الجمعة، 26 يونيو 2009

Diet Care


صار لي ألحين أسبوع من بديت مع دايت كير..وعندهم أنواع حق الاشتراكات أنا عن نفسي اخترت إشتراك الأكشن و هو عبارة عن توصيل لحد البيت كل الوجبات ريوق وغدا وعشا بس بدون حليب وفواكه..بقولكم مشواري لهم أول يوم أول شي دقيت وخذيت موعد وماشاء الله زحمة مو على كيفي أنا دقيت اليوم وقلت لهم أبي باجر ما عطوني موعد إلا تقريبا عقب 10 ايام ..المهم عاد قبل الموعد بيوم دقوا عليّ وقالولي إحنا محتاجين تحليل دم ..ناخذ لج موعد ولا شلون ؟؟؟ قلت لها بصراحة أنا مسوية تحليل قبل فترة والحمد الله كل شي عندي أوكي ...قالت على راحتج ...

وماكو رحت لهم وعطوني أوراق عبيتهم بمعلومات تخصني من إسم وعنوان وغيره ...وتوقيع على تعهد إنه ما لهم شغل إذا ما نزل وزني ..؟؟؟؟؟وقعت شسوي بعد ..

دخلت على الاخصائية وايد حليوة ..خذت وزني و طولي و عمري وقررت جم سعره حرارية أحتاج باليوم ...ووقفت على جهاز يقيس نسبة الدهون بالجسم ويحدد جم الوزن المثالي لي بصراحة نسيت شنو اسم الجهاز ..

اخترت معاها تقريبا حق يومين شنو الوجبات اللي أبيها وعقب قالت لي كملي عند الاستقبال وعطيهم الأوراق وحطت لي موعد عقب أسبوع تقريبا ..وحرصتني على الرياضة على أساس أبدي بـ 30 دقيقة وأزيد عقب ..

وماكو كملت أوراقي وبديت المشوار ..

عقب اقل من اسبوع راجعت ولا نازله كيلو ونص ...وااااااااااااو وناسة بس ما سويت رياضة إلا 3 ايام بالاسبوع ماكو وقت حق الرياضة شسوي بعمري ..

تجربتي معاهم :

1- الأكل وايد حلو ..

2- الحلو ولا أروع :)

3- مواعيدهم مضبوطة..

4- شكل العلبة وايد مرتب وحلو ومنظم..
5- السلطات لذيذة ..


هذا كله كلفني 225 د.ك ..الاشتراك قيمته بس 199 د.ك هذا غير فتح الملف والفحص على الجهاز ...ومدة الاشتراك شهر ..

الحين عندهم عرض قيمة الاشتراك بس 189 د.ك وتدشون مسابقة واللي يخسر وزن أكثر يربح 3 تذاكر سفر حق جزيرة بالي مع إقامة 5 أيام ..ناويه أشارك ادعوا لي أفوز :) بس قالولي على الشهر الياي عقب ما أجدد اشتراكي ..

أرقامهم : 1806050

هناك 26 تعليقًا:

The.One يقول...

لا زيـن سويتـي و أشتركتـي معاهــم
بصراحـه شغلهم مرتـب ومظمون
وأبشـرج كذا وحده من اهلنا جربتـه وماشاءالله عليها انقـصت واايـد بس على صحه



وبالتوفيق

جاردينيا 2000 يقول...

وإختي بعد جربته وكانت النتايج حلوه ..أنا بعد نزلت كيلو بس مو دايت كير بس لا ..كلهم كل يومين او 3 ايام اطلب من شركه غداء مع سناك الحلو ...طلبت من هلث كمباني حلو +دايت سنتر عادي بس الحلو ماله موحلو +دايت كير لذيذ يامي =)

Sn3a يقول...

دايت كير الكل يقول هذي احسن شركه للوجبات الغذائيه الصحيه

عليج بالف عافيه ومبروك النزول وان شاءالله توصلين للوزن اللي تبينه بصحه وعافيه يارب

DoDoq8 يقول...

عاد سمعت عليهم سوالف

الدايت سنتر يهتمون فيج اكثر


علعمووم اهم شي انج نزلتي وزن

غير معرف يقول...

خوش والله:)
شنو نوعية الاكل عندهم؟ .. وشلون يجيبون الاكل؟ بارد ونصخنه ولا شلووووون؟

غير معرف يقول...

