الأربعاء، 17 يونيو 2009

يا صباح الإسترخاء


صورة من موقعهم
في صباح فات رحنا أنا و pearl و stella لتجربة Aquatonic Spa يم فندق كراون بلازا بمنطقة الفروانية ...البنات مرة كانوا يتسوقون بالصالحية ومن هناك حصلوا على دعوة مجانية حقنا وكان المفروض يكون معانا snow white و fatto بس لظروف خاصة بكل وحدة فيهم ما قدروا يكونون معانا ..

المهم أول ما دشينا يعني من المدخل مبين المكان وايد حلو وكل وحده فينا تقول حق الثانية واي شحلات المكان ...عاد ما قلت لكم الدعوة المجانية كانت عبارة عن استخدام المسبح والسونا والبخار بالإضافة حق الصالون قص واستشوار ..واحنا حجزنا زيادة على الدعوة جلسة مساج استرخاءلمدة ساعة ..


عند الاستقبال عطيناها الدعوة وقلنا لها إحنا حاجزين هالوقت قالت لنا أوكي ودشينا ..ورحنا داخل مع وحدة منهم قالت أختاروا لكم لوكر وحطوا اغراضكم فيه وممنوع التصوير ..عطتنا الروب واحنا نتلوفت ونشوف المكان وجماله جان تقول لنا عندكم hair cup احنا شنو محد قال لنا جان تقول مو مشكلة تقدرون تشترون بـ 15 د.ك ...شنو 15 أي شي أنا سألتها شنو الواحد بـ 15 ولا ثلاثتهم ترد وتقول لا الواحد ...ماكو شغل نشتري قبعة عشان نغطي فيها شعرنا واحنا نسبح بـ 15 د.ك ..


ويا فرحة ما تمت طلعنا نكلم اللي بالاستقبال ...قلنا لها شلون يعني احنا من متى داقين وحاجزين ما أكدتوا علينا على القبعة وبعدين احنا عندنا وشنو نشتري القبعة بـ 15 بصراحة ما نبي نشتري ..وتخيلوا الوقت يمشي ويمشي ...طبعا ردت وقالت واهي حتى ما تطالعنا القبعة مو بـ15 ..بـ 16 د.ك ..بعد طلعت بـ 16 د.ك لا حول ولا قوة إلا بالله...المهم جان تقول لنا انزين منو معطيكم الدعوة قلنا لها اسمها جان تقول ما قالت لكم المفروض كانت تقول ...قلنا لها ما قالت شنسوي الحين ..ترد وتقول سوري ما نقدر لازم hair cup ..قلنا لها دقي عليها وشوفي دقت عليها وما ردت ...شنو تتوقعون سوت ...عطتنا الرقم وقالت لنا دقوا عليها وين قاعدين شكو احنا ندق ..هذا شغلج ..عاد stella ما تقدر خذت منها الرقم ودقت عليها وردت علينا وقلنا لها جذي وجذي السالفة ...يعني إحنا بروحنا يا قدرنا نتيمع ونضبط أمورنا عشان نجتنع ونيي ..تقول هذي قوانين عالمية ....ويع ...منو مصبحين بويهه اليوم ..احنا يايين نسترخي ولا نعكر مزاجنا .....


عقب عطينا موظفة الاستقبال تكلمها وتخيلوا تقولها كلميهم بالعربي وفهميهم ...بطت جبدنا وقلنا لها ترى احنا عارفين شنو تقولين ...؟؟؟شكو تقولين لها تكلمي عربي .........!!!!!!


ماكو قالت لنا قولوا لها في عندنا قبعات free خلوها تعطيكم ...يوم نقولها تقول أوكي أنا أقدر أعطيكم بس إحنا ما عندنا إلا 5 وحاليا بس في 2 مو مستخدمين يعني وحده منكم لازم تشتري ...stella عصبت من استقبالهم الأي شي واللي يبط الجبد وقالت أنا بشتري بس بشوف قبعتكم اللي بـ 16 د.ك شنو صابغينها بذهب وصج ...دشينا وقلنا يالله إنشاء الله تتيسر أمورنا وما كو سوالف ماصخة ..


