويكدس في ديونه ولا يندم ..على فلوسه الطايره وله على وقته الي قضاه بلا فايده ولا عايده ..
صار لكويتي لازم اكون مهندس وله طبيب وله طيار مرتز بطيارته ..وله إداري لازم اكون مدير اقل شي وله وكيل وله عضو في مجلس الامه وعلى الاقل صاحب شركه خاصه فيه ..
وينكم يا فنانين .. ترى سبحان الخالق لكل واحد بصمه غيرخاص فيه ما خلقها عبث
وياكويتي ترى لكل واحد فينا فن غير
فنك بإيدك موجود وله في داخلك نايم مسجون
زماننا حكم علينا وفرض مثل ماقلت لازم انكون في مراكز ومهن مصفوفه ومحفوضه لنا مو لغيرنا ولازم نوصل لها ..غصب طيب وهل وسايط جدامنه كلنا صرنا دكاتره (حتى لو شرينا شهادتنا يبنها فخر من بره) خوش فخر ..الي نفتخر فيه ياي دكتور ولا ماجستير ..بس للاسف هذا الي اهالي البنات لازم تنطره والي كل ابنيه لازم تاخذه .. تراه موبدينه تراه موفنه ..بس لازم علشان اتكون اكويتي محترم ..موجذي ..غربلوه وغربوه وصرفو دم قلبهم ..علشان يرفع راسهم ؟؟...انزين وبعدين اي شنواتقولين وتخربطين راح اتقولولي اي المعاش رزه وعيشه تراه معاش وسياره آخر مديل ونلبس الغالي ابجيسه وله ...بس كافي فهمت ..هذا الي اتعلمتوه إلي لازم كل كويتي من اهوى صغير وعا وفتح عينه عليه ..جذي عشنا وتربينا ..
وديرتنا خليناها لمنو ؟؟ مو للغرب ؟؟؟ اكوتنا بس تبي مهندسين وله اطبه وله محامين ...إيييه اهني المشكله إلي سويناها بإدينا وله الي سواها أبهاتنا ..دخلنا ناس أغراب ..مسكناهم بنيتنا التحتيه ..أساس الي راح اتقوم عليه كويتنا ..وحنا ضلينا فوق طايرين ورافعين عينا لفوق ونطمع لفوق ونسينا احنا شنو اساس كراسينا نسينا أساس اراضينا ..وبانزينا وكهربتنا وشوارعناحتى مجارينا الي اطفحت ..نسينا أساس خبزتنا ..حتى ماينا من وين انييبه ..!! شنو صار وله شنو بعد راح اصير ..ترى الناس الي ادخلو ديرتنا تراهم مو من ثوبنا ولا دينا ..إدخلو ويابو معاهم اشياء دخيله ..ماقول قبل ما كان في غلط وله غش بس كان فيه بس بنسب قليله ..تدرون شنو صار ..صار رشوه والغش جذب شي دارج وشي اجارينا في كل يوم انشوفه ونسمعه وتقبلناه ولا صار البعض خذاه عاده وإطبع فيه وصار حياته تمشي عليه ..
عرفتو ليش زمانه اول غير
عرفتو ليش حياتهم في ابيوت الطين له لذه وطعم حلو ماينسى لو مر زمان وراح الزمان ..لو طال وله قصر ...زمان بيوت طين غير والله غير ..يشتاقلها الي عاشها وله ماشافها ولي بس سمع فيها ..ليش ..ليش لما الحين ماعرفتو ليش
اقولكم تعالو معاي نتفكر ..أنا ماعشت هذا الزمن..بس عشت تحسر اهالينا وحزهم ومستعدين بيعهم لها الوقت مقابل بيت الطين في ذاك الوقت
تعالو شوفو معاي هذي الوحات
اقولكم ..منو كان الفنان الي يبني بيوتهم ؟ مو بيت فلان البناي
منو كان يطاوع حديدهم ..مو هم بيت فلان الحاداد وله تناك .. وله في مهن ثانيه ياكثرها ومحلا اصالتها وفخر لنا من هذي بعد المهمن العطار وله منو ايبلهم ماي وياحلاته من صفاه ونقاوه الماي من الكندري وله منو اسويلهم سفنهم مو قلاف ..وله وله ماراح اخلص من كثرهم ..منا وفيا ..أمان وراحه ياسلام ..اتخيلو اتودي سيارتك حق ولد جيرانكوم وله ولد اختك وله خاكوم ..اتخيلو بس الحوار الي راح اكون
بينكوم : ها شخبارك شخبار الاهل
الكهربجي الي اصيرلك : ابخير ياهلا ياهلا ابريحت الحبايب اشلون خالتي ونسايب ها اشفيها سيارتك
القارئ: لا سفايف بس ..وقلت ما اوديها الا عندك ..ادري فيك فنان ولد فنان ..كل الكويت تتكلم على نظافه شغلك ..ما اوصيك عليها
الكهربجي : ماتوصي حريص ..سيارتك اهيا سيارتي ..وها اخليها على حساب مثل كل مره ..
انت : اي تدري بعد التزامات والسياره ما اصير فيها شي الا بنص الشهر ..على العموم سلم على الاهل ...ماتنسون يوم الخميس اتمرنا بالدوانيه .
ينتهي الحوار
الفه وموده اتحس لكويت كلها لنا ابروحنا ..ونشيل بعضنا البعض . ياسلام
وين هذا اليوم ..الحين ولد عمك اشوفك يصد عنك يخاف تامره شي وله تطلبه !!
يافنانين تراكم كلكم فنانين وبإيدينكوم اتردون ديرتنا لنا ومهنا الضايعه والاساسيه لنا
