الثلاثاء، 23 يونيو 2009

هلا أسامه

اسامه موظف معانا بس من إداره ثانية ، صارلي فتره أدق عليه عشان إنسق معاه يوم إيينا لأن مديرنا بكرمه و بنصوره . المهم أسامه يه ، جان يدقلي محمد من السكرتاريه و يبلغني بوصوله ، و يقولي تعالي جان تبين تشوفينه تره المدير عنده إجتماع ألحين.

قمت و طلعت رحتله بقاعة الإنتظار، و أشوفه قاعد على القنفه يقره مجله من هل المجلات إلي حاطينهم حق الناس يتسلون فيهم وقت الإنتظار ... و بإبتسامه عريضه ...

أنا : هلا أسامه ، معاك ماستر إلي كلمتك بالتلفون ، شلونك ؟ شخبارك ؟ عساك بخير...
بطرف عيني أقدر أشوف محمد واقف على يميني و يبي يكلمني ، بقلبي ( هذا وقته !!!! خل أخلص من الريال بعدين كلمني)
و اكمل مع اسامه : انا اعتذر منك ، المدير ألحين بإجتماع و يمكن يتأخر شوي ، إنشاء الله بس يخلص بشوفك

جان يقوم من القنفه نص قومه و يمسك شي بيده اليسار كان حاطه يمه و يقول : يعني أأوم أصور دلوأتي و له ....

انا هني عيني قامت إتلاقط ، أطالع الريال و اطالع إيده ، ارد اطالعه و احاول أستوعب شنو قاعد يقول ، وااااي لالالالالالا
طلع هذا المصور ، وااااااااه فشلتاااااااااه ، إلي بيده كانت جنطة الكاميرا ،تره على فكره أنا شايفه المصور من قبل بس ناسيه شكله ، جان ألتفت على يساري و أقول حق محمد ، وين اسامه عيل؟

محمد : و انا صارلي ساعه بقولج هذا مو أسامه و إنتي حاقرتني ، أسامه بمكتب خالد

أنا : يااااااااي و أعدل نفسي و إبتسامتي مره ثانيه و أدخل مكتب خالد و أقول: هلا أسامه ، معاك ماستر ...
و أرد اعيد كل إلي قلته للمصور

هناك 5 تعليقات:

haifa يقول...

لوووووول موتيني ضحك
تصير دايما

انا صارت معاي العكس يعني انتاي ارحم

Om MoD يقول...

لووووووووول ...


ماستر عليج سوالف :)

The.One يقول...

والله حسافـه ..
ألحيـن نسفتـي هالابتسامـه وحاله آخر شي يطلع المصور

موشـي لوووول

om hussan يقول...

صراحة موقف يضحك اكثر من محرج ترى ولهنا عليج خلينا نشوفج

غير معرف يقول...

لووول اعتدت على هالـمواقف .,
أول زيارة و اعجبت بمدونتكـم بـس حبيـت أنبه على شـي .,

إنشاء الله تكتب إن شاء الله .,

=)