نهايه السنه 2010

مابقى شي من هذي السنه مرت بسرعه ...واشياء وايد صارت فيها ...كانت خفيفه ماحسيتها ثقيله او حزينه ..بس صارت وايد تطورات واشياء ما كنت اتوقع راح اتصير .
اشلون راح تنهون هذي السنه عندكم ترتيبات ..وله لاهين وماعندكم وقت ؟
أنا وحده اهتم في آخر اسبوعين في كل سنه ..أحاول اشوف كل أقربائي وأتيمع معاهم واشوف اخبارهم
بيتي اغير فيه ..أراجع اهدافي هل حققتها وله في مجال احققها في الايام الباقيه..
مكياجي و كريماتي اشوف مدة الانتهاء ..واسوي تصفيه ...جناطي ..شنو اخلي وله شنو ابي اشتري من الوان..
وايد اشياء اسويها ..وايد مشغوله هذي الايام ..وناسه
وانتوا شنو مخططاتكم ..؟ يوم 1/1 شنو اول شي راح اتسوونه في اول يوم في السنه اليديده

اهلا بالجميع .. طبعا كلكم اتعرفونه ..والاغلبيه كانو شارينه او اقربائهم شروه .... هذي الللعبه من الاشياء الي كنت احبها وكل مره اشتريها بنواعها ...ومن الاشياء الي احب أورثها اعيالي ..وطبعا بنتي حبته وكل ماتشوفه تشتريه .
وبعد من الاشياء الجميله في طفولتي البريئه لعبه "الباربي " اموت عليها ..وطبعا اول مايتني بنت كوت لها باربيات ...بس للأسف ماتحب تلعب فيهم ...حسافه بنات هل وقت ملاقه .
وهوايه القرائه ..كنت ومازلت اعشق الكتاب وريحت الورق ...وشريت وشريت اشكثر قصص بأنواعها كنت انا وبنتي نقراها قبل مانام ..بس في النهايه اتقولي انا ما أحب القراءه ...بس ساعات اشوفه قبل ماتنام اتفج لها قصه تقراها ..
فعرفت ان الهوايات ..والاشياء الي كنتي اتحبنها في صغرج صعب اتغرسينها في نفس اطفالج ..إلا اذا كانو اصلا جينيا يحبونها مهما حاولتي
طبعا هذا كلامي بعد 10 سنوات مصارعه احاول اعلمها اشياء وايد احس انها مفيده او لازم تتعلمها او شي انا احبه يكون فيها ...

المهم انتوا شنو الاشياء الي تتمنونه يكون متواجد او متوارث في اطفالكم ؟

يوم في روضتي

بصراحة اليوم كنت معزومة بروضة الحلو يسور بروضة العصافير ...روضة ولا كل الروضات سنع وعدال الله يعطيهم العافية من اصغرهم ليما أكبرهم ..

بهذا البوست حبيت اعبر عن شكري وامتناني لهم ...وبالذات أبلات يسور ( أبله ل و أبله ع )..

وعشان ما أظلم ابلات مودو اللي قبل هم أشكرهم ( أبله ر وأبله ق ) مودو لحد ألحين يتذكر أيام الروضة وما ينساها ..

نرجع حق صف يسور ..الحلو والمتميز أنه صف يسور عبارة عن خلية نحل وكان أهداء اليهال حق أمهاتهم قرشة عسل صغيرونه ..و الأبله ما قصرت خلت كل طفل يقول اللي يبيه حق أمه وكتبت كلامه في بطاقة وعطاها أمه وطبعا ورتنا قبلها تصوير فيديو حق اليهال واهم يقولون الكلمة..

درسهم حلو وخبرتهم عن الماء والهواء ..

شكرارشكرا من كل قلبي والله يوفقكم يا رب ...

كان ودي أحط لكم الصور بس حجمهم كبير وماني عارفه أصغرهم إذا أحد يقدر يفيدني أكون شاكره له ..

