وين الـ E ؟

اليوم العصر رحت مركز الشعب عشان أسوي فحوصات حق عيني و يقولون لي إذا أقدر أسوي عملية الليزك و له لأ . توقعت بشوف الدكتور اول ، بس بداله كانت الممرضه ، وإهيه إلي سوت لي الفحوصات. أول ثلاث فحوصات كانوا عاديين مثل لمه الواحد إيسويله نظاره و له عدسات ... طبعا غرامهم حرف الـ E وين حرف الـ E ؟ فوق و له تحت ؟ يمين و له يسار ؟ و أبيخ شي لمه إتصغر إتصغر الحرف لمه يصير جنه نقطه

و تقولي : where is the E

أنا : it's a dot...can you see the E

و تضحك بعدها و تقولي :yes

بعد هذا فحص النظر بالعدسات إلي يبدلونهم و ترد تسألني وين الـ E ؟ و الفحص الثالث جهاز إطالع في الممرضه عيني وأنا أشوف صورة كوخ بعيد في حقل ... وين المركب إلي بالبحر ؟؟؟ أول أشوف مركب ... يالله ما علينه المهم شي و قاعد بعيد. بعد هذا إنتقلنه حق الأجهزه إلي اول مره أشوفها ، نفس الشي حطيت راسي و ترد إطالع عيني ، بس مادري ليش انا إهني تخيلت إنه الجهاز بينفخ هوا في عيني إلي خفت أحط راسي في ، بس طلع ماكو شي ، ليت أحمر و بس ، بعد هذا جهاز ثاني جنه ديسكو، أقصد لمه أطل بالفتحه أشوف حلقات لونهم وردي وره بعض و بالنص ليت أخضر ، نفس ليتات الديسكو، تشبهم و تطفيهم ، أخر شي قطرت إبعيني و يابت شي جنه قلم في نهايته واير موصل بجهاز ، هذا القلم قاعده تنقط في عيني، أنا ما احس إنها تحوش عيني بس مادري شنو قاعده تسوي؟؟؟ لمه سألتها شنوا هذا؟ جان تقولي عشان نحسب القرنيه !!! ما فهمت مادري ليش سألتها ؟؟؟ يليتني ساكته أحسن . بعد هذا كله ، قالت بنادي الدكتور ، زين زين اخيرا بشوف الدكتور ... و صل و قالي بقه فحص أخير عشان نتأكد ، قلت بس ألحين بشوف الجهاز العجيب إلي محد يستخدمه إلا الدكتور ، وودوني غرفه ثانية و يقعدوني على كرسي و يقولي الدكتور:

وين الـ E ؟

ما أصدق مره ثانية ؟؟؟؟!!!! وين الـ E؟؟؟؟

آآآآآه يمين ....فوق.....تحت .... و الـ E تصغر ...و تصغر ... يسار...يمين...ما أشوف ... نقطه... ما أشوف...نقطه. بس بعد هذا جان يقولي الدكتور إنشوفك يوم السبت إنشاءالله العمليه الساعه 9:00 - 9:30 . خلاص ، أقدر أسوي العملية ، إستغربت لمه بس يبي إيودع ، لحظه لحظه دكتور!!! قولي شلون؟ شنو بصير ؟ صج إني سمعت من رفيجاتي شنو المفروض أسوي بعد العمليه ،بس يعني غير لمه الواحد يسمع من الدكتور .

سألته وايد أسئله بس أحس لا أكو بعد ، بخش باجي أسئلتي حق بعد العملية . المهم قالي إني أقدر أطلع عادي بعد العملية بيوم ، و أييب وياي نظاراتي الشمسية عشان ألبسهم بعد ، و لمه أرد البيت أهم شي أسوي إني أنام ( أسهل شي بالدنيا ) .