موفقه اختي ,,

رغم اني اشوف ان الاصرار هو اساس خسارة الوزن ,,
و ليس نوع الدايت او الغذاء ,,
اهم شئ الرياااااااضه ,,
و يكون الغذاء شامل ,,


ما اتوقع اعاني من وزني لو اكل منا لبكره ,,
الحمد لله

دمتي بخير ^^

Q8EL5AIR يقول...

تبين الصراحة .. انا مااعترف بهالشغلات!!

ماادري احس ان الواحد اذا عنده اراده وعزيمة على التخفيف راح يسويها هو بنفسه مو عن طريق نظام غذائي ريجيم !!

ما ادري قد اكون مخطأ !! :)



واحد من ربعي الله يذكره بالخير كان وزنه 160 ضعف 80 كيلو ب8 اشهر بولا نظام من هالانظمة ..

رياضة وتخفيف ..

:)








وتحياتي ..
ويسلمواااااااااااااااا :)

haifa يقول...

انا كنت مشتركة عندهم ووقفت .. راح تلاحظين انج بتنزلين باول شهر بس بباجي الاشهر بتنزلين بصعوبة .. لدرجة تحسين انج تدفعين فلوس عالفاضي ..

يعني انا نزلت 5 كيلو باول شهر وبثاني شهر بس كيلو واحد رغم اني ما اكل شي برا البوكس يعني ملتزمة حدي..

اول مابلشت كان الاكل لذيذ وكل شي تمام بس بعد شهر لاعت جبدي .. صرت موقادرة اتقبل طعم ونكهة اكلهم ..

انا اشتركت لان دوامي طويل وكان صعب علي التزم بهيلث فود خلاله .. يعني مضطرة اكل كل يوم من اقرب مطعم لدوامي ماعندي وقت او فرصة اتخير او اتحكم ..

Fahad Al Askr يقول...

شدعوة 200 دينار على كرتون أكل، بس يازت لي الفكرة، ولو إني مستغليها، لكن لأني قاعد بالصيف وعندي شغل وايد، فبضبط مواعيد أكلي، وبالمرة ننزل لنا جم كيلو، لأني متعقد من وزني، صار لي سنتين ماني عارف أنزل 10 كيلو صعدتهم بدون ما أحس

Om MoD يقول...

The.one :


إي حمد الله :)

بصراحة وايد مرتب ..

وشكرا عالبشارة ..ويارب يكون دربي دربهم :)


والله يسلممج :)




جاردينيا 2000 :


هيا جاردينيا :)

يارب كل من يبي ينزل وزنه ينزل ..

ما أدري والله ما جربت ولا واحد فيهم ..بس إذا مليت من دايت كير بغير :)


وعليج بالعافية وإلى الأمام :)





san3a :


أنا كنت مجربه الكشري من الجمعية وعجبني وعلى اساسه قلت بشترك وياهم ..

وهم رفيجتي كانت مذوقتني الحلو من عندهم وعجبني بعد ..

والله يعافيج ويسمع منج ربي :)




DoDoq8 :



لا حرام ...وايد زينين ..ما اقدر أذم فيهم ما شفت منهم إلا كل خير :)


إي الحمد الله أهم شي الوزن :)



غير معرف :


:)

كل شي عندهم مجابيس ..باستا ..سلطات بأنواعها وشوربات ..وحلو أنواع وأشكال ...كل ما يخطر عالبال موجود ...سندويشات بأنواعها ومناقيش كل شي كل شي...

والأكل غيي بارد ويتسخن بالمايكرويف :)



اسيرة الدوحة :


الله يسلمج حبوبه ..

صح الأصرار ..وهذا اعتبره أنا نوع من الاصرار :)

ولازم الواحد يهتم بأكله ونوعه عشان يحافظ على رشاقته ..

والرياضة مهمه اتفق معاج ..

واهم شي عندي أنا يكون الغذا كامل وما يعتمد على نوعية أكل وحرمان ...

والحمد الله عسى ربي يتمم عليج :)



Q8el5air :


وجهة نظر ..

وباتباعي حق هالنظام أكبر ارادة وعزيمة حق التخفيف ..

وانا جربت بنفسي ومليت ودي اغير كنوع أكل ونظام ماني خسرانه شي غير وزني وهذا اللي ابيه :) ..


رايك واحترمه
..


ما شاء الله يعل فالي فاله وانزل الكيلوات اللي ابيهم :)


والله كريم ...


والله يسلمك :)




haifa :

صج ...


اهو عادة أول شهر الواحد يفقد اكثر الكيلوات وعقب يصير النزول أبطا ...بجرب وأشوف ...



