الجمعة، 27 نوفمبر 2009

ينعاد عليكم


أحبتي كل عام وأنتم بخير بالنيابة عن كل الفيونكات ...كل من طرش لي مسج أقوله عساك من حجاج بيته الحرام السنة الياية وأكون وياكم ...لا تنسون تفرحون قلوب الهيال بالعيدية ..والعيد فرحة والله يعوده على الجميع بخير وصحة وعافية وراحة بال ...ونسأل رب العالمين قبول الأعمال....ويرد كل الحجاج سالمين غانمين لأهلهم ..

السبت، 21 نوفمبر 2009

للحج

Safi

شامبو ، بلسم ، صابونه ، و مزيل للرائحه كله خالية من العطر حق الحج
موجود في boots بالأفنيوز
بـ 6 دنانير

الاثنين، 16 نوفمبر 2009

Bubbules Nail spa

(Bubbules Nail spa ) أنصحكم بتجربة المكان شغلهم وايد وايد حلو ومرتب والمكان يساعد على الاسترخاء حبيتهم وعقب ما جربت شغلهم ما اعتقد بروح مكان ثاني ..كنت ناوية أحجز بـ N-style وقاعده اقول حق أختي تروحين باجر ..وإهي كانت تحوّس بالنت وقالت لي شوفي هالسبا شرايج ؟؟؟
قلت لها يالله خلينا نجربه ودقيت وحجزت :)..مكانهم برج جاسم ..مقابل ديسكفري...بشارع السور
أسعارهم شوي غالية بس بصراحة المكان يستاهل ..:)

الخميس، 12 نوفمبر 2009

paintball q8




أكيد تعرفون هاللعبه .. ولي مايعرفها اهي تكون من فريقين.. وكل شخص بالفريق يكون عنده مسدس في طلقات ألوان مو رصاص :) وعقب تبدي الحرب بينهم والفريق الفايز طبعا اهو الي يكون حايش كل الفريق الثاني بالطلقات .. اللعبه وايد حلوه للشباب بس ما أنصح البنات .. لأن مشكلتها ( اللبس ) لبسهم يتكون من خوذه وسديري .. بس مشكله لسديري ان مومغطه على جنب .. ولي تحوشه الطلقات على جنب ماقول الا الله يعينه من الألم .. لأن الطلقات قويه وتعور .. يعني المفروض يوفرون لهم لبس كامل ومغطه من فوق لي تحت .. لسديري اشبسوي !! الي ينطق على زنده ولي على ريله ..!! بس بالنهايه الشباب الي بعايلتنه وايد يحبون هاللعبه ومورادهم الألم وخاصه أخوي :)

ومكانهم عند الأكوابارك وسعر الشخص 10 د.ك ولي بشوف موقعهم ( يضغط هنا ) .
هذا مكان اللعبه وهذا لبسهم اذا امبين عنكم لأن الصوره للاسف موواضحه
وهذي صوره اخوي على جنب .. شفتو الطلقات شتسوي

الاثنين، 9 نوفمبر 2009

لمسات صغيره مفعولها ..خطييير

كانت يمعه عاديه ..بحركه بسيطه صارت شي ثاني ..


قلنا نبي نتيمع عند اختي (احنا 4 بنات) على العشاء وراح انقدم هديه حق بنت خالي بمناسبه طلوعها من اربعين ولادتها .


