خطاك السو يا قلبي

أمس وديت اليهال عند ماماتي لأنه عندي مشوار ...وعاد كنت ناويه لما أرد آخذهم كلهم ونروح الجمعية..ويوم دقيت على أمي وأنا بالطريج عشان يتجهزوووووووون قالت لي..ترى يسار أكل نتيفه من سمك صبور ومن أكلها راح يركض يبجي ومسك حلجه أنا اختبصت شصار بوليدي....قالت لي تعالي نوديه المستوصف خليهم إطمنونا عليه لأنه مو راضي يحط شي بحلجه بس المصاصه وأصلا قاعد إلهي نفسه فيها مو قاعد يمص ( السعابيل إترست ملابسه ) خنت حيلي والله ..المهم وصلت أنا البيت ( بيت أهلي ) عاد رضى ياكل من إيدي قلت الحمد الله إنشاء الله ماكو شي بس ماما ما رضت إلا أوديه الطبيب قلت لها خليه يتعشى وعقب أوديه ما اطول عليكم رديت البيت ولا وديته قعدنا أنا و أبوه نتشاور شفناه جنه زوين لما نسأله : في أووووواه يقول : بح (فديت البح والله) ..صار وقت الحليب لا حبيبي مو قادر يشرب رد يبجي ..لبسنا ورحنا كلنا ..من الطواري حولووووه الجراحة ..وإسم الله على عمره وايد عسر ( بجي + نواح ) بالغصب أنا وأبوه والسستر ماسكينه عشان الدكتور يطلع شوكة السمك من بلعومه ..وطلعها بثانية ما شالله عليه صج لي قالوا( كل إستاذ في مهنته ) ..بعد عمري خطاك السو وحمد الله على السلامة وهذي آخر مره تاكل فيها صبور:)وإنتوا ديروا بالكم..

جنطه تشحن تلفون نقال

الماركة الإيطاليه Costume National للملابس ، بطلعون جنطه في موسم الشتا 2008/2009 فيها أشرطة خلايا شمسية أو واير داخل الجنطه يركب على كل التلفونات و الأجهزه عشان إذا خلص باتري تلفونج أو الـ iPod تقدرين توصلينا فيها و يشحن . شرايكم بالفكره ؟

منبه

هذا منبه اتعلقونه على أذونكن ونتاو قاعدين اتسوقون السياره .. شكله مثل البلوتوث .. من الواحد يغفي ويتدندل راسه يصفر ومن اتعدلون راسكم يوقف الصوت .. الصراحه خوش فكره وزينه حق الي بسافر بالسياره ويلا الي من النوع الي يغفي .. وحتن زينه حق اعيالكم الي بالمدارس عشان ماينامون بالحصه .. ويلي يبيه يحصله في ( تروفاليو ) سعرا تقريبا 300 فلس.

فندق موطبيعي

فندق مو طبيعي حق إلي بروح ماليزيا وبالاخص جزيرة بينانغ الساحرة والخيالية هذا الفندق جديد وهو 5 نجوم والفنادق بالجزيرة هناك القليل منها 5 نجوم الفندق والمنتجع أسمة شانجرلا (shangri-la) هذا الفندق في غرف وايد حلوه وجذابة ومريحة وفي بعد سويت مع حمام سباحة عجيب بس للاسف صورة السويت مالقيتها بالسايت بس إلي يبي يحجز يسأل عنها عموما الفندق ريلاكس بالدرجة الاولى ويتضمن ملاعب وسبا وترفيه وايد حلو أخليكم مع الموقع . shangri-la hotel

فطور الحب

صارلنا تقريبا 3 اسابيع وحنا ماقمنا نطلب ريوق من بره عشان مانمتن :) فقمنا انييب معانا توست وأجبان وأشياء خفيفه وحلوه .. واليوم أنا يبت توستر وشي ماعرف اسمه نكبسه بالتوست ويطلعلنا كتبه love .. وهذي يايبتها لي love :) وكيلينا ابحب . فشوفاو الطريقه . طافج يا أم موود بس انشاءالله انسويها على شانج خصيصا انتاي وجاردينيا الله يقومها بالسلامه .

