الأربعاء، 27 يناير، 2010

سويتوها وانتوا صغار ؟؟؟؟


ذاك اليوم دشيت غرفتي وعند التسريحة تحديدا شفت شعر ومبن إنه أحد قاص شعره ...طالعته وقلت هذا لا شعري ولا شعر زوجي ...امممم ولا حطيت ابالي شي شلت الشعر وقطيته بالزبالة ( مكرمين ) ..المهم شوي رحت اطمن على الكتاكيت ( مودو ويسور ) شنو قاعدين يسوون ...انصدمت يوم شفت مودو ماسك مقصي خذيته منه وقلت له مرة ثانية يا ماما لا تحوّس بداري ...وهم ما حطيت ابالي شي ...بعد شويّ ولا مودو يايني يسولف معاي أشوف شعره ها.....شفيه شعرك جذيه :) مودو شمسوي ....يضحك ويقولي قصيت شعري ...الله يقطع بليسك شالجرأه ؟؟؟؟ شلون قصيته ..
أثر الحبيب ماخذ المقص وقاص شويه من شعره ...عاد توه من يومين رايحين مع ابوهم الحلاق ..صار شعره نافوره :)

وشكيت فيه إنه قاص شعر اخوه بعد أطالع يسور جنه مو طبيعي قلت له ها شنو حتى يسور محلق له ...يرد عليّ يسور إي يماه ...مودو ليش تسوي جذيه ....يقولي مودو لا يماه ما قصيت شعره بس شعري ...ألتفت على يسور شنو ماما ألحين مودو قص شعرك ولا لأ ....يضحك ويقولي شنو ماما مودو حلاق ...انا الحلاق محلّق شعري :) ..

ضحكت والله ....وتذكرت إني مره يوم كنت صغيرة بس مو صغيرة وايد حشيت قذلتي خوش حشّه...كانت باطه جبدي وقمت قصيتها بس صار شكلي تحفه :)..


إنتوا صارت معاكم ...سويتوها وأنتوا صغار؟؟؟؟؟؟؟؟

هناك 14 تعليقًا:

نون النساء يقول...

انا حلقت نص حاجبي بالشفرة
يعني بقلد ابوي
شفت ماعندي لحية جان اتولى اللي فوق عيني

صراحه ماتوقعت بيصير فيني جذي..


حصلت زف سنة بساعه
بس امي رقعت السالفه بقلم كحل ايلين نبت مرة ثانيه ههههههههههههههههههههههه

Mohammed يقول...

لوووووووووول اي شكثر سويتها

ايام والله

ويعطيج العافيه على هالبوست

نمووول يقول...

انا كنت اشوف ابوي يحلق بالمكينة بقلدة بس ما لقيت شي بويهي شتغلت على راسي .. ههههههههههههههه

Hope يقول...

يحليله
انا اذكر مره قصيت شعري
شسوي متعقده من العنقوصين اقول حق امي متى تسوين لي بس واحد تقولي لما تكبرين و شعرج ما يناسبه عنقوص واحد
قمت قصيته عبالي جذي بيصير لوول
و لا امي تزفني و تقولي الحين مايصير عنقوص واحد لأنج قصيتيه لوول

Kurinkato يقول...

عندي صورة لي و انا قاصه قذلتي
مايلة بعد و فيها خصلة بالوسط شوي طويلة و نفنوف وردي و ترتر

ههههههههههههههههه

مشكلة ان وقتها كان عرس عمي و كان عمري اعتقد 3 سنين

بس ما اتذكر إذا انزفيت بس ولا هم انطقيت

غير معرف يقول...

بصراحة قص الشعر هذا شي متوارث عندنا
غالبيتنا لما كنا صغار حشينا شعرنا او بالاخص قصينا القذلة
لدرجة اختي قصت قذلتها قبل حفل تخرجها من الروضة بيومين (( كلش شعرها ما ترقع))
ولحد الحين صورة تخرجها من الروضة والقذلة مقصوصة

ام عموووور

سمو الأميرهـ ..ツ يقول...