جنطه السفر

صباح الخير والجوري والنوير :) عندي لكم طريقه سهله لتحضير جنطه السفر وهالطريقه خذيتها أمانة من صديقتي الصدوقه ( أم مود ) .. أنا كنت لي بغيت أسافر أسويلي جدول أكتب فيه مثلا يوم السبت البس جينز مع قميص والاحد كذا مع كذا وهكذا .. بس طبقت طريقه أم مود حق جنطه بنتي .. الصراحه واايد اسهل للسفره ما أقعد ألوي ودور شباصتها ويلا دلاقها مع هالبدله .. أحط بدلتها ودلاقها وشباصتها ابجيس واحد وكتب عليه اليوم الي راح تلبسه :) حلوه الطريقه مو :) وااايد ريحنني .. شكرا أم موود :)

عرس حنه في الفجيره

صباح الخير والجوري والنوير :) بعد رحله خصب الممتعه .. ثاني يوم معزومين على عرس في الإمارات في إماره الفجيره .. طبعا انتو تدرون ان الاماراتيين عرسهم يكون طول الإسبوع بس إحنه رحنه ( يوم الحنه ) ويوم العرس العادي الي وراه على طول .. بالنسبه لي هذي أول مره أحضر عرس بره ديرتي فكان شي ممتع الصراحه وبنفس الوقت عشان اعرف عاداتهم وتقاليدهم بلعرس .. بس الغريب بالموضوع انا توقعت إن العروس اهي الي إحنونها بس طلع المعرس ! والعروس بالأساس ماحضرت الحفله .. لان قالولي قبلها بيوم كانو امسويلها حفله .. فقلت يمكن تعبانه .. والله مالومها سبوووع بحاله طق ورقص .. إحنه يوم واحد وراسنه يصدع من الطقطقه .. المهم حاطين كوشه أرضيه للمعرس .. وعقب مارقصو البنات .. يا المعرس وزافينه أهله بالرقص والأغاني والتصفق ولفلوس والحلاو الي قاعد يفلعونه فيه من بعيد ههههه مسكين كسر خاطري يوم انفلع بالحلاو .. الله يهداها الي قاعد تقط الحلاو جنها قاعده ترجم .. قطي من فوق على الأقل يطيح ابراسه مو بعينه ويلا ابخشمه .. المهم نرد حق موضوعنه .. فأول مايدش المعرس يكون شايل صينيه الحنه فوق راسه وعقب يشيلها اي احد ثاني .. وييكون لابس مثل حزام اخضر مربوط عالخصر والجتف .. ويقعد بالكوشه ومد ريله فوق الكوشيه عشان يحنون ريله .. بس الصراحه ماشفت هالمقطع من الزحمه .. بس شفت يوم يحط صبعه لصغير يم صبع عمه لأن أبوه متوفي الله يرحمه وعقب تيي المره الي اتحط حنه وتحنيهم مع بعض .. وعقب يمش الحنه ويفصخ لحزام الي قتلكم عنه ولبسه واحد خاطب ... وأترككم مه الصور :)

طبعا لازم أي وحده تروح العرس لازم اتحط حنه .. فحماتي تحنت .. وانا انسووووو اكره الحنه وريحتها



وهذا المعرس بوحزام لازم يمسكونه من الصوبين وزفونه لي الكوشه ( بعد أخاف يهون .. فمافي مجال للنحشه :) )


وهذي صينيه الحنه .. الي فيها شمع ترى مو جوكلت كيك .. هذي الحنه ههههه

وهذا واحد من أهلهم شايل الحنه ( طبعا الرياييل لهم حفله .. فلازم يفرون الفريج فيها مع غناوي ورقص لي الكوشه )

وجذي طريقه تحني الريل

وهذا صبع المعرس مع عمه :)

