السبت، 25 يوليو 2009

سوالف حريم


مساء الخير جميعا :) الصراحه ولهت اني اكتب .. قلت جني مصختهه حبتين :)

موضوعي اليوم سلمكم الله عن ( الزوجات شسوون اذا زوجهم يبي يطلع مع ربعه ) خل قولكم جم سالفه .



السالفه الاولى

وحده تقول اذا زوجي بيطلع مع ربعه اسوي روحي غشيانه ..وهو المسكين عباله صج .. ويي ولمها وخايف عليها وحالته حاله .. وهي تقعد تبتسم الابتسامه الشريره وابتسامه النصر ...طبعا مايشوفها تبتسم لأن لامها لووووول



السالفه الثانيه

وحده ثانيه من تشوفه بيطلع اوقفتله عند الباب وفاجه ايدها الثنتين عرض الباب .. اتقول شمشون الجبار .. وتقوله ماراح تطلع لو شصير لوووووول



السالفه الثالثه

وهذي من تشوفه قاعد يبدل اهدومه ومتزهب حق الطلعه .. ميلت راسها اشوي على جنب ونزلت الدمعه .. يعني مسكينه ..خو تدرون احنه دمعتها مايبيلها تعصر عشان تطلع لوووول



مسكين هالريل عطوه فجه اشوي .. خل يتنفس .. عاد انتي لاتسيرين لزقه معاه .. وين مايروح ريلج ابريله اتقول علج لازق .. ويلا اشرايكم يالشباب .. اليوم انا واقفه معاكم :)



ودمتم سالمين :)




هناك 29 تعليقًا:

رورو الشخبوطه يقول...

هلا فاتو..

صج واخيرا نزلتي لنا بوست..

خخ ماحطيت ردت فعل ال2 وال3..

ال2 اتوقع ماتردها الا الطوفه و ال3 بيعطيها ظهر ويكمل واذا طيب بعطيها كلينكس وهما يروح..

الاول شكله توه معرس باجر يتعود وتتوهق اذا غشت صج بيحقرها خخ او بيلمها عقب صحيتي شكلج صرتي زينه يالله مع السلامه..

لا تطلعين حركاتنا للصبيان..

بعدي ماتزوجت لا تحرقين افكاري خخخ..

بس ماتسوى تسوي افلام عشان مايطلع بيجابله ويحن ويتحلطم حلاته لما تغلط تسوي الافم عشان تكسر خاطره :)

مرسو خيتو..

bokeh of magic * يقول...

لووووووول عجبتني حرركة شمششون P:
احسن خل يقعدون عند حريمهم لاحقين على ربعهم

3BeeDo ;) يقول...

اي والله اي والله مسكين الريال :P
معني مو متزوج بس اشوف الييي حواليني متزوجين جنهم بسجن مادري ليش مانشوفهم ولمن نشوف ساعه ويشلع خو كله يوم واحد ويانه يعني تاخر مافيها شي وله التلفون طول ما اهو قاعد يرنع

NewQ8 Bride يقول...

و الله اكبر غلط هالتصرفات اصلا راح يمل الريال ، المشكله وايد ناس بالكويت فاهمين الزواج بطريقة غلط اصلا وايد شي مفيد حق الزوجين انه يكون حق كل واحد فيهم وقته الخاص

مشكورة على الموضوع و انا من اشد المؤيدين انه الريال يطلع مع ربعه بشرط ان ما يكون عنده مانع انها تطلع مع رفيجاتها

جاردينيا 2000 يقول...

تصفيق حاااااااااااار لقدوم فاتو مرحا مرحا تعيش =) اهلين وشلونج

السوالف هذي صارت قديمه ولا تمشي مع الريال وهذا اذا اقعدت الوحده بالبيت اصلا اعتقد العكس الحين صار
دوام ونوم تدريس اليهال بعدها تقضي اغراض البيت من جمعيه وسوق وبعدها تتفرغ حق روحها صالون وتوجيبات وحده والده وله معزومه على استقبال ...وين الوحده الفاضيه الي اتحاول اتقضي وقتها مع ريلها يمكن تبي اتسلمه بعض المهام يمكن =)

-mate يقول...

