الثلاثاء، 25 أغسطس 2009

معقولة هذي ديرتي الحبيبة

أختي حبيبتي مسدوحة بمستشفى مبارك الكبير تعبانه شوي ...أقولج ما عليج إلا العافية والله يقومج بالسلامة يارب وديري بالج على روحج ...

المهم ندخل بصلب الموضوع رايحين كلنا نزورها واحنا بالاسانسير ركبت معانا وحده ومعاها واحد من البورتر وشايل معاه مكيف ...؟؟؟؟ أنا علامة استفهام شالسالفة وين يايين ليش يايبين مكيف ولا ويديد وبكرتونه...جان وحده من خواتي تقول إي يقولون التكييف خربان والسبة الرطوبة ؟؟؟؟؟؟؟؟؟؟؟؟؟؟؟؟؟

أي شي يعني المرضى قاعدين بالخيسة ...والطامة الكبرى يوم وصلنا ولا إختي حاطة لها مروحة عشان تبرد عليها ...قلت لها وي اللي يدش صاحي يطلع مريض ...ردي البيت أحسن لج...

بس للأسف ما يصير لازم تكمل العلاج عندهم...ويقولون إنه التكييف اللي بالمستشفى يشتغل على ماي وإذا صار رطوبة يخترب ..يعني شلون أهما داشين يتعالجون ولا شنو بالضبط ...ما تقدرون تقعدون ساعة عند المريض من الحر ...بس الغريب إنه الممرات التكييف زين وشغاّل بس الغرف خيسة ..؟؟؟

والأدهى والأمر إنه السرير اللي نايمة عليه إختي مكتوب عليه ( broken bed ) معقوله السرير مكسور ...يعني شلون المريض يدير باله وأهوا نايم ولا شنو...

وأنا من دشيت وأقول شنو هالورقة اللي على السرير ماني عارفه ومو ميزة شنو مكتوب ؟؟؟؟؟ وعدلت الورقة ولا أنصدم ....أمبيه يعني نعمر بره ومستشفياتنا الله بالخير ؟؟؟؟؟؟؟؟؟!!!!!!هذي مروحة إختي يعني المستشفى مو مسئول عن توفير شي يبرد على المرضى كل أسرة تتكفل بمريضها !!!!!!!!!!!!!!!

خنت حيلي أخيتي نايمة على هالسرير ؟؟؟ من صجكم إحنا بالكويت يعني ....انا اللي شايفه بعيني مو قادرة استوعب ....

شر البلية ما يضحك ...لوووووووووووول

هناك 33 تعليقًا:

Eng_Q8 يقول...

ويقولون حكومتنا زينه

Eng_Q8 يقول...

والله يشافي اختج .. اجر وعافيه

Om MoD يقول...

اللي يحّر إنه إحنا قاعدين نعمر بره ...



وجذيه نشوف بديرتنا ...


الله يسمع منك ..مشكور

ميمة السبيت يقول...

** الله يشافيها انشالله و الله لايقطنا تحت رحمتهم يا رب

bent el deera يقول...

ما تشوف شر اختج الف لا باس عليها وطهور ان شاء الله

والوضع بالمستشفيات مزري ومحد يتحرك

Om MoD يقول...

ميمة السبيت :


مشكورة عزيزتي ...


إي والله_ الله لا يقط العدو تحت رحمتهم..







bent el deera :


الشر ما ييج حبيبتي ...

حده مزري !!!!!


ولا يخفى عليج الاضاءة تلوع الجبد ...ادشين ادوخين الظاهر يبون المريض كله ينام ..

joe يقول...

ماتشوفون شر ان شاء الله
وتطلع بالسلامه
وتهد الغرفه الي فيها يارب

اعرف شخص طلع بريوله من البيت راح حق هالمستشفى ومارد راح صليبيخات لوول استغفر الله
للتوضيح اشخاص مو شخص

شهالمستشفيات صج الي شفتهم بأوربا شغل عدل كشخه و شي مرتب و الي عندنه سكراب مومستشفى

يعطيج العافيه

SHOOSH يقول...

ما عليها شر انشالله و كله باجره

آنا فاقده الامل في مستشفياتنا

كمباني و أجهزه مو ككفاءات وطنيه

beezo يقول...

اجر وعافيه انشاءالله
:(

حرام

ضيقتي خلقي

رورو الشخبوطه يقول...

ماتشوف شر..

والله يشفيها يارب..

يبا حتى صحتهم لعبوا فيها الله يرحم حالهم يارب..

الاوركيده يقول...