طبعا مافي نفسنه ( ممنوع اصطحاب الاطفال والاطفال مملكتهم بيتهم ومن هالحجي ) جنهم يقولون الي ماييب عياله يويله ويلااه :) عاد يوم سألت وحده ليش اليهال !!؟؟.. كلش ماله داعي .. قالتلي اذا قلنالهم لاتييبونهم محد راح إيي . . . عاد لاتشوفونهم شنو سوو بالعرس الي باليوم الي وراه .. كان بفندق 5 نجوم والصاله وايد حلوه .. والورد اموزع ابكل مكان وصوب الكوشه .. وقبل لاتيي العروس الورد كللللللله تنتف من اليهال .. الي يقطع الورد ووزعه ولي ياخذه وياكله ولي ينتفه ولي يحذفه .. حرااام والله ليييييش !!! المشكله مححححد يكلمهم الوضع حده عادييييييي والي يايبه عربانة ولدها وطبعا كل وحده ماسكه جنطه البيبي ولي ترضع بنتها ولي اتسكت الي تبجي ويلي ويلي ويلي .. مادري بالنسبه لي كلللش ما حبيت اليهال بالعرس.. بس الصراحه استانست واايد لأن تجربه يديده بالنسبه لي :) شكرا يا أم مروان وأبو مروان والعايله الكريمه كلها الي ضيفتها وحطتنه فوق راسها .. الصراحه ماقصرو معانه .. الي سوو معانه شي كبير الصراحه :) انردها لكم انشاءالله اذا شرفتونه الكويت :)

دعوة حسينية

شخباركم حبايب .....؟؟؟؟

إنشاء الله مرتاحين ....؟؟؟؟

ولو إنها متأخر بس ميخالف باقي جم يوم واللي يحب يحضر ويستفيد ..

دعوة زهرائية لأخواتي وأطفالهم للمجلس الحسيني بحوزة السيدة الزكية سلام الله عليها بمنطقة الأندلس ق 12 ش 15 م 22 ..

ت: 24880999 ...

لمدة 10 أيام ... من الأحد 5/12/2010 - 14/12/2010 ...

وسيكون من 6_8 مساءا ......وهناك مشاهد تمثيلية بالإضافة إلى المحاضرة ..

رحله خصب في عمان

صباح الخير والجوري والنوير :) الويكند الي طاف رحت منطقه في عمان اسمها ( خصب ) اهي منطقه بحريه فيها واايد سواح أجانب وصيدها من السمج موطبيعي .. المكان حدده عجييييب .. تمشينه بالمركب بين الجبال وعقب تغدينه بالمركب وحوالينه دلافين يناقزون :) صج صج وناااااسه .. طبعا المنظر عجيييييب وبنفس الوقت ريلااااااااااااكس والهوا نسناااااس .. يعني مكان سبحان الله قمه في الروعه .. احنه كنه طابين مطار الشارقه ومن المطار ودونه ناس عمانيين من معارفنه لي هالمنطقه .. طبعا على ماتوصلون هالمنطقه الا جبدكم قالبه من الطريج لأنها طريج جبال .. يعني ساعه ومادري اشكثر يميين يسااار يميين يسااار يمييين يسااار يمييين يسااار واااااي دار راسي من الطريج حدده متعب بس يستاهل الروحه :)) يعني حتن أهل عمان نفسهم لازم ادشون الإمارات عشان يروحون ( خصب ) لأن مافي منفذ من عمان لي خصب وشوفو الخريطه أحسن .. وأترككم مع الصور .

مسيره الفوز بكاس الخليج الكويتي 2010

كيكه الفوز :)

الفرحه امبينه بدون لاعلق :)

حتن الصعايده احتفلو معانه .. شايلينها شيله عالبحر :)

مساء الأزرق الي فرح قلوب أهل الكويت كلهم :) .. أدري بوستي متأخر بس ظروفي وماتسوي .. الصراحه ما أدري اشلون أعبر عن الي بداخلي من وناسه .. أحس لين الحين ماني مصدقه من الوناسه .. يومها كل العايله اقعدت تناقز من الوناسه من كبيرهم لي صغيرهم .. وطبعا على طووووول طلعنه الأعلام وطلعنا بالسياره وهرنات وأغاني وترفرف بالأعلام لييييين خقينه من الفراره مابقى شارع مارحناله :) صج كان الكل فرحان والكل قاعد يرقص والكل مبتسم .. الله يدوم أفراحنه يارب .. الصراحه منتخبنه ماقصر باللعب وهذا الكاس العاشر من 12 سنه .. صج فتره طويله بس الحمدالله .. فزنه وبجداااره :)

