نوفتيل الدانه-البحرين

أنا صارلي 3 سنوات كل سنه أروح البحرين (هبه) كنت كل سنه لازم اروح دبي بس من 3 سنوات مارحتلها ..مادري أنا من زمان أحب البحرين وكنت اروحلها مع اهلي دايما بس من تزوجت صرت أروحلها قطاعي ..المهم ..من سنتين سكنت في اليت قراند ..حلو على نظام اسويت ونظيف أمام ستي سنتر الحين ...السنه الي فاتت رحت وسكنت في ريتز ..حلو وراقي جدا ..في منطقة السيف (أنصح فيه جدا )

وهذي المره في منتجع الدانه...المكان حلو وطريقته وايد حلوه ..بس ..مشكلته كله عرب ...وبحرينيين ...ويهال ولويه ...يعني المفاصيخ بالعربي كلهم خليجييين ...وتعالو وتفرجو ...مسخره

أنا متعوده على الاجانب امسدحين تحت الشمس شنهم ميد مشوي ...وإذا اتحركو يا يدهنون او يقرون كتاب في هدوء وصمت ..ما تلتفتينلهم

بس الي شفته في مسبح الدانه الخليجيين كأن الكرسي إقرصهم رايحين رادين ..عرض اجساد ولحوم وشحوم ..انزين دخلتو المسبح انزين سبحو ....لا تحرش بالبرهالمسبح والي معاهم بالمسبح ....ويييع لويه ...حتى ما طبيت وثاني يوم خليت بنتي واخوي ابروحهم (يثقفون )

أنا أحب أقعد بالفندق بين المسبح والسبا والبحر ...راحه ..أشرب عصيري ..وتشمس ...بس في هذا الفندق لا ..نحشه ...قضيته تفرر في الاسوقه بين ستي سنتر والعالي أشرفلي .

غرفه الاطفال

الحمام (وانتو ابكرامه)

ماعندهم بلكونه

المطعم

المسبح مع جاكوزي وبار داخل المسبح

صور متفرقه

طبعا السوق الجديد الي فتح في البحرين ستي سنتر ..عجبني فيه الوساعه من غير دواعيس وكل شي راح ادلونه لانهم عندهم تنظيم معين مثلا ملابس الاطفال ابروح -الاثاث ابروح -العبي يم بعض- حتى اكرمتو الحمامات كلهم في جهه وحده عند المداخل والمداخل بعد كلهم في جه وحده بعض المحلات الي زرناها طبعا ملابس الاطفال والعبي والمطاعم والكفيهات طبعا هذا محل البرد تختارين البسكوت مع البرد مع اكيك او مكسرات جلي او حلاو او ككاو ..وايد اشياء تقدرين اتحطينها ..حطيت انا كيك براوني +ككاو توكس+توفي+مكسرات =) بغيت اموت ماقرت اكمله صار ثقيييل بس حلو

يتم الخلط بين المكونات

بالهناء والشفاء

احبه وايد استانس عليه هالمحل ودي اشتريه كله كان موجود في دبي ..كله أشتري منه ..يابوه البحرين =)

كان عندهم معرض عن الحشرات وكان حلو وايد

ابصراحه فندق ريتز احلى من الدانه وارقى رحلته في سفرتي الي قاتت شهر 7شوفو الاصور



http://fyonkat.blogspot.com/2008_07_01_archive.html

ألف مبروك

حبايبي خريجين الثانوية العامة ...أحب أهني بنت إختي وولد إختي على تخرجهم من الثانوية العامة وأقولهم ألف مبروك نسبكم تشرف وترفع الراس..تعبتوا والله ما ضيع تعبكم.. عسى ربي يسمح دروبكم وإنشاء الله تتدخلون الجامعة والتخصصات اللي تبونها ..وتهانينا مرة ثانية ..

خالتكم : om mod

مطعم إصفهان بسوق واقف

اكيد الكل واصله هذا الايميل عن مطعم اصفهان و بنقل لكم تجربتي مع هذا المطعم:)

بمناسبة انتهاء العام الدراسي قررنا نطلع طلعة عائلية مع الوالد و الوالده و الاشقاء الاعزاء و بعد المشاورات اقترحت عليهم انجرب مطعم اصفهان و ما اطول عليكم و صلنا سوق الديرة و سالنا رواعي المحلات عن المطعم و مشينا بهل السكيك و الغبره و اخر واحد سالناه قال اقبال فندق البحرين ...... مشينا لمن و صلنا الفندق البحرين و لا قبالنا مطعم شعبي و ابوي سالني هذا المطعم قلته لا لالالا فراح سال راعي المطعم و تتوقعون شنو قال:

.

.

.

.

.

.

انتوا العايله رقم 101 تسال عن المطعم

.

.

.