دشينا وبدلنا وعالمسبح يلا ...وليه شنو بعد ...يقولون لازم مايوه وما يصير غيره..و pearl ما كانت لابسه مايوه بس لبسها كان نايلون ويصلح حق السباحة يعني بس مو مايوه ..راحوا نادوا لنا وحده مسئولة وعاد pearl ما قصرت فيها عطتها بالانجليزي تقولها شنو تقصدين من كلامج إني أطلع انا الحين ما عندي إلا هاللبس ..تقول لها ليش مو لابسة نفس رفيجاتج ...شكو ..قالت لها أنا هذا لبسي مال السباحة شسوي ...ترد وتقولها لا ما يصير يعني كل واحد يقول هذا لبسي مال السباحة وأخليه وتأشر على لبسها وتقول عيل انا أقولج هذا لبسي مال السباحة ..

قلت لها أنتوا كاتبين القطن ممنوع وهذا مو قطن ...لا مو راضية ما تعرف إلا تقول I`m sorry...وليه شنسوي شكله هاليوم ما راح يعدي على خير ..

قلنا لها ترى هذي تجربتنا الأولى وكلش اسلوبكم بالتعامل مو حلو ...عطيتونا فكرة كلش سيئة عنكم ...ويوم قالت لها إنه أنا حاجزة مساج عقب المسبح ...جان تقول آآآآآآآآآآآآآآآآآه ...أوكي بس هذي آخر مرة مرة ثانية لازم مايوه ...



قمنا نطالع بعض شنو يعني ليش إنه بلاش يعاملونا جذيه ويوم دروا بندفع فلوس تغير الحجي ...ما يندرى ...؟؟؟؟؟؟؟؟؟؟؟؟!!!!!!!

طبعا ما بقولكم شكثر المكان حلو ويقولون إنه الواحد يحرق فيه تقريبا 500 سعره حرارية ...في معانا مدربة بالحوض وتعطينا توجيهات.. إحنا دشينا تقريبا الساعة 10:30 الصبح ..فيه مكان تمشون فيه الماي يكون عكس التيار يوّنس ...في قواري بالماي ...فيه دشات ترش على الجسم من صوب الظهر ..وفي كراسي تتسدحون عليها وتمسج كل مكان بالجسم ..وشي حق الريل وشي حق الراس ..المكان وايد كبير ..و في اشياء ما ذكرتها ..


طلعنا يمكن 11:45 ..رحنا السونا والبخار ..البنات حبوا البخار أكثر ..أنا عادي المكانين عجبوني :)

عقب خذينا دش وتوضينا وصلينا ..لأنه موعدنا حق المساج كان الساعة 1 الظهر ..



واي طبعا متنا من اليوع قلنا لهم ماكو شي ناكله نشربه على ما ايي مو عدنا عطونا شاي أخضر وايد مر ما قدرنا نشربه...وتفاح أخضر :) ..طبعا المكان اللي قعدونا فيه ..واو واو واو ...وايد حلو ..

عقب كل وحده يات لها اللي بتمسجها وتناديها باسمها وناسه ..الممر اللي مشينا فيه حلو وايد ...واستانست pearl لأنه الغرفة على إسمها ...


طبعا المساج روعة ويسوى قيمته ( 26 د.ك ) ومدته ساعة ..طلعنا عقب وحده تسأل الثانية عن شعورها ..الغرفة روعة وهدوء وموسيقى هادية ...شقول شخلّي :)


طلعنا لبسنا ورحنا على أساس نسوي شعورنا ...ما تصدقون اللي صار الموظفة نفسها اللي الصبح ما أدري شفيها علينا تقول لنا متى تبون أحط لكم موعد ..امبيه هذي شفيها احنا من الصبح قلنا لها ترى دعوتنا معاها صالون ...تقول لنا إي بس ما خذيتوا موعد ...شنو هذي تستعبط ....قلت لهم بلا عوار راس خلوها تنادي لنا المدير ...وتخلصنا ..ويوم قلنا لها وين المدير أشرت على واحد يمها ..كان فيه واحد لبناني ما ادري اثنين ..المهم كلمناه وقلنا له كل اللي صار من طأطأ لما سلامو عليكم ...المهم قال قعدوا وما يصير خاطركم إلا طيب ..