مبرووووك يامنتخبنه الكويتي

عيدي ياكويت بفوز الازرق

2011 من الآن

هديه لبدايه راس السنه 2011 راح اتكون مميزه ..احجز هديتك لاحبائك

CASA SPA

السلام عليكم ... شلونكم ..شخباركم

الله يسلمكم ويسلم الجميع ان شاء الله اليوم بقولكم عن بوست اخذيته من ME BLOGGING كانت كاتبة عن CASA SPA .. شوقني الموضوع وقلت خل اجربه طبعا كانت تجربه وايد حلو ومريحة اييون ليه البيت ويفكونج من الزحمة والمواقف .. الله يسلمكم دقيت عليهم وقلت لهم ابي بدكير ومنكير مع مساج خفيف حق ايدي وريلي .. والله واتفقت معاهم على الوقت واليوم وفعلا كانوا عندي بالتايم ( حبيتهم بسبت دقت مواعيدهم :) ) المهم يابت عدتها وقعدت تشتغل .. كان كل شئ حلو وبسرعه خلصت يمكن من الوناسه .. واهم شئ اني بالبيت بالبيجاما :) وهذي الصور ...

( بس شوي كانت قرقه ( يعني تتكلم وتتكلم ,,بالعربي ثرثاره ..)

شكرا ME BLOGGING

واخر شئ يعطونج تفاحه ...

واذا تبون تهادون احد .. عندهم فاوجر بالاشياء الي تبونها ويقدمونه بشكل وايد حلو ...

لفت نظر

سلام الله على كل من رد يتابعنا ... وعلى كل من فقدنا ... بصراحة أشكر أبلة (kawaiilover26 اللي يحب يتابع بلوقها بس يضغط على إسمها )على تشويقها لنا في العوده للكتابة بالبلوق ( عسى ما شر أم مود لغة عربية ) المهم بدش لكم على طول بالموضوع اللي غاثني الله يغث اللي غثني إنشالله قولوا آمين ...

تخيلوا صار لنا فترة والمدير ما عنده إلا أنا ورفيجاتي وين قاعدين هل متجمعين بمكتب واحد ولا كل وحده بمكتبها مع العلم انه ماكو شغل متأخر ولا أحنا من النوع الليي سوي لوية وازعاج ( عن الحلال والحرام بعض المرات يرتفع صوتنا )...
اليوم اللي صار الطامة الكبرى أنا وصديقتي فاتو قاعدين مع بعض تريقنا الحمد الله وطبعا معانا ستيلا بعد ما كلنا وخلصا تقريبا قريب الساعة ١٢ الظهر ... مر صوبنا المدير وانا مكتبي جدام المطبخ... وكان في واحد يديد ياينا عاد المدير ياي يشوفه وفاتو عندي واهوا قبل هالمرة شايفها عندي ومكلمها وقايلها قعدي بمكتبج المهم واهو يكلم هذا قامت فاتو وراحت مكتبها... وجنطتها واغراضها كلهم عندي .. المهم دش سلم سأل عن زميلتي بالمكتب قلت له مو مداومة ... تخيلوا سأل عن الجنطة يقول : هذي جنطة منو ؟؟؟؟؟؟؟؟؟
يوم قلت له هذي جنطة فاتو سألني شنو اهي قاعده هني قلت خليني ارقع قلت لأ بس كنا نتريق ...
ولا بييت فاتو شافها سلام سلام ها شعندج يايه هني ... اعفست الدنيا وقالت له ماكو يايه آخذ تلفوني خذته وراحت ..
تميت شوي وشلت أغراضي و رحت عندها ..وستيلا استأذنت وراحت...
شوي ما نشوفه الا ياينا عنوه من مكتبه ويقول ( انتوا الثنتين يا قاعدين هناك يا هني.. لو سمحتي مكتبج طبعا هالحجي لي )
حمد الله والشكر على نعمة العقل شنويضايقه إذا احنا ربع شنويضايقه إذا احنا صوتنا مو طالع شنو يضايقه إذا مو معطلين الشغل ..
شمعنه احنا وليش ؟؟؟؟؟؟
هذا اهو السؤال !!!!!!
كثر ما حبيت الدوام كرهته ... كثر ماكنت احاسب نفسي على مرضياتي ما قمت ابالي ... الحين خلاص قمت اسوي شغلي بس عشان احلل معاشي وارضي ربي ضميري ( طبعا من الأول اطلب رضى ربي بس قبل كنت ذبح نفسي عالشغل وساعات أكون تعبانة بس لأن عندي شغل أداوم) ..
واللي بعرفه كل الدوامات جذيه ؟؟؟