المطعم موجود في سوق واقف

.

,

,

في قطر !!!!

وووا فشلتاه..... فلا تصدقون الايميلات و المنتديات لازم اتشوفون او تسمعون قبل لا تعزمون او تقترحون خصوصا بعد اذا كان احد معاك ميت من اليوع ....و قمت ارقع حق روحي و قولهم انتوا شفتوا شي ما شفتوه من اول :)

شكر و اعتذار

مساء الخير جميعا :) الصراحه وااايد ولهانه عليكم يلبلوقرز .. ومشكورين على كل من سأل عني وقت غيبتي .. بس لاتحاتون انا مافيني شي الحمدالله .. بس تقدرون اتقولون ماخذه ( اجازه من التدوين ) .

اشكر fisha على سؤالها عني.. الصراحه ولهت على بوستاتج وسوالفج انتي ومديرج لوول .. واشكر (صبا) ..وقولها ولهت على رومانسيتج الحلوه .. واشكر ( كظماوي ) وقوله ولهت على تصيدك لبدلياتي :) واشكر ( غير معرف ) على سؤاله\سؤالها فيني :) .. وولهت على باجي المدونين .

واعتذر لأني راح اكمل انقطاعي لفتره انشاءالله ماتكون طويله :)

c . u

أخي العزيز ..مبروك التخرج

منتجع النخيل كانت عزيمتنا -مطعم الارجنتيني جاوش
حبيت آخذه حق مطعم شبابي وراقي ..ففكرت في هذا المطعم ..لانه يحب الستيكات ..كنت سامعه عنه من زمان ولا رحتله ..بس الحين يت حزته ..عزمته على الغداء مع ماما وزوجي ..صح المطعم حلو وراقي ..بس الاكل بارد ..إدويفي ...طبعا حبيت حركه تقديم الاستيكات حجمها تتبيلتها ..حلو ...شوفو معاي الصور

شوربه اليوم مع السلطه ..

طبق الدجاج الوحيد الموجود بالمنيو (أشوه )

الفطر طبق جانبي (شكله اخرع )

يعني نحتفل فيه حطيتله شمعه=)

الهديه كانت مبلغ من المال (من كل افراد العيله ) حصله مبلغ حلو والله ..وحطيتها في بوكس حسافه ماصورتها ..بس استانس وايد وحنا بعد ........ عقبال الوظيفه =) السنعه

Diet Care

صار لي ألحين أسبوع من بديت مع دايت كير..وعندهم أنواع حق الاشتراكات أنا عن نفسي اخترت إشتراك الأكشن و هو عبارة عن توصيل لحد البيت كل الوجبات ريوق وغدا وعشا بس بدون حليب وفواكه..بقولكم مشواري لهم أول يوم أول شي دقيت وخذيت موعد وماشاء الله زحمة مو على كيفي أنا دقيت اليوم وقلت لهم أبي باجر ما عطوني موعد إلا تقريبا عقب 10 ايام ..المهم عاد قبل الموعد بيوم دقوا عليّ وقالولي إحنا محتاجين تحليل دم ..ناخذ لج موعد ولا شلون ؟؟؟ قلت لها بصراحة أنا مسوية تحليل قبل فترة والحمد الله كل شي عندي أوكي ...قالت على راحتج ...

وماكو رحت لهم وعطوني أوراق عبيتهم بمعلومات تخصني من إسم وعنوان وغيره ...وتوقيع على تعهد إنه ما لهم شغل إذا ما نزل وزني ..؟؟؟؟؟وقعت شسوي بعد ..

دخلت على الاخصائية وايد حليوة ..خذت وزني و طولي و عمري وقررت جم سعره حرارية أحتاج باليوم ...ووقفت على جهاز يقيس نسبة الدهون بالجسم ويحدد جم الوزن المثالي لي بصراحة نسيت شنو اسم الجهاز ..

اخترت معاها تقريبا حق يومين شنو الوجبات اللي أبيها وعقب قالت لي كملي عند الاستقبال وعطيهم الأوراق وحطت لي موعد عقب أسبوع تقريبا ..وحرصتني على الرياضة على أساس أبدي بـ 30 دقيقة وأزيد عقب ..

وماكو كملت أوراقي وبديت المشوار ..

عقب اقل من اسبوع راجعت ولا نازله كيلو ونص ...وااااااااااااو وناسة بس ما سويت رياضة إلا 3 ايام بالاسبوع ماكو وقت حق الرياضة شسوي بعمري ..

تجربتي معاهم :

1- الأكل وايد حلو ..

2- الحلو ولا أروع :)

3- مواعيدهم مضبوطة..

4- شكل العلبة وايد مرتب وحلو ومنظم..

5- السلطات لذيذة ..