بعد عمري عيالي

حبايبي عيالي يحبون يتسبون بالبحر أو حمام السباحة والأكوابارك ويستانسون على التطبش بالماي..بس ألحين الجو ينخاف منه جو مرض وأنا أخاف على ورعاني من المرض..والله يسلمكم السنة اللي فاتت شركنا ماديشا بنادي الغوص وتعلم السباحة الله يحفظ عمره ..بس يسارش حبيبي لحد الحين ما دربناه على السباحة ناويين أنا وأبوه نشركه بالنادي السنه الياية يعني لما يصير عمره 3 سنوات ( العمر الطويل لك يا رب )..عاد قلت ماكو إلا أترس لهم البانيو ويلعبون بالماي قبل ما أسبحهم ...استانسوا وااااااااااااااااااايد وهيصوا..:) الله يحفظ عمركم ويهديكم يا رب:) يا أحلى اثنين بالدنيا :)

الجزء اليديد بالأفنيوز فتح

في جم محل فاتح ، يمكن 5 او 6 .. بس بعد يبيلهم وايد على ما ينترس. الحلو في الجزء اليديد إن مسوين الطوفه عليها مناظر ، يعني هذا الجزء الكشخه ، كله فيهم المحلات الغاليه .

friend feed

friendfeed.com سايت يديد يساعدك إنه تعرف كل شي ربعك و أصدقائك قاعدين يشاركون في العالم عن طريق الإنترنت ، مثل الصور، الفيديو، الأغاني ... إلى آخره ، بدال لا تروح إدور عن أخبارهم في youtube و له في facebook أو في flickr ، هذا السايت يختصر عليك الوقت و الجهد ، كل شي موجود في صفحه وحده .

بحر

أنا اليوم ويه بنت خالتي رحنه نسبح بالبحر ، قلنه مادام بده يصير حر أكيد المايه حلوه و الجو هادي ماكو هوه و غبار نفس ذيك الأيام إلي طافت ... وااااااي أي مايه حلوه !!!! موت برد ، المايه مثلجه مو مال الواحد يسبح ، ما قدرنه ... يبنه طفاحات و قعدنه فوقهم عشان ما يحوشنا الماي . آخر شي طلعنه و قعدنه على الرمل نتشمس ... يعني tan ( أنا ادري بصير رماديه ، بس ميخالف همن بتشمس )

أكو أحد يبي يروح برشلونا ؟

أنا شكلي كل ما راح أشوف فندق حلو بقولكم عنه ... هذا الفندق hotel murmuri barcelona وايد غرفه محترمه و بسعر حلو بعد ، إبتدأ من 70 دينار ... و يمكن أقل بعد ، لأن كل ما تقعد ليالي أكثر يقل السعر (هذا حسب كلامهم). انا ما رحت أسبانيا ، فما أعرف عن شوارعها وله شي ، كاتبين عن هذا الفندق إنه بوسط المدينه وكل شي قريب منه (إلي يعرف شوارع المدينه خل يأكد كلامهم صح وله لأ) .

اول مره أشوف فندق حلو في جنيف !!

فنادق جنيف كلش مو حلوه ... ما عندهم شي مودرن ، eastwest hotel إهو أول فندق إشوفه في جنيف من مجموعه الفنادق إلي يسمونهم Boutique hotels ، إلي يكونون صغار مو أكثر من 100 غرفه و يكون موديلهم جديد و عصري (شرايكم بالكلمه ؟ عصري؟). إلي يميزه إنه قريب ، خمس دقايق مشي للسوق و تقريبا يعتبر رخيص بالنسبه لجنيف ، إبتداءا من 100 دينار لليله . إلي ناوي يروح خل يجربه ، شكله حده عجيب.

الموقع الالكتروني للفندق : eastwest hotel

أسهل كاميرا فيديو

هذي الكاميرا ميزاتها إنها ما فيها خيارات وايد ، بس مهمتها تصور فيديو و بس ، و إلي أحسن و أحسن ما فيها وايرات لتوصيلها على الكمبيوتر ، بس عليك ترعص دقمه و يطلع الـ USB بره و توصله . بعد ما فيها واير شحن يركب لها بس بواتري AA . تصور لمدة ساعه . تدرون منو تصلح له هذي الكاميرا ؟؟ البابا و الماما ( إلي ما يحبون التكنولوجيا ) .