الله يعينا على ما بلانا ..طبعا هذا شي من لا شي من المواقف اللي تصير لنا بالدوام ...

وعقب كل هذا وصل حق كل وحده فينا لفت نظر بإسمها :)...

b+f في منتهى اللذه :)

صباح الخير والجوري والنوير :) طبعا هالمطعم في ( أحلاا ميني بيرجر ذقته ابحياتي ) مالا داعي أسويله دعايه لأن معروف باللذه الموطبيعيه .. أصلا مالاداعي تمضغون الأكل بس قرمو وخلو الباجي عالبيرجر لأنها اهي ابنفسها راح تذووووووب .. وانه قاعد أكتب إشتهيتهه مره ثانيه :) بس حسافه من كثر ماقاعده اهبص نسيت لاأصور :) وطبعا الي بروحله لازم ينطر دوور اشطوووووله وشعرررررضه لأن مافي حجز .. بس يسوه النطره .. والي مايدري وينه اهو في 360.

كبيييييييييييير يا b+f :)

جوووووول

ادري من سنة الطفحة ماكتبت بس شنو اسوي حملت و ولدت وياهل واق ويق وعفسه صارت حياة جديدة مرة ثانية ...

الحين ان شاء الله برد لبلوقنا :)

موضوعي اليوم عن حفلة سويتها حق ولدي في جوووول ديسكفري ... ولدي صارله مدة يحن يبي حفلة حقه مع ربعه يلعبون فيها واختار جووووووول ...

المهم .. جو الحفلة كان وايد حلو .. مرتب .. كانوا اليهال ايون ويقسمونه على ثلاث فرق ويخلونهم يتحدون بعض والفريق الفايز هو الدائما يظل في الملعب .. حتى المباراة الفاصله والفايز ياخذ الكاس .. بعدها يصورونهم جميعا مع الكاس واييبون الكيكه ويغنون حق المحتفى به .. وبعدين العشا في جيليزز يحطون طاوله كبيره ويقعدون اليهال ويوزعون اكلهم .. وتوت توت خلصة الحفلة ... طبعا اليهال لما ايييون يخيرونهم بين ( البيتزا .. الجييز برغر .. النكتس " قطع الدياي " )

كانت تجربه حلووووه .. اخليكم مع الصور .. الصور قليلة الان CD الحفلة للحين ما استلمته ..

جدول للعطله الطويله

صباح الخير والجوري والنوير :) في إجازه عيد الأضحى إستمتعنه جدا بالشاليه .. ولأن العطله طويله فسوينه جدول حق الأيام .. يعني ( فعاليات ) عشان نكسر روتين الشاليه .. فكل يوم أونس من يوم .. وانه وبنات خالاتي الي مسكنه هالفعاليات .. وصج الكل استانس من كبار وصغار .. حتن بعد جبدي خالاتي عازمينه انه وبنات خالاتي عالعشا في مطعم ( ككاو-360 ) عالسبوع الياي بمناسبه الجهد الي بذلناه لإسعاد الشاليه :) فراح أنزل بوست انشاالله على هالمطعم وأقولكم تجربتي الأولى فيه .. فأنصحكم اذا في عطله طويله خططو لها نفسنه وصج راح تستانسون :) عشان اتحصلون عزيمه ابلاش نفسنه لووول :)