ممتاز يا فاتوو ..!

كشفتي لنا أسرار عيارة الحريم لأزواجهم .. حقاً إنه بوست مفيد للرجال
:)

The.One يقول...

مشكلـه الحريم ..فيهم عذر شرعي..
أنه مايخلون الواحد على راحته لازقين لزقه :p


ضحكتني سالفه شمشون ههههه
شكـرا ع البوسـت

عبدالرزاق القطامي يقول...

واخيرا ظهر الحق وزهق الباطل ان الباطل كان زهوقا


ههههه

المشكلة حتى لو طلعت كل ربع ساعة دقت تلفون

مشكوووووووره بس متى تفهم الي عندي

:)

Fishah يقول...

اول شي :
ولكم بااااااااااااااااااااااك يا حلوه .. انا اقووول اليوم البلوق منور :))
خوش بوست

عاد اتصدقين .. انا احب مبدأ العياره لووول بس عاد مو جذي .. انا عندي عادي ان الريال يطلع بعدين مع ربعه .. ياخذ راحته .. عشان ما يحس مثلا انه انحكر في هالزواج ويصير صج قفص بلاتيني خخخخ بس على شرط انه مايزودها عاد مره ربعه ومره انا :>

غير معرف يقول...

والله انا متزوجه و الحمدالله صارلي 5 سنين و اول ما تزوجت تقريبا اول شهر خوال زوجي يتحرشون فيني بالكلام يقولون احنا الرياييل بنسافر و نبي ناخذ ريلج معانا عاد تسمحين له..ويقعدون يضحكون و يطالعونه... و انا اصدمهم اقولهم اي اخذوووه خليستانس معاكم ههههههههههه ... ليش الحكره خلو الرياييل يستانسون مثل ما احنا الحريم نبي نستانس و نروح عروس و استقبالات مساكين خنت حيلي كله صاكين عليهم... ريحوهم يريحونكم هههههههههههه .... و الله لما يبي يطلع مع ربعه حتن بخور ابخره و اشوف هدومه و اسنعها له تقولون معرس... صيرو نفس حريم اول تعمرون في بيوتكم :)

غير معرف يقول...

الله يكون بعون هالرياييل بس ساعات يستاهلون لوووول

بس بصراحه طرق روعه خو احنا حق الشطانه زاهبين ابي اجرب واقولكم شنو صار معاي

غير معرف يقول...

الله يعطيج العافيه على هالموضوع خوش موضووووع اي علمونه شوي خل نغير الروتين الي احنا فيه مليينه من طلعات ريايييلنا مع ربعهم صج اني ما اتوقع اطوف هالحركات على ريايييل هالزمن بس انجرب

:)

bhr.qadsaweya يقول...

ولكمممم بااااك فاتوووووو

حلات سوالفاج و الله

انا بالنسبة لي خل يطلع و يروح احسن يرجع مشتاق لي وبيني و بينج هم فكه شوي p=
ترا الحريم هم يملون من ريااييلهم.. نبي بوست عن تلزق الرياييل تكفيييييين

.
.
بسألج امو مود وين طولت الغيبة ؟؟

يعطيج العافية حبيبتي

mtfa2el يقول...

لووول

ان كيدهن عظيم .. قالها رب العالمين بكتابه

شوفي و من الحب ما قتل .. و الريال دايماً يحب انه ما ينقطع عن ربعه و تكون له مساحته الخاصة معاهم يعني لازم تحترم هالشي و تقدره .. مو إذا بيطلع ولا بيسافر ناشبته و لوعت جبده على طلعة ولا سفرة و لا نومة بشاليه
لا يمصخها ولا ينقمت مرة وحدة خير الحلول الوسط

لازم تكسب الريال مو تخليه يحب النحشة منها

malak يقول...

ههههههههه



اهم شي اللي تسوي روحها طايحه غشيانه :D

طز بالرجالة يقول...

