الأحد، 21 يونيو 2009

حدتني الظروف

أدري مصخت سالفتي وصارت قديمة بس أنا مواعدتكم ولازم أوفي بوعدي :)

ما كنت ناوية ولا مخططة كلش إني أروح ماليزيا وكل ما زوجي ياب سيرتها قلت له ما أبي ..ما أبي اروح حر وخيسة شويدينا ابي أروح مكان بارد وفيه ثلج ..بس صج بني آدم يخطط ويرسم واللي مكتوب له يصير ..كان ودي أروح أول شي جنوب أفريقيا وحست ودورت وبحثت عنها وايد وحسب اللي قريته جوها بارد وحلو والشعب ودود بس ما أدري جنه الرحلات ماكانت على مزاجي حسيت اغلب الرحلات اللي فيها من طقت سفاري فهونت عنها وحولت على أستراليا ولو تشوفون الـ favorites عندي تلقون ملفات وايد عن استراليا وجنوب أفريقيا ...وبيوم من الأيام دش علي زوجي وقالي خلاص ما لنا إلا شرق آسيا ..طبعا عقب إنفلونزا الخنازير قالي ما نبي نروح ونجازف بحايتنا ...تعوذت من إبليس وقلت له أوكي ..والحمد الله رحنا السفريات وحصلنا حجز يتوافق مع إجازة زوجي العزيز ورحلتنا كنت مدتها 10 أيام ما تنقلنا وايد أنا ما أحب التنقل وايد بالسفر بس رحنا كوالالمبور قعدنا فيها 5 أيام وعقبها رحنا سلانغور قعدنا فيها 3 أيام ومنها لما دبي قعدنا يومين.. ..وانا عجبتني وايد سلانغور حلوة حق اللي ياخذ عياله معاه إحنا قعدنا بفندق سن واي لاجون سيتي ..الفندق عجيب والمدينة المائية أعجب ..مكان روعة :)

بحط لكم بعض الصور مع تعليقاتي الخاصة :)

وصلنا ماليزيا صورة بالمطار عجبتني وصورتها ..




لازم نروح السوق الصيني ونحوس فيه ...
طرارة من نوع ثاني ...و في نفسه ذهبي بس ما شفته ..

ما شاء الله اللون الأخضر مغطى كل مكان ووايد مريح للعين ..




مدينة الملاهي في جينتك ...وايد زحمة مع انه ما كان يوم إجازتهم ..بس الجو هناك عجيب ...






طاووس شايف نفسه بحديقة البغبغاوات بكوالالمبور ...وايد حلوه الحديقة..

شفت هالإعلان بالسوق ( تايمز سكوير )..وهو نفسه الفندق اللي قاعدين فيه ...عجبوني المعاريس اللي من تفافيخ فصورتهم لكم :)

لازم نمر عليها قبل لا نروح الفندق ...بقاله مشهورة عندهم ومرتبة وكل شي فيها :)


مدينة الثلج بجينتك ...درجة الحرارة -5 تحت الصفر...موت برد ..بس صغيرة ..حذفنا على بعض ثلج وطلعنا :)


الله يعزكم ...ما أدي شقصتها ...رحت أصلي ما اشوف إلا نعال مقصوصه قمت طلعت كاميرتي وصورتها ..ليش يعني ريولهم صغيرة ؟؟؟؟؟؟


بريد كتكات ...عشان نطفي فيه حرارة الجو...كليناه بالمدينة المائية في سن واي لاجون :)


عجبتني طريقة زقايرهم ..عشان الواحد كل ما يفكر يدخن له زقاه يشوف هاللوعة الجبد عليها ...وفي صور ثانية تعيسة بعد ..


هذي صورة ثانية في مدينة جينتك ..



مطعم الطربوش مطعم لبناني موجود في المجمع اللي متصل بفندق سن واي لاجون ...وايد الأكل حده حلو..


في عندي صور وايد بس اكتفي بعرض هذيه لكم ..ليش إنه أغلب الصور إحنا فيها :)

وبصراحة عقب التعب ما صورت وايد بدبي ...جم صورة بس بمدينة الثلج وكله إحنا مرتزين بالصور ..بعد مو عدلة أحط لكم صوريّ :)
om moD

هناك 15 تعليقًا:

DoDoq8 يقول...

7mdlah 3la slaMTCH ASHOFCH M`7TFYA

:)

ananasah يقول...

