الأحد، 12 ديسمبر 2010

عرس حنه في الفجيره


صباح الخير والجوري والنوير :) بعد رحله خصب الممتعه .. ثاني يوم معزومين على عرس في الإمارات في إماره الفجيره .. طبعا انتو تدرون ان الاماراتيين عرسهم يكون طول الإسبوع بس إحنه رحنه ( يوم الحنه ) ويوم العرس العادي الي وراه على طول .. بالنسبه لي هذي أول مره أحضر عرس بره ديرتي فكان شي ممتع الصراحه وبنفس الوقت عشان اعرف عاداتهم وتقاليدهم بلعرس .. بس الغريب بالموضوع انا توقعت إن العروس اهي الي إحنونها بس طلع المعرس ! والعروس بالأساس ماحضرت الحفله .. لان قالولي قبلها بيوم كانو امسويلها حفله .. فقلت يمكن تعبانه .. والله مالومها سبوووع بحاله طق ورقص .. إحنه يوم واحد وراسنه يصدع من الطقطقه .. المهم حاطين كوشه أرضيه للمعرس .. وعقب مارقصو البنات .. يا المعرس وزافينه أهله بالرقص والأغاني والتصفق ولفلوس والحلاو الي قاعد يفلعونه فيه من بعيد ههههه مسكين كسر خاطري يوم انفلع بالحلاو .. الله يهداها الي قاعد تقط الحلاو جنها قاعده ترجم .. قطي من فوق على الأقل يطيح ابراسه مو بعينه ويلا ابخشمه .. المهم نرد حق موضوعنه .. فأول مايدش المعرس يكون شايل صينيه الحنه فوق راسه وعقب يشيلها اي احد ثاني .. وييكون لابس مثل حزام اخضر مربوط عالخصر والجتف .. ويقعد بالكوشه ومد ريله فوق الكوشيه عشان يحنون ريله .. بس الصراحه ماشفت هالمقطع من الزحمه .. بس شفت يوم يحط صبعه لصغير يم صبع عمه لأن أبوه متوفي الله يرحمه وعقب تيي المره الي اتحط حنه وتحنيهم مع بعض .. وعقب يمش الحنه ويفصخ لحزام الي قتلكم عنه ولبسه واحد خاطب ... وأترككم مه الصور :)


طبعا لازم أي وحده تروح العرس لازم اتحط حنه .. فحماتي تحنت .. وانا انسووووو اكره الحنه وريحتها



وهذا المعرس بوحزام لازم يمسكونه من الصوبين وزفونه لي الكوشه ( بعد أخاف يهون .. فمافي مجال للنحشه :) )


وهذي صينيه الحنه .. الي فيها شمع ترى مو جوكلت كيك .. هذي الحنه ههههه


وهذا واحد من أهلهم شايل الحنه ( طبعا الرياييل لهم حفله .. فلازم يفرون الفريج فيها مع غناوي ورقص لي الكوشه )

وجذي طريقه تحني الريل



وهذا صبع المعرس مع عمه :)

طبعا مافي نفسنه ( ممنوع اصطحاب الاطفال والاطفال مملكتهم بيتهم ومن هالحجي ) جنهم يقولون الي ماييب عياله يويله ويلااه :) عاد يوم سألت وحده ليش اليهال !!؟؟.. كلش ماله داعي .. قالتلي اذا قلنالهم لاتييبونهم محد راح إيي . . . عاد لاتشوفونهم شنو سوو بالعرس الي باليوم الي وراه .. كان بفندق 5 نجوم والصاله وايد حلوه .. والورد اموزع ابكل مكان وصوب الكوشه .. وقبل لاتيي العروس الورد كللللللله تنتف من اليهال .. الي يقطع الورد ووزعه ولي ياخذه وياكله ولي ينتفه ولي يحذفه .. حرااام والله ليييييش !!! المشكله مححححد يكلمهم الوضع حده عادييييييي والي يايبه عربانة ولدها وطبعا كل وحده ماسكه جنطه البيبي ولي ترضع بنتها ولي اتسكت الي تبجي ويلي ويلي ويلي .. مادري بالنسبه لي كلللش ما حبيت اليهال بالعرس.. بس الصراحه استانست واايد لأن تجربه يديده بالنسبه لي :) شكرا يا أم مروان وأبو مروان والعايله الكريمه كلها الي ضيفتها وحطتنه فوق راسها .. الصراحه ماقصرو معانه .. الي سوو معانه شي كبير الصراحه :) انردها لكم انشاءالله اذا شرفتونه الكويت :)