هذول متزوجين الرياييل ولا شارينهم؟
المفروض تفتح له الباب..و تقول له رووووووووح
لا و تعطيه بيزات بعد علشان العشا مع ربعه. شنو لزقة عنزروت؟ لازم وقت خاص كل يوم حق كل واحد فيهم..يقعد بروحه و يتأمل او يطلع مع ناس غير...شتبي بويهه 24 ساعة؟ اهي الي بتمل مو بس اهو

ميمة السبيت يقول...

** لووووووووول عيل تدرين انا ريلي عشان يفتك من الحنه يطلع عقب ما انام :(

شفتي مكر الرجاله

شاي الضحى يقول...

لوووووووووول ما اقول الا الله يعين رياييلهم عليهم خلوهوم يطلعون فجوا عنهم شوي بسكم لزقه الريال لازم يشم هوا ويغير مثل ما انتي تحبين تطلعين مع رفيجاتج او اهلج خليه يستانس لاحقه على اللزقه ههههههه

Ļa ƒéммé يقول...

خيركم خيركم لأهله

المفروض الوناسه الغالبه بالعلاقه اتكون عائليه والله يهدي المتزوجين لبعض ...واللي يفرق هالريال من اي نوع وربعه من اي نوع ؟؟

kazmawy يقول...

لوووووووووووووووول
عاشت نصيرة الشباب والرجل
والله الريال لى بغى يطلع يطلع ولا يسال باحد ما عليج كلها تمثيليات
:))*

fatto يقول...

رورو الشخبوطه :

هلا والله ابرورتنه :) اي والله مابغى انزل :)

لووووووووول .. اي هذيل بدايه زواجهم جذيه الظاهر عقب رياييلهم اعرفولهم .

ويامعوده لاتسووين جذي اذا اتزوجتي .. ماتسوى عليج يطلع ريلج عارف هالحركات وطنش فيج وتندقرين لووول






being one
هلا والله :)
اكيد لاحقين على ربعهم بس هم الواحد وده يغير جو مع ناس غير .. على الاقل عشان يولهون على بعض اشوي :)




عبيدوو :
هلا والله عبيدو :) طبعا مو كلهم جذيه .. بس هذيل ربعك امبين حريمهم امصروعينهم .. ويلا شخصيته ضعيفه جدام مرته .. انت انشاءالله لي تزوجت عاد خلك قوي .. لاتسيطر عليك مرتك عطها العين الحمره من اول يوم لووول عشان ماتأذيك ابطلعاتك لووول
نصيحه مني لك : احنا البنات ترى ماننعطه ويه :)




new bride:
هلا والله ابعروستنه :) أأيدج 100% ابكل كلمه قلتيها .. طلعتي خوش عروس :) الله يخليكم لبعض :)





جاردينيا :
هلا والله ام عيسى شخبارج :) الصراحه احرجني ترحيبج .. بعد جبدي والله :)

هذيل الي انا اتحجى عنهم .. يسوون هالحركات لأنهم توهم متزوجين .. ماكو شغل والا يهال والامواجيب مثل ماقلتي .. الظاهر بشوفون غلاتهم :)

fatto يقول...

mate :
هلا والله ابغواصنه :)
افا عليك .. اي شي تبيه من اسرار وعياره الحريم انا اقولك .. متى ماتبي اتزوج انا حاظره افا عليك :) انت بس دورلك بنت الحلال وانه اضبطك لووول




the one:
اهلين شخبارج :)
اي والله في بعضهم لمن يسولفولي يقثوني ابسوالفهم حدهم لزقه .. طبعا موكل البنات في بنات متفهمين وعاقلين وبعضهم ماينعطون ويه :)




عبدالرزاق القطامي :
هلا والله فيك :) لووووول ضحكتني والله
شوف بدايه الزواج الوحده اتكون حنه مع ريلها من يطلع دقت عليه .. بس موقصدها ان اتيننه ويلا تحرجه مع ربعه .. اهي بس اتكون ولهانه عليه .. عقب سنه اتفج اشوي عنه .




fisha:
اهلا اهلا ابحوريتنه :) بعد جبدي والله منور ابوجودج :)
اي اكيد اذا كله قاعد يطلع مره ربعه وكاشت فيها .. خل اتسوي كل حركات العياره لووول

fatto يقول...