ودمتم سالمين :)

أوووو يالأزرق إلعب بالساحه

يااااااااااااااااااااااااااااااااااااارب انفوووز .. تكفه يا الأزرق لاتحطم قلبي وقلب الكويتيين :(

ومتى انشاءالله اتحقق أمنيتي وروح الملعب وشجع :( ؟؟؟؟؟؟

رحلتي الشتويه الى لندن

مساء الخير والجوري والنوير :) أول مره بحياتي أسافر حزه ( الشتاء ) وهالمره رحت لندن وهذي المره الأولى الي أزور فيها هالبلد الجميل .. صج استانست فيها ..أولا لأن بررررررررد وثانيا لأن السوق كله تنزيلااات .. حبيتها واايد .. فأنصح أي شخص يحب البرد نفسي يروح هالفتره أي ديره يبي :)

ودمتم سالمين :)

مغامرة مع جبنة فيلادلفيا

جبنة فيلادلفيا قدمت عرض كدعاية لها عن طريق صفحتها بالفيس بوك عن تجربة الافطار على ارتفاع 50 متر عن سطح الارض وبنت خالتي M تم دعوتها وعاشت التجربة مدتها 20 دقيقة تقريبا عن سطح الارض في مرينا ويف واشاركم بهل صورة :)

سنعود إنشاءالله

صباح الخير والجوري والنوير .. عدت والعود أحمد :)

احنه الفيونكات مادري اشفينه .. صارلنه فتره موكاتبين شي .. البلوق ( هدووووء وسكووون وطخخان ( يعني طاخ ) :) الله يعافيها جاردينيا لو مو اهي جان تطخخ عدل لبلوق .. مادري اشفيني على هالكلمه حابتها واهم شي اني اتفنن فيها لووول المهم مو هذا موضوعنه .. انشاءالله من اليوم راح انرد نكتب لأني ولهت على البلوق وعليكم طبعا .. فأعتذر والفيونكات تعتذر همن عن الإنقطاع .. وأشكر كل من سأل عنه الصراحه ماقصرتوا .

ملاحظه : بالغلط .. وأكرر بالغلط مسحت ( قائمه البلوقات الي حاطتها على جنب .. فإنشاالله عطوني هاليومين وأردها بإذن الله )

وناسه

العرض الي طاف كان كل يوم الاثنين لبسي وردي راح اتحصلين كره برد مجانا اذا شريتي اي نوع من البرد
بس الحين اذا شريتي كيكه 3.500دك راح اتحصلون 3 علب برد واااو ...انا وحده احب باسكن وهذا العرض يفيدني ابصراحه ..بس لازم البس وردي كل أثنين =) .

تقبل الله طاعتكم

اهلا بحجاجنا ..نورتوا بيوتكم ..ومدونتكم ..وشتقنا لشوفتكم ..وسوالفكم

مواقف السيدات

فعلا حبيت الخدمه ..ياخذون منج سيارتج ..هذا الحل يكون حق وحده مستعيله حدها ..وله تبي تاخذ شي معين وتطلع ....شكرا جمعيه مشرف

for Gift

علب هدايا لجميع المناسبات أهدي هديتك لمن تحب

تصميماتها ..غريبه ...شوفو الرابط باجي التوزيعات
http://www.facebook.com/photos.php?id=100001641201101#!/profile.php?id=100001641201101

شكرا صديقاتي

كل الشكر لأحلي صديقات .. احتقالكم لي بميلادي .. و الله لا يخليني منكم ..