إسم الكاميرا :Flip

للطلب : إضغط هنا

ملاحظة : أكو ألوان ثانيه غير الأبيض

عيد ميلاد

اليوم أقصد أمس عيالي كانوا معزومين على عيد ميلاد عيال صديقتي ..المهم الحفلة كانت تنكرية عاد ماديشا كان يبي شخصية خروووف بس ما حصلت له وخذيت له لبس زرافة..يسارش ابتلشت شوي فيه ماكو لبس تنكري قده فقررت البسه ووزار ومكسر ..يعني شخصية كندري (اللي يوصل ماي حق الناس قبل ) بس بغيت ألبسه غترة وأسويها ( جريمبه ) بس يساري ما يحب يحط شي فوق راسه..واستانسوا وايد كان فيه شخصيات وهدايا ومسابقات ونطاطيات ونفيش وآيس كريم والكيكة عجيبة وايد حلوة .......يعني باختصار اليهال كيفوا .أخليكم مع الصور :)

الكرسي السباغتي

تصميم الفنان الفرنسي - الأرجنتيني الأصل Pablo Reinoso ، سيعرض أعماله في معرض Carpenters Workshop Gallery في لندن من 30 أبريل و حتى 7 يونيو 2008 .

صنع في المنزل ليصل للمنزل

سايت كويتي يبيع حلويات و ساندويشات ناس مسوينها بالبيت ... إلي عنده هواية الطبخ يقدر يسجل معاهم . أنا ليمه ألحين ما طلبت منه ، رفيجتي قالت لي عنه ، إهيه تبيع عن طريقهم كيك بقلاصات (الصوره إلي تحت ) يبيلنا يوم إنجربه.

الموقع الإلكتروني : www.q8h2h.com

علاقات ملابس

تصميم : Phil Cuttance

إسم المنتج : Trophy Hangers

للطلب : إضغط هنا

مو صح كاظم الساهر يشبه woody في toy story ؟

ستشفى الصباح..

بعد ما سوت خالتي عملية الزايدة والحمد الله طلعت من العناية المركزة...ألحين أحسن بوايد من أول الأيام بس لازم تقعد هناك جم يوم لأنه إهيا فيها القلب وسكري وضغط...وتحتاج متابعة حق تنظيم السكر والقلب..طمنا الدكتور على الجرح يقول واااايد زين إدعوا لهااااا بالشفا ..عجبني شي عند المستشفى شوفوا الصور..وشي ضحكني داخل الغرفة بالمستشفى (جيكوا على المكتوووووب يعني تحذير لوووووووووووول) :)

؟؟؟؟

هذا منظر حضاري بالله عليكم..حتى منظر البيت يتشوه:)

أحلا ككاو ذقته ابحياتي

مره ياباو هالككاو بالدوام وقاعد يوزعونا علينا .. وعطوني اياه بس شكلا مايشوق ان حلو .. بس لمن كليتا دخت من كثر ماهو ( لذيييييييذ ) اينن واايد حلو .. قمت اكل وحده وره الثانيه .. لازم تشترونه .

الجبره ( سوق الخضره )

عقب ماتغدينا انا وزوجي اشتهينا رقيه الساعه 4 العصر وقالي امشيي خن روح ( الجبره ) عشان نشتري رقيه .. ورحنا , وأنا أول مره أروح هالمكان .. الصراحه وناسه بس يبيلج تلبسين ( عبات ) لأن كلهم اهنود .. ومايصدقون وحده اتمر عشان يقطعونها من الخز ..وقبل لانشتري الرقيه قلنالا لازم انذوقها .. وذقناها وهي حاره بس طعمها اينن حدها شيره همن وهي حاره .