غير معرف 1 :
هلا فيج :)
اي والله مالا داعي الحكره من غير سبب .. عيل خواله ماتوقعو ردت فعلج بتكون جذي لووول .. الله يخليكم لبعض :)




غير معرف 2 :
هلا فيج :)
لووووول شتجربين لايمعوده انا موكاتبه هالبوست عشان اشيشكم لرياييلكم .. اذا زفج ويلا دقرج موتقولين كله منج يا فاتو لووووول قد اعذر من انذر لووول .





غير معرف 3 :

هلا فيج :)
لااا اشفيكم لاتوهقوني مع رياييلكم شتجربون .. ترى يمكن تنفع مره وراح يعطيج فيها ويه .. وعقب صدقيني راح يكشت فيج والا راح يرد عليج لوول

fatto يقول...

بحرينيه قدساويه :
اهلييين هلا فيج .. شخبارج وشخبار اهلنا بالبحرين :)
اي والله الوحده تبي اتفج اشوي عن ريلها .. اتجابل روحها عالاقل .. تدهن شعرها .. اتحنيه .. اتلطخ ويها بالماسكات لوووول

وافا عليج ماطلبتي شي .. خن اسوي ابحاثي عن تلزق الرياييل ونزله بوست .



وام مود موجوده بس من زمان ماكتبت شي .. الظاهر مشغوله اشوي .. راح اكلمها لج افا عليج وتنزل عشانج بوست :)





متفائل :
هلا والله :) عاد انت جنك قاعد اتفكر اتزوج .. عسى بس ماهونت من هالسوالف لوووول لاتخاف ترى موكلنه جذي لوول
وبالضبط خير الحلول الوسط .





ملاك :
هلا والله ابملاكنه :)
عاد اتصدقين في وايد بنات يسوونها .. انا قاعد اقول شنو ماتييهم الضحكه اذا سووها لووووووول




طز بالرجاله :
هلاوالله فيج :
لووووووول عاد اي شي اعطيه فلوس اقوله اعزم ربعك لووول زين لبنيه رضت يطلع هالمره تعطيه فلوس لوول
وهذيل توهم متزوجين فليل حين ماملو من رياييلهم .. عقب مايملون اتقوله روووح الله معااك :)





ميمه السبيت :
هلا والله فيج :) لوووول عيل تنصدمين لمن اتقومين من النوم .. بس احسن عشان ماتفقدينه وتملين ابروحج :)

fatto يقول...

شاي الضحى :
هلا فيج .. ومبروك عل البلوق اليديد :)
هالنوع الله يعين رياييلهم عليهم :) بس نطري عليهم اشوي راح يملون وفجون :)




la femme
هلا فيج :
اي والله .. انشاءالله الله يهدي كل المتزوجين لبعض :)






كظماوي :
اهلا اهلا ابمحرمنا هلا ابطجماوي لووول
افا عليك انا مع الحق :)
ترى والله في جذي .. شوف الي شخصيته قويه يقدر يسيطر عالوحده ويطلع ومايسال على احد على قولتك .
عاش عاش بوشخصيه :)

kazmawy يقول...

فاتو
لووووووووووووول
ابو شخصية شفتى ايميل الاسد
لوووووووووول

fatto يقول...

لا كظماوي :
هلا والله :)
اي شفته والله موتني ضحك .. بس ماقتلي انت اي نوع ؟؟

ويلا سر من الاسرار يابو شخصيه لووول

joe يقول...

يقولج الريال لازم يرجع حق سابق عهده ويضرب النساء في كيدهم

اي والله هالايام الحريم ماينقدر عليهم ;p

fatto يقول...

اهلا اهلا ولد المباركيه .. حمدالله على السلامه .. نورت الكويت :)



عاد حريم هاليومين اهم الي يضربون مو ينضربون لووول :)