السبت، 19 أبريل، 2008

ما سويت العملية

اليوم كان موعد عمليتي الليزك ، بس ما سويتها :(
موعدي كان الساعه 9:30 أو أنا من الساعه 9:00 هناك ، قلت على ما يزهبوني حق الدخله خل أروح مبجر ، قبلي 3 ، دخلوا و خلصوا و انا بعدي قاعده ، ما شافني الدكتور إلا الساعه 10:15 يمكن. بس كان الدكتور مصري ، مو مبارك العجمي ، إلي أهو دكتوري !! الدكتورالمصري قاعد يفحصني و الدكتور العجمي معاه . الغريبه إن ردينه مره ثانيه حق فحص وين الـ E ؟ و أرد أجاوب ، و يغيرون العدسات بالجهاز و يردون يسإلوني وين الـ E ، وااااي الـ E مو واضحه ياربي شسوي بروحي . بعدين حط جهاز بعينه و يشب ليت بعيني و شكله تأكد إني ما أشوف عدل ، قلت بسسسس ألحين أنا أعتبر عميه و راح أسوي العملية بعد شوي ، وقف الدكتور المصري و قعد يكلم العجمي ، بس قاعدين يتكلمون بصوت واطي و قالولي قعدي بغرفه الانتظار ، رحت ، بس لمه نادوني مره ثانية ، ما زهبوني حق العمليه !!!! قعدني الدكتور العجمي على الكرسي و قعد يشرحلي منو هذا الدكتور و ليش إني ما أقدر أسوي العمليه .
هذا الدكتور أخصائي و يشتغل عند الشركه المصنعه لجهاز الليزك و جهاز الفحص ، و قال لمه ردوا فحصوني شافوا إنه الأرقام قاعده تتغير للعدسه في كل فحص (مو ثابته) و الظاهر هذا من تأثير العدسات اللاصقه ، فعطاني الدكتور قطرات لترطيب العين أستخدمهم لمده أسبوعين و أرد أسوي الفحص ، لازم الواحد يتأكد ، و يمكن أسوي الليزك و يمكن لأ ، يمكن ما تصلح لي من أساس ماكو منها فايده . آآآآه بنشوف شنو بصير . هذي عين ، الواحد لازم يتأكد ... و سلامتكم

هناك 3 تعليقات:

kAiKa-MGroMa يقول...

وييي خنت حيلي .. يلا ما عليه ألزم ما عليج انه شغلهم لج يكون مضبوط 100%
وعلى قولتج " هذي @@ "

=) تمنياتي لج بالصحة والعافية يارب.

Om MoD يقول...

بعد عمري..بس الحمد الله على كل حال..وكل تأخيره فيها خيره يا قلبي :)

master يقول...

kaika magroma :شكرا

om mod : إي والله على قولك (كل تأخيره فيها خيره) إنشاء الله