الجمعة، 1 مايو 2009

رحلتي إلى بنك الدم

قبل جم أسبوع تقريبا سويت تحليل دم ...والنتيجة طلعت إنه نسبة دمي مرتفعة ( صلوا عالنبي )..وسألتني إذا راسي يعورني ولا لأ ..وصج كان قبل فترة راسي يعورني وكنت طايحة بالجاي والقهوة وماكو فايدة ..وقالت لي تقدرين تتبرعين بالدم .. قمت وقلت حق زوجي العزيز ودني اتبرع طلعت نسبة دمي مرتفعة وراسي يعورني وايد ..يمكن ليش إني كنت ماخذه كورس حديد ولمدة شهرين متابعين ( ما ادري هذا تحليلي والله اعلم )..رحنا بنك الدم وخطواتي بدت تتباطئ وجني هونت وعادي اتحمل عوار الراس ..أخاف من الإبرة وكلش كلش ما أحب سحب الدم ..زوجي يقولي يالله شفيج تمشين جذيه ..اقوله ما فيني شي ...عادي ..بس الصراحة جنه يوم صارت الصجية ترددت ..المهم وصلنا وخذيت هالورقة عقب ما خذوا بطاقتي المدنية وفتحوا لي ملف وطبعوا على ورقتي ( متبرع لأول مرة ).. خذيت الورقة ورحت حق هالغرفة .....خذوا دم من صبعي وعندهم جهاز صغير يفحصون نسبة الدم فيه ...جان تقولي الممرضة ترى نسبة دمج نازله ...ممكن ما يسمح الدكتور تتبرعين ...وووووووي.....شلون ؟؟؟ قلت لها معقوله ..توه مسوين لي فحص وقالولي إنه نسبة دمي مرتفعة ..قالت لي خليني أعيد لج التحليل ..وعادتة ونفس الشي ...ومثل ما تشوفون نسبة دمي واضحة ( 122 ) قولوا ما شاء الله
عقب رحت فحصوا الضغط وعبيت الورقة اللي شفتوها فوق ( اللي لونها أبيض )...الحمد الله كل شي اوكي ...وتوجهت عند غرفة التبرع ..زوجي قالي عادي حتى لو نسبة دمج عادية تبرعي ..قلت له جني ما ابي هونت ..قلت له أوكي بشوف الدكتور شقول إذا قال مسموح بتبرع وإذا قال لأ ما أبي ..دشيت على الدكتور جان يقول : لآ حضرتك نسبة دمك ما تسمحش إنك تتبرعي ...ويوم سألته عن النسبة الطبيعية قالي 125 ..حمد الله أنا مو وايد أنزل من الطبيعي ..يعني زين ...بس ما رضى لي اتبرع ...ومسكين زوجي ياي معاي ونبي نتبرع مع بعض اهو تبرع وأنا لأ ..:)هذا زوجي وأهو يتبرع ...( ما شاء الله عليك ربي يحفظك من كل عين )
بس للأسف شوفوا المتبرعين عقب ما يتبرعون يعطونهم عصير كي دي دي ...وين تعتقدون يقطون جيس العود ...بأصيص الزرع ..مع إنه الزبالة ( عزكم الله ) عقب شوي ..بس ماكو فايدة ما يحافظون على شي نظيف ...عسى الله يهديهم

هناك 10 تعليقات:

Om GhaMaZaT يقول...

الله يعطيج العافيه :)
والله اهو بصراحه المفروض بين فتره والثانيه الواحد يروح يفحص ويتبرع لانه مثل ماقالوا ممكن عوار الراس ناتج عن ارتفاع معدل الدم فالواحد من يتبرع يرتاح :) ...
سبحان الله نسبة وتناسب .. وبصراحه ماتنلامين .. اهي الابره بروحه اسمها يخرع هالدور وقت الصجيه الواحد يصفر ويخضر ويزرق بعد :) طبعا انا اتكلم عن روحي .... بس واله خوش رحله

Mr_CHoCoLaTe يقول...

الظاهر من الخرعه نزلت نسبة دمج هي هي

ما تشوفين شر

و الله يجزي خير كل من يتبرع لان فيه أجر ان شاءالله

Nikon 8 يقول...

إستمري على كورس الحديد حتى ترتفع نسبة دمج .... وخيرها بغيرها .

joe يقول...

مادري ليش مستشفى الدم عندهم لف ودوران
لو بنطلع بلاويهم ماتخلص
بس الصراحه اول مره مايحنجون على واحد ويقولون له تبرع

الي يتبرع بالدم يقولون يصير خفيف ويرتاح
ماتشوفين شر // يعطيكم العافيه

حياتي هدف مو عبث يقول...