ماتشوفون شر واجر وعافية انشاء الله

الله يشافيها ويعافيه

مع الاسف هذي مستشفياتنا خالها مايسر احد
صج مثل مايقولون عين عذاري

:((((((((

شاي الضحى يقول...

هذي الكويت صل على النبي

الكل تكلم وتحجى لما راح صوتهم ... بس هل من مجيب؟!!

الله يشافي اختج وجميع مرضى المسلمين

Om MoD يقول...

المباركية :


الشر ما ييك ..الله يسلمك ...اشوي ربي ما طولها عليها طلعت الحمد الله..



يمه .......الله يكافينا الشر ..






shoosh :



الشر ماييج ...إي والله


يعني من صج فاقده الأمل عيل أنا عندي أمل يتسنع شي ...






beezo :


الله يعافيك ...


شفت شلون ...لا وأخوي رايح له أمس يقول ...تصدقين الانتركم اللي عندها بالغرفة خربان وسوالف السسترارت كله عندها ....وين الراحة ؟؟؟؟؟؟؟؟؟





رورو الشخبوطة :


الشر ما ييج عزيزيتي..


يارب يارب والأهم إنها دير بالها على عمرها والتحرص أكثر...



عسى ربي يرحم حال الجميع ...بس هذا شي يفج الراس !!!!!!!!!!!!!!





dam3t_almghor :



الشر ما ييج ...

ويشافي كل مريض يا رب ..



:( شي يضيّق الصدر والله ...







شاي الضحى :




اللهم صلي على محمد وآل محمد..


بس ما يصير ما يصير ...لازم يشوفون لهم حل ؟؟؟؟؟؟


والله يسمع منج ../شكورة ..

fatto يقول...

وافشلتااه يا ديرتي الكويت


ماتشوف شر اختج انشاءالله .. وانشاءالله تطلع بالسلامه .

Yin مدام يقول...

أولا مبارك عليكم الشهر

ثانيا
الله يقوم أختج بالسلامة وأجر وعافية إن شاءالله
وأي واحد يدش مستشفياتنا لابد وأن يكون أجره مضاعف إن شاءالله

تفضلتي وقلتيها نعمر برة ومستشفياتنا الله بالخير

هذا نظام التشيلرز "تكييف من سنين ألف وحطبة!!"

قولي هذا مستشفى مبارك أكل الدهر عليه وشرب
روحي شوفي مستشفى الصدري الجديد اللي افتتحوه العام
يا لهوي
من كثر ما باقوا ما قدروا يحطون فيه شي سنع
خليها على الله
المهم الله يهون على أختج وكل مريض اللي فوق مرضهم معاناتهم بمستشفياتنا ويقومهم بالسلامة

حَافِـيَةُ الَقَدمَيّـنْ ولِبَاسِي المَطـرْ يقول...

الله يقومها بالسلامه إنشالله
صج مستشفياتنا الله بالخير
علبونه حكومه طايح حظها
إنزين سنعوها :/

غير معرف يقول...

المفروض فلوس الديرة بدال لا يقطونها على اللي يسوا و ما يسوا برا الكويت .. يقطونها هني و يرفعون معاش الدكتور و يشجعون الطلبة الكويتيين و بالذات طلبة الطب مو يجيبون دكاترة من اللي خبري خبركم ما يدرون وين الله قاطهم و شهايدهم بيع و شرا .
و ثانيا يبنون مستشفيات سنعه عالاقل كل محافظه فيها 2 !!

غير معرف يقول...

اي و نسيت أقول الحمدلله على سلامتها و ما تشوف شر ان شاءالله :)

Sn3a يقول...

معقوله
ونص!
ماتشوف شر اختج

بانوراما يقول...

هذي اكويت صل على النبي ..

شنقول شنسوي ..

لا حياة لمن تنادي ..

الوضع مزري حده ..

اوقع بعد جم يوم يفرشون لهم بالأرض وينمون المرضى ..

والحمدلله على سلامة اختج

وما تشوف شر يا رب

خطاكم السوء

غير معرف يقول...

قوة حبوبة

انا من زمان رافعة شعار ان مستشفيات الكويت (الداخل منها مفقود والخارج منها مولود ).....

ولا مستشفى مبارك مسمينه ( مستشفى المقاصيص ) لأن يقصونج قطعة قطعة piece by piece .....لوووول

Fahad Al Askr يقول...

خطاكم السو، وما تشوفون شر، الله يقومها بالسلامة

الله يكافيكم الشر، لا من الولد ولا من الأخت، الله يرفع عنهم وأجر وعافية

Om MoD يقول...

fatto :


إي والله فشلة ...