ما شاء الله عليهم ..

أذكر مره كنت احاول أنفذ عملية قص شعري كنت متعقدة منه ليش انه طوويل و امايه الله يطول بعمرها مب طايعه تقصه لي ..

انخشيت ورا الباب و بايدي المقص وقبل لا تكتمل العملية الأإجرامية
زختني أمايه
وهزبتني هزاب
...
بوووست ممتع :)

يعطييج العاافيه
و ربي يحفظ لج أولادج

حليلهم مشاغبين شراتي
:)

Om MoD يقول...

نون النساء :

بدعتي ....لا عيل مودو يمج ما سوّا شي ..


شعر يترقع بس حاجب صعبة :)

لووووووووول :)



Mohammed :

:)

ذكرتك بالذي مضى ..

الله يعافيك ..



نمووول :

أمبيه ... :)

وأكيد حصلت لك زفه محترمة :)



hope :

لوووووووول..

عشان جذيه أحب الأم تكون متفهمة مشاعر بنتها إذا قالت لها يمه قصي شعري تقصه ...
وما تخليه بخاطرها ..:)

بس سالفتج سالفه ..لووووووووول:)




kurinkato :

لووووووول خوش صورة ...لو شنو ما تنسين إنج قصيتي قذلتج بيوم من الأيام :)

شكلج هيل كان مميز :) بالقذله الجنابية :)

مو شفايدة الزف عقب ما صار اللي صار :)




غير معرف :

أتوقع أنا جذيه كل واحد لازم يمر ببهالتجربة بعمر معين :)

أمبيه بدعت إختج عاد حرّه على الأم إذا في مناسبة والأخ أو الإخت لاعبه بشعرها....





سمو الأميره :


لوووووووووووووووووووووووووول..


مسكينه كسرتي خاطري ..


شكلج عقبها حرمتي حتى تمسكين المقص :)


حياج الله وتشكرين :)

Master يقول...

hehehe kil edenya emjarba el gas?? :)

ana 3ayal al7een ele al3ab eb gethleti :p
a7awel amsik nafse, 3ashan , ma t'haweshni el mara besalon

شاي الضحى يقول...

اي سويتها وايد

ومره قصيت شعر امي كان طويل وحشيته لها بس لا تسأليني شلون وليش :q

والله يخليلج عيالج :)

haifa يقول...

اوووووه آنا تاريخ حافل
طبعا تعديت قص القذل الى ماهو العن
اتذكر باولى ابتدائي قصيت رموشي زين ما بطيت عيني طبعا العذر تأذيني ما اركز وانا ادرس.. اهيا صج جذي بس ماتوصل للقص!

Sn3a يقول...

weld bent 3ammee m7alleq 7awajba eb mooooos!!!
ellee bent 3mee matat men l 5r3a o ashwa ma sawwa shy eb 3aina


allah ya7feth 3yalkom ya rab

o n3eeman modooo

Sn3a يقول...

by the way
i still cut my hair lama at'thayag;p

Om MoD يقول...

master :

على قولتج ....كل الدنيا خايضة هالتجربة :)


إي عاد إنتي سوالفج سوالف :)







شاي الضحى :


لوووووووووووووول..


قوية :)



الله يسلمج ...



haifa :


مه ..والله مو هينه ...أتذكر ورفيجتي وانا كبيرة بعد قالت لي قصي رموشج عشان يصيرون أطول ولا تجرأت ..


رموشج عاد ..خطيرة ....







san3a :

مساكين هالأمهات معاناة مع هالعيال وسوالفهم ..


لا خطاها السو من الخرعة :)




وينعم بحالج حبيبتي ..



شاطرة عيل ما تحتاجين صالون :) بس عسى الضيقة ما تييج ...تقصينه وإنتي مستانسة ..