أنا جم مره أفكر وأقول الحين بروح خلاص
وأهون طبعاً من الخوف ههههههه

بس زين تسوون ويعطيكم العافية
بس أنا للحين مافهمت
دمج نازل ولا زين ولا شنو
:/

Paris يقول...

الله يعطيكم العافيه

تصدقين انا ما اخاف من الابر عكس اختي اهيا الوحيده اذا يطقونها تصرخ حتى الممرضه تقولها انتي مو ياهله
تخيلي هالسنه 3 ابر لازم يطقونا و ما طقونا و لا وحده و اللعام بعد
اللعام 2 و السنه 3 يعني المجموع يصير 5
هالسبوع بيطقونا الله يستر ..

و الله يجزيكم خير :)

fatto يقول...

لوووول انتي رايحه اتبرعين .. واخر شي ريلج الي تبرع :)

يالله الحمد الله ان نسبتج طبيعيه .. وترى التبرع بالدم زين للجسم :)

وماتشوفين شر انشاءالله وخلج من القهوه والجاي .. لاتكثرين منهم موزين .

Om MoD يقول...

om ghamazat :


الله يعافيج حبيبتي ..

أنا بصراحة ولا عمري تبرعت ..هالمرة كانت بتكون الأولى وما صار ..

وسبحانه كل شي فينا مخلوق بدقة متناهية اي خلل بالجسم يسبب عوارض حق الإنسان ..

وعلى قولتج حدي اختبصت :)

:)

______________________________


mr-chocolate :



الظاهر جذيه ..

الله يسمع منك :)

_______________________________

Nikon 8 :


لوووووووول ..

مو الغلط اللي صار إنهم عطوني كورس الحديد ..بدون ما يسوون لي تحليلي دم ..بس ليش إني كنت نازفه ..اكتبت لي الدكتورة حديد ..

إنزين سووا تحليل قبل ...لا مستشفياتنا ما شاء الله عليها ..ودكاترتنا يعرفون يحللون بالنظر..

أنا كنت المفروض اطلب تحليل دم ..قبل لا أبدي بأخذ الحديد..

ومثل ما قلت خيرها بغيرها ...






________________________


للكلمات بقية :

امبيه شنو عندهم بلاوي ...

خرعتيني ...

عاد قالولي تعالي عقب اسبوعين نعيد التحليل ونشوف .؟؟؟


بعد دمي مو مرتفع يخافون يصير فيني شي :) اسم الله علي :)



ما ادري ما جربت .. بس زوجي يقول صج وايد يرتاح

والشر ما ييج ... والله يعافيج ..


________________________________


حياتي هدف مو عبث :


ليش لأ روحي تجربة حلوة ..مع أني ما عشتها بكاملها ..

شوفي اهو لا نازل ولا صاعد ..والأفضل تكون نسبة الدم 125 ..وإذا كانت أكثر ممكن الواحد يتبرع ..بس إذا اقل لأ المفروض ينتبه على أكله هذا اللي قالي إياه الدكتور ...يعني نسبة دمي انزل من الطبيعي بشوي مو وايد ..بس قالي نخاف عليج ما نققدر نخليج تتبرعين :)



___________________________


paris :



الله يعافيج ..


ما شاء اللل عليج ..عكسي تماما..

والله يكون بعونكم :)


______________________________


fatto :


لووووووول ..شفتي شلون :)


الف الحمد الله على كل حال ..

والشر ما ييج حبيبتي ..

chandal/danchal!! يقول...

فاتو

:)))

والله قلبك على قلبي

أول شي سلامتك من عوار الراس... أنا بنت خالتي كل عاير فيها راسها والسبة نسبة الدم أعلى من الطبيعي

:)

بس يمكن من الخرعة قلت نسبة الدم!... يجوز



وانشاءالله بميزان حسناتكم انت وزوجك

:)


بالنسبة للاصيصات... تصدقيت صارلي فترة أفكر فيهم... أقول بلاها اصيصات زرع اذا السالفة انقلبت حاويات قمامة!.. وانت بكرامة

بس صج شكلهم بشع ويبطون جبدي اللي يقطون اوراقهم وصخامهم فيها!

Om MoD يقول...

أول شي أنا مو فاتو أنا أم مود ..

:)


وعالعموم الشر ما ييج حبيبتي ..


لوووووووول كل شي جايز ..

والله يسمع منج وربي يتقبل ..


شفتي العيز شنو يسوي ..المشكلة في زباله ..بس الأوادم ..ما لهم خلق كلش ...