الحمدلله على سلامتكم :))
ماليزيا رغم رطوبتها القاتلة ... بس دولة خيالية ...صج دولة سياحية ما تملين منها وخاصة فيها أماكن حلوة حق الي يحب المجازفة والمغامرة ... مثلي ;PP

om comment kuwait يقول...

حمدالله على السلامة يا ام مود

الله يونسج بالعافية انشاء الله

اللي صج حيرني ليش تكرمين النعال مقصوصة بعدين قلت يمكن اريولهم صغيرونة علشان جذي قاصينها =)

Mr_CHoCoLaTe يقول...

عليكم بالعافيه ^_^
و الحمدلله على السلامه

معوضه بسنين يايه و تروحون مكان بخاطركم فيه

Om MoD يقول...

DoDoq8 :

الله يسلمج من الشر حبيبتي ...

لووووول ...بس ترى من زمان أنا رادة ...صار لي تقريبا شهر :)


Ananasah :

أول شي حياج الله ببلوقنا ..
والله يسلمج عزيزتي ..

إي والله رطوبتها ..قاتله ..
بس تصدقين الفترة اللي رحت فيها ما حسيت وايد بالرطوبة مثل وقت الصيف ..

أنا رايحة من قبل على شهر 8 مت من الرطوبة ..وبينينغ وايد رطوبه ..غير كوالالمبور ..

بس صج حلوة..



om comment kuwait :



الله يسلمج عزيزتي ...

والله يسمع منج ...

لووووووووول ...شفتي بدعوا الماليزيين :)




Mr_Chocolate :


الله يعافيك ...

والله يسلمك..

الحمد الله كل شي خيره ..وإنشاء الله نلف العالم :)

om hussan يقول...

صراحة شكلها خوش ديرة عليج بالعافية يبيله سفر وروحة وردةبعد الحكرة انا ولهت على الدوام ملل

Om MoD يقول...

om hussan :


إنشاء الله تروحين كل مكان ...

والله يهون عليج حبيبتي ...

وتوله عليج العافية ...انا بعد وحشتيني ..

ما عليه فترة وتعدي ....الله يكون بالعون

غير معرف يقول...

ايام الخوالي

Sn3a يقول...

الحمدلله عالسلامه

بكل شي ام مود تصدقين لما الواحد يخطط ويدور يروح مكاان مختلف عن التخطيط

انا ماليزيا ماكانت عاجبتني
بس لما رديت الكويت استوعب انها حلوة وتونس
لاني رحلتنا كانت استراليا ماليزيا
فقعدت اقارن بينها وبين استراليا

بس تالي صج عرفت انها تونس وحلوة وسوقها عجيب وطبيعتها حلوة

عليكم بالف عافيه
والحمدلله على سلامتكم

ان شاءالله السفره اليايه روحو استراليا حدهاا تهبل وماتشبعين منها ابد ابد ابدددد

Om MoD يقول...

غير معرف :

:)


san3a :

الله يسلمج حبيبتي ..

صاجه يوخيتي ...

تصدقين على قولتج ..الواحد مو بس جذي بعد مرات تشوفين أشياء وانتي مسافرة ما تعجبج ولا تشترينها وعقب ما تردين تتحسفين إنج ما أخذتيها ..

أنا قلبي مع استراليا ومن الأماكن اللي ضروري أروحها ..

سمعت عنها وايد ..وخاطري أشوفها ..

والله يعافيج ..

والله يسلمج ..

The.One يقول...

حمدالله على سلامتــج أم موووود
وخوش صور :)

Sn3a يقول...

سؤال مهم

كليتو بالمطعم الايراني ناب؟
يتروالي لو بروح ماليزيا مره ثانيه بروح حق هالمطعم بسسس

Om MoD يقول...

The.one :


الله يسلمج ...وحياج الله بمدونتنا ..


وشكرا ..



san3a :

:)...لا ما رحت له ...عيل نفس حالتنا ويا مطعم الطربوش خاطرنا نروح ماليزيا عشان ناكل فيه ..


اليايات إنشاء الله بجربه :)..بس وين مكانه ؟؟؟؟

Sn3a يقول...

طافج عيل
ان شاءالله رحلتكم اليايه

انا لما قالولي لذيذ ماصدقت
بس مو صج المطعم مو صج


مكانه بالضبط ماراح اعرف اشرح لول
اهو الشارع نفسه بكوالالامبور الزحمه
اللي فيه العربيه للعود جنه
جنج رايحه مجمع بافيليون

Om MoD يقول...

:)



لووول سنعة ...إنشاء الله ضروري نجربه باليايات ..