هذا كله كلفني 225 د.ك ..الاشتراك قيمته بس 199 د.ك هذا غير فتح الملف والفحص على الجهاز ...ومدة الاشتراك شهر ..

الحين عندهم عرض قيمة الاشتراك بس 189 د.ك وتدشون مسابقة واللي يخسر وزن أكثر يربح 3 تذاكر سفر حق جزيرة بالي مع إقامة 5 أيام ..ناويه أشارك ادعوا لي أفوز :) بس قالولي على الشهر الياي عقب ما أجدد اشتراكي ..

أرقامهم : 1806050

هذا موقعهم بس لحد ألحين ما فعلوه ..

لدراريع رمضان

يتشرف محمد على البغلي بدعوتكم لحضور معرضه في بيت ديفا

من يوم السبت (27-06-2009 ) و حتى يوم الاثنين (29-06-2009)

هلا أسامه

اسامه موظف معانا بس من إداره ثانية ، صارلي فتره أدق عليه عشان إنسق معاه يوم إيينا لأن مديرنا بكرمه و بنصوره . المهم أسامه يه ، جان يدقلي محمد من السكرتاريه و يبلغني بوصوله ، و يقولي تعالي جان تبين تشوفينه تره المدير عنده إجتماع ألحين.

قمت و طلعت رحتله بقاعة الإنتظار، و أشوفه قاعد على القنفه يقره مجله من هل المجلات إلي حاطينهم حق الناس يتسلون فيهم وقت الإنتظار ... و بإبتسامه عريضه ...

أنا : هلا أسامه ، معاك ماستر إلي كلمتك بالتلفون ، شلونك ؟ شخبارك ؟ عساك بخير...
بطرف عيني أقدر أشوف محمد واقف على يميني و يبي يكلمني ، بقلبي ( هذا وقته !!!! خل أخلص من الريال بعدين كلمني)
و اكمل مع اسامه : انا اعتذر منك ، المدير ألحين بإجتماع و يمكن يتأخر شوي ، إنشاء الله بس يخلص بشوفك

جان يقوم من القنفه نص قومه و يمسك شي بيده اليسار كان حاطه يمه و يقول : يعني أأوم أصور دلوأتي و له ....

انا هني عيني قامت إتلاقط ، أطالع الريال و اطالع إيده ، ارد اطالعه و احاول أستوعب شنو قاعد يقول ، وااااي لالالالالالا
طلع هذا المصور ، وااااااااه فشلتاااااااااه ، إلي بيده كانت جنطة الكاميرا ،تره على فكره أنا شايفه المصور من قبل بس ناسيه شكله ، جان ألتفت على يساري و أقول حق محمد ، وين اسامه عيل؟

محمد : و انا صارلي ساعه بقولج هذا مو أسامه و إنتي حاقرتني ، أسامه بمكتب خالد

أنا : يااااااااي و أعدل نفسي و إبتسامتي مره ثانيه و أدخل مكتب خالد و أقول: هلا أسامه ، معاك ماستر ...

و أرد اعيد كل إلي قلته للمصور

وينك يانحن والاطفال

تذكرتوه ..مركز نحن والاطفال ويه شعاره البانده الاصفر ..وييييه كان شي على أيامنا ..ماأروحله الا في فتره الاعياد والما انخلص من المدرسه وناجحيين =)

اليوم استلمنا الشهايد وفرحه الامهات قبل اطفالهم في النتايج ..والشوارع زحمه ..واليهال انطلاق وافراج من بعد الامتحانات ..يله انعشيهم ونونسهم من بعد الحكره ...ها ماذكرتو ايام زمان مع نفس الشعور ...وناسه وخصوصا لما نشتري من نحن الاطفال ..وباربي لازم باربي نازله يديده في زي جديد ...

الحين بنتي ذكرتني لما استلمت الشهاده وقالت يله يا يمه وديني قلعه الالعاب "فانتزي وورد " الي في شويخ ماتحب تشتري العابها الا من هناك مع ان في له افرع في اماكن ثانيه وداخل المجمعات ...لا ما تبي الا اهوى (اذكرت لما ابوي اقولنا خلنا اروح محلات الوليد اقرب ..إحنا لا مانبي الا نحن والاطفال ...حسافحه عليك يانحن والاطفال رحت مع الايام الحلوه . المدخل
كان في تنزيلات بس مو على كل الالعاب عالعاده على ربع الالعاب

ديكور عجبني داخل المحل

حدتني الظروف

أدري مصخت سالفتي وصارت قديمة بس أنا مواعدتكم ولازم أوفي بوعدي :)