و الله لا يفرقنا .... :)

و الهديه روعه .. شاكره ذوقكم الراقي

شكرا صديقاتي حبيباتي

2011-2010 للشعر ودي اغير

ودي اقص شعري ..وابيه اغيرني واصير مو أنا ...أحس محتاجه تغيير جذري ..يكسر روتيني
بس هذا الصيف الوانه داكنه ..اسود ودرجات البني ..هذا لوني المعتاد ...مادري اصبغ اسود مزرق اصير حلو ..وله اخليه درجات البني
ودي زيتي وله رمادي ...أبي شي غييير ..ادخل فيه مع الخريف ..قصه جنونيه ولون غريب ...وناسه أكشن =)

اسود وخصل ذهبيه او عسليه

ها اشرايكوووم ...هابين بقصات البوب ؟ حلوه وله مو لايق

من هاواي ..الى سوق شرق

أمس كان الافتتاح في سوق شرق ..هذا فرعه الثاني ...والاول كان في المسيله ...الي حلو فيه انه دايت ..ولو شوقر ..ذقت اشياء وايد
كلها بارده (سموثي) كابتشينو رائع ...هذا البنفسجي حلو ...والاجمل ليمون بالكيوي انتعااااش الصيف
لازم الجربونه .

عيدكم مبارك

مادريت ان محد من الفيونكات ماعايدكم .. السموحه يالغالين :) بهذي المناسبه أهديكم أحلى دعايه الصراحه :) بس الي باطين جبدي هالأهل الي بالدعايه .. انزين اشدعوه ابتسمو وضحكو وصفقو حق هاليهال الزووغه الي قاعدين يهزولكم ومشتطيلكم للعيديه :)

وااي يحلو هالصبي .. اذا شفته ابمكان راح اصور معاه الصراحه :)

وعيدكم مبارك :)

Whats upp

الي عنده تلفون سوني اركسون ... مبروك عليه خدمه الوتس اب ;)

قرقعتوا ..وله لا

ربي إخلي فيونكات يالله =)

بسولف لكم عن شهر الخير

شهر البركه شهر العفه ..شهر نتشوق لصومه ..شهر الخير ..والغفران والطاعه

اللهم بلغنا باقي رمضان وقيام ليله ...اللهم بلغنا ليله القدر وتقبلها منا

مادري رمضان إونس ..الصبح كل واحد ماسك قرآنه وقاعد في زاويه ويقرى... وله اتشوفه ماسك تلفونه يبارك ...وله يسلم على ربعه والكل ممبتسم فرحان مرتاح ...والحريم على الساعه 12 الظهر بدى درس الطبخ ...تبادل افكار وطبخات وكل صار طباخ وفنان طبخ والمواهب تطلع كلها في هذا الشهر ..وبعد الدوام ويييه الجمعيات ماتندش من الزحمه ..كل واحد ماسك اورقته اشوف شنو ناقصه ...أنضحك ...=).

وبليل بعد التراويح ..تبدي الزحمه والشوارع اتسكرت ..الكل كاشخ الكبار واليهال ..وشوفو السنع الحريم بالدراريع والريايل بالقتره والسكبه ... وطبعا الكل مستانس ..من بيت الى بيت انبارك في هذا الشهر الفضيل ..والهدايا حق الخاله والام واليده وكل من يعز عليكم...وناسه اتشوفين البعيد والقريب .

والمسايد زحمه ..والمشايخ والقراء ماشاء الله عليهم ..كل واحد صوته أحلى من الثاني ..

خلص رمضان بعد اسبوع القرقيعان ..خلاص مسكنا أوله من باجر انصلي العيد .

إلي احاتيه برمضان وزني ..مع كل هل ابداع بالسفره وخصوصا اذا كنتي في بيت الحموله شوفي السفره مالها أول ولا تالي ..حتى مافي مكان حق قلاص الماي ...الله يزيدنا من خيره ..الحمدالله على هذي النعمه ...

وناسه ...اونس ..عاد سوو طاعات في هذا الشهر ماتنسون الصدقات وافطار صايم ..وحفظ القرآن

جهزتو حق القرقيعان =)

مبارك عليكم الشهر

Y2Z Designs

مساء الخير والجوري والنوير :) هالموقع وايد عجبني .. أشكال ال wall stickers عجيبه .. حده يحلي المكان ويعطي لمسه جماليه بالبيت .. واسعاره حلوه :) لدخول الموقع اضغط هنا أو FB