وتخيلوا دخلنا الصالون ولا البنات قاعدين ما عندهم أحد ..ليش تسوي جذيه..؟؟ ليش تبينا نروح ونرد ؟؟؟


عطونا ورقة عشان نقدم شكوتنا وصج كتبتها stella وحطت أسمائنا وأرقامنا ..وحمد الله انتهى اليوم على خير ..تدرون متى خلصنا يمكن الساعة 3 العصر ..يعني يوم حافل ما بين الاسترخاء وتعكير المزاج ما أدري شنو كنا المفروض نسمي هاليوم :)


وعقب ساعة تقريبا من ردتنا دقت وحده من العلاقات العامة وتكلمت مع stella وقالت لها كل اللي صار ..و ما قصرت عطت stella رقمها وقالت لها لكم منا زيارة مجانية ثانية :)

يعني بطيبون خاطرنا :)

وبس على كل اللي صار انصحكم تروحون مكان يستحق الزيارة وايد وايد حلو ...

بس لا تنسون المايوه والقبعة :)


وفيه أوقات حق الرياييل وأوقات حق الحريم ..فتأكدوا قبل ما تروحون :) وبس
Om MoD

هناك 16 تعليقًا:

Mr_CHoCoLaTe يقول...

ما تسوى عليكم الدعوه طلعت من عيونكم

عليكم بالعافيه

ZeeZoo يقول...

حده يشوق

يعني الحين جلسة المساج بس ب 26 ولا هم بعد ياخذون على اشياء ثانية؟

رورو الشخبوطه يقول...

نعيما..

بس ان شاءالله تكونون استانستوا اكثر من تعكر مزاجكم..

اليوم يوم تعكير المزاج العالمي :)

مرسووو..

غير معرف يقول...

ويييييييييييييييييييييييييييين فاتوووووووووووووووووووووو ؟؟؟؟؟؟؟

لييييييييييش ما قامت تكتب ؟؟؟؟؟؟؟؟؟

مليووووووووووووووون مره اسآل عنها ومحد يرد

آحذ يرد علي ؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟

master يقول...

غير معرف
تره انا رديت عليج
فاتو ماخذه راحه من البلوق
بترد إنشاء الله
لا تحاتين

Sn3a يقول...

طاع هذول
لما يعطون دعوة مجانيه معناته انتو بتسوون دعايه للناس اذا كانت تجربتكم حلوة
اخاف داشين على حساب موظفه الاستقبال عشان تعاملكم جذيه
حريتيني
اصلا مافكر اروح عقب هذا

ماكو ذوق
عشان 26 دينار مو داشين بجيبها صرتو عالعين والراس صج انها ماتستحي

المهم استانستو
بس زين ان بالكم طويل
لو انا جان قطيت دعاويهم ودقيت على المدير من اول شي

قهروني

Om MoD يقول...

Mr_Chocolate :

شفت شلون ..الله يسامحهم ..الظاهر معطينا الدعوه من غير نفس ..

والله يعافيك ...



ZeeZoo :

عندهم عروض ...بس أقولج من اللوية والملاقة اللي صارت لنا نسينا ناخذ الأوراق والأسعار ..

إحنا كان عندنا دعوة مجانية مثل ما قلت لكم حق الاكواتونيك والبخار والسونا مع الصالون ..

واحنا حجزنا مساج زيادة ...

إنشاء الله أكون رديت على سؤالج :)



رورو الشخبوطة :


ينعم بحالج حبيبتي ..

والله استانسنا وجنه حلم من الوناسة ..لولا الأشياء اللي صارت ..

لوووووووووووول :)


غير معرف :

فاتو موجوده والحمد الله بخير ..

بس يمكن ما لها خلق تكتب :)


لا تحاتينها :)


sn3a :

شفتي شنو سووا فينا ..