مذكراتي

السلام عليكم أدري من زمان ماكتبت شئ لعدة أسباب أولا - كان عندي إمتحانات ثانيا - وهو الاهم E-Go مالي أنقطع بس إلحين رديته خل أقولكم عن الامتحانات المليقة وسوالفها طبعا البنات طايحين غش على حده والمدرسين ساكتين عنهم سوالف وكلام وبراشيم على أوراق A4 والخطة كل الوقت يقولون حق الاستاذ برد قصر على التكييف بعدين الثانية تقول لأ حر شغل التكييف ولي تثبت منو إلي نفس نموذجها ويراجعون الامتحان مع بعض عن طريق الاشارات بعد الامتحانات ويات الصجية وهي النتائج الحلو بالموضوع إني دقيت على المعهد وسألتهم عن موعد تقديم النتائج جان يقولون باجر الصبح قلت أوكي ورحت السوق مع ريلي واليهال أشتريلهم ملابس وأغراض وأنا بالزحمة والعذاب مع اليهال بـ H&M وعند الكاشير دقت علي رفيجتي بالمعهد وقالتلي أني خذيت أمتياز وأنا مو مصدقة وأحلفها وهي تضحك علي جان دمع عيوني ودي أبجي من الفرحة ونسبة عالية بعد شئ عجيب وشعور مو مبين شنو وريلي كان معصب على اليهال ولما شافني جذي قعد يضحك وستانس أكثر مني وقال حق اليهال روحوا بوسوا أمكم وباركولها واليهال يسألون ليش بابا ويقولهم ماما أنجحت جان الخايسين يضحكون علي يعني شلون ماما تنجح ماما خاصت أصلا ( لانهم يشوفوني قاعده بالبيت صايرلي أسبوع فعلى بالهم أن خلاص ) وماقدرت رحت البيت رديت اليهال ورحت المعهد وتأكدت من النتيجة والكل بنات المعهد يدقون يباركولي بس في شئ ضيق خلقي بالبداية وهو أن السكشن الثاني وحده كل تغش والبراشيم مالوتها أكبر من الاوراق الطبيعية وهي خذت نفس نسبتي والدرجات وأنا ذابحة عمري طول الكورس بالدراسة والامتحانات ما كنت أنام هذا شئ حز في نفسي بس بعدين قلت كيفها المهم أنا ناجحة بتقدير ممتاز ونسبتها مو أعلا مني , على تاريخ 4/5/2008 نبدأ الكورس الثاني وتمنولي التوفيق .

Browny my sweet Dogy

سميتها ( براوني ) لأن لونها أدعم .. حبيتها من أول مانولدت .. الحين عمرها تقريبا سنه ونص ..لوتلعبون معاها ماتملون منها من كثر مااهيا حدها اتونس وتدلع .. ومن يومين كان موعد تطعيمها .. هقيتها راح اتنابح وتزعج الناس بس اطلعت قويه . اكسرت خاطري لأنها قاومت.. بس المشكله ان بليل اتنابح اذا شافت اقطاوه.. وكلساع ياي جارنا ويشتكي من عمي ان ماينام الليل ابسبتها ( اشدعوه ) انباحها مايزعج .. اهي مو جلب بوليسي .احنا حاطين الجلبه ابآخر الحديقه والحديقه عوده مو اصغيره.. وعمي قاعد يقولنا ان انبيعها ويلا نعطيها أحد ( ما أبي ) شسوي ؟؟

فكره mun mun اخوي

في وايد بنات يحطون دبابيس الشعر في اسفنجه المكياج أو اسفنجه الخواتم أو ان يقطونهم ابأي مكان وأخوي mun mun عطاني فكره حلوه ان انحط الدبابيس ابها الأشكال .. وهي من داخل مثل رمل والدبابيس تثبت فيهم وشكلهم وايد أرقى من الاسفنجات .. جربوهم .. هذيل ابيعونهم في ( المركز العلمي ) .

hydropool

اليوم المغرب رحت الـSPA إلي في نادي الكورنيش (جدام حديقة الشعب) ، حاجزه حق ساعه في الـ hydropool ، مثل مساج بس بالماي ، إهوه عباره عن حمام سباحه في غرفه ، الواحد يقعد فيها بس إهوه بروحه أو مع صديق (ماكسيمام 2) ، و الماي إيبقبق من كل مكان ، جنه جكوزي بس مو حار، و لي أحلى و أحلى لمه غابت الشمس و صارت الغرفه ظلمه إلي شبو الليتات داخل حمام السباحه ، المنظر عجيب ، لازم إتجربونه . الواحد يقدر إيسوي مساج عندهم و يعطونه بعد الجلسه نص ساعه بلاش بالـ hydropool .

للحجز رقم التلفون : 5636398

يوم الحنة العالمي

قررت يوم الخميس اللي فات إني أحط حنة حقي وحق عيالي ..توقعت إنهم ما يرضون لأنه شكل الحنة مو حلو بس اللي صار إنهم رضوا يحطون حنة المهم أول شي حطيت حق مودو وعقبه سيمبا ولا تشوفوون أشكالهم حبايبي ..وعقب ما خلصت مودو قام يفكر شلون بغسل راسه منها فقير توهق وبالغصب سبحته تشجيع وحالتي حاله ..عاد سألته عقب ها ماما بتحط مرة ثانية حنة ؟؟؟؟؟ شنو توقعون جاوبني؟؟؟؟أكيد لالالالالالالالالالالالالالالالالالالالالالالا:)..يمكن الصور تلوع جبدكم بس أنا عاجبيني شحلوهم بالحنة:)