ما كنت ناوية ولا مخططة كلش إني أروح ماليزيا وكل ما زوجي ياب سيرتها قلت له ما أبي ..ما أبي اروح حر وخيسة شويدينا ابي أروح مكان بارد وفيه ثلج ..بس صج بني آدم يخطط ويرسم واللي مكتوب له يصير ..كان ودي أروح أول شي جنوب أفريقيا وحست ودورت وبحثت عنها وايد وحسب اللي قريته جوها بارد وحلو والشعب ودود بس ما أدري جنه الرحلات ماكانت على مزاجي حسيت اغلب الرحلات اللي فيها من طقت سفاري فهونت عنها وحولت على أستراليا ولو تشوفون الـ favorites عندي تلقون ملفات وايد عن استراليا وجنوب أفريقيا ...وبيوم من الأيام دش علي زوجي وقالي خلاص ما لنا إلا شرق آسيا ..طبعا عقب إنفلونزا الخنازير قالي ما نبي نروح ونجازف بحايتنا ...تعوذت من إبليس وقلت له أوكي ..والحمد الله رحنا السفريات وحصلنا حجز يتوافق مع إجازة زوجي العزيز ورحلتنا كنت مدتها 10 أيام ما تنقلنا وايد أنا ما أحب التنقل وايد بالسفر بس رحنا كوالالمبور قعدنا فيها 5 أيام وعقبها رحنا سلانغور قعدنا فيها 3 أيام ومنها لما دبي قعدنا يومين.. ..وانا عجبتني وايد سلانغور حلوة حق اللي ياخذ عياله معاه إحنا قعدنا بفندق سن واي لاجون سيتي ..الفندق عجيب والمدينة المائية أعجب ..مكان روعة :)

بحط لكم بعض الصور مع تعليقاتي الخاصة :)

وصلنا ماليزيا صورة بالمطار عجبتني وصورتها ..




لازم نروح السوق الصيني ونحوس فيه ...
طرارة من نوع ثاني ...و في نفسه ذهبي بس ما شفته ..

ما شاء الله اللون الأخضر مغطى كل مكان ووايد مريح للعين ..




مدينة الملاهي في جينتك ...وايد زحمة مع انه ما كان يوم إجازتهم ..بس الجو هناك عجيب ...

طاووس شايف نفسه بحديقة البغبغاوات بكوالالمبور ...وايد حلوه الحديقة..

شفت هالإعلان بالسوق ( تايمز سكوير )..وهو نفسه الفندق اللي قاعدين فيه ...عجبوني المعاريس اللي من تفافيخ فصورتهم لكم :)

لازم نمر عليها قبل لا نروح الفندق ...بقاله مشهورة عندهم ومرتبة وكل شي فيها :)


مدينة الثلج بجينتك ...درجة الحرارة -5 تحت الصفر...موت برد ..بس صغيرة ..حذفنا على بعض ثلج وطلعنا :)


الله يعزكم ...ما أدي شقصتها ...رحت أصلي ما اشوف إلا نعال مقصوصه قمت طلعت كاميرتي وصورتها ..ليش يعني ريولهم صغيرة ؟؟؟؟؟؟


بريد كتكات ...عشان نطفي فيه حرارة الجو...كليناه بالمدينة المائية في سن واي لاجون :)

عجبتني طريقة زقايرهم ..عشان الواحد كل ما يفكر يدخن له زقاه يشوف هاللوعة الجبد عليها ...وفي صور ثانية تعيسة بعد ..

هذي صورة ثانية في مدينة جينتك ..



مطعم الطربوش مطعم لبناني موجود في المجمع اللي متصل بفندق سن واي لاجون ...وايد الأكل حده حلو..


في عندي صور وايد بس اكتفي بعرض هذيه لكم ..ليش إنه أغلب الصور إحنا فيها :)

وبصراحة عقب التعب ما صورت وايد بدبي ...جم صورة بس بمدينة الثلج وكله إحنا مرتزين بالصور ..بعد مو عدلة أحط لكم صوريّ :)

om moD

مطراش

توا واصلني بالـ BBM هذا المسج حبيت أشاركم إياه ...

( عندك أغراض بتوصلها و محتاج مطراش ؟ شركة Mr. Delivery تقوم بذلك 22494944 )

أول شي شكيت ، قلت يمكن مو صج ، جان أدخل قوقل و أدور ... جان ألقه وحده إسمها عاصمة الموضه في منتديات كويتيات ترد على بنيه إدورعلى أحد يوزع لها بطايق عرس ، ردت عليها و كتبت هذا...

(هلا حبيبتي صح كلامج الشركة هذي اسمها Mr Delivery اصحابها شباب كويتيين يوصلولج اي شي داخل الكويت اب اي منطقة كانت ووايد بنات بالمنتدى يتعاملون معاهم وخصوصا التاجرات وعندهم هالخدمة انهم يوصلولج بطايق العروس دقي ليهم هذا رقمهم 22494944 صراحة شغلهم عدل وامرتب وسواقهم شاطرين وعارفين )