وانتي صاجة أنا اقول جذيه ..انتوا الحين ما صار لكم جم شهر من بطلتوا ...وجذي تعاملون الأوادم ..حطوا ناس عدله تعرف ترد وتعامل الناس عدل ...

عمى بعين العدو ..لوعت جبدنا هالموظفة ..

بعد عمري سلامتج من الحرّه ..

لا انصحج تروحين ..

وعلى طاري ما تستحي حدها ما تستحي ..حطوا لهم جم قبعة وجم مايوه ويبون الناس تيي وتشتري ...


والله استانسنا وايد ..


وحده تصبر الثانية ..,ما تدرين شلون كله وحده شلون مضبطة أمورها ما بين بيت ودوام عشان نروح ..فكنا حدنا نبي نكمل ونشوف ..

وتصدقين عاد انا ما ادري شفيني مو عادتي عسى محد طول معاي إلا قلت له وين المدير ..ما لي خلق عوار راس ..

بس يختج طافت علي ...

وحركتها الأخيرة موتتني صج قهر ..على سالفة الصالون ...صج كان ودنا ناخذها ونكفخ راسها بالطوفة ..

وما قلت لكم عقب ما طلعنا من الصالون ما شفنا محياها قطيعة :)


وسلامتج من القهر .. حبيبتي :)

إمـرأة لا تُنسـى يقول...

المكان صج يشوّق.. بس بعيد علي .. :\

joe يقول...

صج حده وااو
عاد سواالف الفنادق
كله مرفعين بالسعر وبس

يكفي انكم استانستو

اعتقد احسن من مساااج الصين الي انا رحت له
هذاك "ياما ورا السواهي دواهي"

Sweet Revenge يقول...

عليكم بالعافية الطلعة
بس جد الاسلوب في الاول كان اي شي لو انا جان من الاول انادي المدير ماعندي طولت بال علي جذي ناس بعضهم يتفلسفون علي الفاضي

والله انت ثاني وحدة اسمعها تمدح المكان يبيلنا روحه ان شاء الله .

ومشكورة علي الوصف والبوست ممــــتع :)

haifa يقول...

صراحة ينعاف المكان اذا المعاملة سم

صراحة ماكو على سبا تايم ورويال حياة احتراف ومعاملة ممتازة

سبا تايم قديم من اول ماتبطل المهلب ومع هذا ما انحدر مستواهم لا بالتعامل ولا المواعيد ولا الخدمة

om comment kuwait يقول...

واي حدها لعينة احتريت عليكم

صج شكله المكان يسوى الواحد ايجربه

انشاء الله راح احجز و اروح :)


thx om mod

Om MoD يقول...

إمراة لا تنسى :

بصراحة المكان يسوى العنوة ...لا يفوتج :)



المباركية :

:)

الحمد الله وايد استانسنا ...

شنو هذا اسم المساج ...:) ؟؟؟؟؟؟


sweet reveng :


الله يعافيج ..

صج هذي غلطتنا من الأول ما ادري شلون راح عن بالنا نطلب المدير ...
هذا عادتي بس هالمرة فاتت علي :)

والعفو ولو ..

بس تدرين انا كتبته عقب ما راحت الحرة ...يمكن لو كاتبته بيومهاا جان طلعت حرتي فيهم زياده :)

جربيه وشوفي ..ما راح تخسرين :)





haifa :

انا ما جربت لا سباتايم ولا رويال حياة ..

مدحولي وايد سبا تايم ...بس ما ادري اللي يشتغلون بوذ ...من جذيه مو حابته :)

وما جربت معاملتهم ...





om comment kuwait :

شطول نكج :)


بعد عمري ...سلامتج من الحرة ..

صج صج يسوى ..ضروري تحجزين وقوليلي تجربتج :)

ولكم..

غير معرف يقول...

وناسة و الله .. يبيله استجمام :)

om hussan يقول...

صراحة شوقتوني عليكم بالعافية يبيلة مساج ريلاكس

Om MoD يقول...

Hanan sweetypie :

إب لا يطوفج ...روحي جربيه :)



om hussan :


ضروري عقب الحكرة تروحين ...


وحشتيني :)شخبارج وشخبار حسين :)؟؟؟