والشر ما ييج ...والحمد الله طلعت بالسلامة :)






مدام yin :



علينا وعليج عزيزتي..




مشكورة ...والحمد الله تشافت وتعافت وفتكت من الأرف اللي كانت قاعده فيه ...سوري عالتعبير...


وااااااااااي مأساة ...وضع مستشفياتنا يلوع الجبد ومزري من قلب ...



لا حول ولا قوة إلا بالله العلي العظيم ..










حافية القدمين ولباسي المطر :



مشكورة عزيزتي الحمد الله الله من عليها بالصحة والعافية...


لا مو شرط لأنه حكومة ...بس في مستشفيات تحتاج ترميم ..يهدونها مره وحده ...تجديد أي شي بس يحالوووووووون يصلحون الوضع ..


انا قبل فترة كنت مسدوحة بمستشفى الصباح صج الأرضيات والصبغ اييب اليهد بس معاملة السسترات أكثر من روعه ...

عسى الله يهديهم ...









hanan :


عساهم يقروون اللي كاتبته ....جان زين يحسون فينا ...



ومشكورة ...

Om MoD يقول...

san3a :


!!!!!!!!!!!


الشر ما ييج حبيبتي ....






بانوراما :


خطاك اللاش ...مشكور ما قصرت ..


شدعوه ما صارت وحطوا المرضى بالممرات...بس مو على الارض بسراير


شي يفشل وخّجل....






غير معرف :

يقويج ..


امبيه .....شالحاله اللي إحنا فيها ...

المشكلة الوضع من سيئ إلى أسوأ ..ماكو تطور بالمرة...










fahad al askr :



خطاك اللاش ...والشر ما ييك ...والحمد الله ربي رفع عنها الشر ...




ومشكور ما قصرت .......الحمد الله على كل حال ...


المؤمن مبتلى ...ما لنا غير الصبر ..

Fishah يقول...

ماتشوف شر ان شاءالله

والمستشفيات لا تذكريني فيهم

امي مره نامت بالمستشفى .. الغرفه الخاصه ليتاتها خربانه .. كل ساعه اييبون الفني وماعرف يصلحهم .. بس ازعجنا علفاضي .. فا كنا حاطين اباجورات ايكيا الكبيره 2 بالغرفه

متخيله الاضاءه شلون صايره؟!

الحمدالله والشكر

:(

Om MoD يقول...

لشر ما ييج فشفوشة ...


أنا ماني عارفه ليش الإضاءة تكون خافته وتلوع الجبد ...يعني تهقين ما يبون الزوار يطولون ...لأنه حتى إختي كانت الليتات عندها ضيم ..


بالغصب نشوف بعض .......ويع شالحاله..

شالسالفة يعني اللي اييب اباجورات واللي اييب مكيفات ؟؟؟؟؟؟ من صج هذي الكويت ...؟؟؟؟؟

kazmawy يقول...

الله يقومها بالسلامة
وشنسوى بحالنا الشكوى لله
حسبى على الى كان السبب
لا حول ولاقوةالا بالله

The.One يقول...

استغفرالله هذي حاله !!

الله يشافيها يارب وتطلع سالمه غانمه

The.One يقول...

توني استوعـب

حبيبتي ام مود من حرق موودو لـي طيحـة أختج .. ماتشوفون شر ان شاءالله
ربي يبعد عنكم الشر آمين

غير معرف يقول...

الحمد لله على كل حال ,,
شافاها الله و عافاها هي و جميع مرضى المسلمين ,,
و لا احوجها و لا احوجنا جميعا للمستشفيات ,,

أقولها لك من باب المواساة عندن و عندكم خير
:(

حسبنا الله و نعم الوكيل ^^

Om MoD يقول...

kazmawy :


الله يسلمك ..

شفت شلون ...الله على كل من يبي خراب حق هالديرة ...







the.one :


مشكورة حبيبتي ..الحمد الله اختي طلعت بالسلامة...





وبعدين ترى المصاب يسور مو مودو...الله يحفظهم ..



ويسلمو على الدعاء ..






أسيرة الدوحة:


عزيزتي مشكورة وايد ....ربي يسمع منج..



اللي يفتت المرارة إنه خيرنا مو لنا ...بس



عسى ربي يرحم حالنا وحالكم ...عبالي بس إحنا

كبرياء وردة يقول...

سلامة اختج

الف لا باس عليها

Om MoD يقول...

كبرياء وردة :

والله يسلمج...
مشكورة حبيبتي ..