تسمعون يوم صار تسمم من أكل المطاعم ..وله تسرب امتحانات في احد المدارس وله بيت افلان خر عليه وأساسه غلط وله عوي ..وله الصبه مغشوشه راح اطيح عليه ..اقول عن الي ماسك مهنا وميعرفلها شنو نبي بالضبط لاتحاول لاتفنن من يد اكويتي احلى فن ونغم .
اصلا كل شي راح طعمه وذبل ..كل شي ندري واحنا نشتري كله غش وله ناصبين علينا بالسعر وله ندري ان أكله وصخ وناكل ..وحنا راضين ومستانسين ..والربحان الي دخل علينا مو احنا ..دخل علينا وحنا امهللين دخل علينا وسحب من تحتنا بساط السنع والاصل ..وتعتقدون انه اخذ منا ابساط الفقر ..وقلتو خلوه لهم تراه هذا بساط كله شقى وريحه وتعب ومهن وضيعه متناسب ولا تنفع ولا تضر ..اييييه بعتو أساس فنكم بعتو حق الي دخل علينا ابطمع ..ما أعمم بس الغالبه دخل زاير حتى لو بقى فيها 40 سنه ياكل ويشرب ورتز وبنا بديرته احلا العماير ..وحنا ندري وراضين ..يبوق وينهب عليه حلال يبيع الخمر وفتح المراقص وقهاوى ونور السراديب بليتات حمر ..وحلال عليه ..مو المهم المهم يقوم ابشغله ..الفساد انتشر ..لكويت تتدمر ..علينا ندفع بس دفعو افلوس بس هذا المهم ..
المهم احنا طاقين الكرت واحنا تحت لحفنا ...حسبيا الله عليهم علمونا اشياء واشياء تشيب لها روس وما مرت على بشر ..مايخالف ..احنا فوق ومحد داس على طرف اثوبنا و دشاديشنا ..
لا يخالف .. ويخالف ونص بعد ..اصحو يافنانين ..اصحو ..مامليتو من الفراغ والنوم والسهر ..مامليتو من النت ..وقز ..وسفر ..اكيد راح اتملون
تدرون ليش لانكم أساسكم فنانين ..كلكم فن كلكم فن . بس هم اقوم الحمدالله مازال الخير الموجود مانتحر ..أخيرا في ناس اتحركو ..زحفرو لهم تاريخ ينحفر لهم فوق الصخر
بس اقول شي الحق يانقال كلمه حق وفخر شفت شباب مثل ما انتو شفتو اليوم وراح اتشوفونهم باجر أكثر..تدرون منو ..جيل الحين ..شفتو اشلون اتشطرو..
تدرون شنو يحاول يقول :
انا كويتي انا فنان زمان اول
انا كويتي أنا فنان اعرف اطبخ واخيط واتفنن
انا اكويتي أنا مثل مانقال فيني قول وفعل
ياحلاتكم من جيل جيل قوي – رافض – كله عزم - وجيل متكبر تكبره مو على الناس لا حشى جيل متكبر على الرباده متكبر على نفسه متكبر على الحدود الي ارسمتله
تدرون شنو يقول بعد :
ليش لازم محامي وله دكتور
ليش ما أكون أنا الي احدد ومن غير اقول
ليش ما أكون كهربجي وبمعرفتي بكهربهت شغللي اشغل اختراعاتي واديرمشروعي من فلوسي لا من شهاتي ولامن مركزي الزفر
تراكم كلكم مو اغلبكم ذقتو بسكوت (الكوكيز) الي كان ابيته وابإيده اخبزه اهوى وربعه ..والحين الله يحفضه محله في أكبر المجمعات انرز وانفتح ياحلاته من كوكيز
وله شقت والي رسم ولون على البلايز تيشيرتات وعرضها بساحه سوق شرق ابفخر
وله تعالو وخلونا من تصاميم الغرب ..شوفو الي صمم دشاديشنا ابفناتك وله نفانيف بناتنا حتى تراجي وله جناط ..كله حلو يافنان كله حلو يا فنان ..
اسعارهم غاليه من حقهم سوو الي انتو ماسويتوه اشكركم يا فنانين ابفخر ويا فنان ويافنانة الكويت والعرب
امبييييه وله نسيتو مخترعين الي خذو براعت اختراع ..مانشوفهم وينهم وينكم يا تلفزيون الكويت اخذوهم واحد واحد واعرضوهم لنا ابفخر وله ابطال الإلمبيات وله عظماء العلماء وله الكتاب وشعراء تراهم كلهم فخر مو بس اصحاب المهمن
ماخذيتو من عشابين وعطارين الي هابين الحين والله من عمريوعمرك تييج وتعالج بطب العرب وله اتخلطلج ذيك الخلطه لشدالبشره وله لتساقط الشعر وله ياكشخه وحلات مصممين الكوشات وديكورات حتى صلات استقبالنا ماسلمو ابيوتنا اصممونهم ذيك الذرابه وبعقل..ماراح اخلص وايد مهن وفناتك ... احبكم واحب اصابع اينكم وعقلقم يوم اشتغل
اتقولون هبات اهل لكويت بالهل معارض وكل كويتي وكويتيه صارت اتبيع وتشتغل ..خليهم ان كانت هباتهم فن واصل وله تبونهم في شوارع هايتين من العصر ؟
ترى جيلهم لازم ينذكروينكتب ويتحبر وينحط عليه الف خط وسطر ويدون بتاريخ الكويت يوم فكرواكتشف فنه وتفنن وانكشف .
ماراح اخلص بس تراكم اتعرفون اتكمله بس التفتو ودورو وين فنك اختفه وله تعتقد انه اندثر .