يمكن الواحد يمل من نوع الاكل من جذي أنا ناويه اغير الشركة على طول غذا مليت او اكتفي باني اسوي اكلي بنفسي ...


مشكله والله الدوام ...وخصوصا إذا صار طويل ...

ما جربتي شي ثاني في وايد شركات الحين ونفس الطريقة ؟؟؟؟؟؟


وموفقه عزيزتي ..

kazmawy يقول...

عليج بالعافية وزينس ويتى
انا مجرب اكلهم والله طيب والحلو مثل ما قلتى لذيذ
بس اهم شى الرياضة مع البرنامج الصحى حتى تكون النتيجة تسوى
بالعافية والتوفيج

Om MoD يقول...

الله يعافيك ...

حده لذيذ...

إنشاء الله ناوية أسوي رياضه ...بحاول اضغط على نفسي واطلع وقت لها...

ومشكور والله يوفق الجميع :)

جنون الكويت يقول...

شكله خوش اكل للدايت بقول حق أمي عنه ........^_^

Om MoD يقول...

fahad Al Askar :


شنو نسوي ..عشان الرشاقة كل شي يهون :)




جنون الكويت :



قوليلها وخبرينا عن التجربة :)

worldwide.q8 يقول...

فعلا دايت كير وايد مدحولي اياه

bhr.qadsaweya يقول...

بالتوفيق حبيبتي :)

يعطيج العافية

om hussan يقول...

شدي حيلج بس لاتردينهم مثل المرة الي طافت ترى حسافه التعب يروح والفال لي بعد الولادة

Om MoD يقول...

bhr.qadsaweya:

إي إدعيلي حبيبتي ..

الله يعافيج :)




om hussan :


يا بعد عمري ....إنشاء الله ...

وإنشاء الله وربي يسهل عليج :)

غير معرف يقول...

انا صارلي 6 ايام مع دايت كير

الاكل مو صج الحلو مو صج

لوووول :)

صج يعني ماكو شي يخليكم تخربطون وتاكلون من مطاعم بس عفيا لا تحبطوناااا :( ترى انا كل ما احد مدح الشي اقتنع فيه واذا ذمه بسرعه اكرهه :\ انا بس محتاجه هالشهر كتنسيق جسم واشتركت بكيرفز علشان اعرف نفسي بلبيت ما اسوي رياضه :) وثانكس كلكم بج بج

Om MoD يقول...

بالتوفيق عزيزتي ...



وانا معاج على الاكل والحلو:)حده لذيذ :)


ولا تهتمين الناس أذواق وكل واحد يفرق عن الثاني ...كل واحد يحط لج تجربته وتظل تجربتج غير ومختلفة ..

وإنشاء الله توصلين حق اللي تبينه ..

ويالله تشجعت اكثر في احد وياي :) مو بروحي

غير معرف يقول...

مرحــــبـــــــا :)


ام موووود شلونج مع الرجيم؟


شنو اخر التطورات؟

وبالاسبوع جم لازم ننزل؟

Om MoD يقول...

اهلين عزيزتي ..


والله الحمد الله ماشي حاله ...

ماكو راجعت ذاك اليوم وقلت لها إني صايره عصبيه بزود ...قالت خليني أعطيج فري بس قلت لها لا خل يطوف علي شهر عقب باخذ يوم فري :)


أنا نزلت بأول اسبوع كيلو ونص والاسبوع الثاني كيلو و600 ...حده وناسة يعتمد على كل شخص وجسم ...


وانتي بشرينا عنج :)

غير معرف يقول...

عدنـــــــــا :)

انا الله يسلمج موعدي الاول كان بعد 10 ايام من بلشت معاهم ونزلت كيلو ونص :)
والحين ماكو ناطره موعدي الثاني

بس لمن زرتها قالت لي راح نقلل من الكالوري وقلت لها اوكي قللي من كالوري لسويت والله يسلمج قامت توصلي نمونه لووووووووول من عقب العز

غير معرف يقول...

عدنـــــــــا :)

انا الله يسلمج موعدي الاول كان بعد 10 ايام من بلشت معاهم ونزلت كيلو ونص :)
والحين ماكو ناطره موعدي الثاني

بس لمن زرتها قالت لي راح نقلل من الكالوري وقلت لها اوكي قللي من كالوري لسويت والله يسلمج قامت توصلي نمونه لووووووووول من عقب العز

غير معرف يقول...

om moooood wainch??
3asa mashar;\


bqolch


tra jadadt eshteraky m3ahom :)

tofy

غير معرف يقول...

Thanks for clearing it out