فقلت من زمان ماسوينا حركات فقلت ماكو الا طيور الجنه ورحت وخذيت اي شي يخص بيبي شاور ادري انه المفروض يكون البيبي شاور في الشهر السابع للحامل بس حبيت اغراضهم....... لتكون الاقرب والانسب لمناسبتنا ..وطبعا كانت مولوده فرتبت الطاوله كل شي وردي
بس صار شي شي عدل والكل استانس وحسينا روحنا في حفله مميزه وكانت مفاجأه للكل وخصوصا حق بنت خالي وايد استانست ..علينا بالعافيه والله امدلعين روحنا على الآخر .أخليكم مع الصور الطاوله المزينه حتى الاطباق ماسلمو من اضافاتي



بعض الهدايا البسيطه للذكرى


كلمه حلوه لكل وحده حطيتها بجانب الطبق بكرت ذرب






تخصصي الحلو ماتحلا المناسبه الا في حلو حتى لو بقطعه ككاو




مكان لتقديم الهديه

وبس =)

الثلاثاء، 3 نوفمبر 2009

مبروك يابطل


اسفه على اللبس الي حصل ..الازرق فاز في المبارات وديه

والابيض بعد فاز أمس وحصل على الكاس للإتحاد الآسيوي

والله فرحتنا ياالأزرق واالأبيض ...شكرا لرجوع الأبيض


3-11-2009


لا ننسى هذا التاريخ

CoLD sTonE + HumBurGer UniOn



بصراحة اليوم كانت لنا جولة ممتعة في أرجاء الأفنيوز أنا وعزيزتي pearl كان عندها جم شغله ودها تخلصها ...وقلنا بالمره نتغدى هناك وعقبها نحلي ..المهم ما طولها عليكم اخترنا مطعم إسمه " همبرجر يونيون " بصراحه كل اللي طلبناه كان لذيذ واسعاره معقوله ..عنده كل شي سلطات وعصاير وساندويتش دياي ولحم وغيره ...بحط لكم الحين الصور شوفوا واستمتعوا :

المكان وايد مرتب وحلو والجو العام أحمر طلبنا سلطة سيزر قمة اللذه بس ما صورتها ...وحلقات بصل كانت عادية ومعاها كان صوص لذيذ ..الخدمة سريعة وحدهم ذربين ..



هذا طبق Pearl عليج بالعافية اللي شفته إنها حدها مستمتعه وهي تاكل وظلت تمدح بالصمونة لما قالت بس ....بالعافية على قلبج ...




هذا كان طبقي بصراحة قالي مكعبات الدجاج مشوية ...بس لو قايلي شيش طاووق أحسن ..وايد حلو وخفيف ويكون معاه نوعين صوص واحد أحلى من الثاني ..


---------------------------------------------------------------



وعقب ما كلينا على طول رحنا نحلي في "ColD sTone" اللّي Pearl مواعدتني تودّيني وتوكلني فيه خليت الطلب عليها وتشاركنا بالطبق البارد وكان عبارة عن بريد فانيليا وبراوني وكاراميل ...واااااااااو ...طبعا طريقتهم شلون يسوون الطلب ويحذفون البريد ويغنون يشوقون حدهم ..

شكرا Pearl الطلعة معاج كانت تونس والأكل كان لذيذ الحمد الله توفقنا بإختياراتنا اليوم ..

أنصحكم تجربون المكانين ..وبحط لكم الصور..

هذي صورة المكان

هني وهو يسوّي طلبنا


وبالعافية على قلوبنا ...لذييييييييذ أقولها من أعماق قلبي ..ولازم آكل فيه مره ثانية ..وثالثة ...ورابعة ....ووو:)

هذا موقعهم ..

الاثنين، 2 نوفمبر 2009

نحبج


** الموضوع منقول من (BB) :)


نحبج يا كويت لو تصك القهاوي الساعه ١٢ نحبج يا كويت لو يحطون تأمين مخيمات نحبج يا كويت لو شالو دوانيتنا نحبج يا كويت لو شاليهتهم صكرت بحورنا نحبج يا كويت لو سحبو سيارتنا نحبج يا كويت لو زادو فوايد قروضنا نحبج يا كويت لو بالمطار يصيدونا نحبج يا كويت لو زين تقزرها على ضهورنا نحبج يا كويت لو حتى الهندي يتفل بويهنا نحبج يا كويت لو البورصه مو راضيه تصير خضرا نحبج نحبج نحبج والله نحبج