اخذت الصور من:





هناك 9 تعليقات:

نون النساء يقول...

مادري شسوي عقب ماقريت البوست

ادمع عيني

ولا اصفقلج واشد على ايدج وقلبج اللي كتب

ولا اقوووم ألمج من ورى الشاشة انتي والبوست



صااجه بكل كلمة تعور قلتيها يا جاردينيا


كفووو

غير معرف يقول...

الحجي سهل
الله كريم يستر من باجر

mazyona يقول...

صج
ياحلات أيام قبل البساطة أحلى شيء فيهم
تسلمين على الموضوع

غير معرف يقول...

شفيج على الشهادات مادري تبين الناس يظلون جهله و يسوون كوكيز و يقعدون؟ لعلمج اللي عنده محل كوكيز شاب جامعي شهاده و مركز والكوكيز هذا بزنس و هوايه يعني الواحد يدعم فنه بالشهاده و بالعكس الرسول صلى الله عليه و سلم قال اطلبوا العلم و لو في الصين انا مادري شنو مشكلتج و لو تسألين يدج او يدتج راح يقولون لا مانبي بيوت الطين و الشقى نبي الراحه في بيوت الحين ، بس انا معاج بشغله وحده ان اول الكويتيين على قلب واحد مايحقدون الحين لأ الكل يحسد الثاني ,, و تسلمين

جاردينيا 2000 يقول...

غير معروف أنا مو ضد الشهايد ابدا ..أنا ضد الي يشتري الشهايد
أنا ضد الناس الي اصرون على اعيالهوم وهم ميولهم فنيه حركيه في ناس الله خالقهم جذي مايقدرون يكملون حتى الثانويه ..بس الاهل مايفهموم هذا الشي
في ناس خلقو لكي يكونو نجارين وله بنايين وله اشلون تقوم الامم
وفي ناس انولدو علماء ومهندسين وله منو راح يخترع لنا الذره ويهندس لنا بيوتنا وشوارعنا
في جذي وفي جذي مولازم الكل علماء
والحمدالله كلنا جامعيات ..وأتنى لبنتي الماجستير أن كانت ميولها دراسه أما إذا كنت ميولها مثلا الرسم مثلا ليش ماتدرس الرسم مو اتكون طبيبه غصب او محاميه غصب
عرفت شنو قصدي
العلم نور ..والشهاده علم ..وفكره طريق النجاح
أشكرك

جاردينيا 2000 يقول...

غير معروف
وادري انه جامعي الي اسوي الكوكيز
البيوت الراحه هي سبب الفراغ والمرض لامهاتنا وجداتنا

malak يقول...

حلووو الموضوع



يعطيج العافيه :)

غير معرف يقول...

سلام جاردينيا، فهمت وجهة نظرج بس انا شخصيا قاعده اشوف ان الشباب اهما اللي مالهم خلق يلتفتون لنفسهم لاهين بالبلاك بيري و الفيس بوك و الأهل الحين مالهم سطوه نفس أول مايقدرون يغصبون عيالهم على شي اهما مايبونه و اشوف ان بيوت الراحه ماتسبب الامراض ليش؟ الواحد يسوي رياضه يروح الحداق الشاليه يشتغل يكرف و يرد يرتاح في بيته بالعكس الف الحمدلله على النعمه اللي احنا فيها، احس هالشي اللي تتكلمين عنه يطلع من داخل الشخص نفسه مايصير نلوم الأهل على كسلنا و اللي ماعنده شهاده صح يصير حرفي ليش لأ بس هم الحرفنه علم مو بس شغل ايد يعني الرسم ترى مدارس و انواع الرسام هم يتخصص بنوع محدد يعني هم يدرس :) و صح كلامج العلم نووور و مشكوره على توضيحج

غير معرف يقول...

http://amandapit33.blogspot.com/