هناك 11 تعليقًا:

Katkoota xD يقول...

وناسة الله يوفقهم انشالله

Me Blogging يقول...

eee walla shay yedeed, awal mara asma3 fe shay chethe

mit min ethe7ik 3ala salfat tge6 el 7alaw chinha tarmi LOOOOOL

o ele yakel el ward waaaay ma'saaaa, o ya milg el yahal bel 3ers

سمو الأميرهـ ..ツ يقول...

يعني كنتم عندنا فالفجيرة لووول :pP

وانا أقووول الفجييرة منوووره (;


اممم
عندنا في ليلة الحنا المعرس يحني صبعه الصغير بس ...
<< أصلا الرياييل يكرهون شي اسمه حنا ويكرهون ريحتها ..

عادة الحزام الأخضر مب الكل يسويها ..



ووو
بوست جميل
:)

تقبلي مروري

ZeeZoo يقول...

امبي سالفه اليهال مو صج (ينتفون الورد وياكلونه)لوووول اخترب العرس

بس بصراحه عاداتهم وتقاليدهم وايد حلوة واحسن منااحنا اللي نسينا تقاليدنا

أميـــــره يقول...

روووووعه ما شاء الله

أشراقة الأمل يقول...

راائع جدا مشاهدة مراسيم زواجات مختلفة
استمتعت هنا
لك ودي

غير معرف يقول...

I'm an Emirati lady from Dubai & let me tell you that I'm really surprised from what I just read! Not everyone in Uae does that, & to be honest its my first time reading or even knowing such traditional.. I have couple of Kuwaiti friends & I know that your weddings guys are so similar to us, but maybe this family that you visited has their own or even people in Fuj is different. I mean this is not the process & how it goes in every Emirati wedding. Our men don't do henna, plus the girl doesn't do the henna infront t of the people, she gets it done one day before the henna night, & the next day she enters with either green or red dress while wearing Arabic gold that’s it. & in both nights kids are not allowed, & no one is even allowed to touch the flowers or stage or such things, our wedding are organized, that all what I wanted to make this clear lol!
Regards..

Unknown يقول...

صباح الخير << حلو والله نشوف عادات وتقاليد كل بلد << يعطيج عافيه حبيبتي

غير معرف يقول...

salllam all,,
i know its to late to reply on that post but i was really surprised from what you wrote about wedding in Fej

i am from Abu Dhabi and that is totally different than what we do in our weddings in AbuDhabi . 

i totally agree with the Emirati lady from Dubai who commented on that post earlier.

wish you all the best.

 

غير معرف يقول...

انا اماراتية من دبي وحبيت الخوات من دبي وبوظبي اللي كتبوا تعليقاتهم بالانجليزي هذي آخرة الزواج من هنديات... ما أدري ليش حاسه انها نفس البنت كاتبة تعليق وبعدين راده على نفسها.

تقاليد أهل الفجيرة فعلاً مختلفه بس وايد حلوه، وحفلات دبي وبوظبي استوت مثل أعراس الاجانب، ويسوون لها بروفات وكل الخطوات محسوبة، يعني باختصار ملل. أنا عن نفسي ما أحضر الا أعراس البلوش والسّمر حق الربشة.

Unknown يقول...

المعرس شكله بلوشي او عيمي. محد يلبس الحزام غيرهم